Tutu Mate 8
8
Jesuu jànda'a ra iin ra ku'vi jà'a kue'e ta'yu
(Mr. 1:40-45; Lc. 5:12-16)
1Ta ora nūu ndio Jesuu ma yuku ikan, ta nduva'a kuii kua'a' ñivi tāndikun chata ra. 2Ta ikan jan iin ra ndo'o kue'e ta'yu, chājayatin ra ra nuu Jesuu, ta chūnandi chiti ra nuu ra, ta te'en nāka'an ra chi'in ra:
―Yo'o Racha'nu, na janda'un yu'u chi'in ma kue'e ña ndo'i, tuva kùuniun ―kàti ra.
3Tajan jānakaa Jesuu nda'a' ra, ta jānani ndio ra nda'a' ra ra, ta te'en nāka'an ra:
―Kùuni̱ janda'i ñu̱n. Na nda'un ―kàti Jesuu chi'in ra.
Tajan juuni ma ora ikani, nāa ma kue'e ta'yu ñii ra. 4Ta ikan jan te'en nāka'an Jesuu chi'in ra:
―Koto kätitu'u̱n ma ña tā'un nuu nï'iin ñivi, uvanuu nuu sutu, na kujana'un ñu̱n. Ta na kunda'un iin kiti, ta sòkóun ri kuenda Ndioo, ti takan kà'an ma tutu Ndioo tāa Moisés taji'na, ikan na koto tandi'i ñivi ña cha ndā'un ―kàti Jesuu.
Jesuu jànda'a ra iin ra kùu musu ma capitán ma ñuu Roma
(Lc. 7:1-10)
5Ta ora kī'vi Jesuu ma ñuu Capernaum, tajan chājayatin iin ra capitán ma ñuu Roma ma nuu ndaa Jesuu. Ta te'en jānini ra ra chi'in ma tu'un i'ya:
6―Yo'o Racha'nu, ma ra jà'a tiñu nui, kù'vi ra kàndii ra ve'i jà'a ña pe'lu cha'a' ra chi'in nda'a' ra, ta ya'aga nda'vi kùuni ra ña ya'a ndè'e ra tundo'o ―kàti ra.
7Tajan Jesuu te'en nāka'an ndio ra chi'in ma ra capitán:
―Na ko'o ta jànda'i ra ―kàti ra.
8Tajan ma ra capitán te'en nāka'an ra chi'in Jesuu:
―Yo'o Racha'nu, na töve ìyo yi ña ki'viun ma tichi ve'i cha'a' ña ra nda'vini kùi, va'aga ña na ja'un yi chi'in ma tu'un yu'uniun, ta chi'in yakan nda'a ma musui. 9Vati nda mai, juuni ìyo ma ra chà'nda tiñu nui, ta juuni ìyo jandaru ña chà'ndai tiñu nuu ndia. Vati ora kà'in chi'in iin ma ra jandarui ña na ku'un ra, ta kuà'an ra, ta ora kà'in chi'in inga ra ña na kichi ra, ta vàchi ra. Ta ora tàvai tiñu nuu ma musui ña na kuja'a ra iin tiñu nui, ta jà'a ra yi ndia. ―Takan kàti ma ra kùu capitán chi'in Jesuu.
10Ta ora chīni Jesuu ma ña kā'an ra ta ndava kuà'an anima ra ndaa ra. Tajan te'en nāka'an ndio ra chi'in ma ñivi kuà'an chata ra:
―Ndicha va'a ña kà'in chi'in ndo ña ninii ñuu Israel takä'an nàta'in nï'iin ma ndian chìnuni va'a ma takua chìnuni ra'ya. 11Yu'u kà'in chi'in ndo ña nduva'a kua'a' ñivi, ni kichi ninii ka'nu ma nuñu'u' ñuñivi, ña ni koo na chi'in Abraham, Isaac, ta Jacob, ma nuu chà'nda Ndioo tiñu andivi. 12Va ma ndian ìyo yi ña ku'un ma nuu chà'nda Ndioo tiñu niku, ni jaku'un ra na ma nuu naa, ña ndava ni kuaku na ta kari'u nu'u na jà'a ña ni nde'e na tundo'o ma ikan.
13Ta ikan jan te'en nāka'an tuku Jesuu chi'in ma ra kùu capitán:
―Na ku'un ve'un ta na kuu yi, ma tava chinuniun ña kùu yi ―kàti Jesuu chi'in ra.
Ta takan kūu yi ña ndā'a ma ra ku'vi juuni ma ora ikan.
Jesuu jànda'a ra, ñaka'nu Petu'
(Mr. 1:29-31; Lc. 4:38-39)
14Takan kūu tajan kēe ndio Jesuu kuà'an ra ve'e Petu', ta ikan ndē'e ra ña ku'vi ma ñaka'nu Petu' kàndian jà'a ka'ni. 15Ta ikan jan jānani ra nda'a' ra, ma nda'a' ña, ta kēe ma ka'ni ña. Tajan ndēta ña, ta kīcha'a ndioan jà'a ña, ña kachi ndra.
Jesuu jànda'a ra kua'a' ndian ku'vi
(Mr. 1:32-34; Lc. 4:40-41)
16Takan kūu ta ora cha kuaa, tajan chāndaka ndio na kua'a' ma ndian ndiso tati xaan nuu Jesuu, ña na janda'a ra na. Ta chi'in iin tu'uni ña kā'an ra nuu ma tati xaan ikan, ta kēe yi ma tichi kuñu na, ta juuni jānda'a ra kua'a' ma ndian kù'vi jà'a inga tuku nuu kue'e ndia. 17Takan kūu yi, ikan na chinu ma tu'un kā'an ma Isaía, ra kā'an chi'in tu'un yu'u Ndioo niku. Vati rakan te'en kā'an ra: “Ra'ya kùu ra ña jānda'a ra yo, ta ndāki'in ndi'i ra ma kue'e ndo'o yo.” Takan kàti ma tu'un Ndioo.
