LUKAS 15
15
Domba apan nawul᷊i
(Mat. 18:12-14)
1Su sambau allo, manambo mallaluṛṛu wose wuṛṛu manga taumata apan sassunnanna lal᷊oṛṛon soa lal᷊eo, nirumanta madaringikka Mawu Yesus. 2Manga taumatan Farisi wuṛṛu manga hurun agama mannattakke sussal᷊iomanna. I mangitou mabbisara, “Eh, taumata indi mannengkamma taumata lal᷊eo wuṛṛu u'anna lai su sampunna ringanni mangitou!” 3Ana waugu udde, Mawu Yesus nabbati'e si mangitou sasumandingnga indi,
4“Unnu wisara sangkatou wuassi yamiu uatahuanna domba maṛṛasutta see i tou niawul᷊iannu sambau – apa sarun olaanne? Natantunna i tou sarun manantangngu siom pul᷊o sio domba udde su wadda'a, wuṛṛu inaite maddea'a sambau apan nawul᷊i udde ma'oman sara asombanganna. 5Wuṛṛu napawe i tou naasombate apia domba udde, i tou aroddi lulluassa na'oman sara pinasanna domba udde su wambangnge, 6see niapidda napul᷊e. Wua'udde i tou namago manga hawene wuṛṛu al᷊indonganne, wuṛṛu nabbisara, ‘Wette i ite lumuassa. Domba'u apan nawul᷊i niasombangante apia!’ 7Ne, aroddi lai su surga pia al᷊al᷊uassa apan bahewalla su sangkatou apan marosa nawal᷊u wuassu rosane, wuassu siom pul᷊o sio taumata apan mapiate wuṛṛu tate lai iwata'a mawal᷊u wuassu rosane.”
Roitta apan nawul᷊i
8“Ara'e unnu wisara sangkatou wawine uatahuanna mapul᷊o roitta sal᷊a'a, see sambau nawul᷊i – apa sarun olaanni tou? I tou sarun mande'omma sol᷊o wuṛṛu manapu wal᷊ene lapiddu maddea'a su al᷊awo'u tampa ma'oman sara asombanganna roitta udde. 9Su tempo i tou naasomba roitta udde, i tou namago manga hawene wuṛṛu manga al᷊indonganne, see nabbisara, ‘I ya'u lulluassa atonna ana waugu niasombangante apia roi'u apan nawul᷊i. Wette i ite lumuassa!’ 10Aroddi lai mala'ekattu Ruata lulluassa napawe pia sangkatou taumata lal᷊eo nawal᷊u wuassu manga rosane. Pangimante!”
Ana'a apan nawul᷊i
11Mawu Yesus nabbisara apia, “Pia sangkatou iamangnga apan pia anangnge ruang katou esakka. 12Iapa atuarianne nabbisara si tou, ‘Iamangnga, anggil᷊a'e si ya'u wageangku orassa indi wuassu darotongngi ite.’ Ne iamangnge nattahiate darotongnge udde su anangnge ruan katou udde. 13Manga pira allo wua'udde ana'a atuarianne udde nabal᷊u'u wageangnge pussaane udde see inaite su wanua marau. Poiaroddi i tou nanginsuete roinne wuṛṛu mallal᷊umanna'e. 14Napawe roinne udde nasuete, nariaddite su wanua udde ṛutumma apan wahewa, na'oman sara i tou nasusate. 15See i tou inaite nammanara ringannu sangkatou tumana'u soa isudde, apan nandolokki tou su wailla mandiaga wawi. 16I tou niamal᷊unusante, na'oman sara i tou pia apulu malloṛṛo tianne ringannu annu manga wawi udde. Salaiwe i tou mal᷊unussa aroddi, tawe saran sangkatou mangonggolu anna si tou. 17Panginsueanne i tou naanaungnga wuṛṛu nabbisara, ‘Manga taumata apan mammanara ringannu iamangku pia anna marasai arawe i ya'u isindi mateten lunussa! 18I ya'u mapul᷊ete wuṛṛu inaite ringannu iamangku wuṛṛu mabbisara si tou: Iamangnga, i ya'u suete na'ola'a rosa su saruannu Ruata wuṛṛu su saruanni Iamangnga. 19I ya'u tate su ṛinone lai isago ana'u Iamangnga. Ola'e i ya'u ere sangkatou allangngu Iamangnga.’ 20Ne i tou inaite napul᷊e ringannu iamangnge.
Ta'e marau wuassu wal᷊e, i tou niasiloanten iamangnge. Ringannu aakkanna iamangnge tinumal᷊angnga naisasomban tou, see naṛṛa'uppa wuṛṛu nangari'a si tou. 21‘Iamangnga,’ unnu ana'a udde, ‘i ya'u suete na'ola'a rosa su saruannu Ruata wuṛṛu su saruannu Iamangnga. Tate su ṛinone lai ya'u isago ana'u Iamangnga.’ 22Arawe iamangnge namago manga mangangimbene wuṛṛu nabbisara, ‘Paal᷊ihakka! Panganu laubba apianne, wuṛṛu luṛṛea'e si tou. Luṛṛea'a lai sinsingnga su tal᷊imadone, wuṛṛu sapatu su leddane. 23Wua'udde panganute ana'u sapi atawanne wuṛṛu pototte. I ite sarun umanna wuṛṛu lumuassa. 24Ana waugu ana'u indi natete, orassa indi nabbiakke apia; i tou nawul᷊ite, orassa indi niasombangante apia.’ See i mangitou nanattakke naandeangnga.
25Tantal᷊anna udde, ana'a pahul᷊une su wailla. Su tempo i tou napul᷊e wuṛṛu na'omate maranin bal᷊e, i tou naaringikka tingikku musikka wuṛṛu masasal᷊aingnga. 26I tou namago sangkatou su wallattu mangangimbene see naiwal᷊o, ‘Pia apa su wal᷊e?’ 27Mangangimbe udde sinumimbakka, ‘Tuarinu nawelengke! Wuṛṛu iamangngu suete nandolokka niapapototta ana'u sapi apan matawa, ana waugu nawelengnga apia ana'i tou ringannu sal᷊amatta!’
28Ana'a pahul᷊une udde mangke nasa'u, na'oman sara i tou maddiri sumutta su wal᷊e. See iamangnge sinumabangnga wuṛṛu nassal᷊o'en tou niapaasutta. 29Arawe i tou nabbisara, ‘Ringannu tonnane al᷊annune i ya'u mammanara ringanni Iamangnga. Taambe saran paassa i ya'u nilumawangnga parentan Iamangnga. Apate nionggolli Iamangnga si ya'u? Ambingnga sambau lai taambe nionggolli Iamangnga si ya'u ipa'ola'a andeangnga ringannu manga hawe'u! 30Ana'u Iamangnga udde suete nanginsue darotongngu Iamangnga ringannu wawine masandaga, arawe napawe i tou nawelengnga, Iamangnga namototta ana'u sapi apan matawa si tou!’ 31‘Ana'u,’ sasimbakku iamangnge, ‘i'o sidutu isindi ringangku. Anambon darotongnga apan tatahuanangku udde darotongngu lai. 32Arawe i ite sarun ma'andeangnga wuṛṛu lumuassa ana waugu tuarinu udde natete, arawe orassa indi nabbiakke apia; i tou nawul᷊ite, arawe orassa indi nawelengke apia.’ ”
@ LAI 2003