एहुन्ना 6
6
ईसु पाँच हजार कोड़ाकुय खियो तेडा
(मत्ती 14:13-21; मरकुस 6:30-44; लूका 9:10-17)
1हेना वरी तयोम ते ईसु गलील जिला राः समुन्धर परोमिय सेनेना। हेना तिबिरियास समुन्धर मेनते होकू कहनी वआ। 2अवुर हेंय रोगियाकू थरे अहचरज कामिय करो तेडा, हेना होड़कू ञेंलते डकू, अवुर अखीर होड़कू हेंय तयोम तेकू सेनतेडा। 3हेना वरी ईसु अनेज रेनकू चेलाकू सुदा घुटरी रे सेनकेन तेय दुड़ूब यनु। 4अवुर एहूदिकू राः पस्का परब तयाः बंचो तना।
5ईसु चरियो गतर हनिय तको तेड दो, अखीर होड़कू अनेज थरेय ञेंल अगतेड कुआ। तहाँ फिलिपुस थरेय कहनी तेडा, “अबू नेकू खियो कू लगड करा वरी रोटी बू तिला आगा?” 6ईसु चीय चीः हेनाय पपाड़ी दोहो एनु, लेकिन नआँ टेबोः अजमोविय लगाडिय होंबोर तेडिया।
7हेना वरी फिलिपुस ईसु थरेय कहनी तेडा, “नामेन होड़कू दम-दम खियो कू लगड दूय सव दीनार#6:7 एक दीनार एक दिन राः मँजुरी हवे राः तेहो सींड़कू एरो कू पुरो एना।”
8चेला कुतय मेंडे रे सिमोन पतरस बोहोत अन्दिरयास हेंय थरेय कहनी तेडा, 9“नआँ रे मियाँहोड़ कोड़ा चोंडिज इदाना। हेंय थरे जव राः पाँच गोटंग रोटी अवुर बाटंग हकुकींञ इदाना। लेकिन नामेन होड़कू लगड हेना तिनीमीन गिआ।”
10हेना वरी ईसु कहनी तेडा, “सींड़कू जोमुः लगड दुड़ूब मेनते पे कहनी वकू” हेना रे अखीर घाँस दोहो एना, हेन ओत तेकू दुड़ूब यनु। हेना रे कोड़ाकू उजगी पाँच हजार मेनमोट कू दोहो एना। 11तहाँ ईसु रोटिय सबतेडा, अवुर भगवान धन्यावादिय ओवाडा। हेना वरी चेला कुतय थरे परोसे लगाडिय एमतेडा, नेन घयते हकु कुहो कू परोस वडकू। अवुर होड़कू जेतना कू जोम सको मेनमोट कू जोम तेडा।
12हेना वरी जोम पिटो केन रे चेला कुतय थरेय कहनी तेडा, “अलो ससीतुः लगड बंचो केन हेना टुटकत पे जवर गोत्ते।” 13तहाँ हेंकू हेना पाँच गोटंग जव राः रोटी वरी कू जोम अटा तडा हेना टुटकत कू जवर तेडा, अवुर हेना भर भर बारह छनवाँ सेनेना।
14हेना वरी होड़कू हेंय करो तेडा अहचरज काम ञेंलकेड तेकू कहनी तेडा, “ना चँवदीस रे भविस्यवक्ता मेजुअय मेनाअय सही मेते ने-नी हवे।” 15ईसु जिदहाय ते राजाकू बनोविंञ मेनाआँ पपाड़ी केनते, मियाँहोड़ ते घुटरी हनतेय चलो यनु।
ईसु दाः अगस तेय सेनतेडा
(मत्ती 14:22-27; मरकुस 6:45-52)
16हेना वरी सिंगड़ एना, तहाँ चेला कुतय समुन्धर अड़ी रेकू सेनेना। 17हेना वरी हेंकू डोंगा रे रकब केनते समुन्धर परोम कफरनहूम सहर कू चलोः दोहो एनु। हेना तोलोग अंधरा यन दोहो एनु, अवुर ईसु नीमित मेनते हो हेंकू थरे अनायीनिय मेजुः दोहो एनु। 18अवुर आँधी तुफान राः चलते ते दाः अखीर हिलकोसुः दोहो एनु। 19तहाँ हेंकू डोंगा चलो चलो ते करीब करीब दूय कोस#6:19 लग भग पाँच छो किलोमिटर कू चलो यनु, तहाँ हेंकू ईसु समुन्धर राः दाः अगस ते डोंगा हनतेय सेन अगुय तोलोग कू ञेंल ञँमतेडिया, तहाँ हेंकू अखीर कू बोरो यनु। 20हेना वरी हेंय हेंकू थरेय कहनी तेडा, “इंञ हवे, अलोपे बो-रू।” 21तहाँ हेंकू डोंगा रेकू रकाबिय मेनते कू तयार यनु, अवुर तुरेत्ते जे जघा डोंगा तेकू सेनुः दोहो एनु, हेना कू तयाः गोत्तेडू।
