थरप्या तका का काम 12
12
विस्वास्याँ की मण्डली पे घणो हताणो
1ईं टेम में राजा हेरोदेस मण्डली का कुई विस्वासी लोगाँ ने हताणो सरू कर दिदो हो। 2वणी यहुन्ना का भई याकूब ने तरवारऊँ मरवा नाक्यो। 3वणी जद्याँ ओ देक्यो के, ईं बातऊँ यहूदी राजी वेरिया हे, तो पतरस ने भी बन्दी बणाबा के वाते आगे बड़्यो। आ बात बना हाज्या की रोट्याँ का तेंवार पे व्यी ही। 4#निर 12:1–27हेरोदेस पतरस ने पकड़न जेळ में नाक दिदो। वींके च्यार-च्यार सपायाँ का च्यार टोळा बणान पेरो लगवा दिदो। वींकी ईं मनसा ही के, फसे का तेवार केड़े वींपे लोगाँ के हामे मुकदमो चलाणो हो। 5तो पतरस ने जेळ में राक्यो हो, पण मण्डली का मनक हाँचा मनऊँ वींका वाते परमेसरऊँ परातना करता रिया हा।
पतरस को जेळऊँ छूटणो
6जद्याँ हेरोदेस मुकदमो चलाबा का वाते पतरस ने लाबा में हो, वीं रात पतरस दो सपायाँ के बचमें हूतो हो। वो दो हाकळाऊँ बन्दयो हो अन जेळ का बाना पे पेरादार रुकाळी कररिया हा। 7अणाचेत, परबू को एक हरग-दुत वटे आ पूग्यो, जेळ की ओवरी में उजितो वेग्यो, वणी हरग-दुत पतरस को खांदो ठपकारन वींने जगाते तके क्यो, “फटाकऊँ ऊबो वेजा”, तरत हाँकळा वींका हातऊँ आपूँ-आप खलगी। 8तो पछे हरग-दुत वींने क्यो, “त्यार वेन आपणी पगरख्याँ पेर ले।” पतरस भी वस्यानीस किदो। हरग-दुत वींने पाछो क्यो, “मारी लारे आ।” 9पछे पतरस वींके पाछे-पाछे बाणे निकळ्यो, पण वींके हमज में ने आरियो हो के, जो भी हरग-दुत कररियो हे वो हाँचई में हे, के मूँ कस्योई हपनो देकरियो हूँ। 10तो पेली अन दूजी पेरादाराँ की टोळी ने पार करन वो लोड़ा की फाटक के भड़े आग्यो, जो नगर के दयने ही। वा फाटक आपूँ-आप खलगी अन वे बाणे निकळग्या। वे गळीऊँ जारिया हा के, वो हरग-दुत तरत वींने छोड़न परोग्यो।
11पछे पतरस ने नंगे पड़ी अन वो बोल्यो, “अबे मारे हमज में आयो के, ओ हारोई हाँचई में हे, परबू आपणाँ हरग-दुत ने खन्दान मने हेरोदेस का कब्जाऊँ छुड़ायो अन ईं तरियाँ यहूदी लोग जो करबा का वाते छाता हा वींऊँ परमेसर मने बंचायो।”
12जद्याँ वो ओ हमजग्यो, तो वो यहुन्नो जिंको दूजो नाम मरकुस भी हो, वींकी बई मरियम का घरे परोग्यो वटे नरई लोग-बाग अगेटा वेन परातना कररिया हा। 13पतरस बारणे का कुँवाड़ ने बजायो, तो वींने देकबा के वाते रूदे नाम की एक दासी अई। 14पतरस की बोली ओळकन वा राजी वेगी अन बना कुँवाड़ खोलियाई दोड़न मयने गी अन क्यो के, पतरस बारणा आगे ऊबो हे। 15वाँकाणी वींने क्यो, “थूँ वेडी वेगी हे!” पण, वा जोरावरीऊँ केरी ही के, या बात हाँची हे। तो वाँकाणी क्यो, “वो वींको दूत वेई।”
16अटीने पतरस बारणा आगे कुँवाड़ बजाईसरियो हो, तद्याँ वाँ लोग-बागाँ कुँवाड़ खोलन वींने देक्यो, तो वे अचम्बा में पड़ग्या। 17वणी वाँने हानी करन छाना रेवा वाते क्यो। परबू वींने जेळऊँ कस्यान बारणे निकाळ्यो वींका बारा में बतान क्यो, “याकूब अन दूजाँ भायाँ ने भी ओ बता दिज्यो।” अन पछे वो वीं जगाँ ने छोड़न दूजी जगाँ परोग्यो।
18जद्याँ दन उग्यो, तो पेरादार घबरान होचरया हा के, पतरस कटे ग्यो? 19ईंका केड़े जद्याँ हेरोदेस वींने हमाळ्यो अन वो ने लादो, तो वे पेरादाराँऊँ पूछताछ किदी अन वाँने मारबा को हुकम दे दिदो। अन पछे हेरोदेस यहूदियाँऊँ जान केसरिया में थोड़ाक दन रियो।
हेरोदेस की मोत
20वो सूर अन सेदा का मनकाँ पे घणो रिस्याँ बळतो हो। ईं वाते वे अगेटा व्या अन एक मन वेन वींऊँ मलबा आया। वाँकाणी राजा को खास मनक बलासतुस का नके जान वींने मनायो अन पछे वीं हेरोदेस नके जान हमजोता वाते क्यो, काँके वाँका देस में धान हेरोदेस का देसऊँ आतो हो।
21एक ते किदा तके दन हेरोदेस राज-दरबारी गाबा पेरन गाद्दी पे बिराजो तको मनकाँ ने भासण देबा लागो। 22लोगाँ जोरऊँ हारो करन क्यो, “आ तो कस्या देवता की अवाज हे, मनक की तो कोयने हे।” 23तरत परबू के हरग-दुत हेरोदेस पे वार किदो, काँके हेरोदेस परमेसर ने मान ने दिदो अन वींके किड़ा पड़ग्या अन वो मरग्यो।
24पण ईंका बचमें, परमेसर का वसना को परच्यार-परसार बड़तो रियो।
25बरनबास अन साउल यरूसलेम में आपणो सेवा को काम खतम करन मरकुस नाम का यहुन्ना ने भी आपणी लारे लेन पाच्छा आग्या।
(c) 2010-2017, New Life Computer Institute. All rights reserved