यहुन्ना 11
11
लाजर की मोत
1 #
लूका 10:38,39 बेतनियाँ नगर में एक लाजर नाम को मांदो मनक आपणी बेना मरियम अन मारता का हाते रेतो हो। 2#यहु 12:3यो लाजर नाम को मांदो मनक वणीस मरियम को भई हो, जणी परबू का पगा पे अंतर नाकन आपणाँ बालऊँ पूँछ्या हा। 3तद्याँ वींकी बेना ईसू का नके हमच्यार खन्दायो के, “हो परबू, देको थाँका पाको दोस्त लाजर मांदो हे।”
4ओ हुणन ईसू क्यो, “या मांदकी लाजर के मरबा की ने, पण परमेसर की मेमा का वाते हे, काँके वणीऊँ परमेसर का बेटा की मेमा वेई।”
5ईसू मारता अन वींकी बेन अन लाजरऊँ परेम राकता हा। 6पछे भी जद्याँ वणी हुण्यो के, वो मांदो हे। तद्याँ भी वो जटे हो, वटे दो दनाँ तईं ओरी रक्यो। 7ईंका केड़े ईसू चेलाऊँ क्यो, “आवो, आपाँ पाच्छा यहुदया परदेस परा चाला।”
8चेला वाँकाऊँ क्यो, “हो गरुजी, थोड़ाक दन पेल्याँ तो वटे यहूदी मनक थाँका पे भाटा फेकणा छारिया हा, तद्याँ भी थाँ पाच्छा वटे काँ जाणा छारिया हो?”
9ईसू वाँने क्यो, “एक दन में बारा घण्टा उजितो रेवे हे। यद्याँ कुई दन का उजिता में चाले तो ठोकर ने खाई, काँके जग का उजिता में हारोई सई वींने दिके हे। 10पण यद्याँ कुई रात में चाले तो वो ठोकर खावे हे, काँके रात में उजितो ने वेवे हे।” 11ईसू ईं बाताँ किदी अन वाँकाऊँ केबा लागो, “आपणो दोस्त लाजर हूँरियो हे, पण मूँ वींने जगाबा का वाते जारियो हूँ।”
12तद्याँ चेला वींने क्यो, “हो परबू, यद्याँ वो हूँग्यो हे, तो हव वे जाई।”
13ईसू तो वींकी मोत का वाते क्यो हो, पण वीं हमज्या हाँ के, वणी नींदऊँ हूँ जाबा का वाते क्यो हो। 14तो ईसू वाँकाऊँ हुदोई के दिदो, “लाजर मरग्यो हे। 15अन मूँ थाँका वाते खुस हूँ के, मूँ वटे ने हो, काँके अबे थाँ मारा पे विस्वास कर सको। आवो अबे आपीं वींका नके चाला।”
16तद्याँ थोमो जिंने जोड़ला भी केता हा, वणी दूजाँ चेलाऊँ क्यो, “आवो, आपाँ भी गरुजी का हाते चाला, ताँके अणाका हाते मर सका।”
बेतनियाँ में ईसू
17वटे बेतनियाँ पूग्या केड़े ईसू ने नंगे पड़ी के, लाजर की लास ने छाट में खोदी तकी कबर में मेल्या ने च्यार दन वेग्या हे। 18बेतनियाँ नगर यरूसलेमऊँ एक कोस छेटी हो। 19नरई यहूदी मारता अन मरियम का नके वाँका भई की मोत पे वाँने संतोक देबाने आया हा।
20जद्याँ मारता ईसू का आबा को हमच्यार हुण्यो, तो वाँ वाँकाऊँ मलबा ने गी, पण मरियम घर में बेटी री। 21मारता ईसुऊँ क्यो, “हो परबू, यद्याँ थाँ अटे वेता, तो मारो भई ने मरतो। 22अन मूँ अबाणू भी मूँ जाणूँ हूँ के, ज्यो कई थाँ परमेसरऊँ मांगो, परमेसर थाँने वो दी देई।”
23ईसू वींने क्यो, “थारो भई पाछो जीवतो वे जाई।”
24मारता वींकाऊँ क्यो, “मूँ जाणूँ हूँ के, आकरी का दन में पाछो जीवतो वे जाई।”
25ईसू वींने क्यो, “जीवन मारा में हे अन मरिया केड़े पाछो जीवतो वेणो मारा में हे। ज्यो कुई मारा पे विस्वास करी, वीं यद्याँ मर भी जाई तद्याँ भी पाच्छा जी उटी। 26अन ज्यो कुई जीवतो हे अन मारा पे विस्वास करे हे, वो कदी ने मरी। कई थूँ मारा पे विस्वास करे हे?”
27वणी ईसुऊँ क्यो, “हाँ, परबू, मूँ विस्वास करूँ हूँ के, थाँईस मसी हो, अन ज्यो परमेसर को बेटो जगत में आबावाळो हो, वो थूँईस हे।”
ईसू की आक्याँ में आसूँ आग्या
28अस्यान केन मारता पाच्छी परीगी अन आपणी बेन मरियम ने बलान छानेकूँ क्यो, “गरुजी अटेईस हे अन थने बलारिया हे।” 29ओ हुणन मरियम वटे वाँका नके तरत अई। 30ईसू अबाणू भी गाम में ने पूग्यो हा पण वीं वटेईस हा, जटे मारता वाँकाऊँ मली ही। 31तद्याँ ज्यो वींके हाते घर में हाँ अन दिलासो देरिया हाँ, ओ देकन के मरियम आगतऊँ बारणे गी ओ हमज्या के, वाँ कबर पे रोबा ने जावे हे, ईं वाते वाँका पाच्छे चालबा लागा।
32जद्याँ मरियम वटे पोंछी जटे ईसू हाँ, तो वाँने देकताई वाँका पगाँ में पड़गी अन क्यो, “हो परबू, यद्याँ थाँ अटे वेता तो मारो भई ने मरतो।”
33जद्याँ ईसू वींने अन यहूदी लोग-बागाँ ने ज्यो वींका लारे आया हाँ, वाँने रोता देकन, वो हरदा में घणो दकी व्यो अन आत्मा में घणो उदास वेग्यो, 34अन क्यो, “थाँकाणी वींने कटे मेल्यो हे?”
