Pi zi tiki 32
32
1Laban a faka amai gorof, a ɵiɓiɗi wuti wiiɗi tiyakaini gaiɗi alini na falakai. A ɓikiɗi a waya aha.
Yakob a zizina sini aŋ nava gaini Ezaw
2Won hlai na Yakob a n'a hala wuzani sek ɗa, ɗai zi ɵeŋ na wiini Alaw e hilisi e nivi gaini. 3Tizaw won hlai n'a tiliɗi a muɗa: Hanɗa a kaŋ na wiini Alaw, a sini yiki ɓa: Mahanayim.
4Yakob a ɵina ɗai wuzani sini Ezaw na tawalni midini afti na Seyir edi war basga na wiiɗi Edom. 5A siɗi gadai a miɗiɗi, aga ki miɗini wiini epin-geza Ezaw maini nɵa: Yakob na begeku a na muɗasi maini nɵa: Mu nasi fu ahani Laban, mu fanasi woni viya haa girna. 6M'aŋ gaini ɵaakai, gaini ablehökai, adumai gaini haakai, bagakai na mɵagai gaiɗi na falakai lai. Mu ɵinaɗi ɗai sini epin-geza Ezaw na ɗa buri e zini zaida ta, kapai a za yim sa ta. 7Ɗai n'e ɵiniɗi e wiyisi sini Yakob e miɗi: Mi hili ahani Ezaw na tawalku ya, ni lai a na halasi arku. Aŋ gaiɗi ɗai pini miya puɗu. 8Yakob a huna gara, hunai n'abai a yimaŋ. A ɓûrwiɗi ɗai na gaini vok sulu: Haakai gaini ɵaakai gaini ɵigini ɗa lai. 9A muɗa gaini warni ɓa: Na ɓa ezaw a cosi li sini vok na ktai, a ɵaraŋ edi tekeɗeɗi, vok n'a hina aga a ka sini.
10Asakal par Yakob a muɗa: Alaw na wiini tiya Abraham, na wiini apa Isaak, tuku EPIƊ-ƊAI na ku muɗaŋa ɓa waya miɗini aftiku sini pinzibaku aga mu zuku pɗem ɗa, 11ta m'agwi gara burini yim na ku zaŋ sa gaini jre-ɗikat na ku zaŋ sini ɗifku zi sda ɗa. Buri avut mu vuga Yurdan gaiɗi amaraŋaiŋa ktai pal. Tiyana m'aŋ gaini vok pa sulu. 12Za barka, plaŋa edi war tini tawala par, war tini Ezaw buri hunai pa wuzani ta. Mu huna ɓa aga e hilisi e fiɗiyi edi gaiɗi falakaiya, gaiɗi aliya lai. 13Tuku ku muɗaŋa ɓa: Aga mu za pɗem suku, aga mu bunda pinzibaku viya maini kaikai n'agoɗom war ra nɵa, n'a sɗa aŋ pɵa kai buri a na viya. 14Yakob a fana war hlai ni ɗa,
Pini farai n'aŋ tini ɗa, a mula zamai buri a siŋni wiini Ezaw na tawalni aŋ katu. 15A mula afkasai miya sulu, baŋgarakai caaɓa, adumai na falakai miya sulu, adumai na maɵagai caaɓa lai, 16ɵigini na falakai zi fiyaw na gaini ali pini doogo doogo hu, ɵaakai doogo doogo puɗu, garakai doogo, ablehökai na falakai caaɓa, na maɵagai doogo lai. 17A saŋ tiɗi ɗaini zi sda. Fara paŋ arni edi kiini kiini, a miɗiɗi: Vigiɗi wuza, ki hini baŋa arbani fara su su. 18Asakal par a sa gadai wiini ɗif zi sda n'avut a muɗa: Won hlai na Ezaw na tawala a nava li gaiku a zilbuku li ɓa: Tuku ku wiini asiya ɗa, ku hala fu wata ɗa? Fara n'aŋ wuzaku ɗa a wiini asiya ɗi ɗa? 19Aga ku wiyini seŋ ɓa a wiini Yakob na ɵeŋku. A katu n'a ɵiniŋnisi wiini epin-geza Ezaw, ni gaini midini dama a na halasi pini par. 20A sa gadai hanɗa wiini ɗif zi sda n'ag'aŋ sulu, asakal par wiini n'ag'aŋ hu, asakal par wiiɗi nagai paŋ n'e hili pini fara paŋ, a muɗa: Sai ki miɗi maini na hanɗa nɵa bas, won hlai na ki nivi li gaini Ezaw ɗa 21Aga ki miɗini pra ɓa: Yakob na ɵeŋku a na halasi piyi par. A muɗa gaini warni ɓa: Nɵa aga mu wiyini hangalni n'a tuura azumai, won hlai na mu ɵina like hanɗa li wuza, asakal par aga mu nava gaini, ablaŋtaŋkai aga a yimaŋa gaini firiyi ɗi? 22Katu ɗa a vugaɗi wuzani, amma duvuk ni ɗa, ni gaini midini a fana ɗa warni kaŋ.
Yakob a daba was gaini Alaw
23War duvuk hanɗa dama a faka amai, a miliɗi falakaini na sulu, bagakai na wuzaɗi na sulu, alini na doogo pi ktai lai, a vuga hlai zi hiwi na Yabbok.
24A miliɗi a kiɗi anene duɓani yem par. Asakal par a bunda wazagaini anene paŋ lai. 25Yakob a hina kiini pal, ɗif ktai a daba was gaini haa gorof na hlai rum rum. 26Won hlai n'a tala ɓa aga a rɗa amai midini kai, a daba Yakob sini doŋolaini, doŋolaini a hurɗa, won hlai n'e ɗa dibi was. 27A miɗini wiini Yakob: Hinaŋa buri hlai a sɗasi edi ɓa. Yakob a wiyini seŋ: Na ɓa ku ɓakaŋa kai ɗa aga mu hinuku kai. 28A miɗini: Yikuku maɵa ɗa: A wiyini seŋ: E yikiŋa ɓa Yakob. 29Ɗif a muɗa pra: Aga e yikuku ɓa Yakob kir kai, amma Izrayel, buri ku daba was gaini Alaw, gaiɗi ɗai lai, ku rɗa amai midiɗi. 30Yakob a zilbaŋ: Za barka, siŋkaŋa yikuku ta. Ɗif a miɗini: Ku zilba yikiŋa buri ma ɗa? Won hlai ni dama a ɓaka Yakob. 31Yakob a yika hlai hanɗa ɓa: Peniyel, a dara muɗa wuzani arni Alaw; buri gaini Alaw mi tili arɗi maryi, m'aŋ kara lai.
32Won hlai na Yakob a vuga Peniyel, futi te diyasi amai, a tupula burini doŋolaini. 33Buri hanɗa alini Izrayel e limi sirdai n'a taɓa arbani ɓalak gaini hoŋor kai, haa girna buri Yakob a nava wuruk sin sirdai hanɗa.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964