एहुन्ना 7
7
ईसु अवुर बोपोह कुतय
1हेना वरी तयोम ते ईसु गलील जिला रेय होयोरुः दोहो एनु, कहेकि एहूदी अधिकारिकू ञेंड गोजेय राः तक तक रेकू दोहो एना, हेनाते हेंय अहूदिया रे मेनेय सेनगाना। 2अवुर एहूदिकू राः तम्बू#7:2 मिसरी देस राः गुलामी कू वरी कू उडूंग एना। अवुर होर बिर ते इसराएलिकू तम्बू बनो बनो तेकू दोहो एना। हेना उहयर केते नआँ झोपड़ी राः परब, साल रे बार एस कू मनोवेआ। नआँ परब लगातार आठ दिन अँगम कू मनोवेआ। परब तयाः बंचो तना। 3हेनाते बोपोह कुतय हेंय थरे कू कहनी तेडा, “जे काम मी काम यड हेना, चेला कुतम होकू ञें-ले लगड ना वरी अहूदिया हनतेम चलोऊ। 4कहेकि जे ञुमूतिय उसुला, हेनी होड़ उकू उकू ते मेनेय कामेआँ। अगर अम अहचरजुः राः काम मी काम यड रेदो, हेन हँडे अनाम दुनिया रेनकू होड़कुम देखोवा।” 5कहेकि बोपोह कुतय हो हेंय थरे मेने कू बिसवासे दोहो एनु। 6हेना वरी ईसु हेंकू थरेय कहनी तेडा, “ईञाः समय निहों मेनते अनायिन मेजुआ, लेकिन अपे परब रे सेनुः लगड सगोर समय इदाना। 7दुनिया रेनकू होड़कू अपे एरो कू मेरंग वडपेआ, लेकिन इंञ कू मेरंग वञाँ। कहेकि हेंकू खराब काम कू कामा मेनतेंञ लाय यडा। 8अपे परब मनो लगड सेनुःपे, निहों इंञ परब रे एरोंञ सेनेना, कहेकि निहों मेनते ईञाः समय अनायिन पुरोआ।” 9ईसु नेन याःते कहनी केते हेन गलील रेय दोहो यनु।
तम्बू परब रे ईसु सेनेना
10तहाँ बोपोह कुतय परब मनोकू चलो यनु, हेना वरी ईसु हो दलंग दलंग ते परब रेय सेनेना। 11हेना परब रे एहूदी अधिकारिकू ईसु करेया मेनते कू छपा बेड़ाय दोहो एनु। 12अवुर हेना परब रे अखीर होड़कू जवर एना। अवुर होड़कू ईसु राः बारे तेकू कुरुबुसुः दोहो एनु। कोई कोई कहनियू, “नेय बढ़ियाँ होड़ हवे,” अवुर कू कहनियू, “अरे नेय होड़कुय भड़को यडा।” 13हेंडे रेहो होड़कू एहूदी अधिकारिकू राः बोर ते हेंय राः बारे ते सींड़कू मड़ंग रे खुलेआम ते मेने कू कहनी गडा।
परब रे ईसु सिक्छाय लाया
14तहाँ परब राः अधा दिन बितो केन रे; ईसु मँडिल रे सेनकेन तेय चेडकू दोहो एनु। 15तहाँ एहूदी अधिकारिकू अहचरज केनतेकू कहनी तेडा, “नेय कनय गुरू बेगर चेडेया, फेर नेय काःते बुद्हिय ञँमकेडा?” 16हेना वरी ईसु हेंकुय जबाब वडा, “इंञ चेडयड कुः हेना टेबोः ईनिञाँः मन ते मेनेंञ चेडयड कुआ, लेकिन ईञिय कुलकेडा हें-नी राः हवे। 17अगर कनय हो भगवान राः टेबोः मनो गिसानियाय, नआँ टेबोः भगवान हनवरिआ किदो ईनिंञ हनवरिआ, हेना हेंय पपाड़िअयू। 18अवुर कनय हो अनेज राः मन मरजी तेय कहनिया, हेंय अनेज राः मान मरजादिय ञँम बेड़ाआ। लेकिन कनय हो अनेजिय कुलकेड हेनी राः मान मरजादिय चहोआ, हेंय सीरित तेय टेबोआ, जलिया ते कबोह मेनेय टेबोआ। 19अवुर अपे मूसा नियम बेगारिय ओवा पेआ किदो? हेना नियम अपे मेंडे कनय मेने पे मनो यडा, हेना वरी ची लगड पे ञेंड गोजेंञ मेनते?”
