Luc 20
20
Jesús len'ohyaj
(Mat 21.23-27; Mar 11.27-33)
1Fwala elh p'ante, Jesús ihi Dios Lew'et tä ichufwenhen wichi wet iwo silätayej lhamel Dios Silätyaj tä Is. Wet nämhen sacerdotes tä len'ohyajay ihiche, lhäy'e hin'ol tä lhayen lewosayej Ley p'ante tälhe Moisés, lhäy'e hin'ol tä thänhäy, 2wet tay'ätshane tä yok:
–Lhek fwen n'ohohen, ¿chi tälhe han'ohyaj tä lewoye m'ayhay tä lhenlhitso? ¿Atsi tä hiw'en amho?
3Jesús nichulho wet yok:
–Häte iche m'ak tä olham oty'ätshanej amehen. Chulh n'oho: 4¿Chi tälhe Juan Bautista len'ohyaj tä ibautisaynhente wichi? ¿Hä tälhe Dios wok hin'ol?
5Tä lhamel iläte, yämwethä lhamhomche wet yok:
–¿Atsi m'ak tä y'awoye? Chik y'ok, “Tälhe Dios”, wet lham yohlak, “Tä mälhyejtso, ¿chipte tä kat'ekhayaye?” 6Mat chik y'ok, “Tälhe hin'ol”, wichi ilänla n'amejen tuntey, tsi nilhokej lhamel letichunhayaj yäme tä kalelhäj tä Juan häpe profeta.
7Tä mälhyejtso, lhamel nichulho Jesús wet yok:
–Olhamel ohanhiyejt'a ihi elh tä tälhe.
8Wet Jesús yok:
–Tä mälhyejtso, olham häte tek ofwen amhohen elh tä on'ohyaj tälhe tä owoye m'ayhay tä oyenlhitso.
Jesús lhämet tä itech'aynej chumhas tä ni'isahen
(Mat 21.33-46; Mar 12.1-12)
9Tä tajyäme täjtso, Jesús tahuyej wichi wet iwoye lhämet tä itech'aynej täja, wet yok:
–Iche p'ante hin'o tä itihchä uva,#Isa 5.1-2 tä wak'alh hiw'enho ayej häp chumhas, ne'tek ichumyenlhi. Wet lham yik, pitaj lewhäy tä ihi honhat elh. 10Tä nichäte lewhäy, ichen lakawo, ne'tek t'alhe chumhas häp m'ak tä lhamel hiw'enhatej tä tälhe lechumet. Mat tä nichäte, lhamel ipäjlhi wet ichen tä niwohit m'ak chik hiw'enho. 11Tä mälhyejtso, lewuk ichen elh lakawo, mat chumhastso häte iläkwlhi wet ipäjlhi, wet ichen tä niwohit m'ak chik hiw'enho. 12Tä paj wet lewuk ichen elh, mat lhamel iwo m'akayej wet ithat alhoye.
13“Tä lepese lewuk yok, ¿Atsi m'ak tä owoye? Wet letichunhayaj yok, Ochenhiyela olhäs tä ohumnek, elat lhamel tek yenla w'et m'ayeka.
14“Wet häp tä ichen, mat tä chumhastso hiw'enlä, wet yok, Häp täjtsi hin'o tä lewukla honhatna. ¡Mäh n'alän, wet n'amenlak n'alewuhuy!
15“Wet lhamel itsoklhi wet ithat w'echehi n'olafwek wet ilän.”
Wet nech'e Jesús äp yok:
–Tä mälhyejtso, ¿chiwoye lewuk? ¿Atsi m'ak tä lefwetajay iwohiyejela häp chumhastso? 16Oyok, nämhiyela wet itäyhthihena, wet yachajiyela wichi iyhäj häp lechumettso.
Tä lhamel iläte lhämettso, wet yok:
–¡Isit'ak mälhyejtso!
17Mat Jesús iyahin lhamel wet yok:
–Tä mälhyejtso, ¿atsi m'ak tä yäme häp Dios lhämet tä ihi Lehi tä yok:
“Häp tunte tä hin'ol
tä yenlhi hup itiyej kanhi,
nech'e häpe t'at tunte tä lhamya”?#Sal 118.22
18Elh chik häpe chik nichätpe tuntena, wasihila. Wok chik lham tunte nichätpe elh chik häpe, iwohla lamoka.
“Achaje niyat m'ak tä lewuk, mat achaje Dios m'ak tä Lewuk lham Dios”
(Mat 22.15-22; Mar 12.13-17)
19Häp sacerdotes tä len'ohyajay ihiche, lhäy'e hin'ol tä lhayen lewosayej Ley p'ante tälhe Moisés, tä lhamel iläte Jesús lhämtestso, lhamel t'uhläk itsoklhi, tsi nitäfwelej tä lhamel t'at tä õ'tech'aynej chumhas tä ni'isahentso. Mat nowaye wichi. 20Tä mälhyejtso, tatey imälhthi Jesús, wet ichene hin'ol tä fwetaj häpehen iyhäj tä isenpa, yämthilek iläte lhämet chik häpe chik yen tesayej, wet õyachaje gobernador. 21Häp hin'oltso, tä nichäte Jesús wet tahuyej wet yok:
–Maestro, olhamel ohanej m'ak tä lhen ämeta lhäy'e tä lhen achufwenyaja häpe t'at m'ak tä is alhoho. Wet ahäpe elh tä tek itetshanej wichi m'ak tä häpehen, wet lechufwenej t'at wichi m'ak tä Dios ne'tek lhamel iwoye. 22Tä mälhyejtso, olhamel oty'ätshan ame tä oyok, ¿hä is t'at tä otis häp niyat Romano tä t'alhpe impuestos, wok kha?
