Luk 10
10
Zezu aluma bebingi bedzi meku untsami ne bebingi bole
1Yumana, Kunwu atobo bebingi bedzi meku untsami ne bebingi bole, yedzi eluma bebingi bole ne ubandaka se bingundu ne bibuma byesi byedzi mene itsetse. 2Zezu ne bangu ati: «Buka ya yele, ipoko dzanawen ni bedzandzi ute, sunwulayi ne kunwu we buka aluma bedzandzi beyitsi ne uya dzandza. 3Tsekayi, me luma beyi nda bana be bindonvene tima ye benyama bekamve. 4Ni beyi ti batse, beyi nde bapa bedolo, beyi nde bapa myanza ne bekotoko, beyi nde sita ne peyi ne unyusele batu. 5Ndili ye beyi binyindzile se ndaku mbotu, umve beyi babanda tanda ati: “Itavu dze dze se ndaku yi.” 6Ti yadze ne mutu widzi ne itavu se ndaku yayu, itavu dzavuka nedzi, ti nde vavu itavu dzavutse ne beyi. 7Ti batu bidzi se ndaku yayu bayamba beyi, dzayi wawu, dzayi bila, notayi bye bikaba beyi, undzandzi umve abomo me wuta, beyi nde vele tse ne nyidzile se mendaku moko, 8ndili ye beyi bikalwe se ngundu yotu, ti bangu bayamba beyi, dzayi bila bye bikaba beyi. 9Sakayi mibedzu mye ngundu yayu, tandayi ne bangu ati, Ukani ve Nzambi va tsindene kone bangu. 10Ndili ye beyi bidzanga se ngundu yotu, ti batu be ngundu nde yamba beyi, tsekayi se bibuma bye mikuka beyi betanda bangu ati. 11Besu betemise iwulu dze ngundu ye beyi, dze menata se metambi me besu, besu bevutise beyi ndzangu. Ni umve beyi bayiba ati, Ukani ve Nzambi vedzi kone beyi.» 12«Metanda beyi vusa ve Nzambi itse pama batu, umpami nwen ngundu yi nwentse takwe umpami nwen sodome kanve.»
13«Ndoko ne beyi batu be ngundu ye Kolazi, ndoko ne beyi batu be ngundu ye Betsayida. Nzambi apika mamvu me likimiyinda kwele ye beyi, ni kaka kwele ye batu be ngundu ye Tili ne Sidoni. ni Nzambi abiki pika ma nvu meneni mamu Tili ne Sidoni, batu babu bebiki nyuwen ne dzika mamvu mebi, ne uyikwene kwele ye Nzambi. Tadzi bangu beswa mikanda mye pusu, ne usuwaka mesuyiki kule nyulu.» 14Umpami nwen batu be Kolazi ne be Betsayida nwentse takwe nwen batu be Tili ne Sidoni. 15Ni beyi batu be ngundu ye kapenayumi, beyi betsimene nati, beyi betse takwe boko ndzii ikulu? Ndika, we tse sundaka ndzii se ibila dze nde sele. 16Zezu avele tanda ne bebingi bedzi ati: «Ndili ye mutu iyuka beyi, ame yuka wawu ni me. Ni mutu take yamba beyi, ame lewe wawu ni yambe me. We nde yamba me, ame lewe wawu ni we me luma me.»
Bebingi be Zezu baye vutse
17Yumana vavu, bebingi be Zezu meku untsami ne bebingi bole, baye vutse kwele ye Zezu ne itsisa ati: «Kunwu, ne mimbiti mye kuna besu, ndili ye besu biwowe ne myangu ne kumvu yowe.» 18Zezu akalule ne bangu ati: «Meyene Satan ayinga ikulu ana nwen nda ngandzi tawelime. 19Yukayi, makaba beyi singa ye ulanda kule betadzi ne bedzinga ne undzangite singa ye mimbiti. Nde yi tuka yukuvuse beyi mbonzi. 20Ni beyi nde tsisa ne vavu, ne mimbiti mikuna beyi, ni tsisayi utsina ne Nzambi atende meku nvu me beyi ikulu.»