होड़कू ईसु कू छपा तेडा
22हेना ञींदावा समुन्धर परोम रेकू चड़ाँ तन हेंकू होड़कू ञेंलतेडा कू कि हेना रे मिनियेंटंग डोंगा दोहो एना, अवुर ईसु हेना डोंगा रे चेला कुतय सुदा मेनेय रकब गन दोहो एनु, हेना डोंगा ते चेला कुतय भर चलो एना। 23हेंडे रेहो तिबिरियास वरी होड होडिञाँ डोंगा हेना जघा रे सेनेना, हे-ना जघा रे हेंकू परभु धन्यावाद वते रोटी कू जोम तेडा। 24हेनाते होड़कू ञेंलतेडा कि नआँ रे ईसु हो कोवाया अवुर चेला कुतय हो कोवा कुआ, तहाँ हेंकू हेना डोंगा रे रकब केनते ईसु कू छपा छपा ते कफरनहूम कू सेनेना।
ईसु जीवन राः रोटी हवे
25हेना वरी हेंकू समुन्धर खँडा केडते ईसु अवुर चेला कुतय सुदा कू जुमो एना, तहाँ कू होंबोर तेडिया, “ए गुरू, ना रे तिमीस मी मेजेना?” 26तहाँ ईसु हेंकू थरेय कहनी तेडा, “इंञ अपे थरे सहिच मेतेंञ कहनी यडा, अपे अहचरज काम राः मतलोब पपाड़ी लगड मेने, बल्कि अपे बिः मेनते ते रोटी पे जोम तेडा, हेनातेपे छपा यडिञाँ। 27नआँ दुनिया राः खान पान नास जोमा, हेनाते नासुआ हेना खान पान लगड अलोपे मेहनेते। लेकिन जे खान पान हमेसा दोहोना, अवुर अनन्त जीवन ए-मा, हेन लगड पे मेहनेते, अवुर हेना खान पान इंञ होड़ होपोन ओवा पेआ, कहेकि अपा मतलोब भगवान, जीवन एम हेना खान पान ओवापे लगड इंञ हाँकिय ओवाडिञाँ।” 28हेना वरी हेंकू होंबोर तेडा, “भगवान राः काम लगड अले ची ले बनोआँ?” 29तहाँ ईसु कहनी वडकू, “भगवान राः काम नआँ हवे, अपे हेंय जेयिय कुलकेडा हेंय थरे पे बिसवासे।” 30तहाँ हेंकू ईसु कू होंबोर तेडा, “अले करा घियाआ निसानाम तिःवाले तना कि अले हेना ञेंलकेते अम थरे ले बिसवासे? अले करा चमत्कार मी तिःवा लेआ? 31अबू रेनकू दादी पुरखाकू सुनहर ओत रे मन्ना#6:31 मन्ना; मिसर देस राः गुलामी वरी आजाद केनते इसराएलिकू कनान देस हनतेकू चलोः तोलोग चालीस बरिस अँगम सुनहारा जंगल तेकू भटकोः दोहो एनु। तहाँ भगवान हेनेन घनी दम-दामा पुँडी पुँडी ते दोहो एना सुड़िआ, जोमे लगाडिय ओवडकू दोहो एनु। हेना मन्ना मेनते कू कहनी वआ। कू जोम तेडा, नआँ याःते धरमग्रंथ रे लिखल इदाना, ‘हेंय हेंकू जोमे लगड सरग वरी रोटिय ओवड कुआ’।” 32हेना वरी ईसु हेंकू थरेय कहनी तेडा, “इंञ अपे थरे सही मेतेंञ कहनी यडा, हेना रोटी मूसा सरग वरी मेनेय एमगड पेआ, लेकिन इंञ अपुंञ सहिआ रोटी सरग वरिय ओवा पेआ। 33कहेकि भगवान एमकेडा रोटी नआँ हवे, सरग वरी अगड़ू कोःते दुनिया रेनकू जीवन ओवा कुआ।” 34हेना वरी हेंकू हेंय थरे कू कहनी तेडा, “ए परभु, हेना रोटी अले हमेसाम ओवा ले।”
