Génesis 14
14
Pa Abram ti tjôcjanesh pa Lot
1Lhechesh pa nalhu ti lhcaanvacleesh'e pa Amrafel pa Sinar. Vooy pa Arioc lhcaanvacleesh'e pa Elasar. Pa Quedorlaomer lhcaanvacleesh'e pa Elam. Vooy pa Tidal lhcaanvacleesh'e pa Goim. 2Papuque caajem pa vatvatclônjayash t'ajuyjulh pap'elh lhcaanvacles: pa Bera lhcaanvacleesh'e pa Sodoma, pa Birsa, lhcaanvacleesh'e pa Gomorra, pa Sinab, lhcaanvacleesh'e pa Adma, pa Semeber, lhcaanvacleesh'e pa Zeboim, shi' pa lhcaanvacleesh'e pa Bela, pa lhavtsaat lhey shta Zoar. 3Papuque ve'lhanôjesham yamvatsham papi lhcavos yiey pa tavashay Sidim yiey pan yie' nôqueesh pa yinôôt lhey Tovôc Yicavôm. 4Pa lhcaanvacle Quedorlaomer doce pava nincôpes ti ve'lhasham ti lhcaanvacleesh. Taj ti vooy ti trece pava nincôpes pa yamvatshamjop papi ve'lhanôjesh lhcaanvacles pa yen ti t'ajuyjulh pa lhech. 5Vooy peelh nincôôp pa Quedorlaomer shi' papi lhcaanvacles papi ve'lheelhch'e pa yichey pa cotsjaat Astarot Karnaim, lhech'e ti yash'apee shta papi refaítas; pa nôquee papi zuzitas yiey pa Ham yash'apee shta. Pa yash'apee shta papi emitas yiey pa Save-quiriataim, 6pa yash'apee shta papi horeos yiey pava uticuy Seir, pa yisaas yamjey pa tavashay Parán shalheema pa nintôlh'e pa. 7Ti tapec pa Quedorlaomer shi' papi tanaôycheelh pa yamey pa En-mispat pan lhey shta Cades. Lhech'e ti yiclônsha'ne lhacôm'a papu ti yi'van yiey pan nash'e pa lhcootsjat papi amalecitas. Lhech lhfanishesh shta ti yiey papi amorreos papin yiey pa cotsjaat Hazezon-tamar.
8-9Pa lhechesh papi lhcaanvaclesesh'e pa Sodoma, pa Gomorra, pa Adma, pa Zeboim shi' pa Bela pa yichey pa tavashay Sidim. Lhech'e papuque ve'lhanôjesh lhcaanvacles ti vatclôneelhsha'ne ti t'ajuyjulh pa Quedorlaomer, pa Tidal, pa Amrafel shi' pa Arioc. Papi lhech lhanvaclesesh'e pava yishatjulh yitsates pa Elam, pa Goim, pa Sinar shi' pa Elasar. 10Yiey pa tavashay Sidim acloj pava tinjôquey yiesh pava ts'anatshi t'ajuya jpôyich. C'oya ti yiclôtaj'in papi lhanvaclesesh pa Sodoma shi' pa Gomorra yiey pa vatvatclônjavat pa nach'een pava tinjôquey. Vooy pap'elh lhcaanvacles yiclôtey pava uticuy.
11Papi yaash lhechesh pa yichaj'in lhaôm'a pava vatcôs shi' pava vatcôquicletôy tashaay yiey pa Sodoma shi' pa Gomorra pa tay'een pa lhech'e. 12Vooy pa Lot, lhfacl'a pa Abram, yie' shta pa Sodoma, pa chiychaaj ti chiyôcfa' shi' lhacôm'a pava caajem. 13Taj ti caaj pa ve'lha nivacle ti yiclôt pa lhech ti mônlha. Pa yichey ti nifaclem lhacôm'a cavôque pa Abram lhavaatsha hebreo. Ti yie' pa yita' yitsôt'ajesh pa amoreo lhey Mamre. Pa Mamre lhch'inish pa Escol shi' pa Aner. Papi lhech ve'lheelhch'e pa Abram.
14Pa Abram ti yitô'ya pa lhfacl'a ti chiyôcfa', pa vooyshi papi t'unis lhcavos papi lhech trescientos dieciocho yamvatsham. Lhacôm'a papi lhech voqu'e' papi lhcaanvacles yamey pa yitsaat Dan. 15Ti tulhey, pa Abram shi' papi lhcavos pa t'eclet'a pa nitôyiyjat papi lhcaanvacles. Pa yijôyjan yamjey pa Hoba, yiey fchenajjulh pa Damasco. 16Pa nijôclesh lhacôm'a pava yichaajtaj. Nôque lhjunash pa Abram tjôcjanesh pa lhfacl'a Lot pa yachajem shta lhacôm'a pava yitsôt'ajesh pa lhfacl'a. Tjôcjanesh shta papi nivacchey shi' pap'elh nivacle.
Pa Melquisedec is pa yit'eshem pa Abram
17Ti tapec pa Abram, ti tifeshch'e ti yash'apee pa Quedorlaomer shi' pap'elh lhcaanvacles papi ve'lheelhch'e, pa lhanvacleesh'e pa Sodoma pa yichjuulh yiey pa tavashay Save, lhanquey shta Lhcaanvacle Lhtavashay. 18Yichjuulh shta pa Melquisedec, pan lhanvacleesh'e pa Salem. Lhcavoesh shta pa Dios yaashchisham. Pa lhech t'acumeyshi lhpa yucuve shi' pa ôtjayetas t'i' 19pa yit'eshem pa is pa Abram navôque lhclishay:
“Naisiyan jayu pa Dios t'aashchisham,
pan yisnatesh pa vôôs shi' na cotsjaat;
20pa chiyôclôj pa Dios yaashchisham
pa nashjat'apee papi niac'utsfasa.”
Pa lhechesh pa Abram pa yijutem pa Melquisedec pa diecesh t'iya'esh pava nachaj.*xn* 21Pa lhechesh pa lhanvacle pa Sodoma pa yit'esha pa Abram:
—Anjutyiy napi nivacle, pa amônlhaaesh nava vatcôqueclitôy.
22Pa Abram pa yicuulh:
—Jetônjop pa Lhcaanvacle Dios yaashchisham, pan yisnatesh pa vôôs shi' na cotsjaat, 23ti tanca yamônlhaaesh pa pava natsôt'ajesh. Tanca lhecha pa niyôc ca yôcfeeshey nava yicfiyis, ca jaspa ya aj ca at'eshyi ca alhecha ca ascônatshiin. 24Tanca yicuumjulh pana'in yivaatsha, tsi'sha cavan apis ti tuj napi yicavos. Vooy napi nivacle napin jatanôycheelh na Aner, na Escol shi' na Mamre, lhavaatsha natcum'e jayu pava ca niteetajesh.
Nivacle Bible © Sociedades Bíblicas Unidas, 1994.