Lóka 24
24
Jujúka á Yéso ka kukuwa
(Ɔna phɔtɔ Mat 28.1-10; Mkɔ 16.1-8; Yoá 20.1-10)
1Esa á yenga ka koɗokanaga á esa, ɓake ɗáɓáge ka bóta na ɓákumbi ɔphɔ á su ánjá, na nkoki nde ɗáɓáɓɔngisigi, 2ɓáodonda etae nde ɗáɓábisi ka ngia k'aphe á bóta na ɓáingitisi. 3Ɓáongia suɓi í, ɓákádondɛ ye mǒnda á Mɔkɔta Yéso. 4Ɓáoyayama phɛɛ ka nyɔngɔ ndɔ. Mɔngɔ moci ɓǒko ɓaɓɛ ɓáɔ̌sɛnɛkɛa, cɛɗɛ! Na ɓáɔ́ligi ngɔ́mbɛ á phenuaga phɛɛ. 5Wa, ɓake ndɔ ɓáoɓá na kɔɓɔɓɔkɔ, ɓáɔgɔtɔma. Mpɔ ɓǒko ndɔ ɓáǒngoɗea gea: «Ɓoonkaɓa nkpa nde aoenda ka ɔlɔ á ɓasí ka ɓo? 6Nna wani a ye jujúki ndiu ka kukuwa. Kanisiani phɔ́ nyɔngɔ nde ɗánɔtɔ̌mi ɓî ɗátú phɔ́tɔ na Galiláya gea: 7‹Ambe ɓámbisɛ Muna-Nkpa ka njaga á ɓato á ɓojeɗe, ɓánkɔkɛɛ ka moyangɔ na ájujúkɛ ka kukuwa k'ésa á ko isaɔ.›» 8Mpɔ ɓake ndɔ ɓáokanisia nyɔngɔ nde Yéso ɗáyɔngi.
9Ɓáotóka ka bóta na gǎ tɔ̌miaga mbino nde bui ka ɓagoigi nkama na moci (11) na ɓuangbo ɓɔbu. 10Ɓake ndɔ ɗáɓátú: Malía Magadála, Yɔána, Malía ama-Yakɔ́ɓɔ na ɓake ɓuangbo ɓunde ɗáɓátú kimoci na ɓɔ. Ɗáɓětɔ̌migi ɓateki mbino ndɔ, 11ɓateki ɓákáɓeekeɛ gǎkɛ nyɔngɔ ndɔ, ɗáɓáokanisia te, ande nyɔngɔ á jǎi-jǎi. 12Mpɔ Pɛ́tɛɛ áoma, áoga mbangɔ ka bóta. Wa, áogbúta ka kɛngɛɗia ú, â tɔ ɔɔna jǎi á ngɔ́mbɛ. Mbusa á wa, áoja mɔtɛ-akɛ n'aotangaaga ka nyɔngɔ ndɔ ɗányɛ́nyi.
Yéso sɔsɔɓɛ á ɓagoigi ɓaɓɛ k'aphe á Ɛmáu
(Ɔna phɔtɔ Mkɔ 16.12-13)
13Cɔ, k'ésa ndɔ tɔ, ɓagoigi ɓaɓɛ ɓáoga ka nji moci nnde ɓáɔɔphana Ɛmáu. Nji ndɔ, ɗangamana í ɗátúɔbɛda mbenɔ iɓɛ á tamba ka jua na Yɛusalɛ́ma. 14Wa, ɓáɔyɔngaga sɔsɔɓɛ aɓɔ ka nyɔngɔ bui nde ɗányɛ́nyi. 15Ɓî ɗáɓáikíí yɔngaga na ianaga, Yéso sisakɛ áɔsɛkɛɗa bíbí aɓɔ, áoga kimoci na ɓɔ, 16iso aɓɔ, ɗáɔmɔna, ɓákánengekisɛ gǎkɛ. 17Mpɔ Yéso áǒúsia gea: «Nyɔngɔ sina nde ɓɔmaɔyɔngaga na ɓo ka tamba?» Wa, ɓáomama na ɓáphindigi kiki.
