Markus 8
8
Yesuhz damz ihz ponz rengz
(Matthe 15:32-39)
1Meuz ceun diz ihz keui truz teur cuhz daehz tawz Yesuhz heungz baaiz samz nam maang seum suamz naehz leui, Hnhz raak leh teu paez Daehz keui rae daz keuh nahz, 2“Ohz teur yawng ihz keu ni. Keuh a wa naeh kawmz Ohz waiz seu ngihz, keuh nam maang seum suamz naehz leui. 3Teur ka truz thaz ti yaan, beuk Ohz nam damz keuh nahz seum suamz naehz, plawiz weng kaw keuh te onz tawiz reung dengz.”
4Teu paez Hnhz kaw daz, “Ngaz cih seu naez damz keuh saakz bawnz naeh tuhz ruk ceun ni a?”
5Yesuhz maanyz keuh, “Pehz maang kaaiz mun seu naeh?”
Keuh kaw daz, “Naeh teu pulz.”
6Yesuhz cao ihz keui keu dez kaai keu tehz. Leh kaaiz mun teu pulz, taang kez cuz Phraz Pen Caoh, pekz kaaiz mun aez teu paez Daehz keui teur phraez aez ihz keui nahz. 7Keuh kaw maang tang kahz kyehz teur nyaenz, Hnhz leh kahz taang kez cuz rae lao teu paez Daehz keui teur phraez aez thaengz ihz keui nahz. 8Ihz keui kaw bawnz suamz saakz klawhz ihz. Seutz leh an leuz ne bawnz pulz piat neuk neuk. 9Ihz suamz kaaiz mun ne raenz naeh seu ponz rengz. Yesuhz kaw plawiz ihz keu diz weng, 10tang teu paez Daehz keui kut luat tuhz ceun luang lan cu prih Dalmanutha.
Pharise keui cao cih plaez an laak laaiz
(Matthe 16:1-4)
11Pharise teur ka keui truz cu Yesuhz, upz thiangz Hnhz, sunz caam yawt Hnhz rae, cao cih plaez tang an laak laaiz kaang raaoz aez daehz mas Hnhz maang a na. 12Hnhz kaw seuk weu phawmz Daehz daz, “Ihz keu ni caang daz maanyz an laak laaiz ez? Ohz daz mawn ihz keu ni nahz, Ohz nam cih plaez keuh nahz an laak laaiz naehz.”
13Hnhz praasz lae thaz keuh mial kut tuhz ceun luang, lo lan thaz tui omz boh.
Ceu Pharise boh ceu khunz Herot
(Matthe 16:5-12)
14Teu paez keui nam tang leh lan kaaiz mun, kaai ceun luang keuh ne maang taw kaaiz mun hawkz pan. 15Hnhz seumz keuh nahz, “Mok seu tih! Pehz wiar thengz ceu Pharise boh ceu Khunz Herot.”
16Teu paez keui kaw teur daz daehz nahz, “Kawp ehz nam maang kaaiz mun, Hnhz daz ceun ni doz?”
17Yesuhz kaw mas rae daz keuh nahz, “Pehz teur daz daehz nahz kawp nam maang kaaiz mun haz? Thonz taw seu ni kaw pehz maat loz phawmz lawh haz? Maat tuhz lawh haz? Kingz keu nuasz pehz yeung tanz boh haz? 18Maang ngaai kaw nam awlz, maang keu tiakz kaw nam ngarz. Pehz maat dangz toz lawh haz? 19Meuz Ohz pekz kaaiz mun khanz, damz ihz hanz rengz ne seutz bawnz an leuz seu naeh piat?”
Keuh kaw daz, “Seu kawlz aarz piat.”
20“Meuz Ohz pekz kaaiz mun teu pulz, damz ihz ponz rengz ne seutz bawnz an leuz seu naeh piat?” Keuh kaw daz, “Pulz piat.”