Ndian kùuni tandikun chata Jesuu
(Lc. 9:57-62)
18Ta ora ndē'e Jesuu ña nduva'a kua'a' ñivi chīkonuu na ra, tajan nāka'an ndio ra chi'in ma ndra jàkua'a chi'in ra, ña na ketachiyo ndra inga chiyo ma lakuna. 19Ta ikan jan chājayatin iin matru ña jàkua'a tutu Ndioo ma nuu Jesuu, ta te'en nāka'an ra chi'in ra:
―Matru, kùuni̱ ku'in chataun ndanikuni ma nuu kuà'un ―kàti ra.
20Tajan Jesuu te'en nāka'an ra chi'in ra:
―Taku ma yukuii ìyo yavi nuu kìxi ndri, ta ma saa ìyo taka ndri ndia, va yu'u ra Se'e ñivi tāchi Ndioo, na töve ìyo ni nuu kundii ma xini̱ ―kàti Jesuu.
21Tajan iin ma ndra jàkua'a chi'in ra, te'en nāka'an ra chi'in ra:
―Yo'o Racha'nu, na ku'vaun ña na ku'un ji'nai kukuchi̱ ma tatái ―kàti ra.
22Ta Jesuu te'en nāka'an ra chi'in ra:
―Na'a chatai, ta na ku'vaun ña na kuchi ma ndian töve chìnuni ma ta'an na ―kàti Jesuu.
Jàkutaxin Jesuu ma savi tati chi'in takuii
(Mr. 4:35-41; Lc. 8:22-25)
23Tajan ndāa ndio Jesuu ma tichi varku, chi'in ma ndra jàkua'a chi'in ra ndia. 24Ta ikan kācha'an ndra, ora kōyo ndio ma savi tati nduva'a ka'nu chata ndra ña endee chīkonuu ma ola ma varku ndra. Va ma Jesuu kìxi ndicha ra kàndii ra tichi run. 25Tajan chājandakoo ndio ma ndra jàkua'a chi'in ra ra, ta te'en nāka'an ndra chi'in ra:
―¡Yo'o Racha'nu, na jakakun ndi, vati chani sa'vi ndi! ―kàti ndra.
26Ta Jesuu te'en nāka'an ra chi'in ndra:
―¿Ta naja ya'a ndasii ndo? ¿A ya'aga tia chìnuni ndo ña jà'a ndo takan?
Tajan ndēta ndio ra, ta kīcha'a ra kà'an xaan ra nuu ma savi tati chi'in ma tañu'u, ta ndisaa yi kūtaxin. 27Ta ikan jan ndava kuà'an anima ndra kīndoo ndra, ta te'en kīcha'a ndra chìkatu'un ta'an ndra:
―¿Ta nda ra kùu ra'ya ña, nda ma tati chi'in tañu'u, jàchi'in ña kà'an ra? ―kàti ndra.
Nuu ndā'a uvi ma ndra ndiso tati xaan ñu'u' Gadara
(Mr. 5:1-20; Lc. 8:26-39)
28Ta ora cha kētachiyo ndio Jesuu inga chiyo ma tañu'u nuu kandii ma ñu'u' Gadara, ta ikan kēe uvi ta'an ma ndra ndiso tati xaan tañu ma nuu ñaña, ta chājayatin ndra ndra nuu Jesuu. Ta ndrakan ti endee küu ya'a nï'iin ñivi ma nuu ka'ìin ndra ti, ya'a tivi xini ndra jà'a yi. 29Tajan ndrakan te'en kīcha'a ndio ndra nda'yu ndra jà'a yi:
―¡Koto kï'viun chi'in ndi, yo'o Jesuu, ra Se'e Ndioo! ¿A vàchi jànde'un tundo'o ndi antea ña keta ma kivi ña ni jakutuni ma Racha'nu Ndioo kuati ndi? ―kàti ndra chi'in ra, jà'a ma tati xaan ikan.
30Ta chika ma nuu ka'ìin ndra, ikan ndē'e yi ña ka'ìin kua'a' va'a kini, ña chàchi ndri kachika ndri. 31Tajan te'en jānini ndio ma tati xaan ña ka'ìin tichi kuñu ndra ma Jesuu chi'in tu'un i'ya:
―Tu kùuniun tavaun ndi tichi kuñu ndra, na ku'vaun ña ki'vi ndi tichi kuñu ma kini ña ka'ìin kachachi ndakan ―kàti yi.
32Tajan Jesuu te'en nāka'an ra chi'in yi:
―Va'ani, na ki'vi ndo ―kàti Jesuu.
Tajan kēe ndio ma tati xaan tichi kuñu ndra, ta kī'vi yi tichi kuñu ma kini, ta ndisaa ndio ndri kāndakunu ndri kuà'an ndri iti' nuu ìyo iin xa'va nuu kandii ma lakuna, ta ikan kā'a ndri, ta chī'í ndri. 33Ta ma ndra jàkuenda ndri, kāchinu ndra ti yū'vi ndra. Ta ora chāa ndra ma ñuu, ta kīcha'a ndra nàtu'un ndra nuu ma ñivi ña tā'an ma kini chi'in tandi'i ña tā'an ma ndra ndiso tati xaan ndia. 34Tajan tandi'i ma ñivi ìyo ma ñuu ikan, chānde'e na nuu ndaa Jesuu. Ta ora ndē'e na ra, ta kīcha'a jànini na ra ña na kèe ra ma ñuu ikan.
© 2015, Wycliffe Bible Translators, Inc. All rights reserved.