Luka 15
15
Bɔkɔkɔ ebolefani
1Limɔ bɛsɔnji ya bɛsɔmbi la bato ba njasɔ ibe, iyo yaatotina loya tina lande ndoyalaila Yesu; 2la BaFalusi la Batikasa imɔ loimaima mbo— Boto-yo atonyangela ebabe la atolana lau bieka.
3Eokao, Yesu lokambes’iyo ebombila-bo, Inde mbo— 4¿Oni boto wanu oyayali la bɛkɔkɔ kama liu, elefesa ango ɔmɔi wau, aitomacha yao kama libwa la libwa nda isimo, ani inde atɔkɛ okaluke bona ebosolefana, ko nd’akoshek’inde wao? 5Akoshek’inde wao, inde kota wao nda kɔndɛ yande la limɛngɔ; 6limɔ akayek’inde nda ndakɔ yande, inde kota baina lande la bayalani lande lioi, inde koonga lau mbo— Okaka limɛngɔ amamwito lami, eoka isoosha bɔkɔkɔ ewalefäkä. 7Imi nd’atoonga lanu-mbo— Ko ongoma limɛngɔ liokanaka nda Use loasɔ loa boto ɔmwito wa obe oyatokalangana, elitoeta limɛngɔ loasɔ loa bato kama libwa la libwa ba liengani, ebati la boeno wa likalangani.
Bieto ebilefani
8Botomali to oyale la falanga liu; ¿elefesa lɔmɔi, mbo aitoanesa täla, aitɔɔmbɔkɔ ndakɔ okaluke la bofiili kond’akoshek’inde loao? 9Limɔ akoshek’inde loao, inde kota baina la bayalani lande lioi, mbo— Okaka limɛngɔ amamwito lami, eoka isoosha lofalanga elolefesiki’mi.
10Itoonga lanu mbo— Ko ongoma limɛngɔ liokanaka nda baiso ba Bakitomo ba Mungu loasɔ loa boto ɔmwito wa obe oyatokalangana.
Wana oyalefani
11Yesu loonga mbo— Boto ɔmɔi aaka la bana batolome ambale, 12la etungani loonga la sango wande mbo— Fafa, faka’mi likaɔ lia botiko elikaɔlɛkɛ’mi. La sango lokaana lau bitotina yande. 13Mbisa ya becho bimɔi itungangɔlɔ losɔnjaka eyande bitoti, inde lomacha bokenge wande okakɛ yese y’esika; omao inde lomelekesa bieto yande ko la yeka wawa. 14La asilesäk’inde bieto yande bitotina, limɔ löndo lofi lokwa nda yese ena, inde loakola ndoyala la boeno ofi. 15Inde lɔkɛ okawatema la boto ɔmɔi wa yese ena la boto ona lotom’inde nda bilanga yande mbo afeke ndei yande bieka. 16Inde lookaka yɛmɛ yookanelo la mboso ya kunde eyaläkä ndei, nde angwɛnɛ boto wof’inde yeka.
17Aenyäk’inde loasɔ loande, inde mbo— Aina basali ba sango wami bende la bieka yoengana la yosandelo se ani imi nd’asowa eyamaya l’isiyɛ. 18Itoemala ikɛkɛ ende sango wami, yeongaka lande mbo— Fafa, isotwanelo oso wa Use la nda baiso baɛ imɔ, 19itiengane ndotangomo imɔ wana waɛ; sɛlɛkɛ’mi kwani ayali basali baɛ.
20Inde loemala, inde lɔkɛ ende sango wande. Nde akoyal’inde esika, sango wande lɔɛnɛ wana, inde lookel’inde ngandi, inde lokwa mangu okakusamel’inde kingo, inde lofa wana ichɔu; 21Wana loonga la sango mbo— Fafa, isotwanelo oso wa Use la nda baiso baɛ, itiengane ndotangomo imɔ wana waɛ; sɛlɛkɛ’mi kwani ayali basali baɛ.
22Kongo ko sango loonga la bɛkɔwa yande mbo— Mangumangu; eshaka kanju eyelau finɛ, watesak’inde, fak’inde iketi shota nda isangakala shande la tokwaka twa batindi bande, 23eshaka efembeli ya ngɔmbɛ bonuku, olaka yao, toleke elambɔ la limɛngɔ; 24eoka mbo wana-yo wami awäkä la akoyali; alefäkä, nde asɔɛnɛlɛ oko liasi; la iyo loakola ndoficha limɛngɔ.
25Kongo ko wana wange loyala nda elanga. Ainwäk’inde la ayaläk’inde tina la ndakɔ inde looka bakwengu la bɛɛlɛ ya bisha. 26Inde lota wana ɔmɔi lioi, inde lofel’inde litina lia loasɔ-lo. 27Inde lomutola mbo— Etungani yaɛ asoya la sango waɛ asoola efembeli ya ngɔmbɛ bonuku, eoka asoosh’inde la bosasu la wɛlï.
28Nde boloo lotwa bolengi, la atilɛmbɛkɛ ndɔɔtɔ nda ndakɔ. Nde sango wande lokuswa ndokalɔmbɔkɔl’inde, 29limɔ inde lomutola la sango mbo— Toka! Isokuwel’aɛ kwa bɔkɔwa emiaka-bi wike, ikatefoli ndola yaɛ ango ɛmɔi, nde otifeke’mi ango efembeli ya mbuli mbo ificheke limɛngɔ amamwito la baina lami; 30kongo ko asoya ewana-yo waɛ, oyasolaka bieto yaɛ amamwito la batomali ba bolëfë, oisoolel’inde efembeli ya ngɔmbɛ bonuku.
31Sango loonga lande mbo— Wana, wende lami becho betotina, la bitotina yami yende imɔ ko eyaɛ. 32Loondu nde mbo tokeleke elambɔ la limɛngɔ, eoka etungani yaɛ’yo, awäkä nde akoyali la liwawi; alefäkä, nde asɔɛnɛlɛ oko liasi.
Le Nouveau Testament in Kele (Lokele) © British and Foreign Bible Society, 1958, 2019.