VAKATEKIVU 6
6
Na i Valavala Ca ni Tamata
1Ena gauna o ya era a lewe levu sara na kawa ni tamata ena dela i vuravura, ka sa sucu e lewe levu na luvedra yalewa,#Jope 1.6; 2.1 2ka so vei ira na kawa ni lomalagi#6.2; 6.4 kawa ni lomalagi; se luvedra tagane na veikalou; se luvena tagane na Kalou. era sa raica na kedra matavinaka na goneyalewa, era sa mani tauri ira kina era sa digitaka ka vakawatitaki ira. 3A sa qai kaya ko Jiova, “Na yaloqu ena sega ni tiko vakadua vua na tamata, baleta ni sa vakaiyalayala ga na nona bula, ni sa vakayago ga. Me vakatekivu oqo, na nona bula ena sega ni sivia na 120 na yabaki.” 4Ena gauna o ya, kei na gauna talega e muri, era a bula voli kina e vuravura eso na tamata tuwawa ka luvedra na yalewa era kawa ni tamata kei ira na tagane era kawa ni lomalagi.#6.4; 6.2 kawa ni lomalagi; se luvedra tagane na veikalou; se luvena tagane na Kalou. Era a tamata qaqa sara ka rogo ena gauna e liu.#Tiko 13.33
5Ni sa raica ko Jiova na vakasisila ni nodra i valavala na tamata ena dela i vuravura kei na ca ni nodra vakanananu ena gauna kece sara,#Maciu 24.37; Luke 17.26; 1Pita 3.20 6a sa rarawataka na Kalou na nona bulia na tamata ka vakatikora e vuravura. A sa mosi sara kina vakalevu na lomana 7ka sa qai kaya, “Au na vakarusa na tamata kece sara au a bulia mai na dela i vuravura. Au na vakarusa na tamata, na manumanu yava i va, na manumanu qasi voli kei na manumanu vuka kece sara. Au sa rarawataka dina na noqu a buli ira.” 8Ia sa yalovinaka ga ko Jiova ena vuku i Noa.
Sa Vakalomavinakataka na Kalou o Noa
9Oqo na i tukutuku ni kawa i Noa. A tolu na luvena tagane; na yacadratou o Semi, Ame kei Jefeca. 10E turaga vinaka sara o Noa, ka tamata yalododonu vei ira kecega era bula ena gauna o ya; erau sa dau veitokani vakaveivolekati kei na Kalou,#2Pita 2.5 11ia era sa tamata i vakarau ca ka vakasisila na vo ni tamata ena mata ni Kalou, ka sa sinai o vuravura ena i valavala kaukauwa. 12A sa raici vuravura na Kalou ka liaca na kena i tuvaki vakaloloma, ka ni sa ca vakalevu na nodra i tovo na tamata kecega.
13Sa qai kaya vei Noa na Kalou, “Au sa nakita me'u vakarusai ira kecega na tamata. Au na vakarusai ira vakadua ka ni sa sinai o vuravura ena nodra i valavala ca. 14Mo la'ki taya e dua na nomu waqa ena kau vinaka: me vakarumu ka boroya e loma, e tuba talega ena kuluta. 15Me vakaoqo na kena i tata. Na kena balavu me 133 na mita, na kena raba me 22 na mita, ka me 13 na mita na kena cecere. 16Mo cakava na delavuvu#6.16 delavuvu; se katubaleka. ni waqa, ka me dua na maliwa mai na dela ni waqa ki na yasa ni waqa me rauta e 44 na senitimita. Me taba tolu, ka mo cakava e dua na katuba ena yasa ni waqa. 17Au na qai vakavuna e dua na waluvu ena dela i vuravura me na vakarusa na veika bula kecega. 18Ia au na cakava e dua na veiyalayalati kei iko. Mo vodo ki na nomu waqa vata kei na watimu, kei iratou na luvemu tagane, kei na dui watidratou. 19Mo vakavodoka talega e yarua na manumanu mai na kena veimataqali kecega, me dua na ka tagane ka dua na ka yalewa, me ra bula kina. 20Me yarua mai na veimataqali manumanu kecega, lelevu se lalai; me ra vodo ki waqa me ra na bula kina. 21Mo vakarautaka talega na veimataqali kakana kecega e dau laukana, me kemu kei na kedra na manumanu.” 22A vakayacora o Noa na ka kece sara a vakarota vua na Kalou.#Ipe 11.7
Attualmente Selezionati:
VAKATEKIVU 6: FNV
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Fijian New Version Bible, Revised Edition © Bible Society of the South Pacific, 2017, 2021.