Luuk 16
16
Yesu magɛ namaga a tɩgɛ tɩntɩnnʋ-la sɩ kɛŋ wʋjɩmɩŋ lɛ
1Yesu magɛ namaga dɔŋɔ a pɩ ʋ harɩ-tooroo, “Baal kʋbala nɛ fa hɛ nɩmɛ. Ʋ fa ŋaa kɩaa tɩɩna nɛ. Ʋ fa kɛŋ tɩntɩnnʋ. Ʋ nɛ faa beŋ ʋ kɩalɩŋ. Ŋɩɩ nɛ nɩaa kʋ bʋla pɩ kɩaa tɩɩna-la, arɩ ʋ tɩntɩnnʋ-la kɛŋ ʋ kɩalɩŋ chichei nɛ. 2Ʋ sɩ nɩɩ ŋɩɩ, ʋ yɩrʋ a pɩɛsʋ, ‘Bee na wɩalɩŋ mɩ sɩɩ nɩɩ a tɩgɛ ŋ lɛ. Leŋ dɩ mɩ jɩŋ nɩalɩŋ ŋ sɩ yallɛ mɩ kɩalɩŋ pa. Ŋ bɩra bɩ jaŋ wuo ŋaa mɩ tɩntɩnnʋ.’ 3Ŋɩɩ nɛ baal-la bʋl ʋ tɩtɩa lɛ, ‘Mɩ kʋhɩaŋ ka chɛ dɩ ʋ kirimi nɛ mɩ tɩntɩŋŋaa lɛ. Bɛɛ nɛ mɩ jaŋ ŋaa? Mɩ bɩ doluŋ kɛnɛ dɩ mɩ pɛrɛ. Mɩ bɩra bɩ jaŋ wuo gɔllɔ sʋsʋl kɩaa ma. Mɩ jaŋ fɩfá hɩɩsɩŋ. 4Dɩ mɩ tɩntɩŋŋaa nɛ cheye, mɩ jɩŋ ŋɩɩ mɩ sɩ jaŋ ŋaa a wuo kɛŋ nandɔnsʋŋ, a ŋaa dɩ ba kɛmmɛ woruŋ ba dɩɩsɩŋ lɛ.’
5Ŋɩɩ nɛ ʋ yɩrɛ nɩalɩŋ kala sɩ dii ʋ kʋhɩaŋ chɩmɩŋ. Ʋ yɩrɛba kʋbala kʋbala nɛ. Ŋɩɩ nɛ ʋ yɩrɛ bumbuŋ nɩa a pɩɛsʋ, ‘Chɩmɩŋ ŋ sɩ dii mɩ kʋhɩaŋ teeŋ ŋaa baŋmɛɛ nɛ?’
6Ŋɩɩ nɛ ʋ sɩ dɩ nʋʋŋ nɛ ʋ chɩmʋ aŋkʋra zɔlɔ.
Ŋɩɩ nɛ tɩntɩnnʋ-la joŋ teŋ-la sɩ dagɛ chɩŋ-la a pʋ aŋ bʋl, ‘Teŋ-la sɩ dagɛ ŋ chɩmɩŋ nɛ ŋ-la. Ŋ chɩmɩŋ ŋaa nʋʋŋ aŋkʋraba zɔlɔ nɛ. Kaa bɩrɩmɛ a ŋmʋnsɛ aŋkʋraba mahɩŋ balɩa arɩ fii.’
7Ŋɩɩ nɛ ʋ yɩrɛ dɔŋɔ tɩɩna ma a pɩɛsʋ, ‘Ka ŋ maa?’ Ʋ ma sɩ dɩ chɩmɩŋ ʋ sɩ die ŋaa mɩaa bɔtɔba bʋɩ nɛ.
Ŋɩɩ nɛ tɩntɩnnʋ-la bʋla pʋ, ‘Teniŋ tʋɔŋ ba ŋmʋnsa hɛ arɩ ŋ chɩmɩŋ magɛ ŋ-la nɛ, ama kaa bɩrɩmɛ a ŋmʋnsɛ bɔtɔ zɔlɔ chori.’
8Ŋɩɩ nɛ kɩaa tɩɩna-la bɛsɛ sɩŋgɩrɩŋ tɩɩna-la lɛ arɩ ʋ ŋaa kukeri nɛ arɩ wʋjɩmɩɩ-la ʋ sɩ kɛnɛ a ŋaa wʋbɔŋ-la.” Ŋɩɩ nɛ Yesu bɩra bʋl, “Bee na nɩalɩŋ sɩ cho dʋnɩa kɩaa kɩŋkɛŋ sɩ kɛŋ wʋjɩmɩŋ ŋɩɩ a pɩpɛ dɔŋɔ lɛ a kɩɩ nɩalɩŋ sɩɩ to Wɩa.” 9Ŋɩɩ nɛ Yesu bɩra bʋla pɩ ʋ harɩ-tooro-la, “Mɩ bʋlaa pɩma, má joŋ moribiee a kaa dii nandɔnsʋŋ. Dɩ moribie-la nɛ dɛrɛ, Wɩa jaŋ kɛmma kaa mʋ ʋ jaŋ a joŋ mɩɩsɩ-la sɩ bɩ dɛrɛ a pɩma.