वाँकाणी वींने क्यो, “हो परबू, चालन देको।”
35ईसू की आक्याँ में आसूँ आग्या। 36तद्याँ यो देकन यहूदी केबा लागा, “देको, यो वणीऊँ, कतरो परेम राके हे।”
37पण वाँका मूँ कुई केबा लागा, “अणी आंदा की आक्याँ खोली, तो कई यो लाजर ने मरबाऊँ ने बंचा सकतो?”
ईसू लाजर ने पाछो जीवतो किदो
38ईसू आत्मा में घणो दकी वेन कबर के पे आया। वटे एक गुफा ही अन एक मोटो भाटो वींका मुण्डा ने ढाक मेल्यो हो। 39पसे ईसू क्यो, “भाटो छेटी करो।”
वीं मरिया तका लाजर की बेन मारता वाँने केबा लागी, “हो परबू, अबे तो वींमें वाना आरी वेई, काँके वींने गाड़्या ने च्यार दन वेग्या हे।”
40ईसू वींने क्यो, “कई में थने ने क्यो हो के, यद्याँ थूँ विस्वास करी, तो परमेसर की मेमा ने देकी?”
41तद्याँ वाँकाणी वीं भाटा ने छेटी किदो। पसे ईसू ऊपरे देकन क्यो, “हो बापू परमेसर, मूँ थाँको धन्नेवाद करूँ हूँ, काँके थाँ मारी हूणी हे। 42मूँ जाणूँ हूँ के, थाँ हरदाण मारी हुणो हो, पण ज्या भीड़ च्यारूँमेर ऊबी हे, वाँका वाते में यो क्यो, जणीऊँ ईं मनक विस्वास करे के, थाँ मने खन्दायो हे।” 43यो केन वणी जोरऊँ हाको करन क्यो, “हे लाजर, बारणे आ।” 44तद्याँ ज्यो मरग्यो हो, वो कपनऊँ पळेट्यो तकोई बारणे आग्यो, अन वींका मुण्डा पे भी गाबा पळेट्या तका हा।
ईसू क्यो, “ईंने खोल दो अन जाबा दो।”
यहूदी नेता ईसू ने मारबा की ओजणा बणई
45तद्याँ ज्यो यहूदी मनक मरियम के हाते आया हाँ, वणा ईसू को यो काम देकन वींकामूँ नरई वींपे विस्वास किदो। 46पण वणा मूँ कुई फरीसियाँ का नके जान ईसू का ईं काम को हमच्यार दिदो। 47ईंपे मुक्य याजकाँ अन फरीसियाँ मोटी सबा बलान क्यो, “आपणाँ ने कई करणो छावे? यो मनक घणा परच्या बतारियो हे। 48यद्याँ आपाँ वींने अस्यानीस करबा देवा तो हाराई मनक वींका पे विस्वास करबा लागी, अन रोमी अदिकारी अटे आन आपणाँ मन्दर को अन आपणाँ देस को नास कर देई।”
49तद्याँ वाँका मूँ केफा नाम को एक मनक ज्यो वीं टेम को मोटो याजक हो, वीं हाराऊँ क्यो, “थाँ कई भी ने जाणो हो। 50अन नेई ईं बात ने हमजो हो के, हाराई मनकाँ के मरबा बजे एक मनक को मरणो हव हे,” जणीऊँ हारोई देस नास वेबाऊँ बंच जावे।
51या बात वणी आपणाँ मनऊँ ने किदी, पण वो वीं टेम को मोटो याजक हो अन वणी आगेवाणी किदी के, ईसू यहूदी लोगाँ का वाते मरबा ने जारियो हे। 52वो बेस यहूदी मनकाँ का वातेईस ने मरी, पण परमेसर का हाराई वकरिया तका लोगाँ ने एक हाते करबा का वाते भी मरी।
53वीं दनऊँ वीं हाराई यहूदी अदिकारी वींने मारबा की ओजणा बणाबा लागा। 54ईंका केड़े ईसू वणा यहूदी मनकाँ में खुला में ने फर सक्यो, पण वटाऊँ ईप्राईम नगर का नके हुन्ना काकड़ का भड़े की ढाणी में परोग्यो अन आपणाँ चेला की लारे वटे रेवा लागो।
55यहूदी लोगाँ को फसे को तेवार आबावाळो हो अन हाराई देसऊँ मनक यरूसलेम देस में ग्या, ताँके तेवारऊँ पेल्याँ पुवितर वेबा का रिवाज ने पुरी करे। 56ईं वाते वाँकाणी ईसू ने होदबा लागा अन मन्दर की चोकी में ऊबा वेन एक-दूजाऊँ केबा लागा, “थाँ कई बच्यार कररिया हो? कई वो हाँची में अणी तेवार में आई?” 57पछे मुक्य याजकाँ अन फरीसियाँ यो आदेस काड़्यो के, यद्याँ किंने याँ खबर पड़े के, ईसू कटे हे तो वो बतावे, ताँके वींने पकड़ सका।
(c) 2010-2017, New Life Computer Institute. All rights reserved