Piilimka 15
15
1Kude ŋaaŋnyiŋ Naawen wanni yaa jam Abram jigi ase gɔdaasima la ayen, <<Abram, kan chali yɔgsummoa. Mi ka waai ale a lik fu, a chim fi tutun kpiema. >>
2Alege Abram yaa weeni ayen, <<M Nyɔnɔwa waai ale ka Naawen la, fi le te mu ka boa mi ale kan ta biik nna? Waai ale wa pai m nitalimu la ale Ɛlieza ale nyini Damasikus la.>> 3Abram weeni ayen, <<Fi an te mu bisa. Dila nyiŋ m yenni po yɔmma wanyi ale wa pai m nitalimu.>>
4Ate Naawen wanni yaa jam Abram jigi ayen, <<Nuruwa de a kan pai fi nitalimu alege ka nidoabi dii ale wa chim fidek ziim la ale wa pai fi nitalimu.>> 5Naawen yaa ta wa nyini peelim a weeni ayen, <<Zak zuk a nya wenŋmazuk a chiini chiŋmarisaŋa, fi dan baga a chiini si.>> Wa yaa weeni wa ayen, <<Fi ŋaaŋbisaŋa le piisi ka dila.>>
6Abram yaa ta siaka ale Naawen, ate wa a wi wa ayen wayɔrisima nyɔnɔ.
7Wa ŋman weeni wa mɛ ayen, <<Mi ka Naawen, mi ale ta fu nyini Ur, Kaldiya demma tɛŋka a nyini ayen m te fu tɛŋka de ate fi soa.>>
8Alege Abram a weeni ayen, <<M Nyɔnɔwa waai ale ka Naawen la, mi ale nye ka sɛ a seba ayen m le tuesi tɛŋka de a soa?>>
9Naawen yaa weeni Abram ayen, <<Ta bena ŋata naasari ale bena ŋata buuk ale bena ŋata padiak a jam. Maa ta nangbaŋ takuriŋ ale nangbaŋ kawuruk a jam.>>
10Abram yaa ta ŋantaŋa de meena a jam wa jigi, a gebi ŋa gela buye a yaa pai dueni a tuk chaab. Alege nangbaŋsaŋa wa an gebi ya. 11Nuin sii ale a dɛ lanta la a yaa jam lantaŋa zuk, alege Abram a yiak ti si yiti cheŋ.
12Wenni ale a siŋ la goom yaa chiak Abram nna vilim, ate legi nna kpitɔ yaa jam Abram zuk. 13Naawen yaa weeni Abram ayen, <<Sebi chak ayen fi ŋaaŋbisaŋa ale chim ka nicham tɛŋ kaai ale kan daa ba tɛŋ la po. Ba le tom ba yɔntidi abe ba kan nye ba a magsi ate ku paari bena kobsinaansi. 14Alege m le namsi tɛŋ kaai ate ba tom a te ba ase yɔm la, ate ku ŋaaŋnyiŋ ba yaa nyini tɛŋka po a nyini ale ŋanta yegayega. 15Alege fidek, ale kpaŋ a kpi ate ba gu fu ate fi cheŋ fi koma jigi ale suiyɔgni. 16Fi ŋaaŋbiik sii ale a saari bunaansiwa la ale ŋman jam de la, diila Amori demma biemu an diem zuak ya.>>
17Wenbinni ale siŋ la ate tɛŋka a sob la, samɔniŋ ale nyuisa ale bolim ŋiak a yaa jam va lam gelaŋa suŋsuŋ a taam. 18Dai dila danni Naawen yaa nye nɔiyeŋ ale Abram ayen, <<M le pai tɛŋka de a te fi ŋaaŋbisaŋa a zaani Ejipiti benni a ga paari beli kpienni Yufiretis. 19M le pai Ken demma ale Kenizzi demma ale Kadmon demma 20ale Yit demma ale Perizzi demma ale Arefa demma, 21ale Amori demma ale Keenan demma ale Girgas demma ale Jebus demma tɛŋsaŋa a te ba.>>
© 2023, Ghana Institute of Linguistics, Literacy and Bible Translation