Luuk 21
21
Yo-haala joŋ kɩaa pɩ Wɩa
Maak 12.41-44
1Bʋa kʋbala Yesu hɛ Wɩa dɩɩ-bal-la lɛ a na nɩalɩŋ sɩ kɛŋ kɩaa sɩ joŋ ba moribiee bil a pɩpɩ Wɩa. 2Ŋɩɩ nɛ ʋ bɩra na yo-haal ma sɩ joŋ amiisimba balɩa a ma hɛ. 3Ŋɩɩ nɛ ʋ bʋla pɩ nɩalɩŋ, “Wʋtɩtɩɩ nɛ mɩ bʋlaa pɩma, yo-haala deeŋ moribii-bie-la ʋ sɩ joŋo hɛ, ʋ nɛ kɩɩ nɩalɩŋ moribie-la kala. 4Nɩalɩŋ kala sɩ joŋ moribiee a pɩ Wɩa, ba lɩɩsa aŋ ka nɛ. Aŋ ka ʋ-na joŋ ʋ summu moribiiŋ kala a hɛ, kʋ-la kala ʋ sɩ kɛnɛ nɛ ŋɩɩ.”
Yesu bʋl ŋɩɩ Wɩa dɩɩ-bal-la sɩ jaŋ tel
Mat. 24.1-2; Maak 13.1-2
5Ŋɩɩ nɛ Yesu harɩ-tooroo dɔnsʋŋ bʋl wɩaa a tɩgɛ Wɩa dɩɩ-bal-la lɛ arɩ ʋ zɔmɔ, tie-bie-la ba sɩ kaa saaʋ ma zɔŋ, a bɩra bʋl ŋɩɩ nɩaa sɩ joŋ kʋzɔŋŋɔɔ a pɩ Wɩa ba kaa wasɛ dɩa-la, ba kala nɛ ŋaa dɩa-la zɔŋ ŋɩɩ. Ŋɩɩ nɛ Yesu bʋl, 6“Bʋa kʋbala jaŋ yi, ba jaŋ ŋmoo kɩaa deemba kala ma sɩɩ na a lo. Ba bɩ jaŋ leŋ dɩ tie-bii-bala ma daŋ ʋ dɔŋɔ lɛ.”
Yesu bʋl ŋɩɩ ba sɩ jaŋ dɔgɩsɛ nɩalɩŋ sɩɩ tou
Mat. 24.3-14; Maak 13.3-13
7Ŋɩɩ nɛ ba pɩɛsɛ Yesu, “La kʋhɩaŋ, bʋa bɛɛ lɛ nɛ wɩaa deemba jaŋ ŋaa? Wʋbɛɛba nɛ la jaŋ na, ka dɩ wɩaa deemba-na ŋaa?” 8Ŋɩɩ nɛ Yesu bʋla pɩba, “Má kɛŋ ma tɩtɩa woruŋ dɩ nʋʋkala sɩ́ ma nyɩsʋ,” a bɩra bʋl, “Nɩaa jaŋ yʋgɛ a kɔ a joŋ mɩ yɩrɩŋ hɛ arɩ ba nɛ ŋaa Kirisito, a bʋl dɩ bʋa-la dʋnɩa sɩ jaŋ dɛrɛ kpaga nɛ. Ama má sɩ́ ba harɩŋ to. 9Ma jaŋ nɩɩ arɩ laalɩŋ arɩ yuosuŋ hɛ daha a hɛ dɩ-boloo ma. Dɩ ma nɛ kʋ nɩɩ ŋɩɩ, má sɩ́ leŋe dɩ ma bɔɩsɩŋ joŋ. Wɩaa deemba kala jaŋ ŋaa bal, ama ʋ ŋɩɩ saa bɩ naga arɩ dʋnɩa dɩdɛrɩŋ yie nɛ.”
