मत्ती 5
5
ईशु मसीह चो डोंगरी उपदेश
1ईशु ऐ भीड़ के दकुन भाती, डोंगरी थाने चेगलो; आउर जिदलदाय बसलो तेबे हुनचो चेलामन हुनचो लगे ईला। 2आउर ईशु ऐ बोलुन भाती हुनमन के ऐ उपदेश देऊक मुरयालो:
धन्य बचन
3“धन्य आत हुनमन, जोन मन चो सोज आत, कसनबल्लोने सरग चो राज हुनीमन चो आय।”
4“धन्य आत हुनमन, जोन कलपे सोत, कसनबल्लोने हुनमन शान्ति पावदे।”
5“धन्य आत हुनमन, जोन सोज आत, कसनबल्लोने हुनमन धरतनी चो अधिकारी होदे।”
6“धन्य आत हुनमन, जोन धारमिकता चो भुकाहा आउर प्यासा आत, कसनबल्लोने हुनमन संतुष्ट करा जादे।”
7“धन्य आत हुनमन, जोन दया करू आत, कसनबल्लोने हुनमन चो उपरे दया करा जायदे।”
8“धन्य आत हुनमन, जोनमन चो मन शुद्ध आय, कसनबल्लोने हुनमन माहापुरू के दकदे।”
9“धन्य आत हुनमन, जोन मेल करातो बिता आत, कसनबल्लोने हुनमन माहापुरू चो बेटा बलाया जादे।”
10“धन्य आत हुनमन, जोन धारमिकता चो कारन कन्दराया जाऊ आत, कसनबल्लोने सरग चो राज हुनीमन चो आय।”
11“धन्य आस तुमी, जिदलदाय माने मोचो कारन तुमचो निन्दा करदे, आउर कन्दरा दे आउर झूठ बोलुन-बोलुन भाती तुमचो बिरूद ने सपाय परकार चो खराप गोठ बलदे। 12तेबे हरिक आउर उदुम हुआ, कसनबल्लोने तुमचो काजे सरग ने बड़े ईनाम आसे। ऐईकाजे कि हुनमन हुन अगम गिआनीमन के जोन तुमचो ले पयले रवत ऐई रीति ले कन्दराऊ रला।
लोन आउर उजर ले कटारतोर
13“तुमी धरतनी चो लोन आस; मान्तर अगर लोन चो सुआद नसुन जाओ, तेबे हुन फेर कोन तीज ले खर करा जायेदे? फेर हुन कोनी काम चो नुआय, मात्र ऐचो कि बाहरे पोकाया जाओ आउर मानेमन चो पाँयमन चो खाले रोमदा जाओ। 14तुमी जगत चो उजर आस। जोन नंगर डोंगरी थाने बसलोर आसे हुन लुकुक नी सके। 15आउर लोग दीया जराऊन भाती पयमाना चो खाले नाई मान्तर दिवट थाने संगाऊ आत, तेबे हुनचो ले घर चो सपाय लोगमन के उजर अमरू आय। 16हुनी परकार तुमचो उजर मानेमन चो पुरे चमको कि हुनमन तुमचो नुकु काममन के दकुन भाती तुमचो बुआ, चो जोन सरग ने आसे, बड़ाई करोत।
नियम चो पुरा होतोर
17“ऐ नी समजा, कि मय मूसा चो नियम नाहले अगम गिआनीमन चो किताबमन के मेटाऊक ईले से, मेटाऊक नाई, मान्तर पुरा करूक ईलेसे। 18कसनबल्लोने मय तुमचो ले सते बलेंसें, कि जिदलदाय ले बादरी आउर धरतनी खतम नी होये, हुदलदाय ले नियम ले गोटक मात्रा नाहले गोटक बिन्दु बले बिना पुरा होलोर नी खतम होयदे। 19ऐईकाजे जोन कोनी ऐ नानी ले नानी हुकुममन थानले कोनी गोटक के टुटादे, आउर असने ची लोगमन के सिकायदे, हुन सरग चो राज ने सपाय ले नानी बलाया जायेदे; मान्तर जोन कोनी हुन हुकुममन चो पालन करेदे आउर हुनके सिकायदे, हुनी सरग चो राज ने माहान बलाया जायदे। 20कसनबल्लोने मय तुमचो ले बलेंसे, कि अगर तुमचो धारमिकता शास्तरीमन आउर फरीसीमन चो धारमिकता ले बडुन भाती नी होओ, तेबे तुमी सरग चो राज ने केबे ओलुक नी सकासे।
हत्या आउर रीस चो डण्ड
