Genesisi 13
13
Abrama na Loti va hambana.
1Na Abrama i lo huma Gipite a tlhelela Dzongeni zinwe ni sati wakwe, ni zontlhe lezi a nga hi nazo, zinwe na Loti.
2Na Abrama i wa fumile nguvu hi tihomu, ni siliva, ni nzalama.
3I lo famba hi ku gova, a tsemakanya le Dzongeni, kala a chikela le Beteli, wutshanwini lego ku nga wa hi ni tenda gakwe kusanguleni, xikari ka Beteli ni Ai;
4a wutshanwini ga alati legi a nga wa gi mahile kusanguleni, laho i lo khongela a vitweni ga Jehova.
5Yenawu Loti loyi a nga wa famba na Abrama, i wa hi ni tiyivu ni tihomu ni matenda.
6Ni tiko gi wa nga va eneli a kuva va tshama wutshamu ginwe; hakuva va wa fuyile nguvu, va wa nga zi koti ku tshama wutshamu ginwe.
7Ku wa hi kona maguwa xikari ka varisi va tihomu ta Abrama, ni varisi va tihomu ta Loti; a maKanani ni maPerezi va wa akile lomu tikweni xikhatini lexo.
8Abrama aku ngalo ka Loti: Ngha ku nga hi kona maguwa xikari ka mina na wena, ni xikari ka varisi va mina ni varisi va wena, hakuva hi vamakabye.
9A tiko gontlhe a gi kona mahlweni ka wena ke? Tsawukana na mina; loku uya canjeni ga xibhabha, mina nzi taya ka canja ga xinene; ni loku uya ka ga xinene, mina nzi taya ka ga xibhabha.
10Loti i lo tlakusa a mahlo yakwe, i lo wona a mikova yontlhe ya Jordani, hakuva yi wa hi ni mati yontlhe (Jehova i wa nga se lovisa Sodoma ni Gomora), na yona yi wa ku khwatsi i simu ga Jehova kotisa a tiko ga le Gipite, kala ku chikela Zoare.
11Na Loti i lo hlawula mikova yontlhe ya Jordani. Loti i lo suka aya Mutsuwuka-gambo; va hambana.
12Abrama i lo tshama tikweni ga le Kanani; Loti i lo tshama mitini ya le mikoveni, i lo yimisa a tenda gakwe hi le Sodoma.
13Kanilezi a vanhu va le Sodoma va wa bihile, va wa onha nguvu mahlweni ka Jehova.
14Na Jehova aku ngalo ka Abrama, anzhako ka kuva Loti a hambene naye: Hi nga tlakusa a mahlo ya wena u yima hikwalaho u nga kona, u cuwuka Nwalungu ni Dzongeni, ni le Mutsuwuka-gambo ni Muhlwa-gambo;
15hakuva a tiko gontlhe legi u gi wonako, nzi ta gi nyika ka wena ni pswalo wa wena kala kupinzuka.
16Nzi ta maha a pswalo wa wena kota a tshuri wa misava; loku munhu a zi kota ku hlaya a tshuri wa misava, a nga hlaya ni pswalo wa wena.
17Suka u famba u tsemakanya tiko, a kunavalata ka gona ni kuanama ka gona, hakuva hi gona nzi to ku nyika.
18Na Abrama i lo suka, i lota aka mikuhlwini ya le Mamre le Hebroni; laho i lo aka a alati ga Jehova.
Tshwa Bible © Bible Society in Mozambique, 1972, 2007.