Luka 1
1
1Ende Bwana Teofilo—Eoka mbo bato wike basokotaka ndotaka kasa ya njasɔ ebiakelomökö sisi yasu, 2yao ina ebisoaekelanomo end’iso konda baakoelo ko l’ebɛnɛ̈kɛ̈ la ebanangokoläkä Lioi, 3ongoma asotutaka’mi imɔ mbo iluweke yao bitotina tunya la tunya la wɛlï konda liakoli, imi isosanga ndosɔnɛl’aɛ lokasa-lo loa njasɔ-ao tunya la tunya, 4mbo oluweke la wewe, yao ina ebiaekesomökö aɛ la bɔnɔkɔ.
Liotomu lia Yoane Bolufi
5Ayaläkä Helodi Bɔkɔta wa BaYuda, Sekalaya ayaläkä kanga ya botükä wa Abiya, wali wande aaka ɔmɔi wa baseka ba Alona, lina liande liko Elisabeta. 6Iyo ambale, la wali la olome, benganäkä nda baiso ba Mungu, balitesäkä Bikela la ndola ya Ngɛnɛ Mungu angotwanelo yao. 7Kongo ko bachaaka la wana eoka Elisabeta aaka ekomba, la iyo yaambale baaka sumbu tonunu.
8Akeläkä Sekalaya likuwa lia kanga nda ndakɔ ya Mungu nda weto wa botükä wande, iyo la bakanga loaa lisho liɔɔtɔ kuku ya Ndakɔ ya Mungu otumba isandu sha liyɛsɛ omao, 9iyo loaa lisho ko la ngongo. 10Atumbäk’inde isandu sha liyɛsɛ, etunda etoti ya bato losombola lousa.
11Nde bokitomo wa Mungu lɔɛnɛnɛ ende Sekalaya, inde loemala nda fangi ya olome ya etumbelo ya isandu sha liyɛsɛ. 12Ɛnɛ̈kɛ̈ Sekalaya wɛnɛ bokitomo inde loilima, inde lowa bɔwa finɛ. 13Nde bokitomo loonga lande mbo— Owangëke, Sekalaya, eoka lisomboli liaɛ liokomuku nde, la wali waɛ ako Elisabeta atootel’aɛ wana botolome, otot’inde lina liko Yoane. 14Waɔlɔ nde loomalo la eyalaka limɛngɔ liaɛ, la bato wike beomalaka eoka ya lootomo loande.
15Eoka eyalaka nde oto wa tala nda baiso ba Ngɛnɛ Mungu;
Atiamweke bänä kwa tatä nde etumesomoko la
Bolimo Botanu konda kuku ya nyango wande.
16Eoka yande bana wike ba Isalaele bekikwaka
liasi ende Ngɛnɛ Mungu wau.
17Inde ɛkɛndɛkɛ la oso, ani Mungu atɔɛnɛ inde,
eyalaka la bolimo la bofoka wa Eliya,
Mbo alɛmbɛsɛkɛ betema ya basango ende bana
bau la eba litefoli ekikolak’iyo nda wɛlï wa eba liengani;
La ndokomiela Ngɛnɛ Mungu tukela ya bato ebasotatonjomo.
18Limɔ Sekalaya loonga la bokitomo mbo— ¿Itoluwa nde lole wewe la moni? Eoka imi angɛnɛ yende inunu la wali wami ende sumbu la miaka wike. 19La bokitomo lomutoel’inde mbo— Imi yende Ngabaliele, itoemakala oso wa baiso ba Mungu; isotomomo mbo iongeke laɛ la mbo iluwesek’aɛ e-mboli ilau-bi. 20Toka, boyala nde euma, angokɔkɔlɔ oonga imɔ konda lise elikakelomoko e-njasɔ-bi, eoka otiimele baoi bami ebelakɔchɔmɔkɔ nde nda lisho lia bao.
21Kongo ko bato baumbakeläkä Sekalaya la iyo lowa liena mbo asotikala yumwa nda ndakɔ ya Mungu. 22Akuswäk’inde, atiakɔkɔlɔ̈kɔ̈ oonga lau imɔ, la iyo loluwa mbo aɛni nde liɛni omao nda ndakɔ ya Mungu; inde lomekoel’iyo ani atikali nde ko euma.