20तहाँ हेंकू कहनी तेडा, “अम थरे भूत इदाना, ईया ञेंड गोजमी मेनते?” 21हेना वरी ईसु जबाब वडकू, “सब्द राः दिन रे मियाँटंग अहचरज कामिंञ काम केडा, हेनातेपे अहचरज यना। 22ने-ना राः चलते ते मूसा अपे खतना लगाडिय कहनी वडपेआ। अपे सब्द राः दिन दोहोन रेहो पे खतना कुआ। लेकिन नआँ खतना राः नेत मूसा हनवरी मेने दोहो गना, बल्कि अपे रेनकू दादी पुरखाकू हनवरी मेज दरवारुः तना। 23#एहुन्ना 5:9अपे सब्द राः दिन रे घली होड़कू पे खतनाआँ, ताकि मूसा राः नियम अलो टोविजुऊ। लेकिन इंञ सब्द राः दिन रे मियाँहोड़ होड़ एकदम तेंञ चिकन तेडिया, दो अपे ची लगड पे धकोवंञ तना? 24अपे मुँह चिन चिन ते अलोपे न्याये, सही सही तेपे न्याये।”
ईसु, मसीहा हवे किदो?
25तहाँ एरुसलेम रेनकू गोटाचार होड़कू कहनिय दोहो एनु, “नेय एहूदी अधिकारिकू ञेंड गोजेय मेनते कू सँबह वय तना, हें-नी हवे। 26ञेंलेय पे, सगोरकू मड़ंग रेय चेडयड कुआ, सँयित एहूदी अधिकारिकू हो ने-नी मसीहा हवे मेनते कू पपाड़ी यनाते कनय मेने कहनी वय तना। 27लेकिन नेय करा वरिय मेजकेना, हेना दोबू पपाड़ी तना; मसीहा मेजुः रेदो करेनिय हवे मेनाआँ कनय एरो कू पपाड़ी एना।” 28हेना वरी ईसु मँडिल रे चेडकू तींग ते बड बडे तेय कहनी तेडा, “अपे इंञ पे पपाड़िआ, इंञ करा वरिंञ मेजकेना, हेना होपे पपाड़ी तना, इंञ ईनिञाँः मन ते बेगारिंञ मे-जा, लेकिन जे ईञिय कुलकेडा, हेंय सत गिआयू, इंञ हेंयिंञ पपाड़िआ, अपे हेंय राः बारे ते मेने पे पपाड़ी तना। 29इंञ हेंयिंञ पपाड़िआ, कहेकि इंञ हें-नी हनवरिञाँ, अवुर हें-नी कुलकेडिञाँ।” 30नआँ अँजोम केते हेंकू पकड़ोविय मेनते कू सँबह तना, लेकिन कनय मेने कू पकड़ो गडिया, कहेकि हेंय गोजुः राः समय अनायिन पुरोः दोहो एनु। 31हेंडे रेहो भीड़ वरी अखीर होड़कू हेंय थरे कू बिसवास तेडा, अवुर कू कहनियू, “मसीहा मेजुः रेदो नेय तिबकेड वरी बगरा अहचरज कामिय तीबा किदो?”
ईसु पकड़ोविय मेनते कू सँबह एना
32तहाँ फरीसिकू ईसु राः बारे ते होड़कू कुरू बुसू अकू अँजोम तेडा; अवुर बड बडे आजककू अवुर फरीसिकू हेंय पकड़ोविय लगड मँडिल पहराः हेंकू सिपाहिकुकू कुलतेडा। 33हेना वरी ईसु कहनी तेडा, “इंञ मियाँ घड़ी लगड अपे सुदा इदानिञाँ, हेना वरी ईञिय कुलकेडा, हेंय हनतेंञ चलोआ। 34अपे छपा ञँपे, लेकिन एरो पे ञँमतेडिञाँ, अवुर जे जघा रे इंञ दोहोना, हेना रे अपे एरो पे सेन सको एना।” 35तहाँ एहूदी अधिकारिकू अकू अकू कहनी ओड़ेंगू, “नेय कराय सेनुअते एरोबू ञँमतेडिया? नेय उनानिकू थरे छितीर बितीर केनकू एहूदिकू होय चेडकुआ किदो? 36नआँ ची टेबोईय कहनी तेडा, ‘अपे छपा ञँपे, लेकिन एरो पे ञँमतेडिञाँ, अवुर जे जघा रे इंञ दोहोना, हेना रे अपे एरो पे सेन सको एना’ मेनते?”
