Matayo 27
27
1Aaka bonyanya bososɔswa, kanga bieti la biange ya bato, iyo lɔtɔ ikumbɛ nda loasɔ loa Yesu mbo boolek’Inde. 2Akandäk’iyo okanda Yesu, iyo lɔkɛ lande okamach’Inde nda besamba ya Pilato ako Komanda wa Loma.
Liwa lia Yudasi
3Limɔ Yudasi oyawambäkä Inde, ɛnɛ̈k’inde mbo Yesu afomuku nde se, inde lokalangana, inde lokainola pata kama isatɔ ende kanga ebieti la biange, 4inde mbo— Isotwanelo ko ndowamba bakila ba oyati la loasɔ. Nde iyo mbo— ¿Loni to loasɔ loasu-lo? Aɛ angɛnɛ komyaka loao. 5Lamao inde lofifa bieto se konda kuku ya Ndakɔ ya Mungu, inde lokuswa, inde lɔkɛ okakwa linga. 6Nde kanga ebieti lɔɔsɔ bieto, iyo mbo— Lotiengane la Bikela ndota yao nda sanduku ya lifaefi, eoka ende bolïli wa bakila. 7Limɔ iyo lɔɔtɔ ikumbɛ sha loasɔ, iyo losomba elanga ya bakuki ba tei ya tɔlɔngɔ la bieto ina, elanga losɛɛlɔmɔ eombelo ya bɛɛnda. 8Eokao elanga ena lotangomo mbo Elanga ya Bakila, ko nd’eweuse. 9Lona eloaongäkä Yelemaya ewa Bɔtɔndɔli loakɔchɔmɔ̈kɔ̈ mbo—
Baɔsɔ̈kɔ̈ pata kama isatɔ, bolïli wa Inde oyatinyomökö loketi ko la bana ba Isalaeli,
10La iyo losomba la bieto-ao elanga ya bakuki ba tei,
Kwa aongäkä Ngɛnɛ eonga lami.
Yesu la Pilato
11Limɔ Yesu loemala oso wa Komanda; la Komanda lofel’Inde mbo— ¿Aɛ wende Bɔkɔta wa BaYuda? Yesu loonga lande mbo— Aɛ nd’aongi ongoma. 12Awanjelomökö Inde la kanga ebieti la biange, Inde angomutola ango lioi. 13Limɔ Pilato loonga lande mbo— Otioke likama lia njasɔ ebisowanjel’iyo laɛ? 14Nde Yesu atimutole lioi nda loasɔ ango lɔmɔi, ongoma Komanda lomwaala finɛ.
15Nda lise lia Elambɔ, Komanda ayaläkä la boyaeli wofaikoela bato, ɔmɔi wa ebakandomu kwa asangäk’iyo. 16Bayaläkä nde la boto wa lokuku lofi nda bɔnyɔlɔlɔ ako Balaba. 17Eokao, asɔngɔmɔ̈kɔ̈ iyo oso wande, Pilato lofela bato mbo— ¿Olɛmbi nde mbo ifaikoelek’ino ndai to? ¿Kwa Balaba kwa Yesu oyasotomo Masiya? 18eoka Pilato aluwi nde mbo basoesha Yesu nda likomyi ko l’eoka ya lisiela kongo.
19Ayaläkä Pilato nda kɛka ya likomonyi, wali wande lotomel’inde wɛndi mbo— Oyalëke la loasɔ la boto ona oyengani, eoka yɛniki tale finɛ nda saki louse ko loasɔ loande. 20Kongo ko kanga ebieti la biange, iyo lofumbesa ekuke ya bato mbo bafeleke Pilato ateke Balaba se la mbo basɛɛsɛlɛsɛkɛ Yesu. 21Limɔ Komanda lofel’iyo liasi mbo— Boni boto wau yaambale oyalɛmb’ino mbo ifaikoelek’inde eoka yanu? Iyo mbo— Kangä Balaba. 22Lamao Pilato mbo— ¿Ikeleke to iye la Yesu oyasotomo lina liko Masiya? Iyo yaatotina mbo— Aolomoko nda lieka. 23Komanda mbo— ¿Eoka iye? ¿Boni obe bosokel’inde? Kongo ko iyo loanjanja liasi imɔ mbo— Aolomoko nda lieka.