23Asiläkä weto wa bacho ba likuwa liande nda ndakɔ ya Mungu, inde lɔkɛ olo nda ndakɔ yande. 24Limɔ mbisa ya mbile sinyo wali wande ako Elisabeta loaelo lieme la inde loisama nda likula ko tengai bɔɔmwi, inde mbo— 25Ngɛnɛ asokeela’mi ongoma kwa asotichaka’mi mbo asokoleke sɔni yami nda baiso ba bato.
Bokitomo lɔɛnɛlɛ ende Malia
26Mbisa ya tengai liambɛ bokitomo ako Ngabaliele lotomomo la Mungu nda bokenge wa Ngalilai, boko Nasaleta, 27ende boseka oyaaka liäla lia Yosefa, boto wa bɔkɔ̈kɔ wa Dawidi; lina lia boseka liko Malia. 28Bokitomo loya end’inde, inde loonga lande mbo— Saela botema, aɛ otomali wa elame, Ngɛnɛ Mungu ale laɛ. 29Nde Malia lɔɛnɛ tale finɛ eoka ya baoi-ba la inde lofelana la botema litina lia liseeli-li. 30Bokitomo loonga lande mbo— Owangëke, Malia, osɔɔlɔ elame ende Mungu. 31Toka, otoyala nde la lieme, la otoota wana la aɛ kota Inde lina liko YESU. 32Inde eyalaka nde tala, etangomoko nde Wana wa Oyetami, la Ngɛnɛ Mungu efaefak’Inde kɛka ya isosha sha ngau wande ako Dawidi, 33eyalaka nde Bɔkɔta wa Bɔkɔ̈kɔ wa Yakobo ko layalaya, la yakakaelo yande etilaɛilek’imɔ.
34Nde Malia loonga la bokitomo mbo— ¿Monito lotoya ende’mi ongoma, eoka itiingale la otolome? 35La bokitomo lomutola lande mbo— Bolimo Botanu nd’atoya se end’aɛ la Bofoka Oyetami atoobiamel’aɛ nda liɔmbɛ liande; eokao wana imɔ oyatootomo laɛ eyalaka botanu la etangomoko Wana wa Mungu. 36Toka, Elisabeta nda inunu shande oyale wa bɔkɔ̈kɔ waɛ, inde imɔ ende la lieme lia tengai liambɛ, ani atangomu ekomba. 37Eoka loti la loaso ango lɔmɔi sakolo ngo ko Mungu atokɔkolɔ loao.
38Malia loonga mbo— Tɛnɛ, yende ngo ko bɔkɔwa wa Ngɛnɛ, loyaleke ende’mi kwa asoonga aɛ. Limɔ bokitomo losekwa end’inde.
Malia lɔkɛ fɛtɛti ende Elisabeta
39Nda bacho-ba Malia loila lɔkɛndɔ loa mangu okakɛ nda okenge ɔmɔi wa Yuda, nda yese ya föngo; 40omao inde lɔtɔ ndakɔ ya Sekalaya, inde lolamola Elisabeta, 41la ökakä Elisabeta lilamoli lia Malia, wana lotondwa nda sɔlɔ; Elisabeta angɛnɛ lotumesomo la Bolimo Botanu, 42inde loamama la limiki lifi, limɔ inde mbo—
Aɛ nd’atoetela batomali batotina la elame la olau,
Wana wa sɔlɔ yaɛ imɔ, nd’atoetela la elame la olau.
43¿Loyi ngo ko ende’mi moni, mbo
Nyango wa Ngɛnɛ wami asoya fɛtɛti ende’mi?
44Tɛnɛ ngo aɔti lioi lia lilamoli liaɛ nda batoi bami,
Wana wami lotondwa nda sɔlɔ yami ko la limɛngɔ.
45Limɛngɔ fuu lile la otomali oyasoimela eoka mbo,
Ebiatikäkä Ngɛnɛ lisakä end’inde, yao bikɔchɔmɔkɔ nde wewe.
Bɔɛlɛ wa Malia
46Limɔ Malia mbo—
Bolimo wami botoinakela Ngɛnɛ,
47Botema wami bosoomakala loasɔ loa Mungu, Bouwesi wami,
48Eoka asowɛlɛ iuwe shami baiso, ako bɔkɔwa otomali wande.
Tɛnɛ, ko louse konda fɛtɔ bitoti ebikayeke, batotanga’mi ewa elame.
49Ende Bowangɔ nde Oyasokeela’mi tokesa; lina liande liende litanu.
