JOHAN 3
3
Jisu Le Nekodema Zen Kenthonkethyü
1Lo Nekodema tsekethyü Judanyu kedanyu nme le Farisinyu dan nyu hü. 2Tsügü le kezün ki gunryüo Jisu ka, “Rabi, nle Sunggigü kanyu gunkeryü senkethyünyu nme tsekethyü agun le sha bin nyo. Kechamvule Sunggigü le zen hü kemvu we temi nme-e nle tha zansü thyü keshü hithyülo keho genyu.”
3Jisu le a-ka, “Ale nka zo tsentsü shüti le, nnyu keshün nilo kemvu we temi nme-e Sunggigü keda bin hyu loho.”
4Nekodema le a-ka, “Temi le peshü kela le nyu tsetyüo nnyu keshün nilo tila? A-jvü gin nyu niyüo nnyu nilo gwa ole?”
5Jisu le a-ka, “Ale nka zo tsentsü shüti le, zü lo Kapu nyu nnyu kemvu we temi le Sunggigü keda bin nyu yü loho. 6Nthyü ge kenyu le nthyü, lo Kapu gü nyu kenyu le Kapu gü. 7Ale hagun nnyu keshün nilo mvuloshvu tsonkeshü genyu ndun thyü nya. 8Tsang le nbu sen-o a-kenyü kipon gunla hü, lo nle a-khwen nyülo hünyo; tson-e a-le dikipon ryü, lo dikipon güla hüyo, nle tsü sha hümvu. Temi lihigüe Kapu nyu kenyu le tsü a-keme.”
9Nekodema le a-ka, “Tha tsü le nyu tsethyüo thyülo tila?”
10Jisu le a-ka, “Nle Israel nyu senkethyü nyu thyüo jo hi shamvu la? 11Ale nka zo tsentsü shüti, a we a kesha jo zohü nyo, lo ale kehyu rüla zo hünyo, ai hagun le ajo zenlo hümvu. 12Ale hagun ka kazünyu jo zo shüe hagun le tsüe tenyenlo mvulo, ale hagun ka tsangge rüla zo yatselo hagun le nyu tsethyüo tenyenlo tila? 13Tson-o tsangge kebin Temi Nyugü le tsüryü kemvu we temi nme-e tsangge kü shwi mvu.”
14Lo nduka Mosa le tehen nyu peri penkeso hontse Temi Nyugüe penso shü mvuloshvu. 15Kechamvule tenyen kelogü le kethonthen kerhün hyulo nrün genyu. 16Sunggigü le kazü sogwari ketsin genyu A-nyu chegü khishü, tson-o temi lihigüe tenyen kelo gü le nkela mvule kethonthen kerhün hyulo nrün genyu. 17Lo kazü gü nmu titse kethyü genyu Sunggigü le A-nyu nipe kazü nyu shü mvu, ai kazü nyu no a-genyu kenikelo hyulo titse kethyü genyu.
18A-tenyen kelonyu nmula loho; ai tenyen kemvunyu we a-le Sunggigü Nyuche gü zan nyu tenyen mvu kela genyu ntsokae nmu bin nyo. 19Tson-o nmu nrün jo tsü le keben gü le kazü nyu ryü, ai temi le a-tho njü kemvu genyu keben gü nyeki kezün gü sogwa kvula. 20Temi lihigüe ntsen serikemvu nyu le keben gü ntsü hünyo, a-tho le mu, tsekethyü kenshvu genyu keben gü ki ryü hümvu. 21Ai temi lihigüe ketsin tho thyü kehünyu we, a-tho le Sunggigü genyu thyü hü tsekethyü pe hishü titseo Sunggigü ki ryü hünyo.
Jisu Lo Johan Baptist Gü
22Tsüselo Jisu le senthyükelonyu zen-o Judia kazü nyu ryü, lo a-le anyugun zen-o tsünyu me baptaiz thyü. 23Lo Johan ko Salim khoki Aenon nyu zü le bin kethyü genyu me baptaiz thyü, lo me ko ryüo baptaiz thyülo. 24Lo tsükatsü le mele Johan ten pe doka nyu shümvu bin zun.
25Lo Johan le senthyükelonyu le Judanyu nme zen-o nthyü kenshün rüla zo kenyi. 26Lo anyugun le Johan ki ryüo a-ka, “Rabi, kerika Jordan züri pere kipon nzen kehü gü nle a-rüla zo kehü gü, tsüle me baptaiz thyü tinla so, lo temi aphu a-ki gun küzhü laso!”
27Johan le zoni shü, “Tsangge hoshü pe temi tsü keshü gü kemvu we a-le thame hyulo ho. 28‘Ale Khrista gü kemvu, ai a-mhundyü ki anikeshü,’ tson-o ale kerika zokehü hagun ko ajo shabin nyo. 29Shenhügi hyukelo tsüle shenhü gü, ai shenhü gü pvünyu dan le bin-o a-khwen nyü kebin tsüle shenhü gü genyu a-kenyü sabin hünyo. Tsügenyu akekenyü tsüle tila so. 30A-no gonkenye kvulo mvuloshvu so, ai awe shen ketsintsin tse mvulo shvu so.”
Tsangge Keryü Gü Rüla
31Tesoki keryü gü le aphu so ge. Kazü nyu chwikeryü gü le kazünyu nyu, lo a-le kazünyu rüla zo hünyo, tsangge keryü gü le aphu so ge. 32A-le a-kesha kehyu rüla zo hünyo, ai temi nme-e a-rüla kezo nyü hü mvu. 33A-jo zen kelonyu we Sunggigü le ketsin gü tsekethyü mohor le a-ge bin hünyo. 34Kechamvule Sunggigü le nikeshü gü, tsüle Sunggigü jo zo hünyo, a-le ndo mvu tse Kapu gü khikeshü genyu. 35Pvügü le Nyugü so hünyo, lo tha aphu hoshü pe a-ben ka shüla so. 36Temi lihigüe Nyugü tenyen kelonyu le kethonthen kerhün hyulo laso; ai temi lihigüe Sunggigü Nyugü jo zen kemvu nyu we kerhün hyulo ho, ai Sunggigü nyukekhü le a-ge bin hünyo.
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.