LUKE 24
24
Ringkhalui
(Mat 28.1-10; Mk 16.1-8; Joh 20.1-10)
1 #
Mat 28.1-8; Mk 16.1-7; Joh 20.1,11-13. Haptāwui kharethang ngathorthakva̱ sha̱naobing china ngarān kahai nganamkaphā thaoyur bing chi khuiphungda chikhurpamli vai. 2Athumna chikhurwui lungsham khalangshokhairakasā chi thei. 3Kha chikhurli zangkhayang eina angun maleisāmana. 4Ningreikhasut eina leilakha hānshi kahai kachon khangavai mi khani athumwui ngalemli nganingsai. 5Athumna ngacheenāhaida ngaleili mashunkazang eina anina hānga, “Khisāda kathewui ngachaili kharingali phākhala? 6#Lk 9.22; 13.32-33. A hili maleimana kha ringshokhaira. Galileeli leilakha ana nathumli kathada hāngmihaikhala kaji chi phaningunglu: 7‘Miwui Naomayarali morei kaphungbingwui pāngli horsangmida krushtungli shaothatra kala kakathumathang ringluira.’” 8Chieina sha̱naobing china hāngkahai tui chi phaningunga, 9kala chikhurwui eina hanungda tui saikora chi tharāda akha eina chili leikasābing saikorali unghānga. 10#Mk 16.1; Lk 8.1-3; Joh 20.2. Paokazatbingli ungkahāngbing chiya Mary Magdalene, Joanna, Jameswui ava̱ Mary kala athumli ngayurkasā sha̱nao khangateila zanga. 11Kha tui chi hangphāphā kajina da sākhangatha̱bingna makhuisangmana. 12Kha Peterna ngakarthuida chikhurli ngasamvāda khayang chitharan khamanaka kachon chimāng leisai, kala kathāhaokhala da matakhak eina shimli latunghaowa.
Emmausli Khavā
(Mk 16.12-13)
13Chithang Jishuli kashura mi khani, Jerusalemwui eina Kilometre tharā sha̱kha katā Emmaus kaho kha̱ akhali vākida zatlakha, 14shokkahai maram saikora anina ngazekzatsai. 15Anina ngazekzatmamānda leilakha Jishuna rānganaida anili ngasozata. 16#Joh 20.14; 21.4. Kha anina ali mamachutrarthuwa. 17Chieina ana, “Nani khi ngazekazatkhala?” da ngahāna. Wukkhananglak eina ani khani nganingshakhaowa. 18Aniwui ngachaili Cleopas kaho china ngahānkai, “Aruihon Jerusalemli khi shokmameikhala kaji makathei namānga, na kachiwui eina kharākhala?” 19#Mat 21.11; Lk 7.16; 13.33; Ots 3.22. “Khi sāthukhala?” da ana ngahāna. “Nazarethwui Jishuli shokkahai maramna. Mipā hi Varewui mangalila, miwui mangalila kala otsak, tuimatui saikorali pangshap khaleia marān akhana” da anina ngahānkai. 20“Ithumwui pāngmon akhokabing, kala kathānabingna ali kathiwui tandi mikhavai horsangmida krushtungli shaothathaowa. 21Israelli ngatangmiki kaje chi alaka da ithumna chihānsai. Chili lāngda otshot hi shokta ajana kathumthanghaira. 22Matakhak kahaipāva, ithumwui ngachaili sha̱nao kaikhana unghānga, kaja athumna ngathorthakva̱ chikhurpamli vai, 23laga awui angun maleisathu-iji, kazingrao khani leisāda Jishu ringhaira da anina hānga ji. 24#Joh 20.3-10. Ithumwui ngasotnao kaikhana chikhurli ayanga kala sha̱naobingna kahāng chi tākam eina leisai, kha aliva matheithuwa.” 25Chieina Jishuna anili hānga, “O mangkhama̱ khani! Marānbingna hāngkahai saikora chili mashitkasang! 26Awui tekhamateili zangkhavai Khristana kachotkachāng phungphalungki kaji maningmalā?” 27#Lk 24.44-45; Ots 28.23; 1 Pet 1.11. Moseswui eina thuilaga marān saikorana awui maramli kapihaikasā katonga chi Jishuna anili khalatmisera.
