ലൂക്കോസു 20
20
ഏസ്സ്‌ക്ക് ഇര്‌ക്കുവ അദിഗരന പറ്റി കേ്ള്‌ക്ക്‌ന്റാര്
1ഒന്റു നാള് സാമിബീ്ഡ്‌ല് ഏസ്സ് ആള്‌ഗാള്‌ന പഡിസികൊണ്ടുമു നല്ല സേദിന അവാര്‌ക്ക് സൊല്ലികൊണ്ടുമു ഇന്താന്. അദുക്കുള എഗുദാര് പൂസാരി തലെവാര്‌ഗാള്‌മ് ബേദബാത്ത്യനാമ്‌ഗാള്‌മ് എഗുദാര് മൂപ്പനാമ്‌ഗാളോഡ ഒന്റായി ഏസ്സ് പട്ട്‌ക്ക് ബന്ത് അയാള്‌ന: 2<<നീ എന്ത് അദിഗരാത്ത്‌ല് ഈ കാര്യഗാളെല്ല ഗേന്റായി? ഈ അദിഗര ആര് നിനാക്ക് തന്താദ്? എന്റ് എമാക്ക് സൊല്ലു>> എന്റ് കേ്ട്ടാര്.
3അദുക്കുള ഏസ്സ്: <<നാന്‌മ് നിമാന ഒന്റു കേ്ള്‌വി കേ്ള്‌ക്ക്‌ന്റെ, അദ്‌ക്ക് എനാക്ക് ബദ്‌ല് സൊല്ലുനു. 4ഓഗന്നാന്‌ക്ക് നീര്‌ക്ക് മുളുഗുസുവാദ്‌ക്കുളള അദിഗര കെ്ഡേത്താദ് സാമിലിന്തോ മന്‌സാന് എ്ഡേലിന്തൊ?>> എന്റ് അവാര്‌ന കേ്ട്ടാന്.
5അവാര് തമാക്ക് തമാക്ക് ഓസണെ മാഡി നോഡുനാര്. << <സാമിലിന്ത്> എന്റ് നമ്മ സൊന്നദാന <പിന്നെ നിമ്മ എന്ത്‌ക്ക് ഓഗന്നാന്‌ന നമ്പാലെ> എന്റ് ഏസ്സ് നമാന കേ്ള്‌ക്കുവാന്. 6<മന്‌സാര്‌ഗാള്‌ലിന്ത്> എന്റ് സൊന്നദാന ആള്‌ഗാള് ഒട്ടുക്കു ഓഗന്നാന്‌ന ഒന്റു സാമിദാസ് എന്റ് നെനേത്ത്‌റ്‌ക്കുവാദ്‌നാലെ നമാന കല്ലെ്റിന്ത് കൊല്ലുവാര്>> എന്റ് സൊന്നാര്.
7അദ്‌നാലെ <<ഏദ്‌ലിന്ത് കെ്ഡേത്ത്‌ദ് എന്റ് എമാക്ക് തെര്യ>> എന്റ് അവാര് ഏസ്സ്‌ക്ക് സൊന്നാര്.
8അദുക്കുള ഏസ്സ് അവാര്‌ക്ക്: <<അന്നാപ്പ് നാന് എന്ത് അദിഗരാത്ത്‌ല് ഇദെല്ല ഗേന്റേന് എന്റ് നാന്‌മ് നിമാക്ക് സൊല്ലുവാദില്ലെ>> എന്റ് സൊന്നാന്.