21“Paw daz, taw phraeoz seu ni kaw pehz maat loz phawmz hoh?”
Yesuhz cih aez ihz ngaai lapz awlz
22Meuz keuh phraeoz pruh Betsaida ne ihz keui leh truz ihz ngaai lapz hawkz, keuh maanyz Yesuhz aez teu hnhz. 23Yesuhz kaw yawk leh tihz ihz ngaai lapz ne, aacz lae lan nawk pruh. Teuk chuz omz nyaangz sapz ngaai hnhz, leh tihz taangz lang kol hnhz maanyz daz, “Anz mih awlz?”
24Hnhz kaw ngaw yawt, “Ohz awlz ihz keui naeh ceun teungz khaehz ne nuar boh.”
25Hnhz kaw leh tihz taangz lang kol ngaai hnhz thaengz rae cao yawt, ihz an diz kaw a wa awlz caem, deuiz meu rae puatz trimz. 26Yesuhz kaw cao hnhz weng kaang daehz, lao seumz hnhz yak kut tuhz pruh.
Petros lao Yesuhz naeh Tahz Khris
(Matthe 16:13-20, Lukas 9:18-21)
27Yesuhz boh teu paez Hnhz keui lan cu pruh rim weng Kaesarea Philippi. Meuz naeh tawiz reung dengz ne Hnhz maanyz teu paez Daehz nahz, “Lao plaez yawt Ohz nahz luz, ihz keui daz Ohz naeh yaeh?”
28“Teur ka daz, Tahz ehz naeh Yohn, an aez teuk sruz omz. Teur ka kaw daz naeh Eliyas. Teur ka kaw daz naeh ihz taangz phraz hawkz.”
29Hnhz kaw maanyz keuh, “Pehz samz daz, Ohz naeh yaeh hoh?”
Petros kaw daz, “Tahz ehz naeh Tahz Khris.”
30Yesuhz kaw lao mok teu paez Daehz keui nahz, “Yak aez keuh lao Daehz naeh yaeh.”
Yesuhz lao lawng Daehz ngaz yam
(Matthe 16:21-28, Lukas 9:22-27)
31Yesuhz seun teungz lao teu paez Daehz keui nahz, “Kuanz Ihz ne ngaz talz suhz heungz, ngaz talz ihz thiangz thengz, ngaz bawnz yam kaai tihz ihz mawh, beunz caangz an mawh boh ihz mawz kyaamz. Keuiz daz moh waiz seu ngihz, meu rae imz boh.” 32Yesuhz lao plakz baaiz, Petros raak leh nae Hnhz. 33Keuiz daz Yesuhz waaiz yawt tang teu paez Daehz keui daz Petros nahz, “Tiunz raez, Satan, mih nam takz phawmz lawng Phraz, takz phawmz lawng ihz pan.”
34Yesuhz raak teu paez Daehz boh ihz keui, daz keuh nahz, “Ihz an sunz lan tawiz puatz Ohz ne bawnz thiangz thengz toz daehz, baekz lakz klawngz klaengz daehz, lan tawiz puatz Ohz. 35Ihz an sunz khyawt phawmz daehz ne ngaz luh sumz, keuiz daz ihz an luh sumz kawp Ohz boh reu oiz rak samz, ngaz khyawt mial toz daehz boh. 36Yaeh se nam daz, prih keu tehz hacz aamz naeh khangz hnhz kaw, beuk khuanz hnhz luh sumz ne nam maang a keoz naehz? 37Nam maang naehz teur yal bawnz khuanz phawmz ihz. 38Ihz an keu sehz kawp mony reu ma Ohz kaap ihz meukz raai seu ni ne, meuz Kuanz Ihz leh bunz Paz Phraz tang teu maan kaang raaoz an seu ngamz keui truz ne ngaz bawnz keu sehz kawp ihz an diz.”
© 2022, Wycliffe Bible Translators, Inc. All rights reserved.