Wakkagagerak 18
18
Ala nen, “Wulaga wokkirigin,” Abarakam yoreegerak wone
1Ne ambi paga at Abarakam nogo o Mamere eyo teno alome taati o liingge mo andi ambik mbareegi, awooliyana tungga'nggi paga kwi'ndak wonage me, at Aliku ALA nen nikka wagagerak. 2#Ibr. 13:2 Nikka wage mbareegi, Abarakam uut pilarogon enegen pe'nage nagagerik, aap ineebe kenagan at owagam taati mi'ndak wonogwe iyareegerak. Iige nagagerik, awooliya tungga'nggi paga nen nggare agan inowagam iya nage nagagerik, inabu'me nggween paga enete wanduk wangge logonet keyage waganabeegerak.
3Keyage waganake nagagerik, yorage logonet, “Nogobamini o. Kit ya'i ninom logonuk noorak op mbakwi kenok, an neegak, kit nok-nok noorak lek o. 4Ata, kit eyo alome yime tat yonggonggolaamunggup nduk, kiniyok kooriyak niyo ambi tookkira nawi o. 5Kit kinayeloman an nawoore'nggam pe'neya wogotak me, mbi nonggo logomonggotik, kinomaawi paga noorak mbako'nom nabagip nduk, kinabugo mbet-mbet aret larikit o.”
Yorage mbareegi, it nogo nen, “E o! Yagandak ti ndak-ndak aret eeru o.”
6Yogo mbareegwa, at Abarakam nogo mbet-mbet aret ame unggwi nage nagagerik, akwe Tara yoge logonet, “Kat mbet-mbet aret tepung abu abe aaninggin 10 negen wakkagak wagangge logomenggendik, amok mbanogo oroti woraru o.”
7Yoge nagagerik, eeke kagak, at Abarakam nogo mbe agan tapi wonogwe me nogome nage nagagerik, “Tapi aagaluk ambi piirigalo yi aret kagi,” yinuk, wagangge nagagerik, laruwak nduk, at ayeloman wogoge mbareegi, ayeloman nogo mbet-mbet lari nagagerak. 8Mbet-mbet aret lake mbareegi, at Abarakam nogo nen tapi elak amburu toolak inom, elak amburu longgo warak inom, tapi larak nogo inom, it aap nogo wogorage mbareegi, nunggwi iigak, at Abarakam nogo eyo alome taa'nogo inarum aret wonagagerak.
9Abu aret nonggo nogogwaarik, at Abarakam nogo kin wakkogo logonet, “Kat kakwe Tara nogo, nggeeme wonage o?”
Yogo mbareegwa, at nen yorage logonet, “Ame yime wonage o.”
10 #
Oro. 9:9
Ari mbareegi, it aap wogogwaarak nogo at ambi nen ari logonet, “Tahun ambi eeppunuk, tut yi ndak-ndak ari wage paga an abet aret kowagam woraagin o. Ndi, kat kakwe Tara ti, aagaluk wulaga aret ndarigin o,” yinuk, yoreegerak.
Wone yoreegerak nogo Tara o tungga'nggi ambokan nggwe time logonet aruk koneneegerak. 11At Abarakam Tara imbirak ndarak iigak, yi tahun ndi tahun eeko nogogwaarik, abu inanggok a'nuk, at kwe Tara nogo, amiya abu lek agagerak me, 12#1Pet. 3:6 wone yoreegerak at Tara nogo konengge nagagerik, inikime nen ari logonet, “An neebe abu kweegelo a'nuk nagabolo abu aret amiironggok ee'nake, ndi, an nogonggelo togon abu anggok age, eekoorak me, nonggop togon ena warak agago ndariyak me nduk yaga o?” yinuk, inikime nen i'ndok kambeegerak.
13Inikime nen i'ndok kangge mbareegi, at Aliku ALA nen Abarakam yoge logonet, “Nonggop nduk at kwe Tara nen, An abu nanggok agarak kagak, elege ndariyak yo'negaarak yi kiraap, yinuk, i'ndok kanggerak? 14#Luk. 1:37 An Naliku ALA nen koonggitak nogo ambi eeriyak, Meek me, yinuk, ari agaarik? Tahun ambi eeppunuk, keya woraagin, yagarak nogo ndak-ndak ari wage kenok, woraagin aret me, at Tara aagaluk aap aret ndarigin o.”
15Yoge mbareegi, at Tara agabiti nen aana'le mbanggolage logonet, “An i'ndok kambulik o.”
Yereegerak kwe, at Ala nen, “Lek o. Kat abet aret i'ndok kangge keegirak o,” yoreegerak.
O Torom teppuurak nduk Abarakam nen Ala yoreegerak wone
16It aap ineebe kenagan nogo o nogome nen wundi nanuk, o Torom inigen kaawok nduk nogo mbareegwa, Abarakam nen nappiya nagagerak. 17-19Nappiya nage me, at Aliku ALA iniki nen mbake logonet, “At Abarakam apuri ambik aret wiganggo logomenggaarik, inanebunu nggwok inomaawi ambik aret logogun o. At paga yi aakumi ndi aakumi nggween paga logomenggaarak nogo inale'nggen aret mbako logogun. Ndi, at apuri ndaganabemenggerak inom, it nen wigannaremenggaarak mendek inom, iniki an noba panggombunuk obeelom koonak mban eerit nogo logorak paga Abarakam eeppuurak yoreegirak nogo an ndak-ndak eeppuurak inaruk wake logowak nduk aret mippereegirak me, an yogondak eeriyak koonggirak nogo, at Abarakam yoga'lek kumaappunuk logorak meek o. Ata, yorikit aret o,” yinuk, mbareegerak.