28 #
Mk 6.48. Anina vāki kaji kha̱ chi nganaiuwa, kha Jishuna tāmei vāki kaji thada kathei eina, 29anina khāmda hānga, “Ara, kazing yingda taiura, nala hili pisanghaosa” kaji eina ala mayāda pamsanghaowa. 30#Lk 9.16; 22.19. Phazāuki kaji eina ana khamui khuida seihā sālaga serkhaida ngayarmi, 31kala aniwui mik mathingmida a khipākhala kaji theingasakhaowa. Kha aniwui eina shimānhaowa. 32“Shongfali zatmamānda ana chān khangazek kala Varewui tui pheikachithei tharan ningli meikachui mathāmalā?” da ani akha eina akha ngazek ngaroka. 33Anina ngalāngda ngakarthuida Jerusalemli latunga; chitharan tharāda akha kala athumli khangasobing chi kazipkha sāda leikasā chi ungthei, 34#1 Cor 15.5. kala hithada hānga, “Proho kachangkhat ringluihaira, Simonli rāchitheihaira!” 35Chiwui thili anina shongfali khi shokmameikhala kaji kala khamui serkakhaili anina kathada theikhuikhala kaji saikora meisā eina hāngchithei.
Sākhangatha̱bingli Rāsamkaphang
(Mat 28.16-20; Mk 16.14-18; Joh 20.19-23; Ots 1.6-8)
36 #
Joh 20.19-20,27; Joh 21.5,9-13; 1 Cor 15.5; Ots 10.40-41. Anina hāngchithei mahungda leilakha Jishuna athumwui alungli rānganingda hānga, “Nathumli chingrihairanu.” 37Kashuirakhaida athumna kathi manglākā da phaninglaga ngacheelakhaowa. 38Kha ana hānga, “Khisāda ngacheeda ningli chukmaja̱phāphākhala? 39#1 Joh 1.1. Hi ilaka kaji theikhavai iphei, ipāng rāyanglu ili singyanglu, khikhalajila nathumna ili kathei thada kathi manglāva asā eina ara̱kui mangavāmana.” 40Hi hānglaga apāng eina aphei athumli chithei. 41Athumna ringphanāhaida mashitsangrarmada matakhak eina leilakha ana hānglui, “Nathumwuili khikhakha shaikhavai leilā?” 42Chieina athumna hangkahai khaih akha khuimi, 43ana chi khuida athumwui miktāli shai.
44 #
Lk 24.26-27; Ots 28.23. Chiwui thili ana athumli hānga, “Hi ina nathumli ngasopamlakha hāngkahai, matui kahai saikora china, kaja marānbingwui lairikli, Moseswui ningkhami lairikli, Laa lairikli kapi kahai saikora chi ungshungphalungra.” 45Chiwui thili Katharatui chi theishingkhui khavai athumwui ning mathing ngasakta hānga, 46#Hos 6.2; 1 Cor 15.3-4. “Hithada kapihaili, kaja Messiahna kachotkachāng phungphalungra kala kakathumathang kathiwui eina ringluira. 47#Ots 1.4-8; Mat 28.19. Kala awui ming singda nathumna Jerusalem eina thuida miyur saikorali ningngateida morei pheokhavai pao hāshokra. 48Nathumna ot saikora hiwui shākhina. 49#Ots 2.1-4; Joh 14.26; 20.21-23. Kala yanglu, ina iwui Avāwui ngashit kahai chi nathumli shirātra, kha atungshongwui eina nathumli pangshap chi mamiranglakha keinung hili honpamsālu.”
Kazingramli Khuikakā
(Mk 16.19-20; Ots 1.9-11)
50Chiwui thili keinung eina thānshoklaga athumli Bethany eina tangda thānvai kala apāng khangkāda athumli somi. 51#Ots 1.9-11. Ana somimamānda leilakha athumwui eina pakthuida kazingramli khuikāhaowa. 52Athumna mathānthup eina Jerusalemli latunghaowa, 53kala thangkachida khorumshimli kāda athumna Vareli sochikatchinga.
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.