Ala Kalɔ Buse 3
3
Ukyuli Ɔ́ta Únye Katɔti Lɛlɔ
1Na mmɔ ni, kɔlakpi ndi kebweyi kani mbo lɛkwɛ geen ntulo bebuo bani ƒui na Unwoti Katɔti údie akɔ. Na limeyi lɛdi ni, kɔlakpi kɔmmɔ kúsie uleku ɔmmɔ kudɔ na kútéye-nwu kɔnini, “Sɔsɔ geen na Katɔti ɔ́su-ɔ ɔnii, ‘Tadi egyii ammɔ adi biala ebi’?”
2Amu na uleku ɔmɛni údie kenye ɔnini, “Bɔkana na bɔdi kugyii biala kɔni nkya kemo kamɛni kemmo ebi. 3Mmomu bɔsu na Katɔti ɔ́su ɔnii butadi kugyii kɔni nnye kemo kamɛni ntɛntɛ mmɔ ebi. Na butetuku-ku lɛnɔ. Si ɔɔɔdi lɛni ni, bɔdubo bukpi.”
4Amu na kɔlakpi kɔmmɔ kɔ́su-nwu kɔnini, “Kudii! Ɔɔɔdi bukpi na bɛdubo bukpi. 5Mmomu Katɔti ɔgyi ka si bɛ́di kugyii kɔmmɔ ebi ni, bɛdubo anu bɔda. Na bɛdubo bɔbla aani anwu Katɔti kalɛ. Na bɛdubɔnu lɛbuni ku likpidi lɛnɔ bɛti.”
6Amu ka uleku ɔmɛni ɔ́nu ɔ́ti ka kugyii kɔmmɔ ebi adia bɔdi, na aadia bɔnu, na aayá na ukyuli ɔɔdá anu ɔsu ni, úde adi na ɔ́di. Na úde ɔdi úte ɔgyani ɔni nkya mmɔ lɛnɔ na ɔ́di. 7Mmɔ na bana inyɔ ƒui anumi ébimi na bánu báti ka bakɛ kasɔngya. Anwuɔsu béde kugyii evete bonwu adi básala na béti bábɛla lɛlɔ kasɔngya.
8Amu ka useyi uwi údu ni, ɔnana ɔmmɔ ku ulekudi bénu Unwoti Katɔti kɔku uwi ɔni na ɔkɛ ɔɔví kemo kammɔ kemmo. Amu na bátábɛ na egyii akɔ kalɛ na Unwoti Katɔti ulanu-ma. 9Nsu Unwoti Katɔti ɔ́kpali ɔnana ɔmmɔ ɔnini, “Wɛ na akya?”
10Amu na údie kenye ɔnini, “Línu-ɔ kɔku na kemo kammɔ kemmo na liƒu lɛ́da-mi, ɔsika nkɛ kasɔngya. Anwuɔsu líkeli ńtábɛ.”
11Mmɔ na Katɔti úye-nwu ɔnini, “Ɔma násu-ɔ ɔnii akɛ kasɔngya? Munuu kugyii kɔni lɛlɔ ebi na líbo-ɔ ɔda nnii tadi mmɔ ni, aku na átádi?”
12Amu na ɔnana ɔmmɔ údie kenye ɔnini, “Uleku ɔni na éti éte-mi ni, anwu néde ebi ammɔ adi úte-mi na lɛ́di.”
13Mmɔ na Unwoti Katɔti úye uleku ɔmmɔ ɔnini, “Bi na ábla mɛni?”
Amu na uleku ɔmmɔ údie kenye ɔnini, “Kɔlakpi kɔmmɔ nátɔlɔ-mi na lɛ́di.”
14Anwuɔsu Unwoti Katɔti ɔ́su kɔlakpi kɔmmɔ ɔnini, “Lɛla lɛni na ábla mɛni ɔsu ni,
“Ewida adubɔsiaku-ɔ etulo bebuo
ku alakpi akɔ bebweyi ƒui.
Kaƒɔ lɛlɔ na adubo butaakpɛ.
Na lɛti na adubo butaadi
ƒula ngba uwi ƒui.
15Na ndubɔya na awɔ ku uleku ɔmɛni
binwini bekisine,
na ƒula ubi ku uleku ɔmɛni ubi lɛnɔ benwini bekisine.
Ɔdubo-ɔ lili bubo bɔbwɛ,
na awɔ adu-nwu lɛnikpo.”
16Amu na Katɔti ɔ́su uleku ɔmmɔ ɔnini,
“Ndubɔya na ebo abi geen uwi ɔni na ada kaƒɔ.
Na adubunu ɔlɛ asa na awɔ bebi.
Ina amu muedi ni, ƒula anu adubɔsia ƒ'ɔgyani lɛlɔ,
na akya-nwu kalɔ.”
17Na Adam anwu ni, Katɔti ɔ́su-nwu ɔnini, “Ka énu ƒ'ulekudi litemi na ádi kugyii kɔni ebi na líbo-ɔ ɔda nnii, ‘Tadi-ku ebi’ ɔsu ni,
“Líwida kalɔ kammɔ ƒui na awɔ ɔsu.
Na adubo abi bubo kana lɛlɔ asa na akɛ-ka lɛla lɛdi adi
na ƒula ngba emeyi kemmo ƒui.
18Liyu ku lɛnyɛ ku ana udu adubo bɔkwɛ na kalɔ kammɔ lɛlɔ na awɔ ɔsu.
Na kalɔ kammɔ kemmo na adubɔkɛ ƒula lɛdila.
19Na adubuni ewulu na ƒula lɛtɛntɛ
asa na akɛ ƒula lɛdila
weti wetédu uwi ɔni na adubɔsɔ enwini esie kalɔ kemmo.
Ɔsika aka na líti lɛ́vɔ-ɔ.
Lɛti na adi
na lɛti kani na adubɔsɔ enwini.”
20Na Adam ɔ́sia ulekudi lɛnyi ɔnii Hawa ɔni kalɔ ndi ngba. Ɔsika anwu ndubɔbla ukyuli biala nli ngba uni. 21Ɔmmɔ kama ni, Unwoti Katɔti úti ebuo ɔku ɔ́bla adala úte Adam ku ulekudi na báda.
Bábɔku Adam Ku Hawa Bálɛku Eden Kemmo
22Amu na Unwoti Katɔti ɔ́su ɔnini, “Ɔƒaani ni, ukyuli ɔgyi lɛbuni ku likpidi lɛnɔ aani abu kalɛ. Anwuɔsu ɔ́sɔ útalɛka ɔkɛ kuƒi na ude kugyii ebi ani mɔɔyá na ukyuli uulie ngba mmɔ ɔdi na ɔsɔ ulekpi.” 23Anwuɔsu Unwoti Katɔti ɔ́bɔku-ma ɔ́lɛku Eden kemo kammɔ, na ɔ́su-ma ɔnii batátaatuma kalɔ kani kemmo na údie-ma ɔlɛku mmɔ. 24Na ka ɔ́bɔku-ma ɔ́lɛku ɔ́wɔlɔ ni, ɔ́ya na nwuna batu bagyumanane badi benye ku kewii kadi mɔɔbwɛ ogya teesie anumi teebo kama taabala Eden kemo kammɔ ɔƒɛ katukɔ. Na bétile ukyuli biala kuƒi kalɛ na ulakana kugyii kɔni mɔɔyá na ukyuli uulie ngba mmɔ kudɔ bɔni bude.
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.