Yaya 1
1
YAYA
OBEELOM WONE YAYA MBANEEGERAK
Wone ti, aap agagerak wone
1O maan aa'nduk togon mbogut-nggween wakkaga'lek kagak at Wone nogo aret wonagagerak. Wone nogo ti, Ala imbirak aret wonagagerak. Ndi, Wone ti, Ala aret wonagagerak. 2At nogo aa'nduk togon Ala imbirak aret wonagagerak.
3Ala nen at Wone nogo yoge kagak, mbogut-nggween yi mendek ndi mendek abok aret wakkagagerak. Yi mendek ndi mendek wakkagagerak nogo at lek kagak, wakkoolik o. 4Aakumi ineenik eeginake menggerak alom at aret wonagagerak. Ndi, ineenik eeginake menggerak alom ti nen aakumi inikime eya eeginake menggerak. 5Eya nogo nen o apit me eya eeke menggerak. Ndi, o apit nogo nen o eya nogo o apit eerogo pega'lek aret wonage menggerak.
6 #
Mat. 3:1; Mrk. 1:4; Luk. 3:1-2 Ala nen aap ambi endage Yaya aret nappi wagagerak. 7At Yaya nen aakumi inikime eya eeginake menggerak nogo abok paganogo yorage logokit nduk, wagagerak. At yorage paga yi aakumi ndi aakumi abok aret iniki eya nogo oba panggombunuk, abet mbaruwak nduk, paganogo yorage a wagagerak. 8Aakumi inikime eya eeginake menggerak nogo ti, at Yaya lek kwe, at eya eeginake menggerak nogo abok mban paganogo yorage logokit nduk aret wagagerak. 9Eya abe mendek o nggween paga yime unggwi wage logomenggerik, yi aap ndi aap inikime eya eeginake logorak nogo aret wambi wagagerak.
10At o nggween paga yime wambi wage nagagerik, wonagagerak. O mbogut-nggween yi, at aret wakkagagerak kwe, it aakumi nggween paga yime menggaarak nogo at yelok kaga'lek aret wonogogwaarak. 11At ame lombok aret wambi wagagerak kwe, it aap at owe-awot nogo nen at eebe wagangga'lek aret wonogogwaarak. 12Eebe wagangga'lek aret wonogogwaarak kwe, it ando iniki at oba panggombunuk, abet mbako nogogwaarik, waganeegwaarak nogo yorage logonet, “Kit mondok-mondok Ala apuri aret logomunggup o,” yinuk, it abok at apuri aret aganabeegerak. 13It aap nogo aakumi inapuri ndaganakwi kwak ndaganabulik o. Ndi, aakumi nggween paga mendek nen, “An naput ndarikit,” mba'nuk, ndaganakwi kwak ndaganabulik mban. Ata. Ala nen aret ndaganabeegerak o.
14At Wone nogo, aap aret age nagagerik, ninom aret wonagagerak. Ninom logonet, oona ngginik kagak, iniki kunik nen eeppinanege, Ala ndogop menggerak o, yinuk, liirogon yo'nirage, eeke kogo logonet, at Ala aput ambolom ndarak me, ogoba nen tiyappereegerak mondok tiyanak aret kogogurak o.
15At Yaya nen oone nggwok paga at nogo abok paganogo yorage logonet, “Aap ambi nambokan woraagin nogo, an nda'naga'lek neegak, at aa'nduk togon wonagagerak me, an ta mbuuluk. Ndi, at mondok nggwok aret o, yinuk, yokkirage nagagirak nogo eebe yi aret o,” yinuk, yorage nagagerak. 16At oona ngginik kagak iniki kunik nen eeppinanegak mban, eeppinanegak mban, eeke kenok, nit abok aret waganeegurak. 17Ala nen wone lengganogo yoge kenok, Muta nen yo'niragagerak kwe, Ala iniki kunik nen eeppinanege, “Ala ndogop menggerak o,” yinuk, liirogon paganogo yo'nirage, eereegerak nogo ti, Yetut Keritut aret o. 18Aakumi nen Ala mondok inigen kogolik aret o. At Ala aput ambolom ndarak iniki kunik lombok nogo nen perak, Ala abok paganogo yo'niragagerak.