23Mat Jesús nitäfwelej tä lhamel fwetaj ikanej, wet nichulho lhamel wet yok:
24–Lhek päyen n'oye chinaj t'äj.
Wet lhamel hiw'enho. Tä Jesús iyahin, wet yok:
–¿Atsi tä lepeyak lhäy'e lhey tä i'pe?
Lhamel yok:
–Häpe t'at niyat Romano.
25Wet Jesús yok:
–Tä mälhyejtso, achaje niyat Romano häp m'ak tä lewuk, mat achaje Dios häp m'ak tä Lewuk lham Dios.
26Tä lhamel iläte lhämetna, wuj tä iseltejen wet yok tam. Tsi niwohit lhämet chik ni'isa chik iwoye tä ihi tä wichi itayche, yämthilek õ'menyenej wet õ'tsoklhi.
Jesús yäme tä n'op'itseyhay inukwephä t'at
(Mat 22.23-33; Mar 12.18-27)
27Iche p'ante Judío lhayis iyhäj tä lhey Saduceo lhayis, fwetaj n'op'itseyhay ninuyakwephä.#Ap.Lh 23.8 Wet elhpej lhamel ihoye Jesús wet yok:
28–Maestro, häp Moisés hin'äy p'ante n'amejen lelesaynek tä yok, “Chik hin'o iwo lech'efwaya, wet äp y'il tä naj lelesa, t'uhawetej chik lech'inij icheyäjo lew'et wet yen ch'efwaya häp tesa, yämthilek iche leles tä tälhe elh tä pajche y'il.”#Deut 25.5-6 29Tä mälhyejtso, iche p'ante siete hin'ol tä lhalepuhfwas, wet elh tä ichun iwo lech'efwaya, mat tä ileyej honhat wet leles ihihit'a. 30Wet lech'inij tä ichunche äp iyej laka tesa, mat häte tä ileyej honhat wet leles ihihit'a. 31Wet äp lech'inij elh äp iyej, mat äp hätet iwoye lechilalis. Wet mälhyej p'antetso pajtha nofwej häp lhamel tä ihi siete, mat niwohit elh chik leles ihi. 32Tä lepese atsinha häte ileyej honhat. 33Tä mälhyej'attso, tä wichi yäme tä inuhikwephäla häp n'op'itseyhay yämthilek äp yachajo chik iläyhen, ¿atsihila elh lhamel tä atsinhana lech'efwa? Tsi pajche nilhokej lhamel tä siete iyej.
34Jesús nichulho lhamel wet yok:
–Wichi tä ihonhatena, häp tä lakey tä tawhayeyhen. 35Mat häp hin'ol lhäy'e atsinhay tä t'uhawethiyeja chik inukwephä chik tälho n'op'itseyhay wet nichätho honhat elh, nemla tawhayeyhen. 36T'ilek nemla ihanej iwoyneje tsi lhamel hätehlat iwoye ángeles, wet häpkhihena Dios leles tä lhamel inukwephä tä tälho n'op'itseyhay.
37“Wet tä õyäme tä n'op'itseyhay inukwephä, y'ajet Moisés tä yäm kalelhäj täjtso. Tsi lelesaynek tä yäme amlhäj lhawayuk tä itäj ihi p'ante, yäme tä Dios häpe Abraham laka Dios, wet Isaac laka Dios, wet Jacob laka Dios.#Éx 3.6 38Wet häp tä mälhyejtso, Dios häpe t'at wichi tä iläyhen laka Dios, tej tä pajche lhamel ileyej honhat. Tsi nilhokej häp lhamel tä Lewuk iläyhen t'at.”
39Tä hin'ol tä lhayen lewosayej Ley p'ante tälhe Moisés iläte lhämtestso, wet elhpej yok:
–Is alhoho ämet, Maestro.
40Wet nemhit ikatsik äp tektshaneje yämthilek tay'ätshaneje m'ak at chik häpe.
N'ofwayhthi tä Dios Chenek
(Mat 22.41-46; Mar 12.35-37)
41Wet Jesús tay'ätshane lhamel wet yok:
–¿Chipte tä wichi yäme tä N'ofwayhthi tä Dios Chenek tälhe David p'ante? 42Tsi David lham t'at tä yäme tä ihi Salmos tä yok,
“Lhawuk ifwenho Owuk wet yok,
Tayhiphä olhip tä ofwomkat
43wet otihlachufwi apach'ol häp atayhfwas.”#Sal 110.1
44Tä mälhyejtso, ¿chip iwoyek N'ofwayhthitso tälhe David, tä lham David yen at Lewuka?
Jesús yen tesayej hin'ol tä lhayen lewosayej Ley p'ante tälhe Moisés
(Mat 23.1-36; Mar 12.38-40; Luc 11.46-54)
45Tä nilhokej wichi kamaj iläte Jesús, lham tahuyej lechufwenkay wet yok:
46–Amaj amejenlä häp hin'ol tä lhayen lewosayej Ley p'ante tälhe Moisés. Tsi ihumin tä lew'uyis pites tä ilunhen, wet t'upejläk wichi n'okwiyej tä hiw'enlä wet itiyej lewujyaj. Tä ihi n'ohusew'etes, ihumin lew'etes tä t'uhläk nilhokej wichi hiw'en, wet tä ihoye n'okäjyajay, häte iwatlä lew'etes tä isis. 47Lhamel isoyejwethä tesalis lewukwey, wet tä lhaiskatejwethä tä häpehen akantses, yäm pites t'alhyajay tä iwoye. Oyok, ¡lhäy'ehila lhip chik Dios itiyejen letes lhamel!
Attualmente Selezionati:
Luc 20: WCHB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Biblia Wichí, Dios Lhämtes tä Matchehen © Sociedad Bíblica Argentina, 2002.