കാഡ്‌ന ഗുത്തഗേക്ക് കൊഡുത്ത കദെ
9അദ്‌ക്ക് പ്‌റ ഏസ്സ് അവാര്‌ക്ക് ഈ കദെന സൊന്നാന്: <<ഒരുത്താന് ഒന്റു മുന്തിരി ദോട്ട ഗേന്ത് ദോട്ടന ഗുത്തഗെഗാറാര്‌ക്ക് ഗുത്തഗേക്ക് കൊഡുത്തു തള്ളി എഞ്ചോ നാള് ഒന്റു ദൂര ദേസാക്ക് പോയി ഇന്താന്. 10പ്‌റ മുന്തിരി പഗ പറ്‌ക്കുവ ഗളിഗെ ആഗാട്ടി അയാള് തനാക്ക് കെ്ഡേക്കുവ പങ്ക്‌ന ബാങ്കി ബര്യ മുന്തിരി ദോട്ടഗാറാന് ഒന്റു ഗിലാസഗാറാന്‌ന ഗുത്തഗെഗാറാര് പട്ട്‌ക്ക് സൊല്ലി ബ്‌ട്ടാന്. ആന ഗുത്തഗെഗാറാര് അയി ഗിലാസഗാറാന്‌ന അഡ്യഡി എന്റ് അഡിത്ത് ഒന്റുമു കൊഡുക്കാദെ തിരിക്കി ബ്‌ട്ടാര്. 11അദുക്കുള ദോട്ടഗാറാന് ബേ്റൊന്റു ഗിലാസഗാറാന്‌ന അവാര് പട്ട്‌ക്ക് സൊല്ലി ബ്‌ട്ടാന്. അയി ഗിലാസഗാറാന്‌ന അവാര് അഡിത്ത് മാനഗെ്ഡിസി ഒന്റുമു കൊഡുക്കാദെ തിരിക്കി ബ്‌ട്ടാര്. 12അയി ദോട്ടഗാറാന് മൂറാവാദ്‌മ് ഒന്റു ഗിലാസഗാറാന്‌ന അയി ഗുത്തഗെഗാറാര് പട്ട്‌ക്ക് സൊല്ലി ബ്‌ട്ടാന്. അയി ഗുത്തഗെഗാറാര് അയി ഗിലാസഗാറാന്‌നാമ് അഡിത്ത് ഗായ മാഡി ദോട്ടാക്ക് ബെ്ളിഗെ മുഡിക്കി ബ്‌ട്ടാര്.
13അദുക്കുള മുന്തിരി ദോട്ടഗാറാന്: <നാന് ഇന്നി എന്ത് ഗേവേന്? നാന് അദിഗ സീവാന്‌പഡുവ എന്ന് മഗാന്‌ന സൊല്ലി ബ്‌ഡ്‌വെ. ഒന്റു സമ്യ അയാള്‌നെന്റാല് അവാര് മദ്‌സുവാരെങ്കൊ> എന്റ് സൊന്നാന്.
14ആന ഗുത്തഗെഗാറാര് ദോട്ടഗാറാന് മഗാന്‌ന കണ്ട്. <ഇവാന്‌ത്തെ ഈ ദോട്ടാക്ക് ഉരിമെഗാറാന്. അയാള് സൊത്തെല്ല നമാക്ക് കെ്ഡേക്ക്യ ബേ്ണ്ടി നമ്മ ഇവാന്‌ന കൊന്റു തള്ള്‌ല> എന്റ് തമാക്ക് തമാക്ക് ഓസണെ മാഡ്‌നാര്. 15അയി ഗുത്തഗെഗാറാര് അയി ദോട്ടഗാറാന് മഗാന്‌ന ദോട്ടാക്ക് ബെ്ളിഗെ കഡാത്തി കൊന്റു തള്ള്‌നാര്.
അന്നാപ്പ് അയി മുന്തിരി ദോട്ടഗാറാന് ഇന്നി എന്ത് ഗേവാന്? 16അയാള് പോയി അയി ഗുത്തഗെഗാറാര്‌ന കൊന്റു തള്ളി മുന്തിരി ദോട്ടന ബേ്റെ ആള്‌ഗാള്‌ക്ക് കൊഡുക്കുവാന്.>>
ഈ കദെന കേ്ട്ട് ആള്‌ഗാള്: <<ഇത്തെ നഡാക്കാദിര്‌ക്കുഡൊ>> എന്റ് സൊന്നാര്.
