LUKAS 18
18
Sasumandingngu wawine wal᷊u wuṛṛu mallaṛṛuungnga
1Wua'udde Mawu Yesus nabbati'u sambau sasumandingnga ipangaṛṛa'a manga mallal᷊aṛṛenggen-Ne tadea'u i mangitou sidutu u'al᷊iomanna wuṛṛu tawe ma'adio'a naungnge. 2Mawu Yesus nabbisara, “Su sambau soa pia sangkatou mallaṛṛuungnga apan tawe matta'uttu Ruata, wuṛṛu tawe lai mappandumma sisai-sai. 3Su soa udde pia sangkatou lai wawine wal᷊u apan masokkate sumaruanna mallaṛṛuungnga udde, madorongnga hattone sambaanna. ‘Tul᷊ungaawe i ya'u sumaruanna roa'u,’ unnu wawine wal᷊u udde. 4Manga pira tempo al᷊annune mallaṛṛuungnga udde maddiri mantul᷊ungngu wawine wal᷊u udde. Arawe panginsueanne mallaṛṛuungnga udde naṛṛingida, ‘Salaiwe ya'u tawe matta'uttu Ruata wuṛṛu tawe mappandumma sisai-sai, 5arawe ana waugu wawine wal᷊u indi sidutu mallimbatta si ya'u, mappianne i ya'u manamba'a hattone. Amungkangngu tawe, i tou sidutu rudanta wuṛṛu mapaasusa'u.’ ”
6See Mawu Yesus nabbisara, “Inunue'o paapia apa apan iwabbisara mallaṛṛuungnga apan wengkolla udde! 7Ne, apa Ruata tawe manamba'a hatton al᷊aṛṛanang-Nge sassane apan sussal᷊ande si Tou allo ṛabbi? Apa i Tou sarun manoṛṛuttu tempone mantul᷊ungngi mangitou! 8Pangimante: I Tou ringannu mal᷊iha-l᷊ihakka manamba'a hatto mangitou! Arawe napawe Ana'u Taumata rumanta, apa ta'e asombanganna lai taumata apan mangngimanna si Tou su runia indi?”
Sasumandingngu taumatan Farisi wuṛṛu mallal᷊uṛṛu wose
9Mawu Yesus nabbati'u lai sasumandingnga indi apan tuddane su taumata apan mangngadio'a taumata waine, arawe mangngimanna manungku ririne sassane mapiate. 10Unnu Mawu Yesus, “Pia ruan katou apan inai su Wal᷊e Mawu umal᷊iomanna. Sangkatou taumatan Farisi, sangkatou lai madarorongnga wose. 11Taumatan Farisi udde nirumarisikka sassane wuṛṛu inumal᷊iomanna, ‘O Ruata, i ya'u maadiangkamanna Si'o, ana waugu i ya'u tawe ere taumata waine, apan wal᷊iu, taṛṛa l᷊inga ara'e masandaga. I ya'u ma'adiangkamanna ana waugu i ya'u tawe ere madarorongnga wose udde. 12I ya'u paarua mappuasa sulal᷊ummu sangkamisa, wuṛṛu i ya'u mangngonggolu sambau wuassu mapul᷊o anambon asombangku!’ 13Arawe madarorongnga wose udde nirumarisikka marau-rau wuṛṛu tawe maningngara langitta. Lapiddu mannapu roone, i tou nabbisara, ‘O Ruata, akkanawe i ya'u, taumata marosa indi!’ ”
14“Pangimante,” unnu Mawu Yesus, “su tempo napul᷊ete su wal᷊e, ete madarorongnga wose udde tinarimmattu Ruata, wal᷊ine taumatan Farisi udde. Ana waugu taumata apan mannanggakku watanganne sarun iapaawawo, wuṛṛu taumata apan sussallungu watanganne sarun iapaatanggakka.”
Mawu Yesus nangal᷊amatta al᷊aṛṛana'a
(Mat. 19:13-15; Mrk. 10:13-16)
15Pia sire pira taumata uaapiddu al᷊aṛṛana'a maradio'a ringannu Mawu Yesus tadea'u i Tou mamita wuṛṛu mangal᷊amatta si mangitou. Napawe manga mallal᷊aṛṛenggennu Mawu Yesus naasilo olangnge udde, i mangitou namul᷊o manga taumata udde. 16Arawe Mawu Yesus namago al᷊aṛṛana'a udde see nabbisara mallal᷊aṛṛenggen-Ne, “Wala'e aroddi al᷊aṛṛana'a indi rumanta ringang-Ku! Arie isingadda i mangitou, ana waugu taumata ereindi apan maola'a lal᷊oṛṛon araratuannu Ruata. 17Naungete! Taumata apan tawe sumaruanna Ruata ere sangkatou ana'a, tawe maola'a lal᷊oṛṛon araratuannu Ruata.”
Su ola'u taumata ala
(Mat. 19:16-30; Mrk. 10:17-31)
18Sangkatou piaṛṛa'u Yahudi naiwal᷊o Mawu Yesus, “Iamangnga Huru apan mapia, apa sarun olaangku tadea'u ya'u maasomba wiakka tutune wuṛṛu mal᷊annu-l᷊annu?”