जीवन एम हेना दाः
37परब राः छेद चेका असली दिन दोहो एना, तहाँ ईसु चड़ाँ एनायू, अवुर बड बडे आवाज तेय कहनी तेडा, “अगर कनय ततँग केडिय रेदो, इंञ थरे मेजकोः तेय ञूँयु। 38अवुर जे इंञ थरेय बिसवासेः हेनी, जेयसे धरमग्रंथ रे लिखल इदाना, हेन घयते हेंय राः कोठी कया वरी अनन्त जीवन राः दाः जोड़ राः घयते तूआ।” 39हेंय नआँ टेबोः पवितर आत्मा राः बारे तेय कहनी तेडा, कहेकि जे जे ईसु थरे कू बिसवासेआ, हेंकू पवितर आत्मा ञँम बंचो तना, हेना घनी पवितर आत्मा भगवान अनायीनिय ओवाकू दोहो एनु। कहेकि ईसु नीमित मेनते अनेज राः महिमा#7:39 अवुर गोजकोः वरी अनायीनिय जियो रिमुः दोहो एनु, अवुर सरग हनते भगवान अनायीनिय रिम गोगेय दोहो एनु। रे अनायीनिय तयागे दोहो एनु।
40तहाँ कोई कोई ईसु राः टेबोः अँजोम केतेकू कहनी तेडा, “सही मेते नेय भगवान कुलेय लगाडिय जबान तडा, हें-नी भविस्यवक्ता हवे।” 41अवुराःकू कहनी तेडा, “नेय मसीहा हवे।” लेकिन अवुराःकू कहनी तेडा, “नेय मसीहा न लगे, कहेकि मसीहा गलील जिला वरी एरोय मेजेना। 42कहेकि धरमग्रंथ रे न याःते लिखल इदाना, ‘मसीहा दाऊद राजा राः पिढ़ी वरी बयतुलम गाँव वरिय मेजुआ’।” 43अवुर हेंय राः चलते ते होड़कू अलग तलग यनकू। 44हेंकू मेंडे अवुर कू पकड़ोविय मेनते कू पसींद बेड़ाय दोहो एनु, लेकिन कनय मेने कू पकड़ो गडिया।
एहूदी अघुवाकू मेने कू बिसवास गडा
45तहाँ मँडिल पहराः हेंकू सिपाहिकू, बड बडे आजककू अवुर फरीसिकू थरे कू मिड़ाः सेनेना; हेना वरी हेंकू होंबोर तेडा, “ची लगड मेने पे अग्गाडिया?”
46हेंकू सिपाहिकू कहनी तेडा, “हेंय टेबोः तन घयते कबोह कनय मेने टेबोआ।”
47हेना वरी फरीसिकू कहनी तेडा, “अपे होय भड़को केडपेआ जहानू। 48मुख मुखकू चहे फरीसिकू मेंडे रे कनय हेंय थरे कू बिसवास केडा किदो? 49लेकिन जे जे धरम नियम राः बारे ते कनय मेने कू पपाड़िआ, हेनाते हेंकू सरापित गिआकू।”
50 #
एहुन्ना 3:1,2 हेंकू मेंडे रे मड़ंग ते ईसु थरेय मेजेन दोहो एनु, हेनी नीकुदेमुस हेंकू थरेय कहनी तेडा, 51“कनय होड़ ची करोः हेना बेगर जाँच पुछ ते अवुर बेगर अँजोम ते, अबू राः नियम मेने दोसीया।” 52हेना वरी हेंकू हेंय थरे कू कहनी तेडा, “अम हो गलील जिला रेनिय हवे किदो? धरमग्रंथ रे छपा केतेम ञें-ले, हेंडेम पपाड़िआ कि गलील जिला वरी कनय भविस्यवक्ता एरोय मेजेना।” 53[हेना वरी सींड़कू अपन झपन ओड़ाः हनतेकू चलो यनु।
© 2022, Wycliffe India. All rights reserved.