युहन्ना 2
2
गलील लाक्के काना गराऊंऐं पैहलअ च़मत्कार
1तेखअ चिऊथै धैल़ै त गलील लाक्के काना गराऊंऐं कसरअ बैह, ईशूए आम्मां बी आसा ती तिधी बैहा लै नाठी दी। 2ता ईशू और तेऊए च़ेल्लै लै बी त बैहा लै छ़ांदअ। 3ज़ांऊं बरातू लै अंगूरे रसे कामीं पल़ी, ता ईशूए आम्मां बोलअ, “घरा आल़ै का निं अंगूरो रस रहअ।”
4ईशू बोलअ तेसा लै इहअ, “ए आम्मां, ताह निं एते फिकर करने ज़रुरत आथी?
“अज़ी निं मेरअ बगत आई।”
5तेखअ बोलअ ईशूए आम्मां टैहलू लै, “ज़िहअ-ज़िहअ अह तम्हां लै बोले, तिहअ-तिहअ करै।”
6तिधी आसा तै यहूदी लोगे हाथा-खूरा धोई शुचै हणें रबाज़े साबै पात्थरे छ़ह घल़ै डाहै दै, ज़ेथ भितरी दूई-दूई, चअन-चअन मण एछा त। 7ईशू बोलअ तिन्नां लै, “इना घल़ै दी भरा पाणीं।” तिन्नैं भरै तिंयां घल़ै टिरा बहूंदै। 8तेखअ बोलअ ईशू तिन्नां टैहलू लै, “ऐबै निंयां एता का काढी करै शैहण गरांईं सेटा।” तिन्नैं बी किअ तेखअ तिहअ ई।
9ज़ांऊं शैहण गरांईं सह पाणीं च़ाखअ, सह आसा त अंगूरो रस गअ द बणीं, पर तेऊ का निं थोघ त कि अह किधा का आणअ। पर तिन्नां टैहलू का त थोघ ज़ुंणी सह पाणीं काढअ त। तेखअ शादअ शैहण गरांईं लाल़अ और तेऊ लै बोलअ, 10“सोभ मणछ दैआ पैहलै बधिया अंगूरो रस और ज़ांऊं लोग झुटी करै रज़ा, ताऊं दैआ सह फिकअ ज़िहअ। पर तंऐं आसा डाहअ द सोभी का बधिया अंगूरो रस अज़ी बी पिछ़ू!”
11ईशू की गलील लाक्के काना गराऊंऐं अह पैहलअ नछ़ैण रहैऊई करै आपणैं प्रतपा प्रगट और तेऊए च़ेल्लै बी हुअ तेऊ दी विश्वास कि अह आसा मसीहा।
12तेखअ नाठै ईशूए आम्मां, भाई और तेऊए च़ेल्लै कफरनहूम नगरी लै और थोल़ै धैल़ै रहै तिंयां तिधी।
मांदरा का बपारी बागै काढणैं
(मत्ती 21:12,13; मरकुस 11:15-17; लुका 19:45,46)
13यहूदी लोगो ओवार्णैओ थैर आसा त नेल़ और ईशू नाठअ येरुशलेम नगरी लै। 14तेऊ भाल़अ मांदरै बल्द, भेडा-बाकरी, पालल़ी बेच़णैं आल़ै ढबै-धेल्लै बदल़ी लैण-दैण करनै आल़ै बपारी बेठै दै। 15ईशू राशीओ छिऊंटअ बणांअ और भेडा-बाकरी, पालल़ी, बल्द दरल़ाऊऐ मांदरा का बागा लै। तिन्नें ढबै-धेल्लै छिंगै और तिन्नें थल़्ही पाई ढोल़ी। 16पालल़ी आल़ै लै बोलअ, “इना काढा इधा का पोर्ही, मेरै बाप्पू परमेशरे मांदरा निं बपारीओ घर बणांआ।”
17तेखअ फिरी तेऊए च़ेल्लै आद कि पबित्र शास्त्रा दी आसा लिखअ द, “हुंह ज़ल़ा तेरै घरे तैणीं आपणैं दिलै आगी ज़िहअ, हे परमेशर तेरै एऊ मांदरे तैणीं दैणैं मुंह आपणैं प्राण बी।” (भज़न 69:9)
18एसा गल्ला भाल़ी यहूदी मुखियै ईशू लै बोलअ, “तूह इहअ करी करै हाम्हां का कुंण ज़िहै नछ़ैणां रहैऊंदअ आसा लागअ द?”
19ईशू दैनअ ज़बाब, “एऊ मांदरा पाआ ढोल़ी, मुंह करनअ अह चिऊथै धैल़ै खल़अ।”
20यहूदी मुखियै बोलअ, “एऊ मांदरा बणांणा लै आसा लागी दी छयाल़ी साला! ताह कै अह चिऐ धैल़ै लै करनअ खल़अ?” 21ईशू बोलअ त आपणीं देही लै मांदर पर तिन्नैं निं अह गल्ल समझ़ी। 22तैहीता ज़ेभै ईशू मरी करै चिऊथै धेल्लै ज़िऊंदअ हुअ, तेभै फिरी तेऊए च़ेल्लै बी आद कि अह गल्ल बोली ती तेऊ, और तेखअ किअ तिन्नैं पबित्र शास्त्र और ईशूए गल्ला दी विश्वास।
ईशू का आसा मणछे दिला-मनो थोघ
23ज़धू ईशू ओवार्णे थैरा लै येरुशलेम नगरी आसा त, कई लोगै किअ तिन्नां नछ़ैण च़मत्कारा भाल़ी तेऊए नांओंआं दी विश्वास। 24पर ईशू निं आप्पू तिन्नें भरोस्सै रही। किल्हैकि तेऊ का आसा त तिन्नें सभाबो थोघ। 25तेऊ का निं एसा गल्ला खोज़णें ज़रुरत आथी ती किल्हैकि तेऊ का आसा त आप्पै थोघ कि मणछे मनैं किज़ै आसा?
This work is licensed under Creative Commons Attribution-ShareAlike 4.0 License.