SAN MATEO 7
7
Ná ntsu'u cha' sta ngu' qui'ya ji'i̱ tya'a ñati̱
1’Lo'o chaca cha' ni: ná sta ma̱ qui'ya ji'i̱ tya'a ñati̱ ma̱, cha' ná tyiquee' sta ycui' Ndyosi qui'ya ji'i̱ ma̱ si cua'ni ma̱ jua'a̱. 2La cui' ñi'ya̱ nchcui' cuxi ma̱ ji'i̱ xa' la tya'a ñati̱ ma̱, si tyaala tsa ma̱, la cui' jua'a̱ cua'ni cuayá' ycui' Ni ji'i̱ ma̱. Lo'o jua'a̱, la cui' cuayá' milya ñi'ya̱ nu nda ma̱ ji'i̱ tya'a ñati̱ ma̱, la cui' jua'a̱ ta ycui' Ni ji'i̱ ma̱. 3¿Ni cha' yala tsa nchcui' ma̱ ji'i̱ sca cha' cuxi nu ntsu'u ji'i̱ xa' la tya'a ñati̱ ma̱, masi ñi'ya̱ nti' si laca bi' sca satya yuu ti nu ndyatí̱ cloo ngu'? Pana ná ndube ti' ma̱ cha' tlyu tsa cha' cuxi nu ntsu'u ji'i̱ ycui' ma̱, ñi'ya̱ nti' si laca bi' sca nguti tlyu nu ntsu'u cloo ycui' ca ma̱. 4¿Ni cha' laca tlyu tsa tyiquee ma̱ chcui' ma̱ lo'o tya'a ñati̱ ma̱ ndi'ya̱: “Ta nu'u̱ chacuayá' culo na' yuu nu ntsu'u cloo nu'u̱”? Jua'a̱ ñacui̱ ma̱, masi ná ña'a̱ ma̱ nguti nu ntsu'u cloo ycui' ca ma̱. 5¡Na cuiñi ma̱! Clyo la tyu'u nguti tlyu nu ntsu'u cloo ycui' ca ma̱, lo'o li' taca ña'a̱ tso'o ma̱ cha' culo ma̱ satya yuu nu ntsu'u cloo tya'a ma̱.
6’Cha' lubii nu cuentya ji'i̱ ycui' Ndyosi ni, ná tso'o si tsaa chcui' ma̱ cha' bi' lo'o ñati̱ cuxi nu ná nti' cuna cha' bi' tsiya' ti, cha' ñi'ya̱ nti' xne', jua'a̱ nti' ngu' bi'; su'ba ñasi̱' ma̱ ji'i̱ ngu' cuxi bi', cha' cua'ni lya' ti' ngu' ji'i̱ ma̱ li'. Lo'o jua'a̱ ná tso'o sta ma̱ sca na tso'o nu quiña'a̱ tsa nga'a̱ su ndya'a̱ cube', cha' hora ti satá quiya' ni' na tso'o bi'.
Ñi'ya̱ nu tso'o la jña ngu' sca cha' ji'i̱ ycui' Ndyosi
7’Lo'o chaca cha' ni: jña ma̱ sca cha' ji'i̱ ycui' Ndyosi, lo'o jua'a̱ ta ycui' Ni cha' bi' ji'i̱ ma̱ li'; clyana ma̱ ji'i̱ ycui' Ni, lo'o jua'a̱ quije Ni ji'i̱ ma̱ li'; tyucui tyiquee ma̱ chcui' ma̱ lo'o ycui' Ni, cuna Ni cha' nu chcui' ma̱ lo'o Ni li'. 8Cua ña'a̱ ca ñati̱ nu ndijña sca cha' ji'i̱ ycui' Ndyosi, caja cha' bi' ji'i̱ ngu' li'; cua ña'a̱ ca ñati̱ nu nclyana ji'i̱ ycui' Ni, quije Ni ji'i̱ ngu' li'; lo'o jua'a̱ cua ña'a̱ ca ñati̱ nu tyucui tyiquee nchcui' lo'o Ni, cuna Ni cha' nu nchcui' ngu' lo'o Ni li'.
