KAHTAMYENGHAN 3
3
Kahtawe Ngao Yejaipu
1 #
Ütah 12.9; 20.2. Sha-a Youngwanpa Kahwange linge ngaipu phao yinmok üshei phei, pu sheteipupa ne ngoh yangki. Iye shekonyu te i, “Üting me pesha me ngohpu pee hanghe mepu-o tah hah she Kahwange i a?”
2Hüyange shekonyuwe pu te i, “Pesha me ngohpu pelick toman-e hahpu oklak, 3hüpoi hanghepa pee pesha hotan me ngohnang, tüopa pelick tah hah hüyange tahjon, numan-e jonma-a numan lilak, she Kahwange i.” 4#2 Kor 11.3.Hüpoi puwe shekonyu te i, “Nang yelilak. 5Hangjingne aope numan-e tüopa hahlakeih, numan mük eplak, hüyange Kahwang kih-e, ümeng ümei shingkülak, she Kahwange shingnang.”
6Tüokhei aope shekonyuwe tüopa pee-a hahhu jakke, hüyange müklei me lahnyik lakpa ne, hüyange konnange tamlak ne wao-e nge; yhawe tüopa pelick khaiye ütam hah; hüyange yha-e netanpa te-o ütam pha hüyange lye hah. 7Tüophei me imni moini mük ep, hüyange imni pümkeng me ngohnang she shinge pei, tüokhei imni-e phukyak yah-e shingyange imni pümte büang.
8Hüyange ünpong hipak ja me pesha me Youngwanpa Kahwang kempu wüng iman-e jai, hüwante kahta hüyange I shekonyu iman nying nyingke Youngwanpa Kahwang ngoikülak te nyam me pesha mepu pee yo me lowe ngoh. 9Hüpoi Youngwanpa Kahwange kahta te nyik-e i, “Nanga üpu?”
10Hüyange lye i, “Taowe pesha me nang ngaowüng jai, hüyange tao nyam, hangjingne taowa pümkeng me; hüyange ü-nying nyingke lopu weih.”
11Hüwante Kahwange i, “Nang pümkeng me ngoh nang she aowe nang te ipu? Taowe nangte hanghe pee mepu tah hah she i, hatüo nange hahpu a?” 12Kahtawe jan, “Aohi sheko nange ü-phei ngohlak jingne pha, yhawe tüopa pee mepu ülick üte pha, hüyange taowe hah.”
13 #
2 Kor 11.3. Hüwante Youngwanpa Kahwange shekonyu te i, “Nange hatüowa hanghe lingpu?” Shekonyuwe i, “Puwe lowelam ne tam, hüyange taowe hah.”
Ngaophünlak Kahwange i
14 #
Ütah 12.9; 20.2. Youngwanpa Kahwange pu te i,
“Nange hatüo lingyangpu khei,
ching yinmok üshei hüyange phao yinmok üshei phei shetahpu phoiwümpu nang te shahlak;
seanyu phei nang kahtok te shitte kemlak hüyange nang jin kümme kahmak hahlak.
15Taowe nang hüyange shekonyu nipa me hüyange nang lila hei yha lila nipa me wepa ne menge anglak;
yha üli-e nang shang paitam phalak hüyange nange yha üli ya-ong te jot tamlak.”
16Shekonyu te lye i,
“Taowe nang nao ngohwante shangshih ünyei ngaitamlak;
nang shaoshiye nao wangngai ngelak.
Hüke ngohyange-o nange nang netanpa yahhuwe laknyikpu ngohlak,
hüyange I nang tangme nokpu ne menglak.”
17 #
Heb 6.8. Hüyange Adam te lye i,
“Hangjing ne nange nenok shekonyu ngao jaiye nang niye tüopa-a tah hah she Taowe nang nite ngaokeng phapu pee mepu hahpu jingne,
nang jingne kahtoknyu me phoiwümpu shah nang,
nang jin kümme towe nyaiye hahlak tüolak.
18Phümhuh hüyange amjo nangte ngaitam phalak,
hüyange nange phao me ngaipu phümha hahlak.
19Nang leih-e kahtok ne manmeng manmeng,
nang sheta me wanglüm ngaiye hahlak tüolak;
hangjing ne nang kahtok mepu yah-e ngai;
nang kahtok ngoh nang,
hüyange nishe kahtok ne menge mahlak.”
20Adam-e yoi shekonyu min Eve she nyik; hangjing ne yha kahtanyuha üshei ünyu. 21Hüyange Youngwanpa Kahwange Adam hüyange Inok shekonyu jingne meisho inkhek lingyange imante innetam.
Adam Hei Eve Ni Pesha Mepu Taine Tam
22 #
Ütah 2.7; 22.2,14,19. Hüyange Youngwanpa Kahwange i, “Leitüoh, kahta-a teman yo me ja leye, ümeng ümei shing teki; aowe shing, lye yoi yakke üyin pee mepu khai hahyange jinte üyin ngohlak.” 23Tüokhei Youngwanpa Kahwange hanghe kahtok mepu I yah ngai, tüopa kahtok shao tamlak jingne I Eden pesha mepu taine tam. 24Hüke lye kahta-a jange tei, hüyange Eden pesha heong yeme Cherubim, hüyange üshei ye me lüppe okpu müktishiwa yang ja üyin pee lam yomlak jingne ang.
Attualmente Selezionati:
KAHTAMYENGHAN 3: KONYBSI
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.