Zezu akumise Nzambi
21Ndili mene mbotu, Fudzu ye Umpende ya kaba Zezu itsisa. Zezu ati: «Tata wami, Kunwu we ikulu ne sendze, mekaba we live ne ma nvu mowe mesodze bekani ne batu be utsengu, yayu walaka mangu ne bana bete. Ee Tata, we mene ni we metondo vavu. 22Tata wami akaba me byesi, nde mutu wiyiba me Nwana wibaka. Wiyiba me si Tata, nde mutu wiyiba Tata, si me Nwana we ibaka wiyiba Tata. Ni me Nwana we ibaka mefumba laka Tata ne boko, yayu ne bangu beyiba wangu.» 23Yumana, ye Zezu eyikwene kwele ye bebingi bedzi, awowe ne bebingi bedzi ati: «Beyi bedzi se itsisa ne uyene me beyi biyene.» 24Metanda beyi: «Batu be Nzambi beyitsi ne bekani befumba yene me beyi biyene, ni bangu beke yene, bangu befumba yuka me beyi biyuka ni bangu beke yuka.»
Kunvu ye mutu we mamvu meve we Samali
25Unlakisi we bitsila motu awasa dendise Zezu unlanvu. Wangu atelime atanda ne Zezu ati: «Kunwu, mepika ni vi ne ubomo libiku le nde siya?» 26Zezu nedzi ati: «Me Moyize etende se sanguvu ye bitsila bye Nzambi ni meza? Ndili yowe itangala sanguvu ye bitsila, mowe iyuka ni meza?» 27Mutu mene akalule nedzi ati: «Batende se bitsila bye Moyize.» Ati: «Uve watondo Kunwu wowe Nzambi ne unlima nwowe nwesi, ne nyulu yowe, ne singa yowe, ne utsengu vowe vesi, umve watondo boko nda witondo nyulu wowe mene.» 28Zezu nedzi ati: «We meyiba kalule. Pika vavu yayu we bomo libiku le umbu ne umbu.» 29Ni unlakisi we bitsila efumba ni bomo mbingu. Yedzi isunwule ne Zezu ati: «Moko nami niza?» 30Zezu akalule nedzi ati: «Mutu motu ayinga Zeluzalemi ne utse Zeliko. Ye mipita mye lwanise wangu. Bangu baboko wangu byesi, babuma wangu luba, bangu batse ye bangu bedzika wangu tima ye libiku ne liku. 31Kunwu we ndaku ye Nzambi, edze ne suta se peyi mene. Yedzi eyene mutu mene, wangu aba nvule asuta kwele. 32Ne mutu motu we ikaka dze Levi awunze buma mene, ayene mutu we beyukuvuse mbonzi, nedzi aba nvule asuta kwele. 33Ne mutu we yinga ilongo dze Samali, adzanga kone we beme yukuvuse mbozi. Wangu ayene mutu mene, ayene wangu tsesi. 34Wangu atsindene konedzi, asuwaka madzi ne melaku se mepindzi medzi akutaka ne usaka wangu, amana vavu, atumbidze wangu atedze kule bodzi yedze ne bapa wangu, yedzi etse nedzi se ndaku ye benzenze ne ubata, ne usaka wangu.» 35Vusa ve senwen, mutu we ilongo dze samali akaba bepitisi bole be bedolo ne kunwu we ndaku ye benzenze, wangu nedzi ati: «Bata me mutu yu. Ti wayisa bedolo boko kule bami mekaba we, ti maya, mavutise.» 36Zezu asunwule ne unlakisi we bitsila ati: «Se metsimini mowe, tima ye bedzungi besatu ba, mutu we mipita mye buma luba, widzi moko nedzi niza?» 37Unlakisi we bitsila bye Nzambi akalule ne Zezu ati: «Ka mutu we meyene wangu tsesi.» Ye Zezu etanda nedzi ati: «Nowe tseke we pika nda wangu.»
Malta bane Maliya bayamba Zezu
38Zezu bane bebingi bedzi bedze ne utse Zeluzalame, bakalwe se mbuka mbotu. Nwatu we ku nvu Malta ayamba bangu se ndaku yedzi. 39Wangu edze ne nwandzi we kumvu Maliya. Maliya asunda untsitsi se sendze, sina mekulu me Kunwu ne uyuka medzi edze ne utanda. 40Malta edze ne dzandza uyitsi me kwele mesi, ne ilamba dze bila. Wangu aya kone Zezu nedzi ati: «Kunwu, nwandzi wami adzika me ne dzandza me mene. We nde yene ubi, tanda wangu aya yamene me.» 41Zezu akalule nedzi ati: «Malta, Malta, wedzi ne bayi ne mamvu meyitsi, 42ni yila yi neni ni yotu. Maliya atobo ikavu dzive dze mutu tine motu ndetse tuka pinule wangu dzangu.»
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES