Tutu Xuva 9
9
Jesuu jànda'a ra iin ra kuaá, ña takan kāku
1Takan kūu ta ma nuu chìka Jesuu kuà'an ra, ikan ndē'e ra iin ra kuaá ña takan kāku. 2Tajan ma ndra jàkua'a chi'in ra, te'en chīkatu'un ndra nuu ra:
―Matru, ¿ta naja kāku kuaá ma ra'ya? ¿A cha'a' kuati ma ndian kùu tatá ra kùu yi, a cha'a kuati juuni maa ra kùu yi? ―kàti ndra.
3Tajan Jesuu te'en nāka'an ra chi'in ndra:
―Na yöve cha'a' kuati maa ra kùu yi, ta ni yöve cha'a' kuati ma ndian kùu tatá ra kùu yi. Takan kāku ra, ti chi'in rakan kùuni ma Racha'nu Ndioo jana'a ra ma ndatu ra, ikan na nde'e ma ñivi, ña kùu ja'a ra yi. 4Vitin ña juuni kùu yi ora ndichin, ìyo yi ña ja'i ma tiñu ña tāchi ma Tatái yu'u ña jà'i. Vati cha vàchi ma ora chanikuaa, ta ma ora ikan nï'iin ga ñivi, na küa jatiñu. 5Ma ora juuni yanga ìyoi ma ñuñivi i'ya, yu'u kùi takua kùu ma ñu'ú, ña jàtuun ñuñivi ―kàti Jesuu.
6Ta ora chīnu kā'an Jesuu takan, ta tīvisii ra nuu ñu'u', ta jā'a ra ita'vi nda'yu chi'in ra', ta kū'vi ndio ra yi chata tinuu ma ra kuaá. 7Ta te'en nāka'an ndio ra chi'in ra:
―¡Kua'an, kuànakata tinuu̱n, nuu ndaa ma soko ña nàni Siloé! ―kàti Jesuu. Ma tu'un Siloé, kùuni yi ka'an yi: Yu'u tàchi ñu̱n.
Tajan ma ra kuaá ikan cha nākata ra tinuu ra, ta ora chāa ra nuu ndaa Jesuu, ta cha ndè'e ndio ra. 8Tajan ma ndian ìyo yatini ma ve'e ra, chi'in ndian takani ndè'e ña kuaá ra niku, te'en kīcha'a na nàtu'un ta'an na:
―¿A yöve ra'ya kùu ma ra chùnandi chìkan tunda'vi?, kùuni ndo ―kàti na.
9Ta ìyo inga na ña kà'an te'en:
―Juu ra kùu ra ―kàti na.
Ta inga tuku na va kà'an te'en:
―Yöve ra kùu ra, va takani ndè'e ra ―kàti na.
Tajan juuni maa ndio ra, te'en nāka'an ra:
―Ndicha ña yu'u kùi ―kàti ra chi'in na.
10Tajan te'en kīcha'a na chìkatu'un na nuu ra:
―¿Ta naja kua jā'un ña kūu nande'un? ―kàti na.
11Ta rakan te'en nāka'an ra chi'in na:
―Ma ra nàni Jesuu, jā'a ra nda'yu chi'in ma takuii yu'u ra, ta kū'vi ra yi chata tinui, ta te'en nāka'an ra chi'i̱n: “Kua'an nuu ndaa ma soko ña nàni Siloé, ta nakataun ma tinuu̱n”, kāti ra chi'i̱n. Tajan chā'an ndioi cha nākatai yi. Ta takan kūu yi, ña kūu nande'i ―Takan kàti ra.
12Tajan ma ñivi ikan, te'en chīkatu'un na nuu ra:
―¿Ta ndanu chàkunuu ma ra'ii ikan? ―kàti na.
Ta ma ra kuaá niku, te'en nāka'an ra:
―Töve chìtoi ―kàti ra.