24Lamao ɛnɛ̈kɛ̈ Pilato mbo atialongele, kangä mbo bato basambokela etondo, inde lɔɔsɔ balia, inde losoola bangasa bande oso wa baiso b’eba ekuke, inde mbo— Iti’mɔ la loasɔ loa bakila ba boto-yo oyengani, ino ɔsɔkɔ to loao. 25Bato batotina loaola mbo— Bakila bande baomaneke oko end’iso la ende bana basu. 26Limɔ inde lofaikoel’iyo Balaba, la aomakomökö Yesu fimbo, inde lofaef’iyo Inde mbo aolomoko nda lieka. 27Lamao basilikani ba Komanda lɔkɛ la Yesu konda lɔ̈mbɔ loau, la iyo losɔngɔmɛsɛ botukä bototi wau oso wande, 28iyo lowatola bisinda yande, iyo lowates’Inde esinda etelu; 29iyo lotaka likala lia kɛ̈kɛ̈, la iyo lotel’Inde liao nda botö, iyo lɔsɛlɛ isosola nda lingasa lia olome; iyo loswel’Inde balui se la iyo lotak’Inde kömbö mbo— Liseeli, Bɔkɔta wa BaYuda-o. 30Iyo lochwɛlɛ Inde sɔi, limɔ iyo lɔnɔkɔlɔ isosola, iyo loomaka Inde nda botö la shao. 31Limɔ asiläk’iyo ndot’Inde kungutu, iyo losokoel’Inde esinda etelu, iyo lowates’Inde esinda yande angɛnɛ, limɔ iyo lɔkɛs’Inde okaol’Inde nda lieka.
Liwa nda Lieka
32Akuswäk’iyo nda okenge, iyo lotowana la boto wa Kulene, lina liande liko Simona, iyo lotoles’inde lieka. 33Iyäk’iyo nda elela eyatangomoko mbo Ngolongota (litina mbo Longö-loa-otö) 34iyo lofaef’Inde bänä babuyani la lisoo lia shungu, alɛtɛk’Inde bao, nde atikulie ndomwa. 35Asiläk’iyo ndoanyames’Inde nda lieka limɔ iyo lokaana bisinda yande ko ndota ngongo nda likao, 36lamao iyo loyalaka se tɛɛ ndotingana lande omao. 37Olikolo lia botö wande iyo lota liwanjeli liau owanjel’Inde, mbo— Oyo ende Yesu, Bɔkɔta wa BaYuda. 38Limɔ ba beoni bambale loanyomo nda baeka bau lisanga, amamwito lande, ɔmɔi nda osamba wa olome la ɔmɔi nda osamba wa wali.
39Ebetäkä losungakel’Inde, iyo lofilingekel’Inde betö, 40iyo mbo— Aɛ, oyatomelesa Ndakɔ ya Mungu koswa liasi ko la becho isatɔ, uwesaka lokomba loaɛ angɛnɛ. Eyambo wende Wana wa Mungu, sokwaka nda lieka. 41Imɔ ko kanga ebieti amamwito la Batikasa la biange lolimbokol’Inde, mbo— 42Auwekesäkä basi, atikɔkɔlɛ ndouwesa lokomba loande angɛnɛ. Ende Bokɔta wa Isalaele asokweke nda lieka kwani, limɔ iso koimel’Inde. 43Asolendelo Mungu; ko Mungu ɛlɛmb’Inde, auwesek’Inde ko kwani, eoka Inde angɛnɛ nd’aongäkä mbo— Yende Wana wa Mungu. 44L’eba beoni imɔ ebaanyemesomökö nda baeka lande, iyo lolimbol’Inde.