10Ŋɩɩ nɛ Yesu bɩra bʋl, “Tinteeŋ dɔŋɔ nɩaa jaŋ sii a mʋ yuo tinteeŋ dɔŋɔ nɩaa. Taŋ kuoro arɩ ʋ nɩaa jaŋ sii gire mʋ yuo kuoro dɔŋɔ arɩ ʋ nɩaa. 11Tinteeŋ jaŋ zigili woruŋ, losuŋ ma jaŋ jʋʋ, nyanyalaa jaŋ jʋʋ nɩaa leree yʋgɛ, wʋbal-lɔrʋnʋŋ arɩ wʋmagɩlaa kala jaŋ ŋaa wɩa-nyuŋ. 12Ka dɩ wɩaa deemba kala-na ŋaa, ba jaŋ kɛsɛma a to naasɩŋ dɔgɩsɛma. Ba jaŋ jomma hɛ nɩaa nɩsɩŋ lɛ dɩ ba dii ma sarɩya Wɩɩchʋɔlɛ dɩɩsɩŋ lɛ a kɛmma tɔ dɩa. Ba jaŋ kɛmma kaa mʋ kuoroo arɩ nɩbalaa sɩpaaŋ a tɩŋ mɩ wɩaa. 13Bʋa deeŋ lɛ nɛ ma jaŋ wuo na wombiiŋ a bʋl Wɩa wʋzɔmɔ-la. 14Má kɛŋ ma tɩtɩa hɛ dɔŋɔ lɛ a sɩ́ leŋe dɩ ʋ walɩmɛma ŋɩɩ ma sɩ jaŋ bʋl wɩaa a laa ma tɩtɩa, 15bɛɛ wɩaa mɩ jaŋ joŋ wʋjɩmɩŋ a hɛ ma nyuŋ lɛ dɩ ma bʋl wɩalɩŋ ma dʋndɔŋŋɔɔ sɩ bɩ jaŋ wuo kaalɛrɛ arɩ wʋtɩtɩɩ dee. 16Ma nyɩmmaba arɩ ma naambiiriŋ arɩ ma doho nɩaa arɩ ma nandɔnsʋŋ paala jaŋ jomma hɛ ma dʋndɔŋŋɔɔ nɩsɩŋ lɛ. Ba jaŋ kpʋ ma dɔnsʋŋ. 17Nʋʋkala jaŋ bɛrɛma a tɩŋ mɩ wɩaa. 18Ama ma kʋŋ nyu-pʋŋ ma bɩ jaŋ lɛl. 19Dɩ ma nɛ nyalɩma, ma jaŋ laa ma mɩɩsɩŋ.”
Yesu bʋla arɩ ba jaŋ ŋmoo Jerusalɛm lo
Mat. 24.15-21; Maak 13.14-19
20Ŋɩɩ nɛ Yesu bɩra bʋl, “Dɩ ma nɛ na dɩ laalɩyuoroo golli Jerusalɛm, ma jaŋ jɩŋ arɩ taŋ-la jaŋ tel lɛɛlɛ. 21Ŋɩɩ-na má leŋ dɩ nɩalɩŋ sɩ hɛ Judiya lɛ fá mʋ jɩl peelee nyuŋ. Nɩalɩŋ ma sɩ hɛ tabal-la tʋɔŋ, ʋ maga dɩ ba lɩɩ taŋ-la tʋɔŋ. Nɩalɩŋ ma sɩ hɛ ba bagɩsɩŋ lɛ, má sɩ́ mɩɩra jʋʋ tabal-la tʋɔŋ. 22Tapʋlɩɩ-la Wɩa jaŋ dɔgɩsɛ Iziral nɩaa, a leŋ dɩ wɩalɩŋ kala ba sɩ bʋla Wɩa teniŋ tʋɔŋ sɛnɛ kʋ ŋaa. 23Haala-la sɩ kɛŋ luoroo arɩ haala-la sɩ kɛŋ bii-mulluŋ baa wasɛ yɩlɩŋ, tapʋlɩa-la lɛ ba jaŋ na hɛɛŋ. Hɛɛŋ jaŋ jʋʋ tinteeŋ deeŋ woruŋ. Wɩa jaŋ na baanɩŋ tinteeŋ deeŋ nɩaa nyuŋ a dɔgɩsɛba. 24Ba jaŋ kpʋ dɔnsʋŋ arɩ tokobiee, aŋ kɛsɛ dɔnsʋŋ dɩ ba ma ŋaa yosuŋ tinteyee-dɔnsʋŋ lɛ, ka nɩalɩŋ sɩ bɩ Juu tɩŋŋaa ŋaa fɩrɩgɛ Jerusalɛm taŋ-la kala, see bʋa-la Wɩa sɩ daga yie.”