19“Anio i'o nabbisara i Ya'u mapia?” unnu Mawu Yesus. “Tawedu apa apan mapia tumba'u Ruata sassane. 20I'o masingkatte manga parentan Ruata: ‘Arie passandaga, arie pamate, arie panna'o, arie mattiala awusu, wuṛṛu pangaddatta iamangngu wuṛṛu inangngu.’ ”
21“Anambon parenta udde suete ta'u niola'a ro'en i ya'u ta'e dario'a,” unnu taumata udde.
22Naaringikka udde, Mawu Yesus nabbisara, “Ta'e pia lai sambau sarun olaannu: Wal᷊ua'e anambon darotongngu, onggol᷊a'e roinne su taumata asiangnga, ne i'o sarun maasomba darotongnga su surga. Wua'udde rantate wuṛṛu tantalongke si Ya'u.” 23Arawe napawe taumata udde naaringikka wisara aroddi, i tou mangke nasusa ana waugu i tou ala marasai.
24Mawu Yesus masingkatta manungku taumata udde nasusa naungnge, ana waugu udde i Tou nabbisara, “Masahadda atonna taumata ala maola'a lal᷊oṛṛon araratuannu Ruata! 25Malluasanna sambau onta sumuṛṛi su loṛṛangngu raraṛṛumma, wuassu sangkatou ala sumutta su Runia Wakku Ruata.”
26Manga taumata apan naaringikka Mawu Yesus nabbisara aroddi, i mangitou naiwal᷊o, “Amungkangngu aroddi, isai wotongnge masal᷊amatta?”
27Mawu Yesus sinumimbakka, “Apa tawe ia'ola'u taumata, udde wotongnge su Ruata!”
28See i Petrus nabbisara, “Pa'ellega! I yami suete nanantangngu lal᷊oṛṛon bal᷊eng kami ana waugu tumantalongnga Iamangnga.”
29“Pangimante!” wisara Mawu Yesus, “Taumata apan suete nanantangngu wal᷊ene, ara'e awingnge wawine, ara'e tuṛṛangnge, ara'e iamangnge wuṛṛu inangnge, ara'e al᷊aṛṛanangnge ana waugu mangngimbe Ruata, 30taumata udde sarun bal᷊isanna paarua wuassu tempo indi, wuṛṛu su tempo addantane i tou sarun onggol᷊annu pabbawiakka apan tutune wuṛṛu saran mal᷊annu-l᷊annu.”
Mawu Yesus nabbisara atallune su ola'u papate-Ne
(Mat. 20:17-19; Mrk. 10:32-34)
31Mawu Yesus nangammullu sire mapul᷊o dua mallal᷊aṛṛenggen-Ne su sambau see nabbisara, “Padaringikka! I ite orassa indi mabatukku Yerusalem. Poiaroddi, sarangkanambone apan niwoṛṛettu manga nabi su ola'u Ana'u Taumata sarun matipussa. 32I tou sarun itantilla su manga taumata apan wal᷊ine Yahudi, apan sarun mangal᷊uandaga, mangngadio'a wuṛṛu mangaddu si Tou. 33I mangitou sarun manansara wuṛṛu mamate si Tou, arawe su allo atallune, i Tou sarun mabangunna.”
34Sarangkanambone udde tawe niasunnannu manga mallal᷊aṛṛenggennu Mawu Yesus udde saran kadio'a. Atappasannanu manga wisara-Ne udde ia'adappingnga wuassi mangitou. I mangitou wagga apa pandumannu wisara-Ne.
Mawu Yesus napaapian sangkatou madarorongnga matane wuta
(Mat. 20:29-34; Mrk. 10:46-52)
35Napawe Mawu Yesus maranite ma'oman Yerikho, pia sangkatou wuta tantal᷊anna ua'ianna madoro-rorongnga su winggin dal᷊anna. 36Napawe i tou naaringikka manambo taumata sinumabbi, i tou naiwal᷊o, “Pia apa?”
37“Mawu Yesus taumata Nazaret udde, sumabbi,” unni mangitou si tou.
38Ne taumata wuta udde nangintul᷊i, “Yesus, Ana'i Daud! Akkanaawe i ya'u!”
39Manga taumata apan su saruanne, namul᷊o wuṛṛu nandolokki tou niapaal᷊annabba. Arawe i tou sidutu mangngintul᷊i lembon aikkanne lai, “Ana'i Daud! Akkanaawe i ya'u!”
40Mawu Yesus natta'alla wuṛṛu nandolokku taumata niapaapiddu taumata wuta udde ringanni Tou. Napawe i tou na'omate, Mawu Yesus naiwal᷊o, 41“Apa ipaapulunu olaang-Ku si'o?”
“Mawu,” sasimbakku taumata wuta udde, “i ya'u ma'apulu maasilo.”
42See Mawu Yesus nabbisara, “Amungkangngu aroddi, pa'ellege! Ana waugu i'o mangngimanna si Ya'u, i'o napiate.”
43Orassa udde lai i tou naasilote, see i tou tinumantalongke Mawu Yesus ringannu ma'adiangkamanna su Ruata. Napawe taumata nambo udde naasilote olangnge udde, i mangitou nambo nadalote Ruata.
@ LAI 2003