Matayi 1
1
MBUTUKULU AYI BUMUANA BU YESU
Kikhulu ki Yesu
(Luka 3.23-38)
1Tala buididi kikhulu ki Yesu Klisto, muana wu Davidi, muana wu Abalahami :
2Abalahami wubuta Isaki, Isaki wubuta Yakobi,
Yakobi wubuta Yuda ayi bakhomba bandi.
3Yuda ayi nketo andi Tamali babuta Falesi ayi Zala ;
Falesi wubuta Heseloni,
Heseloni wubuta Alami.
4Alami wubuta Aminadabi ;
Aminadabi wubuta Nasoni ;
Nasoni wubuta Salimoni.
5Salimoni ayi nketo andi Lahabi babuta Bowazi ;
Bowazi ayi nketo andi Luti babuta Obedi ;
6Obedi wubuta Isayi ;
Izayi wubuta ntinu Davidi ;
ntinu Davidi wubuta Salomo mu nketo wuba wu Uli.
7Solomo wubuta Lobowami ;
Lobohami wubuta Abia ;
Abia wubuta Asa.
8Asa wubuta Zozafati ;
Zozafati wubuta Zolami
bosi Zolami wubuta Oziasi ;
9Oziasi wubuta Yotami ;
Yotami wubuta Akazi ;
bosi Akazi wubuta Ezekiasi.
10Ezekiasi wubuta Manase ;
Manase wubuta Amoni
bosi Amoni wubuta Zoziasi.
11Zoziasi wubuta Yekonia ayi bakhomba bandi ;
bawu babutuka bu banata bana ba Iseli mu buvika ku tsi Babiloni.
12Buvika bu bumana ku Babiloni,
Yekonia wubuta Salatieli ;
Salatieli wubuta Zolobabeli.
13Zolobabeli wubuta Abuidi ;
Abuidi wubuta Eliakimi ;
Eliakimi wubuta Azoli.
14Azoli wubuta Sadoki ;
Sadoki wubuta Akimi ;
Akimi wubuta Eliudi.
15Eliudi wubuta Eleyazali ;
Eleyazali wubuta Matani ;
Matani wubuta Yakobi.
16Bosi Yakobi wubuta Zozefi wuba bakala di Maliya, ngudi yi Yesu wuba tedila Klisto.
17Diawu zitsungi zioso tona Abalahami nate Davidi zidi kumi zitsungi ziya. Tona Davidi nate thangu bana ba Iseli bayenda mu buvika ku Babiloni ; vaba kumi zitsungi ziya ; bosi tona thangu buvika nate Klisto vaba kumi zitsungi ziya.
Mbasi yisamuna mbutukulu yi Yesu
18Tala phila yibutukila Yesu Klisto : Maliya ngudi andi ; niandi wuba nketo wuzolo kuelo kuidi Zozefi. Buna katudidi ko va nzo dikuela Maliya wubaka buemba vayi mu Pheve Yinlongo kabakila buemba beni. 19Zozefi, bakala diodi dizola kuela Maliya, wuba mutu wusonga, wumanga kuandi kumfuisa tsoni va meso ma batu ; wubaka lukanu lu kumbotula mu kitsueki.
20Bu kaba ku tsi mayindu mu diambu di mambu beni ; buna mbasi yi Pfumu yimmonikina mu ndozi, yinkamba :
—A Zozefi, muana Davidi ! Bika mona boma mu kuela nketo aku Maliya bila buemba buidi yandi mu Pheve Yinlongo kabakidi buawu. 21Wela buta muana wubakala, dizina wela kumbieka Yesu : bila niandi wela kula batu bandi mu masumu mawu.
22Mambu moso mama mavangama mu diambu di dedikisa mambu makamba Pfumu kuidi mbikudi ti :
23 Luwa, ndumba yikambu zaba bakala yela ba mu buemba,
yela buta muana wubakala, dizina bela kuntedilanga
Emanueli, bu dinsundula : “Nzambi widi yeto !”
24Zozefi bu kakotuka, wuvanga mambu moso mbasi yi Pfumu kantuma ayi wubonga Maliya mu ba nketo andi. 25Vayi Zozefi kasia zaba nitu yi nketo andi Maliya ko nate kabuta muana wubakala, ayi wumvana dizina Yesu.
Nkanda wu Moyo, Nguizani Yimona ayi Minkunga
Copyright © 2002 mu dizina di Biblica, Inc.®
Yisadulu mu nsua wu Biblica, Inc.® Minsua mi tsadulu mikinzika.
Kiyombe Contemporary Version, New Testament and Psalms
Copyright © 2002 by Biblica, Inc.®
Used by permission of Biblica, Inc.®. All rights reserved worldwide.