Ma ra kuaá niku, jà'a ma ndra fariseu ña na ka'an ra
13Tajan ma ra kuaá niku, tīin ndio na ra, ta chāndaka na ra nuu ma ndra fariseu. 14Va tava ma kivi nindeo kùu yi ña jā'a Jesuu ma nda'yu, ta kū'vi ra yi tinuu ma ra kuaá ikan, ta ndā'a ra. 15Yakan va ma ndra fariseu kīcha'a ndiko ndra chìkatu'un ndra nuu ra ma naja kua jā'a ra ña kūu nande'e ra. Ta ma ra kuaá ikan te'en nāka'an ra chi'in ndra:
―Kū'vi ra ma nda'yu tinui, ta nākatai yi, ta vitin cha ndè'i ―kàti ra.
16Ta ìyo iin ma ndra fariseu ña kà'an te'en:
―Ma ra jà'a takan, na yöve ra tāchi Ndioo kùu ra, vati töve tìñu'u ra ma kivi nìndee yo ―kàti ndra.
Ta ìyo inga na ña te'en kà'an:
―Ta tu ra jà'a kuatini kùu ra, ¿ta naja kùu jà'a ra ma ndatu ka'nu tuva takan? ―kàti na.
Ta cha'a' yakan kùu yi ña kēsiin na ti, siin siin chànini na. 17Tajan te'en kīcha'a ndiko ma ndra fariseu chìkatu'un ndra nuu ma ra kuaá niku:
―Ta yo'o, ¿naja kua kàtiun nuu ndi, cha'a' ma ra jānda'a ma tinuu̱n? ―kàti ndra.
Ta rakan te'en nāka'an ra:
―Yu'u kà'in, ña iin ra kà'an chi'in tu'un yu'u Ndioo kùu ra ―kàti ra.
18Va tava ma ndra judíu, töve kùuni ndra chinuni ndra ña iin ra kuaá kūu ra niku, ta vitin cha kùu nde'e ra, yakan va kāna ndio ndra ma ndian kùu tatá ma ra kuaá, 19ta te'en chīkatu'un ndra nuu vi:
―¿A se'e ndo kùu ra'ya? ¿A ndicha ña kāku kuaá ra? ¿Ta naja kua kùu yi ña ndè'e ra vitin tuva takan? ―kàti ndra.
20Tajan ma ndian kùu tatá ra, te'en nāka'an vi chi'in ma ndra fariseu:
―Cha chìto ndi, ña ra'ya kùu se'e ndi, ta kāku kuaá ra, 21va töve chìto ndi nayi jā'a chi'in ra ña kūu nande'e ra vitin, ta ni töve chìto ndi, nda ra kùu ma ra jānda'a tinuu ra. Va'aga, ña na ndakatu'un ndo nuu ra, vati ra cha chicha kùu ra, ta kàtitu'un maa ra nuu ndo nayi jā'a chi'in ra ña ndā'a ra ―kàti vi.
22Takan kā'an ma ndian kùu tatá ra, ti yu'vi vi ndè'e vi ma ndra judíu ikan, vati ma ndra judíu cha natu'un ta'an ndra, ña tuva ìyo ma ndian kà'an ña Jesuu kùu ma Cristu, ni tavani'i ndra na indeeni ma veñu'u, ta tüva kùu na kuenda yi.
23Ta cha'a' yakan kùu yi ña nāka'an vi: “Na ndakatu'un ndo nuu maa ra, vati iin ra cha chicha kùu ra”, kāti vi.
24Tajan ma ndra judíu, te'en kīcha'a ndiko na chìkatu'un na nuu ma ra kuaá niku:
―Na ka'un ma ña ndaa nuu ndi, ndava nda nuu Ndioo, vati ndyu'u cha chìto ndi ña, ra jà'a kuati kùu ra ―kàti ndra.
25Ta ma ra kuaá ikan, te'en nāka'an ra chi'in ndra:
―Töve chìtoi tuva ra jà'a kuati kùu ra, a töve. Uvanuu ma ña chìtoi kùu yi ña, ra kuaá kūi, ta vitin, cha kùu nde'i ―kàti ra.
26Ta ndrakan te'en chīkatu'un ndiko ndra nuu ra:
―¿Nayi jā'a ra chi'un? ¿Ta naja kua jā'a ra chi'un ña kūu nande'un? ―kàti ndra.