17ആന ഏസ്സ് അവാര്‌ന നോഡികൊണ്ടു:
<< <ബീ്ഡ് ഗിലാസ ഗേന്റവാര് മോസ എന്റ് തെ്റിന്ത് തള്ള്‌ന കല്ല്‌ത്തെ
ബീ്ഡ് എ്ഡ്‌ക്കാട്ടി എല്ലാ കല്ല്‌ഗാള്‌ന ബ്‌ഡ മുക്ക്യമാന കല്ല്#20:17 മുക്ക്യമാന കല്ല് ബേസ്‌മട്ട മൂലേലെ കല്ല് എന്റൊ കാവാഡിന പാസെ ഇര്‌ക്കുവ ബാസാക്ക് മേല് നഡ്‌ക്കെ ബെക്കുവ കല്ല് എന്റൊ ഇദ്‌ക്ക് അര്‌ത്ത ഇര്‌ക്ക്‌ന്റ്. നമ്മാള്‌ഗാള് ബീ്ഡ് എ്ഡ്‌ക്കാട്ടി പെര്‌ങ്കാന് കമ്പ് ബീ്ഡ്‌ന ഒറേപ്പ്‌ന മാഡി ബെക്കുവ പാസെ എഗുദാര് ബീ്ഡ് എ്ഡ്‌ക്കാട്ടി ഈ കല്ല്‌ത്തെ അവാര് ബീ്ഡ്‌ന ഒറേപ്പ് മാഡി ബെക്കുവാദ്. ആയി തള്ള്‌ട്ട്>#സാമി പാട്ട് ബൊക്കു 118:22
എന്റ് എ്ള്‌ദിര്‌ക്കുവാദ്‌ക്ക് അര്‌ത്ത എന്ത്? 18അയി കല്ല് കുദ്ദാക്ക് ബീ്വ ആരാനാല്‌മ് അയാള് സ്‌ദാറി തള്ളുവാന്. അയി കല്ല് ആരാറ്റ് കുദ്ദാക്ക് ബ്‌ന്തദാന അദ് അയാള്‌ന തവുഡുപൊഡി മാഡി തള്ള്‌മ്>> എന്റ് സൊന്നാന്.
കന്ത്യ കെ്ട്ടുവാദ്‌ന പറ്റി കേ്ള്‌ക്കുവ കേ്ള്‌വി
19ഏസ്സ് സൊന്ന ഈ കദെ തമാന പറ്റിത്തെ സൊന്നാദ് എന്റ് എഗുദാര് പൂസാരി തലെവാര്‌ഗാള്‌ക്ക്‌മ് ബേദബാത്ത്യനാമ്‌ഗാള്‌ക്ക്‌മ് തെരിന്ത്‌ദ്. അദ്‌നാലെ അവാര് അന്നാല് താനെ ഏസ്സ്‌ന പ്‌ഡിക്ക്യ നോഡുനാര്. ആന ആള്‌ഗാള്‌ക്ക് അഞ്ചി അവാര് ഏസ്സ്‌ന പ്‌ഡിക്കാലെ.
