WƖAA DƖ-SUOMUŊ 5
5
A chɩŋ Adam doho nɩaa lɛ a mʋ yi Nowa
1Adam doho nɩaa naasɩŋ nɛ ŋ-la.
Wɩa sɩ ŋaa nuhuobiine, ʋ ŋaaʋ ʋ nagɛ ʋ-na Wɩa tɩtɩa nɛ. 2Ʋ ŋaa baal arɩ haal nɛ a pɛ ba lɛ. Bʋa-la lɛ ʋ sɩ ŋaaba nɛ ʋ yɩrɛba “nuhuobiinee.”
3Adam sɩ hɛ nɩmɛ a yi jɩsɩŋ zɔlɔ arɩ mara arɩ fii, ʋ bɩra lʋl hambolibie, ʋ nagʋ woruŋ. Ʋ hɛ ʋ yɩrɩŋ Sɛf. 4Adam sɩ lʋl Sɛf, ŋɩɩ harɩŋ, ʋ hɛ ʋ mɩɩsɩŋ lɛ jɩsɩŋ zɔlɔ chori nɛ aŋ bɩra lʋl baalaa arɩ haalaa dɔnsʋŋ ma. 5Ʋ hɛ ʋ mɩɩsɩŋ lɛ jɩsɩŋ zɔlɔ nibi arɩ mara arɩ fii nɛ, aŋ-na sʋʋ.
6Sɛf ma hɛ ʋ mɩɩsɩŋ lɛ jɩsɩŋ zɔlɔ arɩ banɔŋ nɛ aŋ lʋl Ɛnɔs. 7Sɛf sɩ lʋl Ɛnɔs harɩŋ, ʋ hɛ nɩmɛ jɩsɩŋ zɔlɔ chori arɩ balɩpɛ nɛ, aŋ ma lʋl baalaa arɩ haalaa dɔnsʋŋ. 8Sɛf ma hɛ ʋ mɩɩsɩŋ lɛ jɩsɩŋ zɔlɔ nibi arɩ fii arɩ balɩa nɛ aŋ-na sʋʋ.
9Ɛnɔs yi jɩsɩŋ mahɩŋ banɛsɛ arɩ fii nɛ aŋ lʋl Kenaŋ. 10Ɛnɔs sɩ lʋl Kenaŋ, ʋ hɛ nɩmɛ jɩsɩŋ zɔlɔ chori arɩ fii arɩ banɔŋ nɛ aŋ ma lʋl baalaa arɩ haalaa dɔnsʋŋ. 11Ɛnɔs ŋaa jɩsɩŋ zɔlɔ nibi arɩ banɔŋ nɛ ʋ mɩɩsɩŋ lɛ, aŋ-na sʋʋ.
12Kenaŋ ŋaa jɩsɩŋ mahɩŋ batori arɩ fii nɛ aŋ lʋl Mahalalɛl. 13Kenaŋ sɩ lʋl Mahalalɛl, ʋ hɛ ʋ mɩɩsɩŋ lɛ jɩsɩŋ zɔlɔ chori arɩ mahɩŋ balɩa nɛ aŋ ma lʋl baalaa arɩ haalaa dɔnsʋŋ. 14Kenaŋ hɛ ʋ mɩɩsɩŋ lɛ jɩsɩŋ zɔlɔ nibi arɩ fii nɛ aŋ sʋʋ.
15Mahalalɛl ŋaa jɩsɩŋ mahɩŋ batori arɩ banɔŋ nɛ aŋ lʋl Jarɛd. 16Mahalalɛl sɩ lʋl Jarɛd, ʋ ŋaa jɩsɩŋ zɔlɔ chori arɩ mara arɩ fii nɛ aŋ bɩra lʋl baalaa arɩ haalaa dɔnsʋŋ. 17Mahalalɛl hɛ ʋ mɩɩsɩŋ lɛ jɩsɩŋ zɔlɔ chori arɩ mahɩŋ banɛsɛ arɩ fii arɩ banɔŋ nɛ aŋ-na sʋʋ.
18Jarɛd ŋaa jɩsɩŋ zɔlɔ arɩ mahɩŋ batori arɩ balɩa nɛ aŋ-na lʋl Ɛnɔk. 19Jarɛd sɩ lʋl Ɛnɔk, ʋ ŋaa jɩsɩŋ zɔlɔ chori nɛ aŋ ma lʋl baalaa arɩ haalaa dɔnsʋŋ. 20Jarɛd hɛ ʋ mɩɩsɩŋ lɛ jɩsɩŋ zɔlɔ nibi arɩ mahɩŋ batori arɩ balɩa nɛ aŋ-na sʋʋ.
21Ɛnɔk ma yi jɩsɩŋ mahɩŋ batori arɩ banɔŋ nɛ aŋ lʋl Mɛtʋsɛla. 22Ɛnɔk sɩ lʋl Mɛtʋsɛla, ʋ ha to Wɩa wombiiŋ a yi jɩsɩŋ zɔɔ-batori nɛ aŋ ma lʋl baalaa arɩ haalaa dɔnsʋŋ. 23Ɛnɔk hɛ ʋ mɩɩsɩŋ lɛ jɩsɩŋ zɔɔ-batori arɩ mahɩŋ batori arɩ banɔŋ nɛ. 24Ɛnɔk to Wɩa wombiiŋ ŋɩɩ nɛ halɩɩ a mʋ tuo. Wɩa nɛ joŋu viiri.
25Mɛtʋsɛla ŋaa jɩsɩŋ zɔlɔ arɩ mahɩŋ banɛsɛ arɩ balɩpɛ nɛ aŋ-na lʋl Lamɛk. 26Mɛtʋsɛla sɩ lʋl Lamɛk, ʋ yi jɩsɩŋ zɔɔ-balɩpɛ arɩ mahɩŋ banɛsɛ arɩ balɩa nɛ aŋ bɩra lʋl baalaa arɩ haalaa dɔnsʋŋ. 27Mɛtʋsɛla ŋaa jɩsɩŋ zɔlɔ nibi arɩ mahɩŋ batori arɩ nibi nɛ aŋ sʋʋ.
28Lamɛk yi jɩsɩŋ zɔlɔ arɩ mahɩŋ banɛsɛ arɩ balɩa nɛ aŋ lʋl hambolibie. 29Ʋ hɛ ʋ yɩrɩŋ Nowa aŋ bʋl, “Wɩa fa ŋmɩɛsa hɛ tinteeŋ lɛ nɛ dɩ la tɩma suoli aŋ-na dii. Bie deeŋ nɛ jaŋ leŋ dɩ la tʋɔŋ pɩŋ dɩ-bala.” 30Lamɛk sɩ lʋl Nowa, ʋ ŋaa jɩsɩŋ zɔɔ-banɔŋ arɩ mahɩŋ banɛsɛ arɩ fii arɩ banɔŋ nɛ, aŋ-na lʋl baalaa arɩ haalaa dɔnsʋŋ. 31Lamɛk ŋaa jɩsɩŋ zɔɔ-balɩpɛ arɩ mahɩŋ batori arɩ fii arɩ balɩpɛ nɛ aŋ sʋʋ.
32Nowa ŋaa jɩsɩŋ zɔɔ-banɔŋ nɛ aŋ-na lʋl Sɛm, Ham arɩ Jafɛf.
©Ghana Institute of Linguistics Literacy and Bible Translation 1984, 2014