20Mbake nagagerik, Abarakam yoge logonet, “It Torom mendek inom, Nggomora mendek inom, yi maluk ndi maluk ambik lombok eerit nogwe iinok, yi aakumi ndi aakumi nen, Iya, yinuk, inagabiti mbarit nogwe o, yogwe iigirak me, 21it yi maluk ndi maluk eekwi iinok, aakumi nen yogwe naruk konenggirak nogo abet aret eekwi a, lek a? yinuk, nenegen maloppiya nage agarik o.”
22Yoge mbareegi, it aap wogogwaarak nogo mbere mban o Torom nogome, Nawi, nduk nogwe iigak kwe, at Abarakam nogo perak, at Aliku ALA imbirak taati puk age nagagerik, 23Aliku ALA owagam panggo yi nanuk, kin wagangge logonet, “Aakumi maluk eekwi ti, inooke logonet, aap obeelom mendek inom abet aret inoorumunggun ilik? 24It aap ineebe 50 maluk eeka'lek obeelom mban o kota time wonogwe iinok, nonggop o? Aakumi ineebe 50 obeelom koonak mban eekwi iinok, o ti teppuurak op aret kwe, teppega'lek it abok aret inom lek eerogo piyoorak op mbaken? 25Kat nen it aakumi obeelom eeko menggaarak inom, maluk eeko menggaarak inom, Ndak-ndak aret o, yinuk, abok lambuk togon inooriyak ti mage o, nogoba. Yi aakumi ndi aakumi inomaluk inom, abe inom, inowak loongga kat aret me, yiluk-yiluk inowak loongge menggerak kombarukwak me, togop eerugun o, nogoba.”
26Yoge mbareegi, at Aliku ALA nen ari logonet, “Lek o. It aakumi ineebe 50 maluk eeka'lek iniki abe koonak wonogwe iige logominggirik kenok ti, it ineebe paga aret o kota Torom time inooka'lek teppiyaagin o.”
27Yoge mbareegi, at Abarakam nen ambinom yoge logonet, “An abu meek liirubu wun pogom logonet, wone yokkiriyak meek aret kwe, kagak yokkege me, mbe'niriyak mage o, nogoba. 28Aap ineebe 50 paga ti lek o. Ata, we 45 mban maluk eeka'lek iniki abe koonak wonogwe iinok perak, nonggop o? Ineebe 5 iluk maluk ti paga o ti abok pup eerogo puurak op mbakendak?”
Yoge mbareegi, at Aliku ALA nen, “Lek o. Aap ineebe 45 o time iniki abe koonak wonogwe iinok, o ti apit aret pup eerogo pigin lek o.”
29Yoge mbareegi, ti'nuk, at Abarakam nen Aliku ALA ambinom kin wakkage logonet, “Ndi, ineebe 40 mban wonogwe iinok perak, nonggop o?”
Yoge mbareegi, at Aliku ALA nen, “Lek o. Aap ineebe 40 paga maluk eeka'lek iniki abe koonak wonogwe iinok, o ti pup eerogo pigin lek o.”
30Yoge mbareegi, ti'nuk, at Abarakam nen Aliku ALA ambinom yoge logonet, “Nogoba o. An ambinom aret yokkege me, mbe'niriyak mage o, nogoba. Aap ineebe 30 mban wonogwe iinok ti, nonggop o?”
Yoge mbareegi, at Aliku ALA nen, “Aap ineebe 30 wonogwe iinok, o ti pup eerogo pigin lek o.”
31Yoge mbareegi, at Abarakam nen ambinom yorit unggwage logonet, “Nogoba wae. An nagabiti mbakak logonet kwe, nogogumbuk a'nuk yokkege me, kanini eeppanugun o. Aap ineebe we 20 iluk mban iniki abe koonak wonogwe iinok perak, nonggop o?”
Yoge mbareegi, at Aliku ALA nen, “Aap ineebe 20 iniki abe koonak wonogwe iinok, o ti, an pup eerogo pigin lek o.”
32Yoge mbareegi, at Abarakam nen ari logonet, “Nogoba wae. An ne ambiriluk yi aret yokkege me, kanini eeppanugun o. It aap ineebe we 10 iluk mban maluk eeka'lek iniki abe koonak wonogwe iinok ti, nonggop o?”
Yoge mbareegi, at Aliku ALA nen, “Aap ineebe 10 iluk iniki abe koonak wonogwe iinok ti, an o ti pup eerogo pigin lek o,” yinuk, yoreegerak.
33Ndi, Abarakam Aliku ALA imbirak wone abu aret mbambogo nogogwaarik, at Aliku ALA nogo nage kagak, Abarakam ame wagagerak.
LAI 2009