35हेना वरी ईसु हेंकू थरेय कहनी तेडा, “जीवन एम हेना रोटी ईनिंञ हवे, जे इंञ थरेय मेजुआ, हेंय कबोह एरो रँगेज तेडिया। अवुर जे इंञ थरेय बिसवासेआ, हेंय कबोह एरो ततँग#6:35 आत्मिक जीवन राः रँगेज ततँग तेडिया। 36लेकिन इंञ अपे थरे ञेंल केडिञाँ पे मेनतेंञ कहनी तेडा, हेंडे रेहो मेने पे बिसवासेआ। 37जे जे होड़कू अपा ईंञिय ओवाआ, हेंकू सींड़कू इंञ थरे कू मेजुआ, हेंकू इंञ कबोह एरोंञ जोला तेडकुआ। 38कहेकि इंञ ईनिञाँः मन मेने, लेकिन जे ईंञिय कुलकेडा, हें-नी राः मन पूरा लगड सरग वरिंञ अगड़ू केना। 39अवुर ईंञिंय कुलकेडा, हेनी राः मन नआँ हवे कि जे जे होड़कू ईंञिय ओवाडा, हेंकू मेंडे कनय अलोंञ गँवों कू, लेकिन हेंकू दुनिया राः अखरी दिन रे फेरिंञ जियो रिमकुआ। 40कहेकि अपुंञ राः मन नआँ हवे कि कनय हो होपोन तू कू ञें-लू, मतलोब ञेंलकेंञ ते इंञ थरेय बिसवासेआ, हेंय अनन्त जीवानिय ञाँमा, अवुर इंञ हेंय अखरी दिन रे फेरिंञ जियो रिमेया।”
41हेनाते एहूदिकू ईसु कू कुरूबुसूवा दोहो एनु, कहेकि हेंय पहील ते “सरग वरी अगड़ू केन हेना रोटी इंञ हवे” मेनतेय कहनी तडा। 42तहाँ हेंकू कहनी तेडा, “नेय हें-नी उसुफ कोड़ा होपोन ईसु हवे, नेय इंगत अपत कींञ दोबू पपाड़िआ, फेर सरग वरिंञ मेजकेना मेनते काःतेय कहनी यडा?” 43हेना वरी ईसु हेंकुय जबाब वडा, “अनापे अनापे अलोपे कुरू बुसूऊ। 44ईंञिय कुलकेड हेनी अपुंञ, कनय इंञ हनते मेनेय ओर अगेय रेदो, हेंय इंञ थरे एरोय मेज सको एना; अवुर इंञ हेंय अखरी दिन रेंञ जियोविया। 45अवुर नआँ घयते भविस्यवक्ताकू राः कागद रे लिखल इदाना, ‘भगवान हेंकू खुदेय चेडकुआ।’ कनय हो अपा वरिय अँजोम केडा अवुरिय चेडकेडा, हेंय इंञ थरेय मेजुआ। 46कहेकि अपुंञ कनय बेगर ञेंलेया, लेकिन जे भगवान हनवरिया, हें-नी भर अपुञिंय ञेंलकेडा। 47इंञ अपे थरे सही मेतेंञ कहनी यडा, कनय हो इंञ थरेय बिसवासेआ, अनन्त जीवन हे-नी राः हवे। 48जीवन एम हेना रोटी इंञ हवे। 49अपे रेनकू दादी पुरखाकू सुनहर ओत रे मन्ना कू जोम तेडा अवुर कू गोजेना। 50कहेकि नआँ रोटी सरग वरी अगड़ू केन हेना हवे, अवुर होड़कू जो-मे रे एरो कू गोजेना#6:50 पवितर आत्मा राः मिरतू अवुर पवितर आत्मा खान पान राः बारे ते लाय यडा।। 51अवुर सरग वरी अगड़ू केना, हेना जीवन ए-मा रोटी इंञ हवे। अगर कनय नआँ रोटी कू जो-मेआँ, हेंकू हमेसा जीवतकू दोहोना, अवुर दुनिया रेनकू होड़कू जीवन एम हेना रोटिंञ ओवा कुआ, हेना ईञाः देंह हवे।”
