SAN MATEO 11
11
Nda Juan ji'i̱ ñati̱ cha' tsaa slo Jesús
1Nu lo'o ndye ngulu'u Jesús cha' bi' ji'i̱ nu tii tyucuaa tya'a ñati̱ nu ndyaca tsa'a̱ ji'i̱ yu, ndu'u yu ndyaa yu cha' chcui' yu lo'o ngu' tyu̱u̱ tya'a quichi̱ nu ndi'i̱ cacua ti; ngulu'u yu ji'i̱ ngu' quichi̱ bi'.
2Tya nga'a̱ Juan ne' chcua̱, pana cua ndyuna nu Juan bi' ji'i̱ lcaa ña'a̱ cña nu ndyu'ni Jesús nu laca Cristo; bi' cha' ngulo Juan cña ji'i̱ ngu' nu ndyaca tsa'a̱ ji'i̱, cha' tsaa ngu' bi' slo Jesús, 3cha' xcuane ngu' bi' ji'i̱ Jesús cuentya ji'i̱ Juan ndi'ya̱:
―¿Ha chañi cha' nu'u̱ laca ycui' nu cua ca̱a̱ ti? ―nacui̱ ngu' bi' ji'i̱ Jesús li'―. ¿Ha tya ca̱a̱ la chaca nu caca ycui' Cristo?
4Li' nguxacui̱ Jesús cha' ji'i̱ ngu' bi':
―Yaa ma̱ cacha' ma̱ ji'i̱ Juan lcaa lo cha' nu nduna ma̱ slo na', lcaa cha' nu ña'a̱ ma̱ slo na' ―nacui̱ Jesús ji'i̱ ngu'―. 5Cacha' ma̱ cha' nu cua na'a̱ ma̱ ca nde ji'i̱ yu; cacha' ma̱ ji'i̱ cha' ndu'ni na' cha' ndyaca tso'o cloo ngu' nu ngua cuityi̱', cha' ndya'a̱ ngu' nu ngua quicha quiya', cha' ngua lubii cuaña' ngu' nu ndyatsu' cuaña', cha' nduna ngu' nu ngua cu'u̱ jyaca̱, cha' ndyu'ú ngu' chaca quiya' nu cua ngujuii, cha' nchca cuayá' ti' ngu' ti'i ñi'ya̱ nu cua'ni lyaá ycui' Ni ji'i̱ ñati̱ chalyuu ji'i̱ nu cuxi. 6Tso'o tsa caca tyiquee ñati̱ nu ña'a̱ ti tya nxñi cha' 'na, masi ná nchca cuayá' tso'o ti' lcaa cha'.
7Lo'o cua ndyaa ngu' bi', li' nguxana Jesús nchcui' yu cha' ji'i̱ Juan bi' lo'o nu quiña'a̱ tsa ñati̱ nu ndi'i̱ cajua:
―Nu lo'o ndyaa ma̱ ne' quixi̱' su nguti'i̱ Juan ca su ná ndi'i̱ ñati̱, ¿na ca ngulacua ti' ma̱ cha' ña'a̱ ma̱ ca ndacua? ―nacui̱ Jesús ji'i̱ ngu'―. ¿Ha na'a̱ ma̱ sca yaca quii nu nchcuta̱ cui'i̱ ji'i̱? Si'i jua'a̱. 8¿Ni cha' laca ndyaa ma̱ cajua lacua? ¿Ha na'a̱ ma̱ ji'i̱ sca nu qui'yu nu tso'o tsa ña'a̱ ste' yu? Si'i jua'a̱, cha' nu ngu' nu lacu' ste' tso'o tsa ña'a̱ ni, ndi'i̱ ngu' bi' slo ngu' culiya' nu laca loo. 9Ná tyiquee' ngua tii ma̱ cha' laca Juan sca ñati̱ nu laca tu'ba ji'i̱ ycui' Ndyosi. Chañi cha' laca yu jua'a̱, pana tlyu la cña ngujui ji'i̱ Juan. 10Ndi'ya̱ nguscua jyo'o cusu' cua sa'ni la cha' ji'i̱ cña nu ntsu'u ji'i̱ Juan:
Culo na' cña ji'i̱ sca msu 'na cha' tsaa yu nde loo nu'u̱,
cha' saala yu tyucui̱i̱ su ca̱a̱ nu'u̱.
