BOTHUBO 7
7
Azuno Yimi
1AMPEU no Noha vilo pi, “No eno okibolomi kumtsu ashukaki lo ilovelo, kughengu hipau tiqhelimi gholo olikhino izulo amikuchou shi aghi keu ino ithulue. 2Mithemighe keu tughashi eno tikishi jeli lakhi khi lono tuna tsunini atsu ngo aqu sawo ogholo qhilo, ikemu mithekumo tughashi eno tikishi jeliye ajeli lakhi khi lono tuna lakhi sawo qhilo. 3Aghau jeli lono ghi adu aqu ishi tuna tsunini sawo qhilo. Tishianguno itaghi ayeghi shou lhoxu puxupe puanike eno ati kughukolu penike. 4Kughengu atsala tsuni likhivae eno pucho tsala lhobidi eno putho tsala lhobidi ino ayeghi shou tsutsughu ghupe nani eno ino lhophe puakeu akuxu akeu thaqhu ayeghi shouno pughaveni cheni.” 5Ike AMPEU no shilo pikeu toi Noha no ti kumtsu shie.
6Kughou ayeghi shou azukuqo ighikeno Noha ye apunu mipe 600 shiae. 7Eno azuyimikeu zuuno Noha no pa nipu ngo pa nuliqo eno panongu nipu ngo ishi sasu pagholono ashukakilo ilove. 8Mithemighe keu tughashi ngo tikishi jeli gholono, mithekumo tughashi ngo tikishi jeli gholono aghau jeli gholono eno ayeghi shou itikiche lhoxu jeli gholono, 9tuna lakhi khi Noha gholo ashukakilo ilove, ti Alhou no shilopi keu toi. 10Ike atsala tsuni thiu azukuqo ayeghi shou ighie.
11Noha no pa kuxu mipe 600 shi akelo eno aqhi akiniu ti moza qhilo atsala chighi akutsuni ni ayeghi qhou azupuki kumtsu mpakho lava vephe, eno atsutsulo akikighipe kumtsu khaqhive. 12Eno ayeghi shou atsala lhobidi putho pucho tsughuqhie.
13Tipa tsalanino Noha no panipu eno panu hipano kuthu Shem, Ham, Jafet eno panongu nipuqo ishi sasu pa gholono ashukakilo ilove. 14Tughashi jeli, tikishi jeli, itikiche lhoxu jeli eno aghau jeli kumtsu panongu gholo ilove. 15Atuthu akeu lhoxu jeli gholono kinini ighino Noha gholo ashukakilo iloe. 16Eno ighikeqo lhoxu jeliye tuna lakhi khie, tiye Alhou no pa vilo shilopikeu toi panonguno iloghie. Tileno AMPEU no pa khathasuve.
17Tithiuye ayeghi shou atsala lhobidi azuqo ae, eno azu kumzapu shive tino ayeghi shou ashukaki pukilhe ikuve. 18Azuno alau shi ilekitheve eno ayeghi shou kumzapu shive eno ashukakiye azu shou yipe kilhe auve. 19Azuno alau alau shi ilekitheve eno atsutsu qholo naghuto kiqhe kumtsu vesuwuve, 20tino naghuto kutsuqaqo nguno alau miter tsuni ile kithe ikuve. 21Aghau pina, tikishi pina, tughashi pina, itikiche lhoxu pina eno timi pinamu, ayeghi shou lhoxu ithachekeqo kumtsu thikhave. 22Ayeghi qhai kelo achekeu eno anigipe lono atuthu shechekeu lhoxu kumtsu thikhave. 23Ayeghi shou akuxu akeu thime thaqhu kumtsu pughave, timi lono tughashi, tikishi eno itikiche lono aghau kutolo. Eno Noha ngo pagholo ashukakilo akeqo likhi puhamono ghulue. 24Ayeghi shou atsala 150 azu haumono ae.
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.