9’Ná ntsu'u ni tsaca cu'ma̱ nu ta sca quee cacu sñi' lo'o jña nu piti xlyá cacu. ¿Ha ntsu'u? 10Ni ná ntsu'u ñati̱ nu ta cuaña ji'i̱ sñi' lo'o jña nu piti cualya cacu. ¿Ha ntsu'u? 11Bi' cha' lacua, si jlo ti' ma̱ ñi'ya̱ ta ma̱ na tso'o ji'i̱ sñi' ma̱, masi cuxi ntsu'u cha' tyiquee ma̱, la cui' jua'a̱ caca cuayá' ti' ma̱ cha' jlo la ti' ycui' Ndyosi Sti na nu ntucua nde cua̱ ñi'ya̱ nu ta Ni na tso'o ji'i̱ ngu' nu ndijña ji'i̱ Ni.
12’Nga'a̱ cha' cua'ni tso'o ma̱ lo'o xa' ñati̱ si nti' ma̱ cha' tso'o ti cua'ni ngu' lo'o ma̱. La cui' cña bi' ngulo ycui' Ndyosi lo quityi nu nguscua jyo'o Moisés, lo'o jua'a̱ cha' nu nguscua xa' jyo'o cusu' nu ngua tu'ba ji'i̱ ycui' Ndyosi sa'ni la; sca ti cuayá' ndyu'u cha' nu nchcui' lcaa ngu' bi' lo quityi.
To' lo'o chubi ti
13’Lo'o chaca cha' ni, nga'a̱ cha' tyeje tacui ma̱ tolo'o chubi. Tlyu tsa tolo'o, lo'o jua'a̱ si̱i̱ tsa tyucui̱i̱ su tsaa ngu' ca bilyaa; tso'o tsa ña'a̱ tyucui̱i̱ bi' nti' ngu', bi' cha' quiña'a̱ tsa ñati̱ ndya'a̱ tyucui̱i̱ bi'. 14Pana chubi tsa tolo'o, lati tsa tyucui̱i̱ su tsaa ngu' nu ngujui chalyuu nu ná nga'a̱ cha' tye ji'i̱ ngu'; xti ti ñati̱ nquije ji'i̱ tyucui̱i̱ bi'.
Lo'o ña'a̱ na si'yu, li' jlo ti' na ni yaca laca nu nda si'yu bi'
15’Lo'o chaca cha' ni: cua'ni tii ti' ma̱ ña'a̱ ma̱ ji'i̱ ngu' cuiñi nu nchcui' cuiñi ti cha' cuentya ji'i̱ ycui' Ndyosi nclu'u ngu' cha' ji'i̱ ma̱. Sca na'ni tso'o laca nu naa xlya'; lo'o nu ngu' cuiñi bi' ni, nti' ngu' cha' culacua ti' ma̱ cha' ñati̱ tso'o laca ngu' ñi'ya̱ laca xlya'. Tso'o tsa nchcui' ngu' bi' lo'o ma̱, tso'o tsa ndu'ni ngu' lo'o ma̱; pana cha' cuiñi laca nu nchcui' cha' tso'o tsa ngu' bi', cha' tyaala tsa ngu', cuiñi tsa ngu' bi'. Si'i ñi'ya̱ laca xlya' laca ngu' bi'; ñi'ya̱ laca sca bo'o nu tyaala tsa, jua'a̱ laca ngu' bi'. 16Taca ji'i̱ ma̱ tyuloo ma̱ ji'i̱ ngu' cuiñi bi' lo'o ña'a̱ ma̱ ni cña ndu'ni ngu', si cha' tso'o, si cha' cuxi ndu'ni ngu'. Si'i ji'i̱ quiche' yane nsuu na si'yu losu' tyixi, cha' ná ta lti bi' si'yu tyixi; jua'a̱ si'i ji'i̱ yaca quiche' nsuu na si'yu tyixi. 17Ji'i̱ lcaa yaca tso'o nsuu na si'yu tso'o; pana yaca nu cua btyi ni, nga'aa nda bi' si'yu nu cacu na. 18Ná ta sca yaca tso'o si'yu nu ná tso'o; jua'a̱ sca yaca nu ná tso'o ni, ná ta bi' si'yu tso'o. 19Lo'o li' si'yu ngu' ji'i̱ yaca btyi bi', cha' nga'aa tso'o bi'; taqui̱ ngu' yaca bi' li'. 20Nchca cuayá' ti' ma̱ ñi'ya̱ ndu'ni sca yaca lo'o ña'a̱ ma̱ si'yu yaca bi', lo'o jua'a̱ caca cuayá' ti' ma̱ si cuiñi ngu' bi' lo'o ña'a̱ ma̱ ñi'ya̱ laca cña nu ndu'ni ngu'.
