Malako 3
3
Boto wa bosamba bɔlɛmbɛti
1Lise liasi Inde lɔɔtɔ nda ɛsɔngɔmɛlɔ la boto aaka omao la bosamba bɔlɛmbɛti. 2Iyo lolamba Yesu eluwa atouwes’inde la lise lia Yenga, mbo bawanjeleke Inde. 3Limɔ Yesu loonga la boto wa bosamba bɔlɛmbɛti, Inde mbo— Emalaka, yauku l’ono nd’atiteni. 4Inde loonga lau mbo— Loni losoengana la Yenga, ndokela olau, kwa ndokela obe? ¿Kwa ndouwesa oto kwa ndoola oto? 5Kongo ko iyo loyala hai, Yesu lɔmwɛlɛ iyo la botema wale, inde looka ngandi eoka ya betema yau bewau. Inde loonga la boto mbo— Nanolaka bosamba waɛ. Inde lonanola wao la wao luwa kwa ebɔmɔi. 6Limɔ BaFalusi lokuswa, iyo lɔɔtɔ ikumbɛ amamwito l’eba Helodi mbo bɛnɛkɛ mboka yool’Inde.
7Nde Yesu la baeki bande losekwa, iyo lɔkɛ fangi ya eliya. Wike wa bato lotutak’Inde, l’eba Ngalilai, l’eba Yudea, l’eba Yelusaleme, l’eba Idumea, l’eba fangi yasi ya Yaledene, l’eba yese ya Tuloa la Sidona, 8okakä iyo mboli ya bitotina ebiakelaka Inde, iyo loya ende Yesu. 9Inde loonga la baeki bande mbo batonjelek’Inde watɔ woumbakel’Inde eoka ya bokamu wa bato, mbo batawamak’Inde. 10Eoka Inde louwekesa wike la bato lolingel’Inde la bokamu mbo eba ngwo bamateke Inde. 11La ɛnɛkɛ belimo ebe wɛnɛ Yesu, iyo lotulamel’Inde se, iyo loamama mbo— Aɛ wende Wana wa Mungu. 12Nde Inde loim’iyo mbo bataluwesa bato loasɔ loande.
Baeki bande liu la ambale
13Inde lɔkɛ olikolo lia löngo, lamao Inde lota ebalɛmbɛk’Inde lioi la iyo ana loyel’Inde. 14la Inde lofa bato liu la ambale isosha mbo bayalakeke lande la mbo atomakek’iyo ndokakambesa wɛndi, 15la ndokusola belimo ebe. 16Inde lota eba liu la ambale, bako Simona (Yesu lot’inde lina mbo Petelo) 17la Yakobo wana wa Sebedayo, la Yoane etungani yande (Yesu atak’iyo ambale lina liko Boanegesi, litina mbo Bana ba kaki) 18la Andelo la Filipo, Balatomayo, la Matayo, Toma, la Yakobo wana wa Alufayo, la Tadayo, la Simona wa Kanana, 19la Yudasi wa Keliota, oyawambaka Yesu.
Limɔ iyo loinwa nda ndakɔ, 20la bokamu wa bato losɔngɔmɔ liasi l’ani iyo angokɔkɔlɔ ango ndola bieka. 21Okaka bato bande ongoma, iyo loya mbo baundek’Inde; iyo mbo— Asowa loseka. 22Limɔ batikasa ebasokwaka nda Yelusaleme iyo loonga mbo— Asɔɔtɛlɔmɔ la Balasebula, la atokusola beimo ebe ko la lisungi lia bokɔta wa belimo ebe.
Satana la Yesu angosunganaka
23Limɔ Yesu lot’iyo lioi la Inde loonga lau la bembila, Inde mbo— ¿Satana atokɔkɔlɔ ndokusola Satana monito? 24Eyambo bokenge bosoatana bonanakeke limɔ wao boitokɔkɔmɔ. 25Eyambo bofindi bosoatana ongoma, wao imɔ angokɔkomɔ. 26Satana imɔ enana lande angɛnɛ, ani bofoka wande bosoatana aitokokɔmɔ, asosila fɛɛ. 27Eoka boto angokɔkɔlɔ ndɔɔtɔ nda ndakɔ ya bowangɔ mbo aindeke yeka yande, sakolo ko atotakanda bowangɔ, lamao inde koindaka ndakɔ yande.
28Ongoma isoonga lanu wewe mbo— Njasɔ ibe bitotina bitomɛsɔlɔmo la basɛɔli batotina ba bato imɔ, 29sakolo ngo ko oyatosɛɔlɔ Bolimo Botanu atiaolɛkɛ limɛsɛli, bobe wande bolayalaka layalaya. 30Inde ongoma eoka bato mbo— Ale la bolimo obe.
31Limɔ nyango la bitungani yande loya, iyo loemesana lousa loa ndakɔ ani basotoma wɛndi end’Inde ot’Inde lioi. 32La windi wa bato lolingel’Inde, iyo mbo— Tɛnɛ, nyango waɛ la bitungani yaɛ bale lousa la batolük’Aɛ. 33Inde lomutoel’iyo mbo— ¿Nyango wami ndai? ¿Bitungani yami yende ndai? 34Limɔ Inde lɔɛlɛlɛ bato ebayalaka se tina lande, Inde mbo— Tɛnɛ nyango wami la bitungani yami. Inde oyatokela kwa alɛmbi Mungu, inde nd’ale etungani yami la welo wami la nyango wami.
Le Nouveau Testament in Kele (Lokele) © British and Foreign Bible Society, 1958, 2019.