Jua'a̱ nchcui' ycui' Ni ji'i̱ Cristo. 11Cha' liñi nchcui' na' lo'o ma̱ ji'i̱ Juan nu ntyucuatya ji'i̱ ngu', cha' bilya cala sca ñati̱ chalyuu nu jua'a̱ ntsu'u cña tlyu la ji'i̱, ñi'ya̱ nu ngua ji'i̱ Juan bi'. Pana cua lijya̱ na' cha' caca na' loo ne' cresiya ji'i̱ ñati̱; juani cua ña'a̱ ca ñati̱ nu ngusñi cha' 'na, tlyu la cha' ntsu'u ji'i̱ ngu' bi' que Juan, masi ti'i ti ngu', masi cuañi' ngu'.
12’Tya lo'o lijya̱ Juan bi' tya clyo hasta juani quiña'a̱ tsa cha' nchcui' ngu', cha' nti' tsa ngu' cha' caca ycui' Ndyosi loo ji'i̱ ñati̱. Lo'o jua'a̱ ntsu'u tsa ngu' nu lye tsa ndu'ni juersa cha' tyalaa ngu' slo ycui' Ndyosi jua'a̱ ti. 13Pana cua nchcui' lcaa jyo'o cusu' nu ngua tu'ba ji'i̱ ycui' Ndyosi sa'ni la ñi'ya̱ caca lo'o xana caca ycui' Ni loo ne' cresiya ji'i̱ ñati̱; la cui' jua'a̱ nchcui' cha' nu nguscua jyo'o Moisés lo quityi, ñi'ya̱ laca cña nu ngulo ycui' Ni ji'i̱ ñati̱. Lo'o ca tiya' la, li' ndyalaa Juan. 14La cui' bi' laca ñi'ya̱ ngua Elías, nu ngua tu'ba ji'i̱ ycui' Ndyosi cua sa'ni; la cui' cua sa'ni nscua cha' ca̱a̱ nu bi' chaca quiya' juani, si tyaja'a̱ ma̱ xñi ma̱ cha' bi'. 15Cua'a̱ jyaca̱ tso'o ma̱ ji'i̱ cha' nu nda na' re lo'o ma̱.
16’Ná tso'o tsiya' ti ñi'ya̱ nu ndu'ni ñati̱ chalyuu tyempo juani. Ndu'ni ngu' ñi'ya̱ si laca ngu' nu sube nu ndya'a̱ ndijya ti cla'be quichi̱, nu taja ti' ji'i̱ tya'a ndijya ngu' cha' ná nti' ngu' quijya ngu' lo'o tya'a ngu'. Bi' cha' nxi'ya ngu' ji'i̱ tya'a ngu': 17“¿Ni cha' ná ntyaja'a̱ ma̱ cula quiya' ma̱? Na nclya'a ya xi ji̱i̱ cha' ji'i̱ ma̱”, nacui̱ nu sube bi'. “¿Ni cha' ná ntyaja'a̱ ma̱ ca xñi'i̱ ti' ma̱ lo'o cua? Na nclya'a ya marcha, na nxi'ya ya nga'a̱ ya.” La cui' jua'a̱ ndyu'ni cu'ma̱ ñati̱ chalyuu juani; xcui' na taja ti' ma̱, ná tso'o ntsu'u tyiquee ma̱ tsiya' ti ña'a̱ ma̱ ji'i̱ tya'a ñati̱ ma̱. 18Nu lo'o ñaa Juan bi' ni, ntsu'u quiña'a̱ tsa na nu ná ndacu yu, nu ná ndyi'yu yu. Lo'o li' nchcui' ma̱ ji'i̱ yu: “Ntsu'u cui'i̱ xña'a̱ ji'i̱ yu, bi' cha' ndu'ni yu jua'a̱”, nacui̱ ma̱. 19Lo'o li' lijya̱ na' nu cua nda Ni 'na lijya̱a̱ cha' caca na' ñati̱, ndacu na' lcaa lo na lo'o ma̱, ndyi'yu na' lcaa lo na lo'o ma̱, lo'o li' nchcui' ma̱ 'na: “¡Ña'a̱ ma̱ ña'a̱! Ndacu tsa yu jua, cu'bi tsa yu”, nacui̱ ma̱ ji'i̱ tya'a ma̱. “Ná tso'o yu jua cha' tya'a tso'o yu laca ngu' nu nxñi cñi cña loo na, lo'o jua'a̱ xi xa' la ngu' cuxi laca tya'a tso'o yu”, nacui̱ ma̱ 'na. Nacui̱ ma̱ jua'a̱ cha' ná tso'o cha' nu nchcui' na', nti' ma̱; pana caca cuayá' ti' ma̱ nde loo la cha' liñi tsa cha' nu nchcui' ngu' nu nacui̱ cha' cuentya ji'i̱ ycui' Ndyosi laca na'.