Si'i lcaa ñati̱ nu tyatí̱ ca su laca ycui' Ni loo
21’Ntsu'u tsa ngu' nu nchcui' lo'o na': “Xu'na, Xu'na”, nacui̱ ngu' 'na; pana si'i lcaa ngu' bi' nu tyatí̱ ca su laca ycui' Ni loo. Sca ti ngu' nu taquiya' ji'i̱ cha' nu nchcui' Sti na' nu ntucua nde cua̱, bi' ngu' laca nu tyatí̱ ca su laca ycui' Ni loo. 22Nu lo'o tyalaa hora cha' cua'ni cuayá' ycui' Ni ji'i̱ lcaa ñati̱ chalyuu, tyu'u tucua quiña'a̱ ñati̱ nu ñacui̱ 'na: “Xu'na, Xu'na”, ñacui̱ ngu' 'na, “lo'o cuare, cua nchcui' ya lo'o ñati̱ cuentya jinu'u̱. Chacuayá' jinu'u̱ ngulo ya ji'i̱ cui'i̱ cuxi nu ngusñi ji'i̱ ñati̱, lo'o jua'a̱ cua ngua'ni ya xa' lo cha' tlyu chacuayá' jinu'u̱”, ñacui̱ ngu' bi' 'na. 23Lo'o li' ntsu'u cha' xacui̱ na' cha' ji'i̱ ngu' bi' ndi'ya̱: “Ná nslo na' ji'i̱ cu'ma̱ tsiya' ti. Yaa clya ma̱ cha' ngu' xña'a̱ laca ma̱.”
Tucua lo ña'a̱ ngüiñá ngu' ni'i̱
24’Lcaa ñati̱ nu cuna tso'o cha' nu nchcui' na' re, lcaa ñati̱ nu taquiya' tso'o ji'i̱ cha' nu nchcui' na', laca ñati̱ bi' ñi'ya̱ laca sca ñati̱ nu ngulacua xi ti' nu lo'o tya lyiji cuiñá yu ni'i̱ ji'i̱. Lo'o li' ngüiñá yu bi' ni'i̱ ji'i̱ yu chu̱' sca quee cuaja'. 25Li' ngua'ya tsa tyo, ña'a̱ cuayá' nu ndyalaa hitya yuu ca quiya' ni'i̱ nu ntucua chu̱' quee bi'. Lo'o jua'a̱ ndyaca tsa cui'i̱, pana ná nclyú ni'i̱ bi', cha' tso'o tsa su ntucua chu̱' quee bi'. 26Lo'o jua'a̱ lcaa ñati̱ nu ndyuna cha' nu nchcui' na' re lo'o ngu', pana ná ndaquiya' ngu' ji'i̱ cha' bi', laca ngu' bi' ñi'ya̱ laca sca ñati̱ tonto nu ná ngulacua ti' tsiya' ti; ngüiñá yu bi' sca ni'i̱ lo yusi̱ ti. 27Li' ngua'ya tsa tyo, ña'a̱ cuayá' nu nxlya'ba hitya yuu ji'i̱ ni'i̱ bi', lo'o jua'a̱ lye tsa ndyaca cui'i̱. Nga'aa ndalo ni'i̱ bi' li', ndyú bi', ndye bi', ngunu'u̱ tsiya' ti li'; lo'o jua'a̱ ñati̱ nu ná ntaja'a̱ taquiya' ji'i̱ cha' jna', tye cha' ji'i̱ ngu' bi' tsiya' ti.
28Lo'o ndye ngulu'u Jesús lcaa cha' re ji'i̱ ngu', li' ndube tsa ti' nu ngu' quiña'a̱ ji'i̱ cha' nu ngulu'u yu ji'i̱ ngu'. 29Ngua ti' ngu' cha' tlyu tsa chacuayá' ntsu'u ji'i̱ yu lo'o nchcui' yu lo'o ngu', si'i ñi'ya̱ nclu'u mstru cha' jo'ó ti nclyu'u yu ji'i̱ ngu'.
Attualmente Selezionati:
SAN MATEO 7: cta
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 1981, Wycliffe Bible Translators, Inc. All rights reserved.