PA'JARIANG 11
11
Menara Babel
1Uru-uruna, sikontu bansa-bansaya ri anne linoa se'reji bahasana siagang sangkamma ngasenji bicaranna ke'nanga. 2Ri wattunna a'lampa bellamo anrai' ke'nanga, battumi ke'nanga ri se'reang parang lappara' ri Babilonia, nampa ammantang ke'nanga anjoreng. 3Massing angkanami para ia ke'nanga, nakana, “Umba kippare' batu bata nampa nitunu sa'genna a'jari terasa'.” Kammaminjo nania'mo batu batana ke'nanga untu' ambangung balla' siagang tere' untu' ampasidakkiki anjo batu bataya. 4Nakanamo ke'nanga, “Umba kimbangung kota siagang se're menara ta'rapika coppo'na sa'genna ri langi', sollanna ki'jari masahoro' siagang tena kisisa'la'-sa'la ri sikontu linoa.”
5Nanaummo Batara untu' anciniki anjo kotaya siagang menara nabangunga rupataua. 6Nampa Nakanamo ri ke'nanga, “Anne ke'nanga se'reji bansa siagang se'reji bahasana, nampa anne nampami pakaramulanna sikamma rancanana ke'nanga. Tasalloami nakkullemo ke'nanga anggaukangi sikamma apa nakaerokia ke'nanga. 7Bajikangngang naungki' nanipasisala-sala bahasana ke'nanga sollanna takkullea sipahang ke'nanga.” 8Kammaminjo nanipasisa'la'-sa'la'mo ri Batara ri sikontu linoa. Jari ammarimi ke'nanga ambangungi anjo kotaya. 9Iaminjo saba'na naniaremmo anjo kotaya Babel,#Babel, lalang bahasa Ibrani sangkammai battuanna “sisala-sala”. lanri anjoremmi Napasisala-sala Batara bahasana sikontu bansaya, siagang battu anjoremmi ke'nanga nipasisa'la'-sa'la' ri Batara mange ri sikontu linoa.
Sossoranna Sem
(1Pat. 1:24-27)
10Iaminne sossoranna Sem. Ruan taungi ri le'ba'na kajariang a'ba lompoa, ri wattunna narapi' 100 taung umuru'na Sem, nisaremi sitau ana' bura'ne, niarenga Arpakhsad. 11Le'baki anjo attallasa' iji 500 taung sallona, siagang nisare iji siapa are jaina ana' maraengannaya.
12Ri wattunna 35 taung umuru'na Arpakhsad, nisaremi ana' bura'ne, niareng Selah. 13Le'baki anjo attallasa' iji Arpakhsad 403 taung sallona, siagang nisare iji siapa are ana' maraengannaya.
14Ri wattunna 30 taung umuru'na Selah, nisaremi ana' bura'ne, niareng Eber. 15Le'baki anjo attallasa' iji Selah 403 taung sallona, siagang nisare iji siapa are ana' maraengannaya.
16Ri wattunna 34 taung umuru'na Eber, nisaremi ana' bura'ne, niareng Peleg. 17Le'baki anjo attallasa' iji Eber 430 taung sallona, siagang nisare iji siapa are jaina ana' maraengannaya.
18Ri wattunna 30 taung umuru'na Peleg, nisaremi ana' bura'ne, niareng Rehu. 19Le'baki anjo attallasa' iji Peleg 209 taung sallona, siagang nisare iji siapa are jaina ana' maraengannaya.
20Ri wattunna 32 taung umuru'na Rehu, nisaremi ana' bura'ne, niareng Serug. 21Le'baki anjo attallasa' iji Rehu 207 taung sallona, siagang nisare iji siapa are jaina ana' maraengannaya.
22Ri wattunna 30 taung umuru'na Serug, nisaremi ana' bura'ne niareng Nahor. 23Le'baki anjo attallasa' iji Serug 200 taung sallona, siagang nisare iji siapa are jaina ana' maraengannaya.
24Ri wattunna 29 taung umuru'na Nahor, nisaremi ana' bura'ne, niareng Terah. 25Le'baki anjo attallasa' iji Nahor 119 taung sallona, siagang nisare iji siapa are ana' maraengannaya.
26Ri wattunna 70 taung umuru'na Terah, nisaremi tallu ana' bura'ne, iamintu: Abram, Nahor, siagang Haran.
Sossoranna Terah
27Iaminne sossoranna Terah: Terah iami manggena Abram, Nahor, siagang Haran. Haran nia' ana'na bura'ne, niareng Lot. 28Ri wattunna attallasa' ija manggena, matemi Haran ri pa'rasanganna, iamintu ri Ur ri Babilonia. 29Abram a'nikkai siagang Sarai, nampa Nahor a'nikkai siagang Milka ana' bainena Haran. Nia' ija ana'na Haran bura'ne maraengannaya niareng Yiska. 30Na anjo Sarai tubaine tamanangi.
31A'lampai Terah ambokoi kota Ur ri Babilonia siagang Abram ana'na, Lot cucunna, siagang Sarai mintunna iamintu bainenna Abram. Eroki a'lampa mange ri Kanaan. Mingka ri wattunna battu ri Haran, ammantammi ke'nanga anjoreng. 32Nampa anjoremmo Terah ammoterang, ri wattunna 205 taung umuru'na.
@LAI, 1999