Quichi̱ su ná ndaquiya' ngu' ji'i̱ ycui' Ni
20Lo'o li' lye xi nchcui' Jesús cha' ji'i̱ quichi̱ su lu'ba ti ndya'a̱ yu, cha' quiña'a̱ cha' tlyu cua ngua'ni yu slo ngu' ca tyi bi', pana ná ngua tyuju'u ti' ngu' ji'i̱ cha' cuxi nu ntsu'u ne' cresiya ji'i̱ ngu'; ná nguxtyanu ngu' ji'i̱ cha' cuxi bi'.
21―¡Tya'na tsa cu'ma̱ ngu' quichi̱ Corazín! ―nacui̱ Jesús―. ¡Tya'na tsa cu'ma̱ ngu' quichi̱ Betsaida! ―nacui̱―. Cua quiña'a̱ tsa cha' tlyu nu cua na'a̱ cu'ma̱, pana ná nguju'u ti' ma̱ tsiya' ti ji'i̱ cha' cuxi nu ndyu'ni ma̱, ná nguxtyanu ma̱ cha' bi'. La cui' jua'a̱ tya sa'ni la xña'a̱ tsa ngu' quichi̱ Tiro lo'o ngu' quichi̱ Sidón, ngu' xa' tsu' ngua ngu' bi'. Pana ná ngujui ñi'ya̱ caca tyuju'u ti' ngu' bi' ji'i̱ cha' cuxi nu ngua'ni ngu', ná ngulochu̱' ngu' ji'i̱ cha' cuxi bi', cha' bilya ña'a̱ ngu' bi' cha' tlyu ñi'ya̱ nu ña'a̱ cu'ma̱ ngu' Israel; bi' cha' ná ngua xñi'i̱ ti' ngu' bi'. Ná ndyacu' ngu' late' ngata, ni ná ngusu'ba ngu' jii hique ngu' ñi'ya̱ nu ndu'ni ngu' su nscua jyo'o. 22Liñi cacha' na' ji'i̱ ma̱, cha' caca tso'o la ji'i̱ jyo'o ngu' Tiro lo'o ji'i̱ jyo'o ngu' Sidón, nu lo'o tyalaa tsa̱ tlyu lo'o cua'ni cuayá' ycui' Ndyosi ji'i̱ ñati̱ chalyuu; lye la xcube' Ni ji'i̱ cu'ma̱ li'. 23Lo'o cu'ma̱ ngu' Capernaum ni, ¿ha tso'o tsa quichi̱ tyi ma̱ nti' ma̱? ¿Ha laca quichi̱ tyi ma̱ loo ji'i̱ xa' quichi̱ nti' ma̱? Pana nde loo la quiñu'u̱ tsiya' ti quichi̱ tyi ma̱, tyaa ycui' ma̱ ca bilyaa li'. Quiña'a̱ tsa cha' tlyu ngua'ni na' slo cu'ma̱, lo'o ná jlya ti' ma̱ 'na tsiya' ti. La cui' jua'a̱ nu ngua sa'ni, xña'a̱ tsa ngua ngu' quichi̱ Sodoma; pana ná na'a̱ jyo'o ngu' bi' cha' tlyu ñi'ya̱ nu cua na'a̱ cu'ma̱ ngu' Capernaum. Si cua na'a̱ ngu' cha' bi', cua ngua tyuju'u ti' ngu' ji'i̱ cha' cuxi nu ngua'ni ngu' li', cua ngulochu̱' ngu' ji'i̱ cha' cuxi bi'; tya nscua quichi̱ tyi ngu' bi' juani lacua. 24Liñi cacha' na' ji'i̱ ma̱, cha' caca tso'o la ji'i̱ jyo'o ngu' Sodoma bi' tsa̱ tlyu lo'o cua'ni cuayá' Ni ji'i̱ ñati̱ chalyuu; lye la xcube' Ni ji'i̱ cu'ma̱ li'.