10Dɩ ŋ nɛ joŋ kɩaa mʋa a pɩ nʋʋ dɩ ʋ wuo beŋ ba nyuŋ woruŋ, tɩɩna jaŋ wuo beŋ kɩaa sɩ yʋga ma nyuŋ woruŋ. Dɩ nʋʋ ma nɛ bɩ wʋtɩtɩɩ kɛnɛ kɩaa mʋa lɛ, ʋ bɩ jaŋ kɛŋ wʋtɩtɩɩ kʋ-daŋ ma lɛ. 11Dɩ ŋ nɛ bɩ dʋnɩa kɩaa wuo beŋ arɩ wʋtɩtɩɩ, nʋʋkala bɩ jaŋ joŋ kɩalɩŋ sɩ faasa kɛŋ nyʋʋrʋŋ a hɛ ŋ nɩsɩŋ lɛ dɩ ŋ bibeŋ. 12Dɩ ŋ nɛ bɩ nɩaa dʋa wuo beŋ arɩ wʋtɩtɩɩ, nʋʋkala bɩ jaŋ joŋ ŋ tɩtɩa dʋa ma pɩŋ. 13Yoŋ-bala bɩ jaŋ wuo tɩŋ tɩntɩŋŋaa a pɩ nɩhɩasɩŋ balɩa. Ʋ jaŋ cho dɔŋɔ aŋ bɛrɛ dɔŋɔ. Ʋ jaŋ tuto dɔŋɔ niiŋ wɩaa woruŋ aŋ vɩa dɔŋɔ niiŋ wɩaa. Ŋɩɩ tɩtɩa nɛ ŋ bɩ jaŋ wuo ŋaa Wɩa yoŋ aŋ bɩra ŋaa moribiee ma yoŋ.”
Yesu bʋl wɩaa a pɩ Farisii tɩŋŋaa
Mat. 11.12-13; 5.31-32; Maak 10.11-12
14Farisii tɩŋŋaa nɩɩ wɩɩŋ deeŋ Yesu sɩ bʋla. Ba fa cho dʋnɩa kɩaa nɛ kɩŋkɛŋ. Ŋɩɩ nɛ ba sisieri ʋ lɛ. 15Yesu bʋla pɩba, “Ma nɛ ŋaa nɩdosunu-la sɩ yie chɛ dɩ nɩaa bɩɩnɛ ma kɛŋ wʋtɩtɩɩ nɛ, ama Wɩa jɩŋ ma tʋɔŋ nɛ. Kɩalɩŋ sɩ ŋaa kʋfɩɛma nuhuobiinee teeŋ, ba ŋaa kʋtɔɔnʋ nɛ Wɩa teeŋ.”
16Ŋɩɩ nɛ Yesu bɩra bʋl, “Nɩalɩŋ faa to wɩalɩŋ Mosis fa sɩ bile nɛ. Ba to tenni-la lɛ Wɩa wʋlaabʋllaa fa sɩ ŋmʋnsa a kaa mʋ bʋa-la lɛ Jɔɔŋ sɩ kɔ nɛ, nɩɩ-la fa sɩɩ fo nɩaa Wɩɩchʋɔlɛ lɩɩŋ. Jɔɔŋ sɩ kɔ ŋɩɩ, ba suomo bʋbʋl Wɩa wʋzɔmɔ-la a tɩgɛ Wɩa kuorii-la lɛ aa pɩ nɩaa. Ŋɩɩ nɛ nʋʋkala fɩɛsɛ sɩɩŋ a wʋwalɩmɛ dɩ ʋ jʋʋ Wɩa kuorii-la tʋɔŋ. 17Wɩa-nyuŋ arɩ tinteeŋ lɛlɩŋ jaŋ ŋaa mɔlɩɩ a kɩɩ wombie-la Wɩa sɩ bile dɩ la tuto wʋbii-bala ma sɩ jaŋ lɛl.
18Baal-na kala sɩ vɩa ʋ haala aŋ bɩra mʋ jaa dɔŋɔ, baal-la ŋaa bachɔrʋŋ nɛ. Baal-la ma sɩ jaa haala sɩ vɩa ʋ bala, ʋ ŋaa bachɔrʋŋ nɛ.”
