यहुन्ना 19
19
ईसू ने मोत की सजा
1तद्याँ पिलातुस ईसू ने पकड़वान कोड़ा लगवाया। 2पछे सपायाँ काँटा की डाळ्याँ को मुकट गूँतन ईसू का माता पे मेल दिदो। अन वींने दरबारी गाबा पेरायाँ। 3अन वींका नके आन क्यो, “यहूदियाँ का राजा अमर रेवे!” अन वींके रेपटाँ मेली।
4तद्याँ पिलातुस पाछो बारणे आन लोगाऊँ क्यो, “देको, मूँ वींने थाँका नके पाछो बारणे लावूँ हूँ। ईं वाते थाँ हमजो के, मूँ वींमें कई भी दोस ने पावूँ हूँ।” 5तद्याँ ईसू काँटा को मुकट अन दरबारी गाबा पेरिया तका बारणे निकळ्यो अन पिलातुस मनकाँऊँ क्यो, “देको, ओ रियो वो मनक।”
6जद्याँ मोटा याजकाँ अन मन्दर का चोकीदाराँ वींने देक्यो, तो हाको करन क्यो, “ईंने हूळी पे चड़ई दो, ईंने हूळी पे चड़ई दो।”
पिलातुस वाँकाऊँ क्यो, “थाँईस ईंने हूळी पे चड़ावो, काँके में ईंमें कई दोस ने पायो हे।”
7यहूदी मनकाँ वींने क्यो, “आपणो भी नेम हे अन वीं नेमा का हस्याबूऊँ वो मोत के घाट उतारबा के लायक हे। काँके अणी खुद ने परमेसर को पूत बतायो हे।”
8जद्याँ पिलातुस आ बात हूणी, तो वो भी घणो दरपग्यो। 9अन पछे दरबार का मयने जान ईसुऊँ क्यो, “थूँ कटा को हे?”
पण, ईसू वींने कई जबाव ने दिदो। 10ईंपे पिलातुस ईसुऊँ क्यो, “थूँ माराऊँ काँ ने बोलरियो हे? कई थूँ ने जाणे के, थने छोड़बा को हक मारा नके हे अन थने हूळी पे चड़ाबा को भी मने हक हे?”
11ईसू जवाब दिदो, “यद्याँ परमेसर थाँने मारा पे यो हक ने देता, तो थाँ कई ने कर सकता। तो थारो मारा पे कई हक ने वेतो। ईं वाते जणा मने थाँरा हाताँ में हूँप्यो हे, वीं थाँराऊँ भी हेला पापी हे।”
12ईंपे पिलातुस वींने छोड़ देणो छायो हो। पण, यहूदी मनकाँ ज्योर की हाको करन क्यो, “यद्याँ थूँ ईंने छोड़ हे, तो थूँ रोम राजा का हण्डाळ्यो ने हे। ज्यो कुई खुद ने राजा बणावे हे। वो रोमी सरकार को विरोदी हे।”
13ईं बाताँ हुणन पिलातुस ईसू ने बारणे लायो अन वटे न्याव की गाद्दी पे बेटग्यो, वीं जगाँ ने भाटो को चबुतरो भी केता हो। जिंने इबरानी भासा में “गब्बता” भी केता हा। 14यो फसे का तेवार की त्यारी को दन हो अन दपराँ की बारा बज्याँ के लगे-भगे टेम हो। तद्याँ पिलातुस यहूदियाँऊँ क्यो, “देको, ओ रियो थाँको राजा।”
15पण, वीं ओरी ज्योरऊँ हाको करन क्यो, “ईंने मारी नाको, ईंने मारी नाको, ईंने हूळी पे चड़ई दो।”
पिलातुस वाँने क्यो, “कई थाँ छावो हो के, मूँ थाँका राजा ने हूळी पे चड़ई दूँ?”
मुक्य याजकाँ जबाव दिदो, “रोमी राजा ने छोड़न माँको कुई दूज्यो राजा कोयने हे।”
16तद्याँ पिलातुस ईसुने वाँका हाताँ में हूँप दिदो, ताँके वींने हूळी पे चड़ायो जावे।
ईसू को हूळी पे चड़ायो जाणो
तद्याँ रोमी सपायाँ ईसू ने पकड़न लेग्या। 17अन ईसू आपणी हूळी उठातो तको वीं जगाँ पे ग्यो ज्या “कपाळ की जगाँ” केवाती ही अन इबरानी भासा में “गलगता” केवाती ही। 18वटे वणा वींने अन वींकी लारे का दो जणा ने भी हूळ्याँ पे चड़ाया। एक ने अटने अन एक ने वटने अन दोयाँ के बचमें ईसू ने। 19पिलातुस एक दोसपतर लिकन हूळी पे टाँक दिदो अन वींमें ओ लिक्यो हो, “नासरत का ईसू, यहूदियाँ को राजा।” 20ओ दोसपतर नरई यहूदियाँ भण्यो, काँके वीं जगाँ जटे ईसू हूळी पे चड़ायो ग्यो हो, ज्याँ नगर का भड़े ही अन वो पतर इबरानी, लतीनी अन युनानी भासा में लिक्यो तको हो।
21तद्याँ मोटा याजकाँ पिलातुस नके जान क्यो, “थें ज्यो पतर पे ‘यहूदियाँ को राजा’ लिकवायो हे, वींने बदलवान अस्यान लिका के, ‘वणी क्यो के, मूँ यहूदियाँ को राजा हूँ।’”
22पिलातुस क्यो, “में ज्यो लिकवा दिदो हे, बेस वो लिकवा दिदो हे।”
