Mateo 19
19
Jesupa tachi k'ima amaapiemaapa jarateada
Marco 10:1-12; Luca 16:18
1Mãɨya jarak'ari Jesú Galilea tuadepa Judea tuadea wãsima Jordán to k'ĩaria. 2Ẽpẽerã minachia nɨbɨ ichi k'aade wãsidama. Mãma chi k'ak'ua piawẽa k'ede ãarea jɨpa beepisima. 3Mãɨya bɨde chi eda waapẽarã p'ariseorã chesidama. Ichiá piawẽa pedeapidai k'orea nãɨya idisidama:
—¿Ɨmɨk'ĩrapa chi k'ima ne paritua oo bɨ k'orea amaai pia bɨk'ãra?
4Jesupa p'anoosima:
—¿Mãrapa Tachi Ak'õre pedea bɨdade, nãɨ eda jaradawẽa p'anɨk'ãra? Jua chiwidieda Tachi Ak'õrepa ɨmɨk'ĩra mãɨnepa wẽra oosima.#Génesi 1:27. 5Ichiaba jarasima: “Mãɨ k'orea ɨmɨk'ĩrapa chi ak'õre mãɨnepa chi nae ameek'ari ichi k'ima ome ará beeipɨ. Mãɨya k'ak'ua aba bɨ jĩra p'ananaipɨ”.#Génesi 2:24. 6Ãchi ume p'anɨwẽma, mãɨpari k'ak'ua aba bɨ jĩra p'anɨma. Mãɨpuru Tachi Ak'õrepa chi ará bɨdat'a abaɨ pida amaai pia bɨwẽma.
7Mãɨpuru ãchia idisidama:
—Mãɨyara Moisepa ¿k'ãre k'orea bɨsima wẽra amaaipɨra, chi amaai k'orea k'art'a bɨda teai pia bɨma amaai naena?#Deuteronomio 24:1-4.
8Jesupa p'anoosima:
—Mãra k'ɨɨrɨwẽa p'anɨẽra Moisepa mãɨya itu bɨsima. Maamina Tachi Ak'õrepa nãɨ ĩjũa ooside mãɨya k'ɨ̃riawẽa basima. 9Mɨa jararuma: ɨmɨk'ĩra abaɨpa ichi k'ima awaraɨ ome k'ãiwẽa bɨ amaak'ari, maapae k'ima awaraɨ ataipɨra, mãɨ ɨmɨk'ĩrapa nemietá oo bɨma mãɨ k'aadeapema wẽra ome. [Ichia amaana wẽra ɨmɨk'ĩra awaraɨpa ataipɨra mãɨ ɨmɨk'ĩra pida nemietá oo bɨma mãɨ wẽra ome.]#19:9 Griego pedeade chi eda waapẽarã k'art'ade pedea corchetede bɨ newẽma.
10Mãɨne Jesú ome p'ɨrrɨapataɨrãpa ichiá jarasidama:
—Mãɨya bɨpɨra, ɨmɨk'ĩra wẽra ome miak'ãii piawẽa bɨma.
11Mãɨpuru Jesupa jarasima:
—Jõmãɨrã ãarea p'ue tuu p'aneenaiwẽma. Abapuru Tachi Ak'õrepa mãɨ k'ɨ̃risia teaipɨra, p'ue tuu baipɨ. 12Chi eda waapẽarã ɨmɨk'ĩrarãpa ãchi t'õnaenapema p'ue warra t'õpidak'ama. Waapẽarã ɨmɨk'ĩrarãpa p'ue warra t'õpidak'ama mãɨya oopisida pẽra. Ichiaba waapẽarãpa k'ima atai k'ɨ̃risiadak'ama ãchi Chipari Pajãne Bɨ pae nepia oodai k'orea.#1 Corintio 7:1-9. Mãra p'ue tuu p'aneenaipɨra, mãɨya p'anat'ɨ.
Jesupa warrarã́ pedea pia pedeada
Marco 10:13-16; Luca 18:15-17
13Maapae ẽpẽrarãpa warrarã Jesumá enemeesidama ichi jua ãchi ɨ̃rɨ bɨk'ari Tachi Ak'õrea ɨt'aa chiidimẽrá. Maamina Jesú ome p'ɨrrɨapataɨrãpa mãɨ warrarã enemeedaadarã ɨtɨasidama. 14Mãɨpuru Jesupa jarasima:
—Warrarã mɨmá itu chepit'ɨ, Pajãne Bɨpa ichidirã ichi juade ua bɨ jĩra p'anɨ pẽra.
15Maapae ichi jua warrarã ɨ̃rɨ bɨk'ari wãsima.