50Booto wande bofi bosowɛlɛkɛmɛ ende fɛtɔ la fɛtɔ ya ebatolitekes’Inde;
51Asokakalesa kakala ko la bosamba wande wa bofoka,
Asomelekesa eba bɛmɛtɔ nda baenyeli ba betema yau.
52Asosokokola eba befoka nda kɛka yau,
Nde asotalia eba touwe tala;
53Asokanelesa eba tosiyɛ la bieka bilau,
Nde asosaya bafoka wawa.
54Asosunga Isalaele oyale bɔkɔwa wande,
Eoka yoenyakela booto wande
55Kwa aongäk’Inde la bangau basu,
Ende Abalayama la ende bana bande laya laya.
56Malia lotikala amamwito la Elisabeta yumwa kwa tengai isatɔ, limɔ inde loinywa nda ndakɔ yande angɛnɛ.
Liotomu lia Yoane Bolufi
57Enganäkä lisho lia Elisabeta lioota, inde loota otolome, 58la bayalani lande l’eba bɔkɔ̈kɔ wande looka loasɔ loa elame finɛ eyakeeläkä Mungu okeel’inde, iyo loya oyasanganaka lande nda eyombi ya limɛngɔ.
59Nda lise lia bonanɛi mbisa ya liotomu, iyo loya oyatena wana itombe, basikiof’inde lina liko Sekalaya kwa elia sango wande, 60kongo ko nyango wande mbo— Mbayɔ, atotangomo mbo Yoane. 61Iyo mbo— Angwɛnɛ oto angɔɔmɔi wa bɔkɔkɔ waɛ la elina-li. 62Ko la ndembe, iyo lofela sango lina elikalɛmbɛk’inde mbo bateke wana liao. 63Sekelaya lofel’iyo litalɛ limɔ inde lɔsɔnɔ mbo— Lina liande liko Yoane; iyo yaatotina lomwaala. 64Limɔ bɔnɔkɔ wande loliolomo futuku la lolamɛ loande lofaikwa, inde loonga la Inde loinakela Mungu. 65Bayalani lau batotina lowänga la lokuku loa bitotina-bi lookana nda yese etotina ya föngo ya Yudea. 66Batotina ebokäkä, iyo loisa yao nde betema yau, iyo mbo— ¿Boni to bɔfɔɔnɔ ebotoyala la wana-yo? eoka bofoka wa Mungu boyali nde lande.
Lioi lia Sekalaya eoka ya wana ako Yoane
67Sango wande ako Sekalaya lotuma la Bolimo Botanu, inde lotɔndɔlɔ mbo—
68Ngɛnɛ Mungu wa BaIsalaele ainakelomoko,
Asoya oyaendola tukela ya bato bande;
69Asotɛmɔlɔ ɛɛla ya liuwesi liasu
Nda bɔkɔ̈kɔ wa Dawidi bɔkɔwa wande,
70Kwa aongäk’Inde la bɛnɔkɔ ya batɔndɔli bande
E-batanu ko kwaalakwaala,
71Mbo touwesomoko nda baiyani lasu la mbo touwesomoko
Nda besamba ya bato ebale lasu la lisiela,
72Mbo akeeleke batata basu booto la
Aenyakeleke ngɛla yande ya botanu
73La ekanɔ eyatinyäk’Inde la Abalayama ngau wasu,
74Mbo tolaendolomoko nda besamba ya ebatoiyel’iso,
Mbo tokuwelek’Inde, angwɛnɛ bɔwa imɔ, ani ɛnɛnɛk’iso
75Ko la botanu la liengani bacho batotina ba liwawi liasu.
76L’aɛ, wana, botangomoko Bɔtɔndɔli wa Oyalongeli,
Eoka weteleke oso wa Ngɛnɛ okakomiel’Inde mboka,
77La okafaefa bato bande liekesi lia liuwesi,
Ko la limɛsɛɛli lia batwanelo bau,
78Eoka ya botema wa ngandi ya Mungu wasu,
Bonyanya wa Use bosoyatwel’iso,
79Ndoanekesa bato ebayali nda lilima la nda bounduundu wa liwa,
Ndokɛndɛkɛs’iso batindi fii nda mboka ya lilatemi.
80Ongoma wana lokonda, inde lowangema nda botema la ayaläkä nda liɔmbɛlɛ konda lise liaɛnɛlɛ̈k’inde ende Isalaele.
Le Nouveau Testament in Kele (Lokele) © British and Foreign Bible Society, 1958, 2019.