LUKA 21
21
1A hun zoh i thawhlawm kuang i mirum hna thawhlawm thlakmi kha a hmuh, 2a si a fak ngaimi nuhmei nih dar phaisa sen pakhat te a thlak lio kha a hmuh ṭhân. 3Cun an sinah, “Biataktein kan chimh hna, ‘hi vialte hna nâk in nuhmeinu nih a thlakmi a tam bik; 4zeitintiah hi hna nih an ngeih hlei Pathian caah an pêk, anih nih cun sifak buin a nunnâk ca i a hmanawk kha a pêk dih,” tiah a ti. 5Cuhnuah mi cheukhat nih ṭempal `amhnâk lung â dawh ning le, pekchanhmi hna hmangin ṭamhmi a sinâk kong an chim lio ah, 6“Hi nan hmuhmi lungrual hna hi, chimh lomi pakhat hmanh a um lai lo, cubantuk ni cu a phân te lai,” tiah a ti. 7Annih nih, “Cawnpiaktu, cu thil cu zeitikahdah a si lai, cuthil a phâk lai i hmelchunhnâk kha zeidah an si lai?” tiah an hal. 8Anih nih, “An in hlen nâkhnga lo i ral ring u. Mitampi nih, ‘Amah cu ka si, an ti lo le, a cân a phân deng cang, tiah keimah min chalh in an ra lai. Cunbantuk mi cu zul hna hlah u. 9Raltuknâk thawng le buaibainâk thawng nan theih tikah awlok chong in um hlah u, zeitintiah cu thil hna cu a um hmasat awk a si ko, asinain donghnâk tu cu a phân colh rih lai lo,” tiah a ti. 10Cun an sinah, “Miphun le miphun an i doh lai i ram le ram zong an i doh lai. 11Hmun dang dangah li fakpi in â hnin lai i hmun tampi ah mangṭâm a tlung lai, zawtnâk a phunphun a chuak lai i van in hmelchunhnâk lianngan le ṭih a nungmi an lang thluah mah lai. 12Cuthil vialte a phâk hlanah an in tlaih hna lai i an in serhsat hna lai, sinagog le thongah an in thlak hna lai, ka min ruangah bawi hna le uktu hna hmaiah thiam lo coter dingin an in luhpi hna lai. 13Asinain cu hmun cu keimah kong nanka hngalhpinâk hmunah a cang lai. 14Cucaah nan lehnâk ding bia kongah i ruat cia lo dingin ruahnâk fek tein um u; 15zeitintiah nan ral hna nih an leh khawh lo tiangin fimnâk le kâ kan pêk hna lai. 16Nannu le nanpa, nan unau le nan rualchan le nan hawi le hna zong nih an in rawi hna lai, a cheu hna cu thah zong an in thah hna lai. 17Ka min ruangah mi vialte huat nan hlawh lai. 18Asinain nan samfang pakhat hmanh a tlau lai lo. 19Nan in khawhnâk nih nan nunnâk a khamh lai. 20“Asinain ralkap rual nih Jerusalem an kulh nan hmuh tikah hrawh le rauhtak cân a nai cang tiah nan hngalh lai. 21Cu cân i Judia ram i a ummi hna cu tlangcungah zâm hna seh, a chungah a ummi nih chuahtâk sehlaw, hau lêng i a ummi cu a chungah lut hlah seh. 22Zeitintiah cuni cu teirul cham ni a si, cu kong i ṭialmi vialte a tlin dih nâkhnga. 23Cu ni ah fapawi le nau a pawmmi hna caah ava poi lai dah! Hi ram ah hin harnâk nganpi a phân lai, hi miphun hna sinah thinhunnâk kha a phân cang lai. 24Vainam in sâm an si lai i miphun kip sinah sal ah hruai an si lai. Jerusalem cu Gentel mi hna caah cân khiahmi a tlin hlan pauh cu Gentel hna lamhchih in a um lai. 25“Cun ni le thla le arfi ah hmelchunhnâk a um lai. Rili le tilet thawngpang ruangah vawlei ah a ruah awk an hngalh lo tiangin harsatnâk le vansannâk a phân lai. 26Van thiltikhawhnâk â hnin lai, vawlei i a phân zau hngami thil hna an ṭih tuk ruangah patling hna lungthin thaba in thi hnikin an um lai. 27Cu cân ah Mi Fapa hi thiltikhawhnâk le a liannganmi sunparnâk he minmei lak i a rat kha an hmuh lai. 28Cuthil hna cu a rak phanh hlan ah, van cau in, cunglei khi zoh u, zeicatiah nan tlanhnâk ni cu a nai cang,” tiah a ti. 29Cun an sinah tahchunhnâk a chim, “Theipi kung le thing vialte hi zoh hna hmanh u, 30A hnah a cawrh kha nan hmuh tikah, vaupi a nai cang tiah nan hngalh. 31Cubantuk in nan nih zong nih cu thil hna a phânmi nan hmuh tikah, Pathian Pennâk a nai cang, tiah nan hngalh lai. 32Biataktein kan chimh hna thil vialte an tlin dih hlan lo tuchan ṭhangthar hna hi an lo lai lo. 33Lei le van a lo lai i ka bia tu cu zeitileihmanh in a lo lai lo. 34“Asinain nanmah lei ah i ralring u, culoahcun nomhhnaihnâk mên ah, zu le sa he, nunchung khuasak tintuknâk he nan um lioah cu ni nih cun an hlauh sual hna lai. 35Zeitintiah lei cung i a ummi vialte hna sinah rapfoih bantukin a phân dih lai. 36Curuangah cuthil vialte a phân hngami chungin luat awk tlâk le Mi Fapa hmai i dir awk tlâk nan si khawh nâkhnga thla cam zungzal u law i ral ring u. 37Chun cân ah ṭempal ah a cawnpiak tawn i zanah Oliv tlangah a riak tawn. 38A chimmi bia ngai dingin mi vialte cu zingkate ah ṭempal ah an ra tawn.
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.