18Ka ɓɔ moci mmbé ɓáɔmɔphana Klɛɔ́pa áonsikisia gea: «Ɓato á ka Yɛusalɛ́ma ɓáúbi nyɔngɔ ndee. Ande gea te oɓɛ sisakɔ tɔ aámbé kóúbi nyɔngɔ nde anyɛ́nyi ka ɓ'esa nde suɓi á Yɛusalɛ́ma?» 19Mpɔ Yéso â goto ǒsikisia te: «Nyɔngɔ sina?» Ɓáonsikisia te: «Nyɔngɔ nde anyɛ́nyima ka phɔa Yéso mmbé ɓá Najalɛ́ti. Yɛ, ɗátú mɔtu-nyɔngɔ akpɛkpɛ ndea Mokonga ka bɛɗanaga akɛ na ka yɔnga akɛ mosá á Mokonga na mosá á ɓakpa. 20Cɔ, ɓagbɛga á ɓatoɓeigi-phɛ́a na ɓagbɛga nɛsu ɗáɓántɔgi gea te ákuwɛ, ɓáɔnkɔkɛaga ka moyangɔ.
21Nseɓeɔ nesu ɗátú gea te, yɛ aámbé aephúiande Ɓaisilaɛ́li ka kɔkɔɓɛ. Cɔ, gǔ índɔ bui, a ye esa isaɔ ɓî nyɔngɔ ndɔ atɔtɔkɛani. 22Goto, ka ɓake á k'ékombo nɛsu ɓásopi ketangaɔ ka gǎ aɓɔ ka koɗokanaga ésa ka bóta, 23ɓákádondɛ gǎkɛ mǒnda á Yéso. Ɓake ndɔ ɓáoja ka ngoɗea asu gea: Ɓamalaéka ɓátóɛsɛnɛkɛi na ngoɗea ɓɔ gea: ‹Yéso aoenda.› 24Ka ɓunde ɗáɓátú kimoci na ɓesu ɓáoga ka bóta, ɓâ tɔ odonda ú ɓíndɔ ɓake ndɔ ɓátɔ́yɔngi. Ɓɔ, ɗáɓákámɔni gǎkɛ Yéso.»
25Mpɔ Yéso áǒngoɗea gea: «Ɓabóbó nde, ca! Měma anu aɗokomani ka ɓeekea nyɔngɔ bui nde ɓaɔtu-nyɔngɔ ndea Mokonga ɗáɓáyɔngi. 26Ande gea te kátókeni gǎkɛ Masíya átambɛgɛ ɓó na ángiɛ ka ɓoombia nɛkɛ?» 27Mpɔ Yéso áɔ̌tɔmiaga base nyɔngɔ nde ɗáɓáyɔngi ka phɔakɛ suɓi á Ɓuku á Mokonga buakɛ, kpanga k'índe á Mósa na tútuisa ka ɓuku bui á ɓaɔtu-nyɔngɔ ndea Mokonga.
28Ɓî ɓájú bíbí á nji nde ɗáɓáge kau, Yéso áǒtomba ɓea nkpa n'aoga ɗanga. 29Ɓagoigi ndɔ ɓáonimisia na yɔnga gea: «Ika kimoci na ɓesu nga, esa aye na gɔgɔmani, maní age.» 30Mpɔ Yéso áoika kimoci na ɓɔ ka mɛja, áobɛɗa mokati na bisa á njaga gǔ í, mpɔ áoɓúna ú na gabea ɓɔ. 31Ɓî iso aɓɔ akoɗokani ye, mpɔ ɓáonengekisa Yéso. Mbusa á wa, ɓákámɔnɛ ye. 32Mpɔ ɓáɔyɔngaga sɔsɔɓɛ aɓɔ gea: «Mpɔ měma asu áɓɛmaǒtoɓoaga ɓî atúɔsɔtɔmiaga k'aphe, kantíti á nyɔngɔ nde ɓáɗundu suɓi á Ɓuku á Mokonga!»
33Ka mbenɔ ndɔ tɔ, ɓáɔmɛɛkɛana ka ja na Yɛusalɛ́ma. Ɓáǒdonda ɓagoigi nkama na moci (11) na ɓáiki kimoci na ɓakpa ɓunɛngbo, 34ɓunde ɗáɓáɔyɔnga gea: «Eya, Mɔkɔta ajujúki tɔ ɗoni, nga Simɔ́ni amɔni ka yɛ.» 35Mpɔ ɓagoigi ndɔ ɓáɔ̌tɔmiaga ɓɔ nyɔngɔ bui nde ɗányɛ́nyi k'aphe na ɓî ɗáɓánengekisi Yéso ka mbenɔ nde ɗátúoɓuna mokati.