At Yiime Wuppiiga Yaya nen yorage nagagerak wone
(Mat. 3:1-12; Mrk. 1:1-8; Luk. 3:1-18)
19It aap Yakuri mendek nen aap Ala unde inom, it aap Lewi mendek inom, “Kat aap ta o?” yinuk, at Yaya yoruwak nduk, o Yerutalem nen at owagam nappiyareegwaarak owagam nogo mbareegwa, at Yaya nen paganogo yoragagerak nogo yi aret o. 20At Yaya nen, “Onggo yoroorak ti, neebi,” mbarulik o. Ata, onggo yorage logonet, “Ala nen leenogo mippereegerak nogo, an ta lek o,” yinuk, tena'me paganogo yoragagerak.
21 #
Pel. 18:15; 18; Mal. 4:5 Yorage mbareegi, it nogo nen at Yaya yogo logonet, “Ndi, ti kenok, kat ta o? Kat Eliya ilik?”
Yogo mbareegwa, at Yaya nen, “Eliya ti kunduk, an lek mban o.”
Yorage mbareegi, it nen, “Ti kenok, aap Ala nen yoge kagak yoraga nogo, kat aret ilik?”
Yogo mbareegwa, at nen, “Ti kunduk, an lek mban o.”
22Yorage mbareegi, it nen at yogo logonet, “Ndi, ti kenok, kat ta o? It nappinani wagaarak nogo wone wonok yora nawam yo'niret ubi! An aap ndogop o, yinuk, pagangge menggendak nogo ngge o?”
23 #
Yet. 40:3
Yogo mbareegwa, at Yaya nen, “Ala yoge kagak yoraga Yetaya nen ari logonet, Aap ambi karume aakumi lek me kuum ari logonet,
At ninogoba Ala woroorak tu koonogo yako logonip o, yereegerak nogo ti, an aret o,”
yinuk, yoragagerak.
24It nappiyareegwaarak nogo ti, aap Pariti mendek inom aret nappiyareegwaarak. 25It nappiyareegwaarak nogo nen Yaya yogo logonet, “Ala nen leenogo mippereegerak nogo ti, an lek o. An Eliya lek o. Ndi, Aap Ala nen yoge kagak yoraga nogo ti, an lek mban o, yagandak kwe, nonggop nduk aakumi yiime wuppiinet nege agandik?”
26Yogo mbareegwa, at Yaya nen, “Lek o. An aakumi yiime wuppiige minggirak aret kwe, aap ambi kit liippega'lek kiigak, wambi wagagerak kinenggela'me wonage o. 27At nogo ti, nambokan woraagin kwe, at aap nggwok me, an nen iyogogut nggerenak piiniyak meek o,” yinuk, yoragagerak.
28Wone ti yoragagerak nogo ti, at aakumi yiime wuppiige nagagim niyo Yoraran enebaga o Mbetaniya nogome logonet, yoragagerak.
“Ala andomba yi kaanip o,” yoragagerak wone
29Nogo yinuk, ko'lu Yetut nogo, at Yaya owagam wage enegen kage nagagerik, it aakumi yorage logonet, “Aakumi nggween paga yime menggaarak inomaluk lek agago piige menggerak Ala andomba nogo wage yi kaanip o. 30Aap ambi an nambokan woraagin nogo an nda'naga'lek neegak, at aa'nduk wonagagerak me, an ta mbuuluk. Ndi, at mondok nggwok aret o, yinuk yokkirage minggirak nogo eebe yi aret o. 31#Yet. 40:5 An togon at liippega'lek aret wonagarak kwe, it aakumi Iterali mendek nen at ineenu aruwak nduk, an yiime wuppiinet wagarak nogo o,” yinuk, yoragagerak.
32Yorage nagagerik, at Yaya paganogo yorage logonet, “Aberiniki towe puume pogom mbogut paga nen wuga agan wambi wage nagaarik, Yetut oba kwi'ndak wonage nenegen kagarak o. 33An nen at liippega'lek aret wonagarak kwe, an aakumi yiime wuppiyoorak nduk, nappani wagagerak nogo nen, Aberiniki wambi woramenggerak at ambi oba kwi'ndak wonage kenegen kaamunggun nogo ti, Aberiniki kinoba wuppinagi woraagin nogo aret o, yo'nereegerak me, 34an aret nenegen kage nagarik, Yi Ala aput aret o, yinuk, paganogo yokkiragi o,” yoragagerak.
It inaa'nduk Yetut oone waganeegwaarak wone
35Nogo yinuk, ko'lu Yaya it at oone waganggwi mendek mbere inom nogome logonet, 36Yetut nage enegen kage nagagerik, “Wologo wae! Ala andomba nage ti, kaanip o.”