Ti̱ ti tyi'i̱ tyiquee ngu' xqui'ya Jesús
25Lo'o li' nchcui' Jesús lo'o ycui' Ndyosi Sti yu:
―Cua'ni tlyu na' jinu'u̱, Sti na'; la cui' nu'u̱ laca Xu'na ya, masi nde cua̱, masi nde chalyuu ―nacui̱ Jesús ji'i̱ ycui' Ndyosi―. Tsa xlya'be hi̱ cha' cua ngua'ni nu'u̱ cha' ngua cuayá' ti' ñati̱ nu ná jlo tso'o ti' nquicha'; pana xa' ñati̱ ñi'ya̱ nti' ngu' tii, ná nchca cuayá' ti' ngu' bi' cha' jinu'u̱. Masi ngu' nu nchca tsa ji'i̱, masi ngu' nu jlo tsa ti' lcaa cha' jinu'u̱ nti' ngu', pana ná nchca cuayá' ti' ngu' bi'. 26Chañi cha' jua'a̱ nti' ycui' nu'u̱, cha' caca cuayá' ti' ngu' nu ná jlo ti' tsiya' ti.
27Lo'o li' tya ngulu'u la Jesús xi ji'i̱ ngu':
―Lcaa chacuaya' ji'i̱ Sti na' ndyanu ya' na'. Ni sca ñati̱ ná jlo ti' ñi'ya̱ laca cha' nu ntsu'u ne' cresiya 'na nu laca̱ Sñi' ycui' Ni; sca ti ycui' Ndyosi Sti na' jlo ti' ñi'ya̱ laca cha' nu ntsu'u ne' cresiya 'na. Lo'o jua'a̱, ni sca ñati̱ ná jlo ti' ñi'ya̱ laca cha' nu ntsu'u ne' cresiya ji'i̱ Sti na'; sca ti na' nu laca̱ Sñi' ycui' Ni jlo ti' na', lo'o jua'a̱ culu'u na' cha' bi' ji'i̱ ñati̱ nu subi na' ji'i̱ cha' ca tsa'a̱ ngu' 'na. 28Lcaa cu'ma̱ nu nga'aa talo ma̱ cha' ti'i̱ tsa cña nu ntsu'u ji'i̱ ma̱ nde chalyuu, nti' ma̱, ca̱a̱ ma̱ tyu'u cha' ji'i̱ ma̱ lo'o na' juani; ta na' chacuayá' cha' ti̱ ti tyi'i̱ tyiquee ma̱ li'. 29Xñi ma̱ cña nu ta na' ji'i̱ ma̱, lo'o li' ca tsa'a̱ ma̱ lcaa cha' 'na. Tya'na tsa ti' na' ña'a̱ na' ji'i̱ ma̱, lo'o jua'a̱ talo tsa tyiquee na' ji'i̱ ma̱; ti̱ ti tyi'i̱ tyiquee ma̱ lo'o cua ngüityi̱ na' cha' cuxi nu ntsu'u ne' cresiya ji'i̱ ma̱. 30Cha' tso'o laca cha' nu ca tsa'a̱ ma̱ 'na; ná tucui cha' bi', lo'o jua'a̱ lasa ti cña nu ta na' ji'i̱ ma̱.
Attualmente Selezionati:
SAN MATEO 11: cta
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 1981, Wycliffe Bible Translators, Inc. All rights reserved.