23जद्याँ सपायाँ ईसू ने हूळी पे चढा दिदो हो। तो वाँका गाबा लेन च्यार भाग किदा। हाराई सपायाँ का वाते एक-एक भाग ले लिदो अन कुरतो भी ले लिदो। पण, कुरतो बनाई हींम्यो तको ऊपरेऊँ नीचे तईं हाताऊँ बणायो तको हो। 24#भज 22:18ईं वाते वाँकाणी एक-दूजाऊँ क्यो, “आपाँ ईंने ने फाड़ा पण, ईंका वाते गोट्याँ नाका के, ओ किंको वेई।” ओ ईं वाते व्यो के, पवितर सास्तर में ज्यो लिक्यो हे, वो पूरो वे,
“वाँकाणी मारा गाबा एक-दूँजा में बाँट लिदा,
अन मारा कुरता का वाते कागद की गोटी नाकी।”
ईं वाते सपायाँ अस्यानीस किदो।
25ईसू की हूळी का भड़े वींकी बई, वींकी मासी, क्लोपास की घरवाळी मरियम अन मरियम मगदलीनी ऊबी ही। 26जद्याँ ईसू आपणी बई अन वो चेला ज्यो लाड़लो केवातो हो, भड़े ऊबा देक्या तो आपणी बईऊँ क्यो, “ओ मास्या, ओ थारो बेटो हे।”
27तद्याँ वणा आपणाँ चेलाऊँ क्यो, “आ थारी बई हे।” अन वीं टेमऊँ वो चेलो वींने आपणाँ घरे लेग्यो।
ईसू की मोत
28 #
भज 69:21; 22:15 ईंका केड़े ईसू ओ जाणन के, अबे हारोई पूरो वेग्यो हे। तो वणी पवितर सास्तर में ज्यो बतायो ग्यो हो वो पूरो वेवा वाते क्यो, “मूँ तरियो हूँ।”
29वटे एक खाटा अंगूरा को रसऊँ भरियो तको ठामड़ो वटे मेली मेल्यो हो। ईं वाते वाँकाणी खाटा अंगूरा का रस में नाक्यो तको फूंबो एक रूँकड़ा की कामड़ी पे मेलन वींका मुण्डा के अड़ायो। 30अन पसे ईसू अंगूरा का रस चाक्या केड़े बोल्यो, “पूरो व्यो।”
अन मातो नमान जीव छोड़ दिदो।
31ओ सबत की त्यारी को दन हो, सबत के दन वाँकी लासा हूळी पे ने टाँगी रेवे, ईं वाते यहूदी अदिकारियाँ पिलातुसऊँ अरज करन क्यो, वाँका पंगा ने तोड़न वाँकी लासा ने हूळीऊँ उतारन वटेऊँ छेटी कर दा काँके वो सबद को दन घणो खास दन हो। वो ईं वजेऊँ खास हो, काँके ओ फसे का तेवार की टेम में आरियो हो।
32ईं वाते सपायाँ आन वाँ दुई मनकाँ का पगाँ ने तोड़ नाक्या, ज्याँने ईसू का हाते हूळी पे चड़ाया ग्या हा। 33पण, जद्याँ ईसू का नके आन देक्यो के, वो मरग्यो हे, तो वाँकी टांगा ने तोड़ी। 34अन वणा सपायाँ मेंऊँ एक जणे वाँकी पाळी में भालो घुसा दिदो अन जणीऊँ तरत लुई अन पाणी निकळ्यो। 35यो बताबावाळो वो हे जणी यो देक्यो जणीऊँ थाँ भी विस्वास करो। अन वो जाणे के, वो हाँच बोले हे। 36#निर 12:46; भज 34:20ईं बाताँ ईं वाते वींके, पवितर सास्तर में ज्यो बतायो ग्यो हो वो पूरो वेवे के, “वींको एक भी हाड़क्यो ने तोड़्यो जाई।” 37#परका 1:7पछे एक ओरी दूजी जगाँ ओ लिक्यो हे के, “जणी वींके भालो घुसायो हे, वींने वीं देकी।”
ईसू ने गाडणा
38अणा बाताँ केड़े अरमतिया को रेबावाळे युसुप ज्यो ईसू ने मानबावाळो हो। पण यहूदी अदिकारियाँ की दरपऊँ आ बात छाने राकतो हो, वणी पिलातुसऊँ अरज किदी के, कई वो ईसू की लास लेजा सके हे। पिलातुस वींकी अरज हूणी अन वो आन ईसू की लास लेग्यो।
39 #
यहु 3:1,2 निकेदुमस, ज्यो हाराऊँ पेल्या ईसू का नके रात ने ग्यो हो। वो वटे एलवो अन गंधरस मलई तकी चीज लेन आयो ज्या लगभग तीस किलो ही। 40पछे वीं ईसू की लास लेग्यो। अन यहूदी मनकाँ के लास ने गाड़बा की रीत की तरियाऊँ हव बाना का तेल की लारे कापळा में वींने लपेट्यो। 41वीं जगाँ पे जटे ईसू हूळी पे चडाया ग्या हा। वींका नकेईस एक बाग हो अन वीं बाग में एक भाटा में खोदी तकी नुवी कबर ही। जिंमें कदी भी कणी लास ने राकी ही। 42काँके सबद को दन सरू वेबावाळो हो, अन वाँ कबर भी नकेईस ही, तो वणा ईसू की लास वींमें मेल दिदी।
(c) 2010-2017, New Life Computer Institute. All rights reserved