52नआँ अँजोम केते एहूदिकू अकू अकू अड़ा चवकी एना, “नेय अनेज राः देंह जो-मे लगड काःतेय एम सकोआ?” 53तहाँ ईसु हेंकू थरेय कहनी तेडा, “इंञ अपे थरे सही सही तेंञ कहनी यडा, अपे मनवाँ होपोन राः देंह अनायिन पे जो-मे मेन दिन अवुर हेंय राः लोहू अनायिन पे ञुँय मेन दिन, अपे थरे जीवन कोवाआ। 54जे ईञाः दें-हिय जो-मा, अवुर ईञाः लोहुय ञूँआँ, अनन्त जीवन हें-नी राः हवे; अवुर इंञ हेंय अखरी दिन रे फेरिंञ जियोविया। 55कहेकि ईञाः देंह सही मेते जो-मेआ चीज हवे, अवुर लोहू हो ञुँय हेना चीज हवे। 56जे ईञाः दें-हिय जो-मा, अवुर ईञाः लोहुय ञूँआँ, हेंय इंञ थरे थीर तेय जुड़ो बगी कोआ, अवुर इंञ हेंय थरे। 57जेयसे जीवातय अपुंञ कुलकेडिञाँ, अवुर अपुंञ राः चलते ते जीवत गिआञूँ, हेन घयते कनय हो ईञाः दें-हिय जो-मा, हेंय ईञाः चलते ते जीवत तेय दोहोना। 58सरग वरी अगड़ू केन हेना रोटी ईनिंञ हवे, नआँ रोटी अपे रेनकू दादी पुरखाकू जोमकेतेकू गोजेना, हेना घयते कोवाआ, लेकिन कनय हो नआँ रोटी कू जो-मेआँ, हेंकू हमेसा जीवतकू दोहोना।” 59नआँ टेबोः हेंय कफरनहूम राः आराधना ओड़ाः रे चेडकू तोलोगिय कहनी तेडा।
अनन्त जीवन ए-मा टेबोः
60हेना वरी हेंय रेनकू चेलाकू मेंडे रे अखीर होड़कू नआँ अँजोम केतेकू कहनी तेडा, “नआँ टेबोः किलिस गिआ; नआँ टेबोः कनय एरो मनो सको एना।” 61तहाँ ईसु चेला कुतंञ अकू अकू नआँ टेबोः तेकू कुरुबुसुः तना मेनाआँ अनेज राः मन रेय पपाड़ी केनतेय होंबोर तेडकुआ, “नआँ टेबोः तेपे अटकोयन किदो? 62अगर अपे इंञ होड़ होपोन पहीलिंञ दोहो एना, सरग हनते पे ञेंल गोडेंञ रेदो, ची होयाआ? 63भगवान राः आत्मा दो जीवन ए-मा। अवुर देंह राः काम ते जीवन एरो ञँमेना, लेकिन जे टेबोः अपे थरेंञ कहनी केडा, हेना टेबोः आत्मा अवुर जीवन हवे। 64हेंडे रेहो अपे मेंडे अवुर कू मेने पे बिसवास यडा।” कहेकि ईसु ईया ईया मेने बिसवास यडा, अवुर ईया एर पकड़ो विञाँ मेनाआँ पहील तेय पपाड़ी दोहो एनु। 65अवुर ईसु हेंकू थरेय कहनी तेडा, “हेनाते इंञ कहनी तेडा, इंञ थरे मेजुआ राः मन अपुंञ मेनेय ए-मे रेदो, कनय हो इंञ थरे एरोय मेज सको एना।”
पतरस राः बिसवास
66नआँ अँजोम केते चेला कुतय मेंडे रे अखीर होड़कू तयोम हनतेकू मिड़ाः यनु, हेना वरी तयोम ते हेंय सुदा मेने कू सेनगाना। 67तहाँ ईसु हेंकू बारहो झन चेला कुतय थरेय कहनी तेडा, “अपे हो मिड़ाः गिसन यडपेआ किदो?” 68#मत्ती 16:16; मरकुस 8:29; लूका 9:20हेना वरी सिमोन पतरस हेंय थरे कहनी तेडा, “ए परभु, अले ईया थरे ले सेनुआँ? अनन्त जीवन राः टेबोः दो अनाम थरेआ; 69अवुर अले अम थरे ले बिसवास केडा, अले पपाड़ियानले, भगवान रेनिय पवितर होड़ अनाम हवे।” 70हेना वरी ईसु हेंकू थरेय कहनी तेडा, “अपे बारहो झन चेलाकू बेगारिंञ चुनो पेआ किदो? हेंडे रेहो अपे मेंडे रे मियाँहोड़ सयतान हवे।” 71नआँ हेंय सिमोन इस्करयोती कोड़ा होपोन एहूदा राः बारे तेय कहनी तेडा, कहेकि बारहो झन मेंडे रे मियाँहोड़ एर पपकड़ोवय ने-नी दोहो एना।
© 2022, Wycliffe India. All rights reserved.