Génesis 2
2
1Na piguim chaqai na 'laua chaqai ná'ogue ná'maq 'ue quena'maxare mashic ime. 2Ca co'na' ỹovirerec saua seis na'xata', ca' ñi qota'olec ỹomat ná'maq ỹo'ueetetac, ca' queso liỹa na'xa'a, ca nco'matec. 3Ime, ca ỹanegue sojo pa'aatec na'xa'a quiyim le'xorenataxanaxaqui, ca ỹoỹoote'oga quiyim qaimaqachin so na'xa'a, ma' sojo na'xa'a chaqaiso viichigui na' nco'matec quená'ogue na lo'ueenatqaipi. 4Ca chaqaido' dá'maq 'neeto' na'le na' qaỹo'uet na piguim chaqai na 'laua.
So ỹale qoỹanalec yi 'laua leenaxat Edén
Co'na' ñi qara'gaxala' qota'olec ỹo'uet na piguim chaqai na 'laua, 5ca saqa'laca aca ñaxat qo'paq chaqai na 'uaqapi, ma' ñi qara'gaxala' qota'olec saqa' ỹo'uet ca ỹaxat taalec ana 'laua, chaqai saqa'leca ca ro'ueenataxanlec. 6Qam quena 'laua chicqotapougui na huaxaỹaq, ca' ỹaquitetalec nqai'en ná'ogue na'maxare. 7Co'na'le, ca' ñi qara'gaxala' qota'olec ỹo'xono' so qom ỹachigoxotaugui na 'laua. Ime, ca' pe'teu'guelo naua limiaqa lauaco, ca' ỹaanem da lca'laxa. Ca' so qom 'ue da lca'laxa.
8Ca na' ime, ca ñi qara'gaxala' qota'olec ỹo'ueeto' so lanaxanqa', illaalec yi 'laua leenaxat Edén, pa'ỹa'gue da lqodoigue. Ime, ca' ỹanalec só'maq lo'ueenatec qom. 9Ime, ca' ñaxajshiguim nqai'en ná'ogue ana ỹoreta'oguit no'uen qo'paq na'ic ana la. Ca' quena lavinñi so lanaxanqa' ỹanañigui aso qo'paq chicqaugui da nca'laxa, chaqai aso liỹa qo'paq chicqaugui quiyim qaỹa'den ca lo'yaxanec chaqai ca se no'uen.
10Ca' quiyi Edén chicqochi'ñi aso lachiugue, ca' quiyi, ca' neuagaxat cuatro naua llico, ca' naquitetashiguim nqai'en so nanaxanqa'. 11So 'auaxaic llic na huaxaỹaq leenaxat Pisón, só'maq lepajlec yá'ogue yi 'laua leenaxat Havila, yí'maq hua'ñi na 'oro. 12Na 'oro hua'ñi yijo 'laua ỹaatqajam lo'yaxanec, chaqai ná'maq no'uen qo'paq louaq, chaqai na lo'yaxanec qa' leenaxat ónice. 13Chaqai da leenaxat so liỹa llic na huaxaỹaq Gihón, ca' chaqaiso só'maq lepajlec yi 'laua leenaxat Cus. 14Chaqai so liỹa llic na huaxaỹaq leenaxat Tigris, ca' chaqaiso só'maq que'tegue da lqodoigue quiyi 'laua leenaxat Asiria. Chaqai so liỹa huaxaỹaq llic leenaxat Eufrates.
15Ca co'na' ñi qara'gaxala' qota'olec mashic ỹanalec so qom yí'maq nanaxanqa' quiyi Edén quiyim ro'ueenataxanlec chaqai cochiỹa. 16Ca 'uo' da ỹaanem la'qaatec, 'naaco': Shichite' 'qui' ná'ogue ana la ana qo'paq quenajo nanaxanqa'. 17Qam ada qo'paq chicqaugui quiyim qaỹa'den ca lo'yaxanec chaqai ca se no'uen, ca' sqa 'qui'. Ma' no'm 'qui', ca' ỹaatqajam llic rillivi'.
18Co'na'le, ca 'naaco' ñi qara'gaxala' qota'olec: Se ỹa'maxañi quiyim dajo ỹale qaidaatam 'oonoqui'. So'uet ma'le aca nauegaxaua chaqai notaanaxaua.
19-20Ca' ñi qara'gaxala' qota'olec ỹachigoxotaugui na 'laua ná'ogue na iseripi chaqai ná'ogue na ỹoipi, ca ỹauegueu'a so ỹale quiyim ỹa'ue ca leenaxat. Ca' so ỹale ỹo'uet na leenaxat ná'ogue na neloipi iseripi chaqai ná'ogue ana ỹo chaqai na neuec iseripi, ca' chaqaida leenaxat nqohin. Qam quesá'ogue qaica quet cá'maq ishit quiyim lotaua so'maxare. 21Co'na'le, ca ñi qara'gaxala' qota'olec ỹaatqajam 'xoic lelaxac nqai'en so ỹale. Ca co'na' ỹaatqajam laqatam, ca' naqato' so 'óna nemeenec, ca lotqai liỹa ỹapaqajanta' so la'at. 22Ca quesó'maq nemeenec naqato' na'le ñi qara'gaxala' qota'olec, ca ỹo'ueeto' na'le aso 'óna 'aalo. Ca' ỹauega'a so ỹale. 23Ca so'maxare co'na' iuane'ta, ca 'naaco':
—¡Dajo maqsa' chi ỹa'aashaxaua chaqai chi ipi'necshaxaua! Ada'maxare leenaxato' 'aalo, ma' ñi qota'olec ỹachigoxotaugui na ỹale.
24Vichiguiño' ca ỹale ca'e ca leta'a chaqai aca late'e, ca' lauora aca loua. Ca caua'maxare 'ec ca 'oonoqui' qom.
25Ca' so ỹale chaqai aso 'aalo saua'que neesauec, qam se npocoxata' quiyim 'neesari' dajo.
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.