Malako 1
1
1Liakoli lia Mboli Ilau ya Yesu Masiya, Wana wa Mungu. 2Kwa yatomoko nda lokasa loa Bɔtɔndɔli ako Yesaya, mbo— Tɛnɛ, itotoma wɛndi wami oso waɛ ndokakomya mboka yaɛ. 3Limiki litoamama nda liɔmbɛlɛ mbo— Komyaka mboka ya Ngɛnɛ la longamesaka biëli yande. 4Yoane Bolufi ayaka nda liɔmbɛlɛ la anangolaka njasɔ ya lilufi lia lɔmɛsɛlɔmɔ loa njasɔ ibe ko eoka ya likalangani. 5Bato batotina ba kenge ya Yudea la eba Yelusaleme bakuswaka ndokɛnɛ inde. Aoläkä iyo njasɔ ibe yau, balufiomökö lande nda liyande liko Yaladene.
6Yoane awataka esinda ya fuu ya ngamela, la bɔkɔli wa lokofo loa nyama nda lɔtɛta, la alakaka bakelele la wee wa lokonda. 7Inde lonangola mbo— Ɔmɔi atoya liili liami oyasoeta’mi la bofoka. Imi itiengane ndofomo isosha shotulama se ndofaikola ikulu sha tokwaka twande. 8Imi nd’asolufia ino nda balia kongoko Inde elufiaka ino la Bolimo Botanu.
Lolufiomo loa Yesu
9Nda becho ena Yesu losokwa nda Nasaleta ya Ngalilai, la Inde lolufiomo la Yoane nda Yaladene. 10Aeswaka Yesu nda balia, kwamao Inde lɔɛnɛ buse bosoatomo la Inde lɔɛnɛ Bolimo botoaa se kwa ekükü 11la limiki lookana nda use mbo— Aɛ wende wana bosamomu wami. Aɛ nd’atoomalesa’mi finɛ.
12Limɔ Bolimo lɔkɛsɛ Inde nda liɔmbɛlɛ. 13Ayalaka nda liɔmbɛlɛ becho kama inɛi ani atososhelomo la Satana. Ayalanaka la nyama omao, la bakitomo lokukya Inde.
14Akandomökö Yoane nda bɔnyɔlɔlɔ Yesu lɔkɛ nda Ngalilai ndokakambesa bato Mboli Ilau ya Mungu. 15Inde mbo— Mbile esoengana, Bɔkɔta wa Mungu bosoya tina, kalanganaka, imelaka Mboli Ilau.
Lotomo lioi loa Baeki ba oso
16Akɛndɛkɛ Yesu nda ngɔngɛ ya Eliya ya Ngalilai, Inde lɔɛnɛ Simona la Andelo, etungani yande ani batoluwa wɛngɔ eoka baaka baluwi ba swi. 17Yesu loonga lau mbo— Tütaka’mi la itoyales’ino baluwi ba bato. 18Lisasaya iyo lomacha wɛngɔ wau, iyo lotüta Inde. 19Akɛndɛkɛ Inde sumbu liasi, Inde lɔɛnɛ Yakobo wana wa Sebedayo la Yoane etungani yande, nda watɔ ani batowamba wɛngɔ wau. 20Kwamao Inde lot’iyo lioi la iyo lomacha sango wau la bakuwi bande nda watɔ, la iyo lotüta Inde.
Kafenauma
21Limɔ baɛkɛ nda Kafenauma. La nda lise lia Yenga Inde lɔɔtɔ nda ndakɔ ya ɛsɔngɔmɛlɔ la Inde loekes’iyo. 22Iyo lomwaala liekesi liande finɛ eoka liekesi liande liaaka la isosha, inga kwa elia batikasa. 23Omao nda ɛsɔngɔmɛlɔ aaka oto ɔmɔi la bolimo obe. 24Inde loamama mbo— Iso laɛ, twende la loni loasɔ, Aɛ Yesu wa Nasaleta? Osoya oyasɛɛsɛlɛsɛ iso? Isoluwa Aɛ, wende oyo Botanu wa Mungu. 25Yesu loima inde mbo— Yalaka tau, kuswaka ende inde. 26Bolimo obe lowanj’inde lokomba, wao loamama la limiki lifi, wao lokuswa ende inde. 27Batotina lomwaala, iyo lofelakana mbo— Ende to iye? ¿Mbo liekesi liyai-li? Ko la isosha atoima belimo ebe la yao kolitesa Inde. 28Kwamao lokuku loande lofafana nda bekenge bitotina ebitimbi ya Ngalilai.
29Akuswaka Inde nda ɛsɔngɔmɛlɔ, iyo la eba Yakobo la Yoane, lɔɔtɔ nda ndakɔ ya Simona la Andelo. 30Nyango wa wali wa Simona aingalaka la etao nda bindo la lisasaya iyo lokambesa Yesu loasɔ loande. 31Yesu lɔkɛ ende otomali, Inde lound’inde bosamba, Inde loemes’inde la etao lomacha inde, la otomali lokuwel’iyo.
32La likɔlɔse, ilaka buse litele, bato loesel’Inde eba kambo batotina la ebaaka la belimo ebe. 33Bato batoti ba okenge losɔngɔmɔ nda bome. 34Inde losäsola bato wike ba loo loa bɔfɔnɔ la bɔfɔnɔ la inde lokusola belimo wike. Inde lofekela belimo ndoonga eoka baluwaka Inde.
35Lanɔngɔ asiswaka la yombe, Inde lokuswa ndokakɛ nda elela eyetiaka la bato la Inde losombola omao. 36La Simona la ebaaka lande, iyo lotuta Yesu, 37iyo loosha’Inde, iyo mbo— Bato batotina batoluk’Aɛ. 38Yesu lomutola lau mbo— Tɔɛkɛ konda bekenge yasi mbo ikookamelese mboli imɔ komao, eoka iyeli nde loao. 39La Inde lɔkɛ okanangokole nda Ngalilai etotina nda bisɔngɔmɛlɔ la Inde lokusokola belimo ebe.
Boto wa Baɛndi
40Boto wa baɛndi loya oyasombokol’Inde, inde lokwa bakulusembe oso wande, inde mbo— Bɔlɛmbɛ, aɛ kokɔkɔlɔ ndotanesa’mi. 41Yesu lookel’inde ngandi finɛ, Inde lonanola bosamba, inde lomata inde, Inde loonga lande mbo— Ilɛmbi nde ongoma; tanesomoko to. 42Lisasaya baɛndi losekwa, inde lotanesomo. 43Yesu loima oto, Inde lotom’inde ani asoonga lande la boimo mbo— Okambesëke oto angomwitoto. 44Kɛndɛkɛ okatamba bindo yaɛ ende kanga la faefaka Mungu lifaefi kwa ataka Mɔsɛ ekela eoka ya lotaneso loaɛ, kwa ndembe ende bato. 45Kongoko inde lɔkɛ, inde loakola ndokambesa bato la ndomelesa mboli ina, eokao Yesu angokɔkɔlɔ imɔ ndotɛmwa nda okenge. Inde loyalaka nda liɔmbɛlɛ, la iyo lokaeshakane end’Inde nda fangi bitotina.
Le Nouveau Testament in Kele (Lokele) © British and Foreign Bible Society, 1958, 2019.