ACT 9
9
1Saul tu cu Bawipa zultu a hrocernâk le thah a timh hna nâk kong a chim len rih ko, tlângbawi nganbik sinah a kal i 2hi lam zultu a hmuhmi pauh nu he pa he ṭem buin Jerusalem khua ah a hnuh khawh nâkhnga Damaska khua i Sinagog vialte ah pêk awk ca a va hal. 3Cubangin a kal i Damaska khua a phâk lai ah chikkhat teah a velchum vialte van in a run ceuh. 4Lei ah a tlu i, “Saul, Saul, zeicadah naka serhsat? tiah aw a theih. 5Anih nih, “Bawipa, mizeidah na si?” tiah a ti. Bawipa nih, “Jesuh, na sersatmi hi ka si. Fungzum chuih hi na caah dahkaw a fah ko,” tiah a ti. 6Khuaruahhar le ther buin, “Bawipa, zei tuah dingindah naka duh?” tiah a hal. Bawipa nih, “Tho law, khua ah va lut, cuticun na tuah ding cu chimh na si lai,” tiah a ti. 7A sin i a kalmi hna cu ngang koin an dir, aw cu an theih ko nain, ahohmanh an hmu lo. 8Saul cu vawlei in a tho i a mit a au tikah pakhat hmanh a hmu kho lo, a kut in an tlaih i Damaska khua ah an luhpi. 9Nithum chung khua hmu loin a um i zeihmanh a ei in a ding lo. 10Cubangin Damaska khua ah zultu pakhat, a min Ananias a um. Bawipa nih langhnâk in, “Ananias” tiah a ti. Anih nih, “Bawipa, hika ah ka um,” tiah a rak ti. 11Bawipa nih, “Tho law, lamding timi kha zul law, Judas innah Tarsas khua Saul kha va hlat, thla a cam lio a si. 12Anih nih langhnâk in mi pakhat, a min Ananias a sinah lutin a mit deinâk dingah a cung i kut a chuanmi bangin a hmuh cang,” tiah a ti. 13Ananias nih, “Bawipa, cu pa cu Jerusalem i na mithiang hna cungah fahnâk nganpi a tuahtu a si, tiah mi tampi sinin ka theih. 14Hika zongah na min a hlammi hna a ṭem khawh hna nâkhnga tlângbawi ngan hna sinin nawlngeihnâk a hmuh cang,” tiah a ti. 15Asinain Bawipa nih, “Kal ko, Jentel mi le, siangpahrang hna le, Israel mi hna sinah ka min luhpitu dingah ka thimmi ûm a si. 16Zeitintiah ka min ruangah zeibantuk harnâk dah a temtuar te lai, amah ka hngalhter te lai,” tiah a ti. 17Ananias cu a va kal i innah a lut, a cungah a kut a chuan i, “Unau pa, Saul, na mit deinâk ding le Thiang thlarau in na khah khawh nâkhnga, Bawipa Jesuh, na ratnâk lam i â langmi nih khan a ka thlahmi ka si,” tiah a ti. 18Chikkhat teah a mit in phuhlip bantuk a tla i a mit nih khua a hmuh cawlh. Cun a tho i baptisma a in cawlh. 19Rawl a ei i thazâng thar a hun ngei. Cun Saul cu Damaska khua i zultu hna sinah ni zeimawzat a câm. 20Sinagog ah Krih cu Pathian a si zia a aupi cawlh. 21A theitu hna nih, “Hi pa hi Jerusalem khua i hi min hlamtu hna a serhsattu kha a si lo mei? Cu mi hna cu ṭem buin tlângbawi hna sin i hruai awkah hi khua ah a ra a si lo maw?” tiah an ti i mak an ti ngai ngai. 22Saul cu a ṭhawng chin lengmang i Jesuh cu Krih a si zia fiang tein a chim tawn, Damaska khua i Judah mi hna cu holhnâk thei loin a tuah tawn hna. 23Ni tampi hnuah, Judah mi hna nih Saul thahnâk ding khua an khâng. 24Asinain an khuakhân kha Saul nih a hngalh. Amah that dingin kutkâ vialte ah an rak bawh dih. 25Cuticun zultu hna nih zanah an kalpi i khua kulhnâk cungin bawm nganpi in lei ah an ṭhumh. 26Saul cu Jerusalem a phâk tikah zultu kha kawmh a timh hna, asinain annih nih an dihlak in an ṭih, zultu a si kha an zum lo. 27Asinain Barnabas nih anih cu a kalpi i lamkaltu hna sinah a ratpi. An sinah, lam i Bawipa a hmuh i a chawnhnâk kong le Damaska khua i Jesuh minin ralṭha ngai in bia a chimnâk kong kha a chimh hna. 28Cuticun Saul cu Jerusalem khua ah an sinah lutchuak in khua a sa ve. 29Bawipa Jesuh minin ralṭha ngai in bia a chim tawn, Grik Judah mi hna he fakpi in an i al tawn i annih nih thah an timh. 30Unau hna nih an hmuh tikah, Sisaria khua ah an zuanpi i Tarsas khua ah an kalter. 31Cuticun kawhhran hna cu Judia ram vialte le, Galili le Samaria ah an fek chin lengmang i hnangam tein an um. Bawipa ṭihzah le Thiang thlarau hnangam terin an um i ankarh chin lengmang. 32Cubangin Peter nih ram pumpi a ṭol dih in Lidda khua i mithiang hna sinah a va kal. 33Cuka ah mi pakhat a min Ainias a zen ruangah kumriat chung ihkhun ah a itmi a va hmuh. 34Peter nih, “Ainias, Jesuh Krih nih an damter cang, na ihphah zual,” tiah a ti i chikhatte ah a tho. 35Lidda le Saron khua i a ummi vialte nih amah kha an hmuh i Bawipa lei ah an i mer. 36Joppa khua ah zultu pakhat a min Tabitha a um, cucu Dorkhas ti a si, a sullam cu sazuk tinâk a si. Cu nu cu ṭhatnâk tuah le misifak bomhnâk lei ah nun siang ngaimi a si. 37Asinain a zaw i a thi. An khawlh i in cungah an suan. 38Lidda khua cu Joppa khua pawng a si caah zultu hna nih cuka i Peter a um kha an theih tikah a ran khawh chungin an sinah ra dingin nawl awkah mi pahnih an thlah. 39Peter cu a tho i an sinah a kal. A phâk tikah in cungdot ah an kalpi i cuka i nuhmei vialte kha a pawngah dirin Dorkas an sin i a um lio i angki a sermi le puan a tahmi hna zoh pah in an ṭap. 40Peter nih an dihlak in a chuahter hna i thla a cam. Ruak lei cu a zoh i, “Tabitha, tho tuah,” tiah a ti. A mit a hun au i Peter kha a hmuh i a ṭhu cawlh. 41Peter nih a kut a chanh i a thawhter. Cun mithiang hna le nuhmei kha a kawh hna i dam in an sinah a kalpi. 42Cucu Joppa khuami vialte nih an hngalh dih i mi tampi nih Bawipa an zumh. 43Peter cu ni tam nawn Joppa khua ah saphaw sertu Simon sinah a câm.
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.