20അദ്‌നാലെ അദുക്കുള്ള സമ്യ കെ്ഡേക്ക്യ ബേ്ണ്ടി അവാര് നോഡികൊണ്ടിന്താര്. പ്‌റ ഏസ്സ് സൊല്ലുവ നായാത്ത്‌ല് കുറ്റ കണ്ട്‌പ്‌ഡിക്ക്യ നല്ലവാര്‌ന പാസെ നഡിത്ത് കാട്ടി കൊഡുക്കുന്റവാര്‌ന ഏസ്സ് പട്ട്‌ക്ക് സൊല്ലി ബ്‌ട്ടാര്. അത്തെ അയാള്‌ന റോമ നാഡ് തലെവാന് അദിഗരാക്ക്‌മ് അയാള് കയിക്കഡിമ് ഇര്‌ക്ക്‌ന്റവാന് മാഡ്യ അവാര്‌ക്ക് മുഡിമ്. 21അവാര് ബന്ത് ഏസ്സ്‌ന: <<ഗുരുവെ, നീ പഡുസുവാദ്‌മ് സൊല്ലുവാദ്‌മ് സത്ത്യത്തെ എന്റ് എമാക്ക് തെരിമ്. സ്‌ന്നവാനെന്റൊ ദൊഡ്ഡവാനെന്റൊ നോഡാദെ ആള്‌ഗാള് എത്തെ പെ്ളേത്ത് പോഡൊ എന്റ് സാമി സൊല്ലിര്‌ക്കുവാദ്‌ന അദേപാസെ പഡ്‌സ്‌ന്റവാന് എന്റ്‌മ് എമാക്ക് തെരിന്റ്. 22മോസെ ബെത്ത സാമി സട്ടപഡി നമ്മ റോമ നാഡ് രാജാവുക്കു കന്ത്യ കെ്ട്ടുവാദ് സെര്യ ഇല്ലെ തപ്പ>> എന്റ് കേ്ട്ടാര്.
23അവാര് ഓസണെ കെ്ട്ടിര്‌ക്കുവാദ്‌ന തെരിന്ത് ഏസ്സ് അവാര്‌ക്ക്: 24<<ഒന്റു ബെ്ള്ളി പണാന കാട്ട്‌ന്. ഈ പണാത്ത്‌ല് ഇര്‌ക്കുവ മൂഞ്ചിമ് പേര്‌മ് ആര്‌ത്ത്>> എന്റ് കേ്ട്ടാന്.
25അദുക്കുള: <<റോമ നാഡ് രാജാവുത്തു>> എന്റ് അവാര് സൊന്നാര്.
<<അത്ത്യാന റോമ നാഡ് രാജാവുക്കുള്ളാദ്‌ന റോമ നാഡ് രാജാവുക്കുമു സാമിക്കുള്ളാദ്‌ന സാമിക്ക്‌മ് കൊഡുനു>> എന്റ് ഏസ്സ് അവാര്‌ക്ക് സൊന്നാന്.
26അത്തെ ആള്‌ഗാള് മുന്നുക്കു ബെത്ത് ഏസ്സ് സൊന്ന നായാത്ത്‌ല് കുറ്റ കണ്ട്‌പ്‌ഡിക്ക്യ അവാര്‌ക്ക് മുഡ്യാലെ. അയാള് ബദ്‌ല് സൊന്നാദ്‌ന കേ്ട്ട് അവാര് അദിസ്യപട്ട് സപ്പെന്റിന്താര്.
സത്തിന്ത് ഉജുര്‌ളാഗുവാദ്‌ന പറ്റി കേ്ള്‌ക്ക്‌ന്റാര്
27സത്തിന്ത് ഉജുര്‌ളാഗുവാദ് ഇല്ലെന്റ് സൊല്ലിന്ത സദൂക്ക്യാര്‌ല് ലേസ ആള്‌ഗാള് ഏസ്സ് പട്ട്‌ക്ക് ബന്ത് 28ഇത്തെ കേ്ട്ടാര്: <<ഗുരുവെ, ഒന്റാള് പെ്ണ്ണെ്ഡ്‌ത്ത് മക്കാളില്ലാദെ സത്തദാന അയാള് പെ്ണ്ടച്ചിന അയാള് അണ്ണനച്ചാനൊ തമ്പ്യച്ചാനൊ എ്ഡ്‌ത്ത് സത്തവാന്‌ക്ക് ബേ്ണ്ടി പ്‌ള്ളെ പ്‌റാത്തുഡൊ എന്റ് മോസെ ബെത്ത സാമി സട്ടാത്ത്‌ല് എ്ള്‌ദിര്‌ക്ക്‌ന്റല്ല. 29ഒന്റു എ്ഡേല് ഏ്ള് അണ്ണാര്‌തമ്പ്യാര് ഇന്താര്. കോഡിലവാന് പെ്ണ്ണെ്ഡ്‌ത്ത് മക്കാള് പ്‌റാക്കാദെ സത്താന്. 