NASEPTE 14
14
Ikonium ah
1Tualeh Ikonium khua ah hichi ahung hi a, Judate kikhopna inn ah alut khawm ua, thu agen ua, tuachi`n Judate leh Grikte tamtak in agingta ta uhi. 2Hinanleh agingta lou Judate`n Jentelte achilsia ua, unaute a mudahsak ta uhi. 3Tuajiakin Toupa ah hangsan tak a thu genin huasan ah sawttak aom ua, amau`n chiamtehnate leh sillamdangte akhut ua bawlsakin, a hehpih thu atheisak jel uhi. 4Hinanleh khuapi sung a mipite aki langkhen ua, khenkhat in Judate agum ua, khenkhat in sawltakte agum uhi.
5Tualeh Jentelte leh Judate`n alamkaite utawh kithuah a sawltakte jumhuaitak a bawl leh suang a den sawm a a buailai un. 6Amau`n hihthu ana thei ua, Likaunia gam a Litra leh Derbe khua tualeh akimvel gam ah ataimang uhi. 7Huasan ah tangthupha a genta uhi.
Listra leh Derbe khua ah
8Tualeh Litra khua ah kengjaw kuahiam mi khat atou a, apiantung a pat kengbai mawng ahi a, keng in apaikha ngaikei hi. 9Hihpa`n Paul thugen angaikhia a, tualeh Paul in limtak in a en a, a damna dingin ginna anei chih athei a 10aw ngaihtak in, “Na keng in dingtang in!” achi a, tuachi`n amah akitawm a, akeng in apaita hi. 11Tualeh mipite`n Paul silbawl amuh tak un, aw ngaihtakin akikou ua, Likaunia ham in, “Pasiante pen mihing bang a ikiang ua hungpai ahi uh!” achi ua. 12Tualeh Barnaba pen Jupiter achi ua, Paul pen thugenpen ahih jiakin Markuria achi uhi. #Jupiter, amindang Zeus=Grikte pasian lak a lianpen (chief) ahi a, tualeh Markuria, amindang Hermes=Kamtai (thupualeh a pang messenger god) Grikte pasian min khat ahi. 13Tuachi`n, khuapi kong mai a om Jupiter siampipa`n bawngtalte leh pakvui kongpi bul ah ahung tawi a, mipite tawh amauh gel biakna dingin thah atum hi.
14Hinanleh sawltakte, Paul leh Barnaba in hua atheih tak un apuan uh a botkek ua mipi lak ah atawmlut ua, akikou ua, 15“Pute bangding a hih silte bawl nahi uhiam? Kou zong noutawh thuak kibang ka hi uhi! Tualeh hih sil thulim loute na kiheisan ua, van leh lei tui khanglian tualeh asung a sil om jousiah bawlpa Pasian kiang ah nung kihei theihna ding un tangthupha kung tut uh ahi. 16Hua Pasian in nidanglai in namchin amauh lampi chiat a apai aphal a. 17Ahihhang in amah theihsakna bawllou in ama thuin a omsak kei hi: tuachi`n silhoih abawl jel a, van a pat guahtui leh gahpha bangkim ahung pia a, ilungtang uh nek ding leh kipakna in adimsak jing hi,” achi ua. 18Tualeh hihthute genin mipite`n amauh biakna ding a gan agoh ding uh a kham jou hamham uhi.
19Tuachi`n Antiok khua leh Ikonium khua a pat Juda kuate hiam huasan ah ahung pai ua, mipite akhem jou ua, tuachi`n Paul suang in adeng ua, si a agintat jiak un khuapi geilam ah akaikhia uhi. 20Hinanleh gingtute aki`m a adin laiun, ahung thou a, khuapi sung ah ahung lutkikta a, tualeh ajing in Barnaba tawh Derbe khua ah apaita uhi.
Suria gam Antiok khua a kilehkikna
21Tualeh amau`n hua khuapi ah tangthupha agen ua. Nungjui tampi asiam khit un Listra leh Ikonium leh Antiok khua ah akileh kikta uhi. 22“Gimna tampi thuakin Pasian gam ah ilut ding mawng uh ahi,” chi`n nungjuite lungsim a kipaksak ua. Ginna a omgige dingin a hanthawn uhi. 23Tualeh saptuam chin a upate a namdet ua, an ngawla athum zoh un amauh aginna uh Toupa kiang ah akemsakta uhi.
24Tualeh Pisidia gam atawnsuk ua, Pamphilia gam atung ua. 25Tualeh Perga khua a thu agenzoh un Attalia khua ah apaisuk ua, 26huasan a kipanin gunkuang in apai ua, a nna sepsa uh sem ding a unauten Pasian hehpihna kemsak a apawtna uh Antiok khua ahung tungta uhi.
27Tualeh a hungtun un saptuamte asam khawm ua, Pasian in amauh zang a sil abawl jousiah leh Jentelte ding a ginna kongkhak ahonsak dante ahilh uhi. 28Tuachi`n nungjuite tawh sawtpi a omkhawmta uhi.
Thangkhal NT - Thukhun Thak
Copyright © 2014 by The Bible Society of India
Used by permission. All rights reserved worldwide.