Yesu magɛ namaga a tɩgɛ kɩaa tɩɩna arɩ Lazarɔs lɛ
19Ŋɩɩ nɛ Yesu bɩra magɛ namaga a bʋl, “Kɩaa tɩɩna kʋbala nɛ fa hɛ nɩmɛ. Ʋ yie lɩlaalɛ gɛrɩ-zɔmɔ-la yalɩŋ sɩ hɛyɛ, a pɩŋ sɩma nyuŋ woruŋ tapʋlɩɩ-na kala. 20Ka summu kʋbala ma fa hɛ nɩmɛ a pɩpɩŋ ʋ boi-baalɩŋ niiŋ, baa yɩrʋ Lazarɔs. Ʋ yaraa kala fa ŋaa naawɩɩlaa nɛ. 21Vasɩŋ yie kɔ a lilenni ʋ naawɩɩla-la. Ʋ yie chɩchɛ dɩ kɩaa tɩɩna-la sɩ dii kʋdiile-la aŋ ka, dɩ ʋ ma paa dii. 22Ŋɩɩ nɛ summu-la sii sʋʋ. Wɩa tɩndaaraa kʋ joŋu a kaa mʋ Abɩraham teeŋ. Ʋ hɔŋ ʋ sɛmɛ Wɩa-jaŋ lɛ aa nɩɩ sɩma. Kɩaa tɩɩna-la ma sʋʋ ba hugu, 23ʋ mʋ jʋʋ Wɩa-nyiniŋ a nɩna hɛɛŋ woruŋ. Ŋɩɩ nɛ ʋ bee mʋ na Abɩraham dɩ ʋ hɔŋ dɩ-bolii, ka Lazarɔs ma hɔŋ ʋ sɛmɛ. 24Ŋɩɩ nɛ ʋ yɩrʋ a bʋl, ‘Mɩ nyɩmma Abɩraham, fá mɩ nenige aŋ tɩŋ Lazarɔs dɩ ʋ kɛŋ ʋ neniiŋ yuu lɩɩŋ a kaa kɔ a fɩɛlɛ mɩ nandelimiŋ. Mɩɩ na hɛɛŋ nɛ woruŋ nyiniŋ deeŋ tʋɔŋ.’
25Ŋɩɩ nɛ Abɩraham bʋla pʋ, ‘Mɩ bii, liise mʋ yi ŋ fa sɩ hɛ ŋ mɩɩsɩŋ lɛ, ŋ faa nɩɩ sɩma nɛ woruŋ, aŋ ka Lazarɔs fa nɩna hɛɛŋ. Ama lɛɛlɛ Lazarɔs maa nɩɩ sɩma daha, aŋ ka ŋ ma hɛ hɛɛŋ tʋɔŋ. 26Ŋɩɩ ma dʋndʋŋa dee, buotuo-luŋii nɛ pɩŋ la pɛgɛ. Dɩ nɩalɩŋ sɩ hɛ la teeŋ nɩɩ chɛ dɩ ba lɩɩ kiele mʋ ma teeŋ, ba bɩ jaŋ wuo. Nʋʋ ma bɩ jaŋ wuo lɩɩ ma teeŋ a kʋ kieli a kɔ la teeŋ.’ 27Ŋɩɩ nɛ kɩaa tɩɩna-la bɩra bʋla pʋ, ‘Mɩ nyɩmma Abɩraham, mɩɩ sʋlʋŋ dɩ ŋ tɩŋ Lazarɔs dɩ ʋ mʋ mɩ nyɩmma dɩa. 28Mɩ kɛŋ naambiiriŋ banɔŋ nɛ, dɩ ʋ kpʋrɩsɛ ba dɩgɩlaa dɩ ba ma sɩ́ hɛɛŋ deeŋ leriŋ kɔ dɩ ba nɛ sʋba.’ 29Ŋɩɩ nɛ Abɩraham bʋla pʋ, ‘Wɩalɩŋ Mosis arɩ Wɩa wʋlaabʋllaa sɩ ŋmʋnsa, ba hɛ ŋ naambiiriŋ teeŋ. Leŋ dɩ ba jegile nɩɩ ba wɩalɩŋ.’ 30Ŋɩɩ nɛ kɩaa tɩɩna-la bɩra bʋl, ‘Ŋɩɩ ha bɩ maga, mɩ nyɩmma. Dɩ nʋʋ nɛ fa sii sʋʋŋ lɛ a mʋ ba teeŋ, ba fa jaŋ bɩrɩma lɩɩ ba wʋbɔŋŋɔɔ lɛ.’ 31Ŋɩɩ nɛ Abɩraham bɩra bʋla pʋ, ‘Dɩ ba nɛ bɩ jaŋ jegile nɩɩ wɩalɩŋ Mosis arɩ Wɩa wʋlaabʋllaa sɩ ŋmʋnsa, ba bɩ jaŋ sɛɩ wɩalɩŋ dɩ nʋʋ nɛ paala sii sʋʋŋ lɛ a mʋ ba teeŋ a dagɛba ma.’ ”
©Ghana Institute of Linguistics Literacy and Bible Translation 1984, 2014