30അയാള്‌ക്ക് അഡ്യാസാരിലവാന്‌മ് അവാള്‌ന എ്ഡ്‌ത്താന്. 31അദ്‌ക്ക് അഡ്യാസാരിലവാന്‌മ് അവാള്‌ന എ്ഡ്‌ത്താന്. അത്തെ ഏ്ളാള്‌മ് അവാള്‌ന എ്ഡ്‌ത്ത് മക്കാള് പ്‌റാക്കാദെ സത്താര്. 32കഡേഗല അവാള്‌മ് സത്താള്. 33ആന സത്തവാര് ഉജുര്‌ളാഗാട്ടി അവാള് ആര്‌ക്ക് പെ്ണ്ടച്ചി ആവാള്? ഏ്ള് ആള്‌ക്ക്‌മ് പെ്ണ്ടച്ചി ആയിന്താളല്ല?>>
34അദുക്കുള ഏസ്സ് അവാര്‌ക്ക് ഇത്തെ സൊന്നാന്: <<ഈ ഉലഗാത്ത്‌ലിര്‌ക്കുവ ആള്‌ഗാള് പെ്ണ്ണ്‌മ് എ്ഡ്‌ക്ക്‌ന്റാര്, പെ്ണ്ണ്‌മ് കൊഡുക്കുന്റാര്. 35സത്തിന്ത് ഉജുര്‌ളാഗ്യാമ് ഇന്നി ബര്യ പോവ ഉലഗാത്ത്‌ല് പെ്ളേക്ക്യാമ് തഗ്‌ദി കെ്ഡേത്തവാര് പെ്ണ്ണെ്ഡ്‌ക്കുവാദില്ലെ, പെ്ണ്ണ് കൊഡുക്കുവാദ്‌മില്ലെ. 36അവാര്‌ക്ക് ഇന്നി സായാമ് മുഡ്യാമാട്ട. എന്ത്‌ക്കെന്റ് സൊന്ന അവാര് സത്തിന്ത് ഉജുര്‌ളാഗ്‌നവാര് ആനാദ്‌നാലെ അവാര് സാമിദൂദാര്‌ന പാസേമ് സാമിപ്‌ള്ളെഗാള്‌മ്‌ത്തെ. 37കത്തിക്കൊണ്ടു ഇര്‌ക്കുവ മുള്ളുഗുമ്പുലു സാമി ബെ്ളിപട്ടാദ്‌ന പറ്റി എ്ള്‌ദിര്‌ക്കുവ പട്ട്‌ല് സത്തവാര് ഉജുര്‌ളാഗുവാരെന്റ് മോസെ ഗുഡി സൊല്ലിര്‌ന്റാന്. അദ്‌ല് മോസെ ആണ്ടവാന്‌ന <അവുറഗാമ്‌ത്ത്‌മ് ഇസഗാക്ക്‌ത്ത്‌മ് ആക്കോവുത്തുമു സാമിത്തെ>#പയണ 3:6 എന്റ് സൊല്ലിര്‌ക്ക്‌ന്റാന്. 38ഈ മൂറു പാട്ടനാമ് സത്തിന്താല്‌മ് അവാര് സാമിക്ക് ഉജുരോഡാത്തെ ഇര്‌ക്ക്‌ന്റാര്. ആന സാമി ഉജുരു ഇര്‌ക്ക്‌ന്റവാര് സാമിത്തെ; അല്ലാദെ സത്തവാര് സാമി അല്ല. സാമി കണ്ണ്‌ക്ക് എല്ലാവാര്‌മ് പെ്ളേത്ത്‌റ്‌ക്ക്‌ന്റാരല്ല.>>
39അദുക്കുള ബേദബാത്ത്യനാമ്‌ഗാള്‌ല് ലേസ ആള്‌ഗാള്: <<ഗുരുവെ, നീ സൊന്നാദ് സെരിത്തെ>> എന്റ് സൊന്നാര്. 40പ്‌റസാരി അവാര് ഏസ്സോഡ എന്താറ്റ കേ്ള്‌ക്ക്യ അഞ്ച്‌നാര്.
