Malako 5
5
Boto wa Bolimo obe
1Iyo loiya nda boili wasi wa eliya, boko yese ya BaKelasene. 2La asaowaka Yesu nda watɔ, lisasaya boto oyayalaka la bolimo obe inde lokuswa nda fowa biko sai oyatowana la Yesu. 3Boto ona aaka la eyaelo yande omao nda fowa biko sai. Angwɛnɛ boto ango ɔmɔi kokɔkɔlɔ okand’inde la bɔnyɔlɔlɔ. 4Akandomökö nde oso bakandomo wike kola bakala la bɛnyɔlɔlɔ, kongo ko inde lɔɔ̈mɔlɔ bɛnyɔlɔlɔ fɔi la bakala inde lotenakaka batena wike; angwɛnɛ oto oyale la bofoka wokakales’inde. 5Becho betoti, la ocho la löwa inde loyalaka nda sai la nda föngo, ani inde loamamaka inde lotinyaka lokomba loande la batalɛ. 6Nde ɛnɛkɛ inde wɛnɛ Yesu esika, inde lofata mangu okatulamel’Inde se; 7inde loaamama la limiki lifi mbo— ¿Iso laɛ twende la loni loasɔ, Aɛ Yesu wana wa Mungu Oyalongeli? Itoomb’Aɛ la lina lia Mungu mbo wokesëke’mi bïale. 8Eoka Yesu loonga lande mbo— Kuswaka ende oto-yo, aɛ bolimo obe. 9Yesu lofel’inde mbo— Lina liaɛ liko ndai? Inde lomutola mbo— Lina liami liko Legione eoka tole bokamu (wa belimo) 10la inde lolɔmbɔkɔlɔ Yesu finɛ mbo atasayëk’iyo nda yese-ye.
11Omao nda fangi ya löngo yaaka liyasa lifi lia ndei ani bitolaka bieka; 12belimo losombola Inde mbo— Kɛsɛk’iso nda ndei ina mbo toɔtɛlɛkɛ yao. 13La Yesu lomachel’iyo la belimo ebe lokuswela oto, yao lɔɔtɛlɛ ndei la liyasa lia ndei lokwa mangu kola löngo konda eliya la yao lowa nda balia, loketi loa yao mbo bilɛfu imbale. 14Limɔ betingani ya ndei lofata mangu ndokakambesa mboli nda bekenge la nda bilanga limɔ bato loya oyɛnɛ lona eloakelomoko. 15Ayaka iyo ende Yesu, iyo lɔɛnɛ boto oyaiki la belimo ani ayali se, la awati esinda la ani ati’mɔ la loseka, ako boto oyaaka la Legione (bokamu wa belimo). Iyo lowänga finɛ. 16Bato ebɛnɛkɛ loasɔ loluwes’iyo loasɔ loa boto wa belimo la eloa ndei; 17iyo loakola ndosombola Yesu mbo asekweke nda yese yau.
18Akwaka Yesu nda watɔ, boto oyaaka la belimo lofela Yesu mbo ayaleke lande. 19kongo ko Yesu atiakuliaka, nde Inde loonga lande mbo— Kɛndɛkɛ nda ndakɔ ende ebaɛ la kangesak’iyo ebifi ebisokeela Mungu ende aɛ la ngandi eyesookel’Inde aɛ. 20La oto lɔkɛ eyande, inde loakola ndomelesa mboli nda Ndekapoli ya njasɔ bifi ebiakelaka Yesu ende inde, la batotina lomwaakala.
Wana otomali wa Yailo
21Alekaka Yesu la watɔ konda boili wasi, windi wa bato lɔsɔngɔmɛlɛ Inde ani ayali nda ngɔngɛ. 22La ɔmɔi wa bekumi ya ɛsɔngɔmɛlɔ loya, lina liande liko Yailo, ɛnɛkɛ inde ɔɛnɛ Yesu inde lokwa balui se, 23inde losombola Inde finɛ, mbo— Wana otomali wami ɔkɛkɛ asoya oko tina lowa, Yauku oyatalia inde osamba waɛ mbo uweke la mbo aikeke imɔ. 24Yesu lɔkɛsɛnɛ lande, la windi wa bato lotutak’inde, iyo lowamakana lande. 25Bɔtɔmali ɔmɔi aaka omao oyaaka la lokambo loa likila ko miaka liu la imbale; 26okäkä wäle finɛ ende kanga wike, la asilesaka bieto yande bitoti, angosäsa ango sinyo, lokambo lɔkɛ la oso. 27Okäkä inde lokuku loa Yesu, otomali loya nda windi wa bato ombisa ya Yesu, inde lomata esinda yande, 28eoka aongaka mbo— Yemata ango bisinda yande, imi kouwesomo.
29Lisasaya likila löma tɔu la otomali looka nda lokomba mbo asosäsa loo loande. 30Yesu imɔ looka mbo bofoka bouwesa oto bosokuswel’Inde, Inde lokikwa nda bokamu, Inde mbo— Ndai amatiki bisinda yami? 31La baeki bande loonga lande mbo— Osɔɛnɛ bokamu wa bato basowamaka’Aɛ, nde kofela mbo— Ndai amatiki’mi? 32Limɔ Yesu loɛlɛlɛ, mbo ɛnɛkɛ oyasokela ongoma. 33Botomali lowänga, inde lonyanga finɛ, eoka aluwi loao elosokelomo end’inde, otomali loya oyakwa se oso wa Yesu la inde loluwesa Yesu bitotina wewe. 34Nde Yesu loonga lande mbo— Wana otomali, liimeli liaɛ lisouwes’aɛ, kɛndɛkɛ la lilatemi la säsesomoko lokambo loaɛ.
35Atitasilaka Inde ndoonga, bato ebasekwaka nda ndakɔ ya Bokumi wa ɛsɔngɔmɛlɔ loya oyaonga lande mbo— Wana otomali waɛ asowa; ¿Otookesa Boekesi likati imɔ monito? 36Nde Yesu looka lioi elisoongomo, kongo ko Inde loonga la Bokumi wa ɛsɔngɔmɛlɔ mbo— Owangëke, imelaka kongo. 37Yesu atiakuliaka oto angomwito mbo atutaneke lande, sakolo ko Petelo la Yakobo la Yoane, etungani ya Yakobo. 38Iyaka iyo nda ndakɔ ya Bokumi wa ɛsɔngɔmɛlɔ Inde lɔɛnɛ limbilititi lia bato la etondo efi ya bato ebatolelaka finɛ. 39Aɔtɔkɔ Inde, Inde loonga lau mbo— ¿Otokela etondo la otolelalela monito? Wana atikwele se, aingali ilɔ. 40Limɔ iyo losɛkɛlɛ Inde finɛ. Inde lumes’iyo atotina lousa, limɔ Inde lɔɔsɔ la sango la nyango ba wana la ebaaka lande angɛnɛ Inde lɔɔtɔ olo aingali wana. 41Aundaka Inde wana bosamba, Inde loonga lande mbo— Talita kumi; litina mbo— Wanaotomali, Imi mbo, Emalaka. 42Kwaamao wanaotomali loemala, inde lɔkɛndɛ, aaka nde la miaka liu la imbale. Bato losisimwa finɛ. 43Limɔ Inde lotel’iyo ekela mbo bataluwesa oto angomwito, limɔ Inde loonga lau mbo bafeke wanaotomali bieka yola.
Le Nouveau Testament in Kele (Lokele) © British and Foreign Bible Society, 1958, 2019.