Mat 4
4
Kuyezyewa kwa Yesu
(Mk 1:12-13; Lk 4:1-13)
1Yesu etanguliliwa mu cipululu na Mzimu Mtuŵa kuti akayezyewe na Satana. 2Pa masiku makumi anayi (40), Yesu enzokulyalini kanthu usiku na mzuŵa, nipo pecisila masiku aŵa, ecimvwa njala. 3Lomba Satana, womuyezya wala, emuwuzya kuti, “Keno nimwe Mwana wa Mulungu, lamulilani myala ili apa iyaluke mkate.”
4 #
Dt 8:3
Koma Yesu eyasuka kuti, “Malembo olaŵila kuti,
‘Munthu angaŵelini na moyo na cakulya ceka,
koma na malizu wonse wolaŵiliwa na Mulungu.’”
5Pa vuli pake, Satana etola Yesu kuya naye ku mzinda utuŵa, nomupanamika palulu ngapo–ngapo pa Ngʼanda ya Mulungu. 6#Ms 91:11,12 Emuwuzya kuti, “Keno nimwe Mwana wa Mulungu, muziponye pansi, pala Malembo olaŵila kuti,
‘Mulungu azealamulile angelo ŵake
kuti akusamalileni.
Ŵeve azeamutakuleni mu manja mwawo,
kuti mendo ŵanu asacitiwe pa myala.’”
7 #
Dt 6:16
Koma Yesu eyasuka kuti, “Malembo olaŵila soti kuti, ‘Osaŵayezya Asikulu, Mulungu wako.’”
8Pa vuli pake, Satana etola Yesu nakuya naye ku lupili itali ngako, nomuwonesha vyalo va mafumu wonse ŵa pano pansi na ulemelelo wawo. 9Emuwuzya kuti, “Vonse ivi nikupe, ukafukama nonilambila.”
10 #
Dt 6:13
Apo Yesu eyasuka kuti, “Fumapo apa, Satana! Malembo olaŵila kuti, ‘Uwolambila Asikulu Mulungu wako, nipo uwoŵatumikila ŵeve ŵeka.’”
11Tetyo, Satana emusiya, nipo angelo ewela kuzomutumikila.
Yesu otatika uŵilizyi wake
(Mk 1:14-15; Lk 4:14-15)
12Yesu pecimvwa kuti Yohane epozewa mu jele, ezyokela ku Galileya. 13Efuma ku Nazaleti, noluta kuyonkhala ku Kapilinamu, ku mbali kwa cimmana, ku citwa ca mu Zebuloni na Nafitali, 14kuti akwanilishe velaŵiliwa na Mneneli Yesaya kuti,
15 #
Ysa 9:1,2 “Ku calo ca Zebuloni na ku calo ca Nafitali,
njila ya ku cimmana, pa silya pa Yolodani,
Galileya wa asali Ayuda:
16Ŵanthu onkhala mu mfinzi
ewona kuŵala kukulu.
Pa ŵala onkhala mu calo ca mfinzi ya imfwa
kuŵala kwafwika.”
17Kufuma pa nsita iyo, Yesu etatika kuŵilizya kuti, “Yalukani mitima, pakuti Ufumu wa Kululu uli pafupi.”
Yesu oyita okata masaŵi anayi
(Mk 1:16-20; Lk 5:1-11)
18Yesu penzoyenda mu mbali mwa Cimmana ca Galileya, ewona ŵanthu aŵili ponekwawo, Simoni woyitiwa kuti Petulo na mkwawo Andeleya. Enzopoza makombe pa manzi, pakuti enze okata masaŵi. 19Nipo eŵawuzya kuti, “Mwewo munikonkhe, nikakusambizyeni kuŵa okata ŵanthu noŵaleta mu Ufumu wa Mulungu.” 20Pamene apo esiya makombe ŵawo nomukonkha.
21Pecipita apo, Yesu ewona soti ayakine aŵili ponekwawo Yakobe na Yohane, ŵana ŵa Zebedayo. Enze mu wato na awusu wawo, enzowamya makombe ŵawo. Yesu eŵayita, 22nipo pamene apo esiya wato na awusu wawo nomukonkha.
Yesu otatika kusambizya, kuŵilizya nakupozya olwala
(Lk 6:17-19)
23Tetyo, eluta ku Galileya konse kusambizya mu makacisi ŵa Ayuda noŵilizya Malizu Aweme olaŵila va Ufumu wa Kululu. Enzopozya soti malwele wonse ŵa ŵanthu na volefuka vawo va mu miŵili. 24Mbili yake imvwika calo conse ca Siliya, na ŵanthu enzoleta wolwala na malwele osiyana–siyana, ŵala enzokumvwa voŵaŵa, ŵa viŵanda, na ŵala ŵa njili–njili, na akufwa vizo, nipo enzoŵapozya. 25Winji wa wofuma ku Galileya, ku Minzi Kumi, Yelusalemu, Yudeya na vitwa viyakine kutawuka Yolodani emukonkha.
Nsenga New Testament © The Bible Society of Zambia, 2015.