ക്‌റ്‌സ്‌ത്ത് ആര് കാല്‌ക്ക് പട്ടവാന്?
41ആന ഏസ്സ്: <<ക്‌റ്‌സ്‌ത്ത് ദാവീദ് കാല്‌ക്ക് പട്ടവാന് എന്റ് എത്തെ സൊല്ല്യ മുഡിമ്?
42-43<ആണ്ടവാന് എന്ന് ആണ്ടവാന്‌ക്ക് സൊന്നാന്,
നാന് നിന്ന് പോട്ടിഗാറാര്‌ന
നിന്ന് കാല്‌കഡി മാഡമാട്ട്‌ക്ക്,
എന്ന് ബല സാരി ഇര്>#സാമി പാട്ട് ബൊക്കു 110:1
എന്റ് സാമി പാട്ട് ബൊക്കുലു ദാവീദ് താനെ സൊല്ലിര്‌ക്ക്‌ന്റാനല്ല. 44ദാവീദ് താനെ ക്‌റ്‌സ്‌ത്ത്‌ന ആണ്ടവാന് എന്റ് ബ്‌ളിക്ക്‌ന്റാന്. പിന്നെ എത്തെ ക്‌റ്‌സ്‌ത്ത് ദാവീദ് കാല്‌ക്ക് പട്ടവാനാവാന്?>> എന്റ് സൊന്നാന്.
ബേദബാത്ത്യനാമ്‌ഗാള്‌ന സൂസാരിത്തിര്‌ന്
45ആള്‌ഗാളൊട്ടുക്കു കേ്ട്ട്‌കൊണ്ടു ഇര്‌ക്കാട്ടി ഏസ്സ് തന്ന് സൊല്ലുപഡി നഡാക്ക്‌ന്റവാര്‌ക്ക് ഇത്തെ സൊന്നാന്: 46<<ബേദബാത്ത്യനാമ്‌ഗാള്‌ന നിമ്മ സൂസാരിത്തിര്‌ന്, എന്ത്‌ക്കെന്റ് സൊന്ന നല്ല നല്ല ജൊഗെ ഇക്കി നഡാക്ക്യാമ് സന്തേക്ക്‌റാഗ ഇര്‌ക്ക്‌ന്റവാര് മദ്‌പ്പ് കെ്ഡേസ്യാമ്, എഗുദാര് പരേസുവ ബീ്ഡ്‌ല് മുക്ക്യമാന എ്ഡേല് കുക്കാക്ക്യാമ്, ബിര്‌ന്ത് പട്ട്‌ല് എല്ലാര് മുന്നുക്കു ഇര്‌ക്ക്യാമ് അവാര് ആസെപഡ്‌ന്റാര്. 47അവാര് മ്‌ണ്ടേസ്യാര് മുദാല്‌മുമ്പുഗാള്‌ന ഊഗത്തോഡ ഏമാത്തി എ്ഡ്‌ക്ക്‌ന്റാര്. എന്റിന്ത് നല്ലവാര് എന്റ് കാട്ട്യ എഞ്ചോ ഗളിഗെ പരേസുവാര്. ബേ്റാള്‌ക്ക് കെ്ഡേക്കുവ ദെ്ണ്ടണെന ബ്‌ഡ മൊത്തന ദെ്ണ്ടണെ അവാര്‌ക്ക് കെ്ഡേക്കുവു.>>
New Life Computer Institute