Chivkeeb 13
13
Anplas Thiab Lauj Sibfaib
1Anplas thiaj coj nws tus pojniam thiab txhua yam uas yog nws tug, tawm hauv tebchaws Iziv mus rau pem Nenkej hauv tebchaws Kana-as sab qabteb, Lauj kuj nrog nws mus thiab. 2Anplas yog ib tug neeg muajtxiag npluanuj heev; nws muaj yaj, muaj tshis, muaj nyuj, muaj nyiaj thiab muaj kub ntau heev. 3Ces nws tawm ntawm qhov chaw ntawd thiab nws txav chaw ib qho rau ib qho zujzus mus rau hauv Npethees. Nws los txog rau ntawm qhov chaw uas nyob nruabnrab ntawm Npethees thiab A-is uas yav nram ntej nws tau los tsuam chaw nyob ib ntus 4thiab twb tau teeb ib lub thaj los lawm. Nws thiaj pehawm tus TSWV nyob qhov ntawd.
5Lauj tus uas nrog Anplas taug kev uake, kuj muaj yaj, muaj tshis, muaj nyuj, muaj cuab muaj yig thiab muaj tubqhe huv tibsi. 6Yogli ntawd, thiaj tsis muaj tshav zaub txaus rau nkawd nyob uake, rauqhov nkawd muaj tsiajtxhu coob heev. 7Ces Anplas cov tub yug tsiaj thiab Lauj cov tub yug tsiaj thiaj sibcav sibceg nyob tsis taus uake. (Lub sijhawm ntawd cov tibneeg Kana-as thiab cov tibneeg Pelixes tseem nyob hauv lub tebchaws ntawd.)
8Anplas thiaj hais rau Lauj tias, “Wb yog kwvtij txivtub, tsis tsimnyog koj cov tub yug tsiaj thiab kuv cov tub yug tsiaj sibcav sibceg li no. 9Yogli ntawd, cia wb sibfaib nyias mus nyob nyias. Xaiv seb koj nyiam sab twg. Yog koj mus nyob sab laug, ces kuv mam mus nyob sab xis; yog koj mus nyob sab xis, ces kuv mam mus nyob sab laug.”
10Lauj tig saib ibncig ntawd thiab pom tias tagnrho lub Hav Yauladees mus thoobplaws rau ntawm Xau-as, mas muaj dej ntau kawg li, zoo ib yam li tus TSWV lub Vaj#13:10: tus TSWV lub vaj: uas yog hais txog lub Vaj Edees. lossis zooli lub tebchaws Iziv ntag. (Lub sijhawm ntawd yog uantej tus TSWV hlawv lub nroog Xaudoos thiab lub nroog Kaumaulas.) #Chiv 2:10; 13:15; Teshl 7:5 11Yogli ntawd, Lauj thiaj hom tagnrho lub Hav Yauladees thiab nws thiaj txav mus nyob rau sab hnubtuaj. Qhov uas nkawd tau sibncaim yogli ntawd. 12Anplas nyob rau sab tebchaws Kana-as, thiab Lauj mus nyob hauv tej nroog uas nyob raws hav thiab mus tsuam chaw nyob ze lub nroog Xaudoos. 13Cov neeg Xaudoos ua phem ua qias thiab ua txhaum tawmtsam tus TSWV loj kawg li.
Anplas Txav Mus Nyob Rau Henploos
14Tomqab uas Lauj ncaim lawm, tus TSWV hais rau Anplas tias, “Koj sawv ntawm qhov chaw ko thiab tsa qhovmuag ua tibzoo saib mus rau sab qabteb thiab qaumteb, hnubtuaj thiab hnubpoob. 15Kuv yuav muab tagnrho lub tebchaws uas koj qhovmuag pom no rau koj thiab koj cajces, thiab lub tebchaws ntawd yuav yog koj tug mus ibtxhis li. 16Kuv yuav pub kom koj muaj cajces coob heev, npaum nkaus li tej hmoov av hauv ntiajteb uas suav tsis txheeb li! 17Ciali sawv thiab mus kom thoobplaws lub tebchaws, rauqhov Kuv yuav muab tagnrho tej ntawd rau koj.” 18Yogli ntawd, Anplas thiajli txav tawm ntawm thaj chaw ntawd thiab mus tsa tsevntaub nyob ze tsob ntoo xeeb ntawm thaj chaw Males hauv lub nroog Henploos, thiab nws teeb tau ib lub thaj ua chaw fij khoom rau tus TSWV nyob rau ntawd.
© 2022 United Bible Societies. All rights reserved.