Yéso aɛsɛnɛkɛi ɓagoigi nɛkɛ
(Ɔna phɔtɔ Mat 28.16-20; Mkɔ 16.14-18; Yoá 20.19-23; Eku 1.6-8)
36Cɔ, na ɓá phɔ́tɔ kɔtɔmiaga mbino ndɔ, Yéso áɔsɛnɛka sɔsɔɓɛ aɓɔ, cɛɗɛ! Áǒngoɗea gea: «Ɓáni na ɓujɛjɛ.» 37Ɓagoigi ndɔ ɓáoima, ɓáoɓá na kɔɓɔɓɔkɔ, ɓáokanisia te ɓáɔni oketi. 38Wa, Yéso áǒngoɗea gea: «Ɓoagatani ka ɓo? Měma anu ana ngǎka ka ɓo? 39Eme aámbé! Ɔ́nani phɔ́ njaga ani n'ecinji ani! Ómoɓaɓáni, ɓɔ́ɛnjiɛ, nga oketi nna na kesuku, nna phɔtɔ na nkua ɓínde ɓɔɔmɔɔna na neně.» 40Mbusa á nndɔ, áɔ̌ɓɔnisa njaga akɛ, n'ecinji akɛ. 41Mpɔ ɓî ɗáɓá na ngǎka ka nyɔngɔ á maseye phɔtɔ na tangaaga, Yéso áǒɓúsia gea: «Ɓona kema á ko ea wani?» 42Ɓáomopha gbútuka á sú na ɓáɓáɓi, 43áɔbɛɗa ú na ea í mosá aɓɔ.
44Mpɔ Yéso áǒngoɗea ɓagoigi nɛkɛ te: «Ɓɔɔni nyɔngɔ nde ɗénóngoɗi na ne phɔ́tɔ na ɓenu gea: Ambe kema bui nde ɗáɓáɗundu ka phɔani suɓi á ɓuku ndea Mósa, nnde á ɓaɔtu-nyɔngɔ ndea Mokonga na nnde á Jabúi átɔtɔkɛanɛ.» 45Wa, Yéso áoúkua úbapha aɓɔ na engekisa kantíti á nyɔngɔ nde ɓáɗundu suɓi á Ɓuku, 46na ngoɗea aɓɔ te: «A tɔ ɓíndɔ ɗáɓáɗundu gea: Masíya atambagande na jujúka ka kukuwa k'ésa á ko isaɔ#Ɔna Isa 53; Ɔsɛ́ 6.2. 47Goto ka ina akɛ unge ɓɛ̌phɛande ɓato á ka ekuna bui, kpanga ka Yɛusalɛ́ma gea te, ɓákětiɛ tambea aɓɔ, mpɔ Mokonga áímɛ ɓojeɗe nɛɓɔ. 48Ɓenu gǎkɛ ɓonde ɓaɗigimisi á nyɔngɔ ndee. 49Cɔ! Neonotekisia kema nde Abɛ atɔ́ɔku. Ikani tɔ suɓi á ntanga-nji, na ka ɓî ɓukpɛkpɛ ka toka n'ego#Ɔna Eku 1.4-5 anogbukumiande.»
Yéso atái na koba
(Ɔna phɔtɔ Mkɔ 16.19-20; Eku 1.9-11)
50Mbenɔ nde Yéso ɗěge na ɓagoigi bǎ ntanga-nji, bíbí á nji Bɛtanía, wa, áɔmɛma Mokonga n'ěbisíí njaga. 51Ɓî ɗáǒbisia njaga, mpɔ áǒɗangamisa na ɓɔ, ka táia akɛ na koba#Ɔna Eku 1.9. 52Ɓɔ, ɓáogbúka muanku aɓɔ mosá á Yéso, mpɔ ɓáosikianaga na Yɛusalɛ́ma na maseye phɛɛ. 53Ɗáɓátú mbenɔ ásii k'éndu á Mokonga ka beba akɛ.
© 2021, Wycliffe Bible Translators, Inc.