37Yoragagerak at oone waganggwi mbere nogo konenggo nogogwaarik, Yetut mugurok nogogwaarak. 38Mugurok nogwe nogo Yetut ena logurogon pegiige logonet, “Kit nano kwaarit wogop o?”
Yorage mbareegi, it nen, “Rabi wae! Kat kawi ngge o?” yinuk, yoreegwaarak. (“Rabi wae,” yoreegwaarak ti, nit ninoone paga, “Ngguru wae,” yoreegwaarak.)
39Yogo mbareegwa, Yetut nen, “Pekka nawok nduk, wa'nip o,” yorage mbareegi, inom nogo nogogwaarik, at ame inigen kogogwaarak. Ne ti eyom paga o kiyoma-kiyoma oonegen 4 negen ari nagagerak me, inom aret wonogogwaarak.
40Aap mbere Yaya nen yoragagerak nogo konembunuk, Yetut mugurok nogogwaarak ambi ti, Timon Peterut awuluk Andereyat nogo aret. 41At nogo nen oweeluk Timon mbet-mbet kwaakkage nagagerik, yoge logonet, “Timon wae! Mesias nogo muk wagaarak ninigen kogoorak o,” yinuk, yoreegerak. (Mesias, yoreegerak nogo ti, nit ninoone paga Ala nen leenogo mippereegerak Keritut aret nduk yoreegerak.)
42 #
Wak. 17:5, 15; 32:28; 35:10; Mat. 16:18 Yoge nagagerik, wonok Yetut owagam nage mbareegi, Yetut enegen kage nagagerik, at yoge logonet, “Yaya aput kat Timon aret kwe, kendage Kepat aret yokkogo logogun o,” yinuk, yoreegerak. (Endage Kepat yoreegerak nogo ti, it aap Yunani inoone paga, “Peterut o,” yoreegerak.)
Piliput Natanayen imbirak wiiragagerak wone
43Nogo yinuk, ko'lu at Yetut o Nggalileya noorak kooneegerak. Koombunuk, aap Piliput kwaakkage nagagerik, yoge logonet, “Nimbirak nawok nduk, mok o,” yinuk, yoreegerak.
44At Piliput awi ti, kota Mbetayira Andereyat Peterut imbirak at inom inawi ambime time aret wonogogwaarak.
45“Nimbirak nawok nduk, mok o,” Piliput nogo yoge mbareegi, Piliput nen aap Natanayen kwaakkage nagagerik, yoge logonet, “Natanayen wae! At ambi woraagin o, yinuk, Muta nen Ala wone yugu liiru mbangge, ndi, it aap Ala nen yorage kagak yoraga nen kunduk, liiru mbanggwi, eereegwaarak eebe nogo ti, Yutup aput Yetut awi Nataret mendek aret me, muk wagaarak ninigen kogoorak o.”
46 #
1End. 9:13; Ya. 7:41, 42, 52 Yoge mbareegi, at Natanayen nen, “A puk! Abe mendek o Nataret time nen op woroorak me nduk yagan a?”
Yoge mbareegi, at Piliput nen, “Pekka mok mban o.”
47 #
Nda. 32:2; Oro. 9:4, 6 Yoge mbareegi, Yetut nen aap Natanayen at owagam wage enegen kage nagagerik, at abok ari logonet, “Aap Iterali mondok abe oone mbere ariilik yi kaanip o.”
48Yoge mbareegi, at Natanayen nen, “A puk! Kat nonggop togon an neebe keenu agandak o?”
Yoge mbareegi, at Yetut nen, “Piliput awo wiigega'lek kagak, kat eyo wuli alome wonage muk nenegen keegirak o.”
49Yoge mbareegi, at Natanayen nen, “Ngguru wae. Ala aput aakumi Iterali inowe endagembogut kat aret keegi o.”
50Yoge mbareegi, at Yetut nen, “Kat eyo wuli alome wonage keegirak o, yinuk, yokkigirak paga kiniki noba panggombunuk, abet nombakendak ya? Kat eeke kagandak yi ti, mbuuluk negen eeke kagandak kwe, peebi perak, nggwok aret eeke kaamunggun o.” 51#Wak. 28:12 Yoge nagagerik, ambi yoge logonet, “Peebi mbogut keyaappunuk, it Ala yonggo nappiya wage menggerak malayikat nogo nen an aap aret nda'nagagirak pe'neya wambi wogwe, mbogut paga lagi nogwe, eekwi iige logomunggun o, yinuk, abet aret yokkigi o,” yoreegerak.
LAI 2009