27Ta rakan te'en nāka'an ra chi'in ndra:
―Cha kātitu'in yi nuu ndo, va töve kùuni ndo jachi'in ndo yi. ¿Ta naja kùuni ndo ña kàtitu'un ndikoi yi nuu ndo inga cha'a'? ¿A ndita'an ndo kùuni ndo tandikun ndo chata ra? ―kàti ra.
28Tajan te'en kīcha'a ndio ndra chàtu'un ndra chata ma ra kuaá ikan:
―Maun kùu ma ra ìyo kuenda ra, va ndyu'u, ìyo kuenda ma racha'nu Moisés. 29Ta ndyu'u cha chìto ndi, ti Ndioo kā'an ra chi'in Moisés, va rakan, töve chìto ndi ndanu kīchi ra ―kàti ndra.
30Tajan ma ra kuaá niku, te'en nāka'an ra:
―Na töve chìnuni̱ ña kà'an ndo ña töve chìto ndo ndanu kīchi ra, ta rakan kùu ra ña jānda'a ra tinui. 31Cha chìto va'a yo ña Ndioo, tàso'o ra ña kà'an ma ndian jàka'nu ra, chi'in ma ndian jà'a ña kùuni ra, va ma ndian jà'a kuati, töve. 32Nda kati tūvi ma ñuñivi nï'iin ñivi takä'an koto na ña ìyo iin ra kùu janda'a tinuu ma iin ra kāku kuaá. 33Tu yöve ra vàchi kuenda Ndioo kùu ra'ya, na küu ja'a ra nï'iin nakuyi chi'i̱n niku ―kàti ra.
34Tajan te'en nāka'an ma ndra judíu chi'in ra:
―Yo'o, kùu̱n ra kāku chi'in kuati, ¿ta vitin kùuniun jana'un nuu ndi nayi ìyo yi ña ja'a ndi? ―kàti ndra.
Tajan jākunu ndra ra veñu'u ma ndian judíu.
Ma ndian töve chìnuni tu'un Jesuu kùu na tava kùu iin ndian kuaá
35Ta ora chīto Jesuu ña jākunu ndra ra nda'vi ikan ma tichi ma veñu'u, ta ora chīkuta'an ra ra, ta te'en chīkatu'un ra nuu ra:
―¿A chìnuni yo'o ña kà'an ma ra Se'e Ndioo? ―kàti Jesuu.
36Ta ma ra nda'vi te'en nāka'an ra:
―Yo'o racha'nu, na katitu'u̱n nui nda ra kùu ra, ta chinuni̱ ma ña kà'an ra ―kàti ra.
37Ta Jesuu te'en nāka'an ra:
―Cha ndē'un ra, ta juu ra kùu ma ra nàtu'un chi'un ―kàti ra.
38Tajan chūnandi chiti ndio ma ra nda'vi ikan nuu Jesuu, ta te'en nāka'an ra chi'in ra:
―Chìnuni̱ ña kà'un Racha'nu ―kàti ma ra nda'vi chi'in Jesuu.
39Ta Jesuu te'en nāka'an ra:
―Ma tiñu vàchi ja'a yu'u ma ñuñivi i'ya, kùu yi ña vàchi jakutuni̱ kuati ma ñivi. Ta vàchi ja'i ña nande'e ma ndian kuaá. Ta vàchi ja'i ña na ndokuaá ma ndian chànini na ña ñivi ndichin nde'e kùu na. Ndiakan ni ndakuu na takua ma ndian kuaá.
40Tajan iin ma ndra fariseu, ña ka'ìin chi'in ra, ora chīni ndra ña kā'an ra takan, tajan te'en kīcha'a ndra chìkatu'un ndra nuu ra:
―¿A nda ndyu'u kùu ndi ndian kuaá?, kùuniun ―kàti ndra.
41Ta Jesuu te'en nāka'an ra:
―Tu ndyo'o kùu ndo ndian kuaá niku, na töve ìyo kuati ndo cha'a' ma ña kini jà'a ndo, vati na töve chìto ndo ma ña jà'a ndo. Va tava kà'an ndo ña kùu nde'e ndo, yakan va juuni ìyo ga ma kuati ndo.
© 2015, Wycliffe Bible Translators, Inc. All rights reserved.