MATHAI 15
15
Khangluite thugousiahte
(Mrk. 7.1-13)
1Tuachi`n Jerusalem khua a om Pharisaite leh laigelhmite Jesu kiangah a hungpai ua, 2“Bangding a na nungjuite upate thugousiah banglou tak a om uh ahia? An anek chiang un akhut uh asilngai kei uh!” achi ua.
3“Hinanleh aman adawng a akiang uah, bangding a nou zong na thugousiah jiak ua, Pasian thupiak danlou bang tak a om nahi ua? achi hi. 4Pasian in, ‘Na nu leh napa zaktak in, Kuapeuh anu hiam apa hiam gensiate pen si teitei heh,’ achi hi. #Exo. 20.12; Deut. 5.16; Exo. 21.17; Lev. 20.9. 5Hinanleh nou, kuapeuh anu hiam apa hiam kiang a, ‘Kei a kipan a phattuamna na muh ding jousiah uh Pasian kiang ah piak ahita,’ chi jousiahin, anu leh apa azah ding ahikei nachi ua, 6Tuachi`n, na thugousiah jiak un Pasian thu pen bangmahlou na suaksakta uhi. #15.6 Mun khenkhat ah law=dan, khenkhat command=thupiak, khenkhat ah Tradition=chi leh nam chindan agen hi. Hihsan a in agennuam pen ahihleh upate chindan lam ahi a, tradition=chindan lam in ijui uhi. 7Nou lepchiahte! Isaiah in na tungtang thu uh ana genkholh dik mahmah hi!
8“ ‘Hih mite`n akam un a hungnaih ua, amuk un a hungzah ua,
hinanleh a lungtang un ahung gamlat uhi.
9A thuhilhna uah mihing thupiak ahilh jiak un,
ahung biak uh pannabei ahi, chi in a dawng hi!’ ”
Mihing buahsak silte
(Mrk. 7.14-23)
10Tuachi`n mipite asam a akiang uah, “Ja unla theisiam un! 11Kam a lut mihing ninsak a pang ahikei; hinanleh, kam a pawt hua in mihing aninsakjaw,” achi hi.
12Tuachi`n a nungjuite a hungpai ua a kiangah, “Pharisaite`n hua thu ajaktak un aheh uh chih nathei ei?” achi ua.
13Hinanleh aman a dawnga akiang uah, “Kung tengteng van a ka Pa suanlouh jousiah bawhkhiat in aom ding,” achi hi. 14“Amauhte awlmoh kei un! Amauh mittaw lak a mittaw lamkaite ahi uh: Mittaw in mittaw mah a lamkaihleh kawkhuk ah a kiakhawm ding uh, achi hi.” #Luk. 6.39.
15Tuachi`n Peter in a dawng a akiang ah, “Hih gentehna kou kiangah hung hilhchian in,” chi`n adong a.
16Tuachi`n Jesu`n, “Tutan a nou zong theihsiamna neilou a om nalai nahi uh maw. 17Kam a lut jousiah gilsung ah alut a, dailenna ah paihkhiat in a om chih theinailou lai nahi uh maw? 18Hinanleh kam a pawtte pen lungtang a kipan-a hungpawt ahi ua, huate mah in mihing aninsakjaw hi. #Mat. 12.34. 19Lungtang a kipan in ngaihtuahna giloute, tualthahnate, angkawmnate; kingaihnate guktatnate, heknate, gensiatnate hungpawt veu hi. 20Hihte ahi mihing ninsak, khut sillou a annek in mi a ninsakkei,” achi hi.
Kanan numeinu ginna
(Mrk. 7.24-30)
21Tuachi`n Jesu hua a kipan in apawt a, Tura leh Sidon gam lam ah apaita hi. 22Tualeh ngaiin, hua gam a kipan Kanan numei khat a hungpawt a, “Aw Toupa, David Tapa! Ka tungah zahngaiin! Ka tanu dawiin aman a agim mahmah,” chi`n a kikou hi.
23Hinanleh aman kamkhat in zong a dawng kei hi. Tualeh a nungjuite hungpaiin a kiangah, “I nungah aki koukou a! Paisak maiin,” chi`n ahung ngen ua.
24Hinanleh aman a dawng a, “Israel nam belam mangte kiang chihlouhngal ah sawl ka hikei,” achi hi.
25Tuachi`n numeinu a hungpai a, “Toupa hung panpih in!” chi`n chibai a hungbuk hi.
26Hinanleh aman a dawng a, “Tate tanghou laksak a, uinoute kiang a paih akilawm kei,” achi hi.
27“Toupa, hihjaw ahia, Hilehzong uite`n apu an nekna dohkan pan a tanghou them kia anejel ve uale,” achi a.
28Tuatakin Jesu`n akiang ah, “Aw numei, na ginna thupi na tazen e! Na deih bangtak in na tungah omta hen,” achi a, adawng a. Tuachi`n a tanu huahun mahmah in ahung damta hi.
Mi tampi Jesu`n a damsak
29Tualeh Jesu hua a pat in a paikhia a, Galili tuipi gei a hungtung a. Tualeh mual ah a paitou a, huasan ah atouta hi. 30Tuachi`n mipi tamtak, kengbaite, mittawte, hamtheiloute, piangsualte leh midang tampi tonpih in a kiangah a hungpai uhi. Tualeh Jesu kengbul ah amauhte asial ua; tuachi`n aman amauhte ana damsak chiatta hi. 31Tuachia hamtheiloute ahung hamtheih ua, piangsualte a hunghoih ua, kengbaite keng a pai a, mittawte`n ahung mutheita uh chih amuhtak un; mipite`n lamdang asa mahmah ua, tuachi`n Israelte Pasian a pahtawita uhi.
Sangli vakna
(Mrk. 8.1-10)
32Tuachi`n Jesu`n a nungjuite a kiangah asam a, “Mipite tuin ka kiangah nithum a omta ua, nek ding bangmah aneihlouh jiak un ka hehpih mahmah a, amauhte anngawl in ka paisak utkei; ahuachih keileh lamkal ah abahsam kha ding uh,” achi a.
33Tuachi`n a nungjuite`n a kiangah, “Mipi hih zahzah vahna khop tanghou gamdai ah khoiah ila dia?” achi ua.
34Jesu`n akiang uah, “Tanghou phel bangzah nanei ua?” achi a.
Tualeh amauhte`n, “phelsagih,” leh “ngasaneu themkhat tawh,” achi uhi.
35Tuachi`n aman tual a tou dingin mipite thu apia a. 36Tuachi`n aman tanghou phel sagih leh ngasate ala a, kipahthu agen a, abalkek a, nungjuite apia a, tuachi`n nungjuite`n mipite kiangah apia uhi. 37Tuachi`n aun un ane ua, avah chiatta ua, anekval nen uh zong lawh sagih aluak dim uhi. 38Anete numei leh naupang simlouh in piching ngen zong sangli ahi uhi.
39Tualeh mipite a sawlkhiat nung in gunkuang ah a hungtuang a, Magdala gam lam ah a hungpaita hi.
Thangkhal NT - Thukhun Thak
Copyright © 2014 by The Bible Society of India
Used by permission. All rights reserved worldwide.