Erreara minachia uru bɨ Jesú ome pedeada
Marco 10:17-31; Luca 18:18-30
16Ewariaba k'ũtã́ Jesumá chesima. Mãɨ k'ũtãpa idisima:
—Jarateaparí, Tachi Ak'õre ome ewaricha chok'ae bai k'orea ¿mɨa k'ãret'a nepia ooi bɨma?#19:16 Griego pedeade chi eda waapẽarã k'art'ade bɨ bɨma Jarateaparí Pia.
17Jesupa p'anoosima:
—¿K'ãre k'orea chi pia bɨ k'orea mɨá idi bɨma?#19:17 ¿K'ãre k'orea chi pia bɨ k'orea mɨá idi bɨma? Griego pedeade chi eda waapẽarã k'art'ade nãɨya bɨ bɨma: ¿K'ãre k'orea mɨt'a piaade a bɨma? Aba pida pia bɨwẽma, mãɨyawẽapuru Tachi Ak'õret'u pia bɨpɨ. Pɨ Tachi Ak'õre ome ewaricha chok'ae ba k'ɨ̃ria bɨpɨra, ichia oopi bɨ pedea oose.
18-19Ichia idisima:
—¿Chi sãɨ?
Jesupa jarasima:
—Ẽpẽra pearãse, wẽra awaraɨ ome k'ãirãse, nechɨarãse, sea jararãse chĩara k'orea, pɨ ak'õre pɨ nae ome wap'ea base,#Éxodo 20:12-16; Levítico 19:18. mãɨnepa abaɨ k'ɨ̃riase ara pɨchi k'ɨ̃ria bɨ jĩra.
20K'ũtãpa jarasima:
—Mãɨ ãarea oo bɨma.#19:20 Mãɨ ãarea oo bɨma. Griego pedeade chi eda waapẽarã k'art'ade ichiaba bɨ bɨma: Mãɨ ãarea oo bɨma mɨ k'ũtãenapema. Mɨa ¿k'ãre ooiwẽa bɨma?
21Mãɨne Jesupa ichiá jarasima:
—Pɨ piarã jĩp'a ba k'ɨ̃ria bɨpɨra, pɨa uru bɨ ãarea netode wãk'ari erreara chi nenea k'edea tease. Mãɨya nepia pajãne uru baipɨ. Maapae mɨ ome p'ɨrrɨade chese.
22K'ũtãpa mãɨ ũrik'ari k'ĩra piawẽa wãsima, neet'á minachia uru basidepa. 23Mãɨne Jesupa ichi ome p'ɨrrɨapataɨrã́ jarasima:
—Piarã chi t'aju bɨma ẽpẽra ɨbɨa bɨ, Pajãne Bɨ juade bai k'orea ichidirã paara. 24Mãicha mɨa jararuma: T'ajuwẽa bɨma camello akuja ãtaude eda wãit'a, mãɨ chi ẽpẽra errearadepa ɨbɨa bɨ Tachi Ak'õre juade bai k'aepẽra.
25Mãɨne ichi ome p'ɨrrɨapataɨrãpa k'awa k'ɨ̃risiadaé pasima, ãchia Tachi Ak'õrepa ne pará p'anɨrã atepe k'ɨ̃riayane a k'ɨ̃risia p'anana pẽra. Ãchia idisidama:
—Mãɨyara Tachi Ak'õrepa ¿k'ait'a k'aripaima?
26Jesupa ãchi ak'ɨk'ari jarasima:
—Ẽpẽrapa mãɨ p'ue ook'ama maamina Tachi Ak'õremá ne chi t'aju bɨ newẽma.
27Mãɨne Pedropa Jesua jarasima:
—Taipa ne ãarea ameesidama pɨ ome wãnai k'orea. ¿Mãɨya bɨpɨra k'ãre nepia ununaima?
28Jesupa p'anoosima:
—Mɨa piarã jararuma: Tachi Ak'õrepa ne ãarea chiwidi ooi ewaride mɨ, chi Ẽpẽra Warra mɨ poro jũra jɨ̃parí jɨ̃ bɨ suak'a beeparí auk'ará bɨde suak'abari beeipɨ. Mãɨne mãra mɨ ome p'ɨrrɨapataɨrã doce poro jũra jɨ̃parí jɨ̃ bɨ suak'a beeparide suak'abari p'aneenaipɨ, Israeldepema p'uuru doce p'anɨ nepɨra ak'ɨdai k'orea. 29Mɨ k'orea abaɨpa ichi te, ũpẽarã, ũpẽawẽrarã, ak'õre, nae, k'ima, warrarã, ĩjũa ameeipɨra, ichia ameena k'aepẽra cien atepe unuipɨ, ichiaba Tachi Ak'õre ome ewaricha chok'ae baipɨ.#19:29 K'ima. Griego pedeade chi eda waapẽarã k'art'ade mãɨ newẽma. 30Mãɨya minachia chi naa p'anɨ k'aadea p'ananaipɨ, mãɨnepa chi k'aadea p'anɨ naa p'ananaipɨ.
© (Active), Wycliffe Bible Translators, Inc. All rights reserved.