45Ayäkä buse ifitika, lilima lokwa nda yese etotina konda lilongolongo, 46Lamao tina la lilongolongo Yesu lota limiki lifi, Inde mbo— Eli, Eli, lama sabakatani? lile mbo— ¿Mungu wami, Mungu wami, moni osomachaka’mi booi? 47Bamɔi ebemaläkä omao, iyo looka, iyo mbo— Inde nd’asota Eliya lioi. 48Lisasaya ɔmɔi wau lokwa mangu okɔsɔ lilamba, inde lɔfɔɛsɛ liao nda bänä, inde lota liao nda ifende, inde lofa Yesu amweke. 49Nde ebamɔi loonga mbo— Macha, twɛnɛkɛ ango Eliya ataya oyauwes’Inde.
50Lamao Yesu lota limiki lifi liasi, Inde lokusola luli nda liwa. 51Kwaamao, esinda ya Ndakɔ ya Mungu losalya yaki imbale ko likolo ko se, la nyɛlɛ lotukatuka la batalɛ loachacha; 52sai loliokolomo la belyo wike ya bato ebengani ebakwäkä ilɔ sha liwa, iyo lokuswakuswaka, 53iyo losekwa nda sai mbisa ya batɛmwɛlɔ ba Yesu, iyo lɔɔtɔkɔ nda Bokenge Botanu, iyo lɔɛnɛlɛ ende bato wike.
54Enɛkɛ Komanda wa basilikani la bato ebatinganaka la Yesu amamwito lande, ɛnɛ̈k’iyo lotukeso loa nyɛlɛ la tolombo etwakelomökö, inde lau lomwaala la bɔwa, iyo mbo— Wewe, Oyo aiki nde Wana wa Mungu.
55Batomali nde wike baaka esika sumbu otichaka elokelomu, batomali ana batutäkä Yesu, basekweläkä Ngalilai okakukia Inde, 56bamɔi baaka nde Malia wa Mangandala, la Malia nyango wa Yakobo la Yose, la nyango wa bana ba Sebedayo.
Liombomu lia Yesu
57Iyäkä nde buse litele, boto wa lifoka oyasekwäkä nda Alimatayo, lina liande liko Yosefa, oyaaka imɔ boeki wa Yesu, inde lɔkɛ ende Pilato okaömba bolyo wa Yesu. 58Limɔ Pilato loonga mbo bolyo bofomoko ende inde. 59La Yosefa lɔɔsɔ bolyo, inde lolingela wao la bisinda bifufu, 60inde loingesa wao nda losai loyai, eloande angɛnɛ eloafuwäk’inde nda batalɛ, inde loundukokola litalɛ lifi liolinja ɛɔtɛlɔ ya losai, limɔ inde lɔkɛ, 61nde Malia wa Mangandala la Malia oyɔmɔi baaka omao, bayaläkä se tina la losai.
62Lɛlɛngɔ, nda lise elisotüta elia lokomyo (loa Yenga), kanga ebieti la BaFalusi lokatowana ende Pilato, 63iyo loonga lande mbo— Ngɛnɛ, tokoenyela mbo e-boto wa bolimbakeli-bo akoyali Inde la liwawi, aongäkä mbo— Mbisa ya becho isatɔ yekuswaka liasi. 64Eokao, taka sumbu ndola mbo losai lɔsɔlɔnɛsɔmɔkɔ sɔlɛ̈ konda bocho w’isatɔ, mbo baeki bande batakɛ okainda Inde limɔ bataonga la bato mbo asokuswa nda liwa; ongoma ikitakitä sha liili sitolonga esha oso la bolimbake. 65Pilato loonga lau mbo— Wende la bato bolambaka, kɛndɛ okasɔlɔnɛsɛ losai sɔlɛ kwa asokɔkɔlɔ ino. 66Iyo lotangwa okasɔlonɛsɛ losai, iyo lokɔkɔmɛsɛ litalɛ la chapa, la iyo lotika basilikani bolambaka loao.
Le Nouveau Testament in Kele (Lokele) © British and Foreign Bible Society, 1958, 2019.