Yesu bʋla pɩ nɩaa dɩ ʋ jaŋ mɩɩra kɔ
Mat. 24.29-31; Maak 13.24-27
25Ŋɩɩ nɛ Yesu bɩra bʋl, “Nɩaa jaŋ na wʋmagɩlaa wɩɩpɔsʋŋ arɩ chɛnɛ arɩ chɛnwʋlaa lɛ. Dʋnɩa kala lɛ, nɩaa bɩ jaŋ jɩŋ wɩɩ-la kala lɛ ba sɩ hɛ. Dɩ mʋgʋ-balaa nɩɩ huuru, fawʋllʋŋ jaŋ kɛmba. 26Fawʋllʋŋ jaŋ kɛŋ nɩaa dɩ ba yeŋŋi a tɩŋ ba sɩɩ yɩɛlɛ wɩɩ-la sɩ jaŋ ŋaa dʋnɩa kala lɛ. Ba jaŋ kiri wɩa-nyuŋ kɩalɩŋ kala sɩ kɛŋ doluŋ dɩ ba lɩɩ ba leree. 27Ŋɩɩ lɛ nɛ ma jaŋ na mɩ-na Nuhuobiine Bie dɩ mɩ to duoŋ-bɩlɩmbaanɩŋ tʋɔŋ kʋʋ tuu. Mɩ jaŋ kɛŋ doluŋ a chaanɛ kɩŋkɛŋ. 28Dɩ wɩaa deemba nɛ suomo a ŋɩŋaa, má sii chɩŋ a kɛŋ ma dɩgɩlaa wuoli, bɛɛ wɩaa bʋa-la lɛ Wɩa sɩ jaŋ laama ta yie nɛ.”
Yesu bʋl tutogo wɩaa
Mat. 24.32-35; Maak 13.28-31
29Ŋɩɩ nɛ Yesu magɛ namaga pɩba a bʋl, “Má bee na tutogo arɩ tɩɩsɩŋ dɔnsʋŋ. 30Dɩ ma nɛ na tɩɩsɩŋ dɩ ba suomo tʋtɔsɛ, ma jɩma yibiiniŋ kpagɛ jʋʋnʋŋ nɛ. 31Ŋɩɩ tɩtɩa nɛ, dɩ ma nɛ na wɩaa deemba kala mɩ sɩɩ dagɛma dɩ baa ŋaa, ma jɩŋ arɩ Wɩa kuorii-la kpaga nɛ. 32Wʋtɩtɩɩ nɛ mɩ bʋlaa pɩma, ma lɛɛlɛ nɩaa deemba sɩ hɛ ma mɩɩsɩŋ lɛ, ma bɩ jaŋ sʋʋ, ka wɩaa deemba ŋaa bal. 33Wɩa-nyuŋ arɩ tinteeŋ kala jaŋ dɛrɛ, ama wɩalɩŋ mɩ sɩ bʋla bɩ jaŋ lɛl.
34Má kɛŋ ma tɩtɩa, a sɩ́ wʋtɔɔnʋŋ ŋɩŋaa, a sɩ́ sɩnɩŋ nyʋa bubugi. Má sɩ́ leŋe dɩ dʋnɩa kɩaa wɩaa walɩmɛma. Dɩ wɩaa deemba nɩɩ walɩmɛma, tapʋlɩɩ-la mɩ-na Nuhuobiine Bie sɩ jaŋ kɔ, mɩ jaŋ guu kʋ dɩ-ma lɛ a nagɛ ba sɩ hɛ bɛrɛ́, kɩaa vɛnɛ mʋ jʋʋ aŋ bɩ jɩŋ ŋɩɩ. 35Tapʋlɩɩ-la jaŋ kɛŋ dʋnɩa nʋʋkala lee-kala lɛ. 36Má pɔ a chʋchʋɔlɛ Wɩa bʋa na-kala lɛ. Dɩ ma nɛ ŋaa ŋɩɩ, ma jaŋ kɛŋ doluŋ a lɩɩ wɩalɩŋ kala sɩ jaŋ ŋaa lɛ arɩ yarɩfɩɛlaa a wuo chɩŋ mɩ-na Nuhuobiine Bie sɩpaaŋ.”
37Yesu fa yie hɛ Wɩa dɩɩ-bal-la lɛ wɩɩhɛyɛ arɩ chʋchʋɔŋ kala nɛ a dɩdagɛ nɩaa. Dɩ dɩdaanɩŋ nɛ yie-na kala, ʋ yie mʋ Olif peel-la nyuŋ nɛ a pɩŋ. 38Chʋchʋɔ-fɩɛla-na kala saa nɩaa yie mʋ Wɩa dɩɩ-bal-la dɩ ba jegile nɩɩ wɩalɩŋ ʋ sɩɩ bʋl.
©Ghana Institute of Linguistics Literacy and Bible Translation 1984, 2014