Ala Kalɔ Buse 2
2
1Lɛni na Katɔti úti ɔ́wɔlɔ katɔ ku kalɔ ku ala ani ƒui nkya-nya kemmo budie.
2Na údie lɛla biala ɔ́wɔlɔ asa na limeyi maatɛdi lídu. Anwuɔsu limeyi maatɛdi lɛlɔ ni, Katɔti ɔ́da kabla ƒui ɔ́ya na ɔ́nwuna. 3Na limeyi lɛmmɔ lɛdanku kusɛ kusɛ na lise kedee ka ɔ́ƒuna-ni úse ɔsu. Ɔsika limeyi lɛmɛni lɛlɔ na ɔ́nwuna ɔni na údie ala ƒui ɔ́wɔlɔ.
Adam Ku Hawa Lɛlɔ Kɔtɛ
4Kalɛ na bédie katɔ ku kalɔ kɔtɛ ndi amɛni.
Uwi ɔni na Katɔti údie katɔ ku kalɔ ni, 5edula ku egyiibi adi átakwɛ tɔ na kalɔ lɛlɔ. Ɔsika Unwoti Katɔti útaya na ɔnantu ɔna uwi kalɔ lɛlɔ. Na ukyuli ɔdi lɛnɔ uuubo na utaatuma kalɔ kammɔ lɛlɔ. 6Nsu ntukpa buuyi taasi kalɔ kemmo na buute kalɔ kammɔ ntu. 7Unwoti Katɔti ɔ́vɔ ukyuli ɔ́lɛku kalɔ kammɔ lɛti kemmo. Na ɔ́nwuna ɔƒɛƒɛɛ ɔni muute ngba ɔ́kya ukyuli ɔmmɔ enwu kemmo aani ɔyawine.
8Amu na Unwoti Katɔti ɔ́bla kemo kadi na kesii kani baalɔ banii Eden na ɔƒɛ katukɔ kakɛ. Na mmɔ ni, úti ukyuli ɔni na ɔ́vɔ mmɔ ɔ́kya. 9Na kemo kammɔ kemmo ni, Katɔti ɔ́ya na egyii ákwɛ enye na adi egyii abuni ani mɔɔdia bɔnu ku edula ani ndia kaduɛ na adia ete ka badi. Na kemo kammɔ ntɛntɛ ni, kugyii kɔni muute ukyuli ngba kunye na kɔni mɔɔyá na ɔɔnu lɛbuni ku likpidi taati lɛnɔ kunye.
10Na ketu kani muute kemo kammɔ ntu kaagbá taasi Eden mmɔ. Na ketu kammɔ kábwɛ kéle lɛlɔ ntukpa ine. 11Ketu kedeedi lɛnyi ndi Pison. Na kaagbá taavi kalɛkɛ kani baalɔ Hawila kemmo, kesii kani na sika ugyiedi ɔkya. 12Kesii kammɔ ni, sika ugyiedi ɔni mɔɔdia bɔnu geen ku atabi ani náƒɔ kuye na baalɔ-nya banii Onis akya. 13Na ketu kanyɔdi lɛnyi ndi Gihon na kaagbá taavi kalɛkɛ kani na baalɔ banii Kus mmɔ kemmo ƒui. 14Na ketu katɛdi lɛnyi ndi Hidekel na kaagbá taavi kalɛkɛ kani baalɔ Asiria ɔƒɛ katukɔ kakɛ. Na ketu kenedi lɛnyi ndi Euƒrate.
15Amu na Unwoti Katɔti úti ukyuli ɔni na ɔ́vɔ mmɔ ɔ́kya Eden kemo kammɔ kemmo ka utaabla-ka lɛlɔ kabla na utaanu-ka lɛlɔ. 16Na ɔ́su ɔnana ɔmmɔ ɔnini, “Ebo kuƒi ka adi egyii ani nnye kemo kamɛni kemmo ebi ƒui. 17Nsu kugyii kɔni mɔɔyá na ukyuli ɔɔnu lɛbuni ku likpidi taati aku ni, tadi-ku ebi. Ɔsika si ádi kugyii kɔmmɔ ebi ni, bukpi kani na adubo bukpi.”
18Ɔmmɔ kama ni, Katɔti ɔ́su ɔnini, “Ɔɔɔdia si ɔnana lɛti ɔkya. Ndubɔbla ubunkune ɔni námanku-nwu lite-nwu.”
19Anwuɔsu Unwoti Katɔti ɔ́kpanku bebuo ku baasɛ ku bebweyi bani ƒui na úti kalɔ lɛti ɔ́bla mmɔ úboku ukyuli ɔmmɔ kudɔ ɔnii ɔsia-ma anyi. Na lɛnyi lɛni na ukyuli ɔmmɔ úte kebweyi biala ni, ani nénwini-nwu lɛnyi. 20Anwuɔsu ukyuli ɔmmɔ násia bebuo ku baasɛ ku bebweyi ƒui anyi. Nsu Adam anwu ni, uuubo ubunkune ɔni námanku-nwu.
21Ɔmɛni ɔsu ni, Unwoti Katɔti ɔ́ya na Adam úduo lɛlɛɛ kemmo úsie ɔgyu geen. Na uwi ɔni na ɔtɛ ɔlɛɛ mmɔ ni, Katɔti údie-nwu ɔƒɛnyi likubi linwi na úti ɔlɔna útile likpo lɛmmɔ. 22Amu na Unwoti Katɔti úti likubi lɛni na údie ɔ́lɛku ɔnana ɔmmɔ ɔƒɛnyi mmɔ ɔ́bla uleku. Na ɔ́kpanku-nwu úboku ɔnana ɔmmɔ.
23Mmɔ ni, ɔnana ɔmmɔ ɔ́su ɔnini,
“Likubi lɛmɛni lɛ́si mina ekubi kemmo.
Na ɔlɔna ɔmɛni ɔ́si mina ɔlɔna kemmo.
Ndubɔlɔ-nwu nnii uleku.
Ɔsika ɔnana kemmo na bédie-nwu bálɛku.”
24Ɔmɛni ɔsu na ɔnana ɔdubɔmami ɔti ku uni lɛlɔ na uti lɛlɔ utámana ulekudi lɛlɔ. Na bana inyɔ badubɔbla ɔlɔna unwi.
25Na uwi ɔmɛni kemmo ni, ɔnana ku uleku ɔmmɔ beli kasɔngya ɔni na kɔƒa kɔdi kulekpo-ma.
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.