21“तुमी सुनुन चुकलासास, कि मूसा चो नियम ने आगजुग चो लोगमन ले बोला जाऊ रली कि ‘हत्या नी करा’, आउर ‘जोन कोनी हत्या करेदे हुन कचरी ने डण्ड चो लायक होयेदे।’ 22मान्तर मय तुमचो ले ऐ बलेंसें कि जोन कोनी आपलो भाई उपरे रीस करेदे, हुन कचरी ने डण्ड चो लायक होयेदे, आउर जोन कोनी आपलो भाई के ठग बलेदे हुन बड़े सभा ने डण्ड लायक होयदे; आउर जोन कोनी बलेदे ‘अरे मुरक’ हुन नरक चो आईग चो डण्ड चो लायक होयेदे। 23ऐईकाजे अगर तुय आपलो भेट बेदी थाने आनसे, आउर हुता तुय सुरता करसे, कि तुचो भाई चो मन ने तुचो काजे काई बिरूद आसे, 24तेबे आपलो भेट हुताय बेदी चो पुरे छांडुन देस, आउर जाऊन भाती पयले आपलो भाई ले मिला-मिसा कर आउर तेबे ऐऊन भाती आपलो भेट चेगाव। 25जिदलदाय ले तुय आपलो बयरी चो संगे बाट ने आसीत, हुनचो ले झटा-झट मिला मिसा कर काहांय असन नी होओ कि बयरी तुके हाकिम के सोपुन देओ, आउर हाकिम तुके पलटनमन के सोपुन देओ, आउर तुय जयलघर ने डालुन दिया जासे। 26मय तुमचो ले सते बलेंसें कि जिदलदाय ले तुय पाई-पाई भरून नी दे से हुदलदाय ले हुता ले छुटुक नी सकसे।
बेबीचार चो बारे ने सिक्या
27“तुमी सुनुन चुकलासास कि मूसा चो नियम ने बोला जाऊ रली, ‘बेबीचार नी करा।’” 28मान्तर मय तुमके ऐ बलेंसे, कि जोन कोनी-कोनी बायले लेकी उपरे खराप नजर डालेदे हुन आपलो मन ने हुनचो ले बेबीचार करून चुकलो। 29अगर तुचो उजा आँईक तुके ठोकरना खुआयदे, तेबे हुनके निकराऊन भाती पकाऊन देस; कसनबल्लोने तुचो काजे ऐ अच्छा आय कि तुचो अंगमन थानले गोटक नष्ट होओ आउर तुचो पुईतराय देंह नरक ने नी डाला जाओ। 30अगर तुचो उजा हाथ तुके ठोकरना खुआयदे, तेबे हुनके गोंदुन भाती पोकाऊन देस; कसनबल्लोने तुचो काजे ऐ अच्छा आय कि तुचो अंगमन थानले गोटक नष्ट होओ आउर तुचो पुईतराय देंह नरक ने नी डाला जाओ।
छाड़पतर चो बारे ने सिक्या
31“ऐ बले मूसा चो नियम ने बोला जाऊ रली, ‘जोन कोनी आपलो बायले के छाडपतर देऊक चाहाओ, तेबे हुनके छाड़पतर देओ।’ 32मान्तर मय तुमचो ले ऐ बलेंसे कि जोन कोनी आपलो बायले के बेबीचार चो अलावा कोनी आउर कारन ले छाड़पतर देयेदे, तेबे हुन हुनचो ले बेबीचार कराऊ आय; आउर जोन कोनी हुन छांडलो बिती ले बिहा होयदे, हुन बेबीचार करू आय।
किरिया नी खाआ
33“फेर तुमी सुनुन चुकलासास कि मूसा चो नियम ने आगजुग चो लोगमन ले बोला जाऊ रली, ‘झूठा किरिया नी खाआ, मान्तर परबु चो काजे आपलो किरिया के पुरा करा।’ 34मान्तर मय तुमचो ले ऐ बलेंसे कि केबीई किरिया नी खाआ; ना तो सरग चो, कसनबल्लोने हुन माहापुरू चो सिंघासन आय; 35ना धरतनी चो, कसनबल्लोने हुन हुनचो पाँयमन चो चौंकी आय; ना यरूशलेम चो, कसनबल्लोने हुन माहाराजा चो नंगर आय। 36आपलो मुण्ड चो बले किरिया नी खाआ कसनबल्लोने तुय गोटक केश के बले ना पंडरा, ना करया करूक सकीस। 37मान्तर तुमचो गोठ ‘हव’ चो ‘हव,’ नाहले ‘नाई’ चो ‘नाई’ होओ; कसनबल्लोने जोन काई ऐचोले आगर होऊ आय हुन खराप ले होऊ आय।
बदला नी धरा
38“तुमी सुनुन चुकलासास कि मूसा चो नियम ने बोला जाऊन रली, ‘आँईक चो पलटा आँईक, आउर दात चो बदला दात।’ 39मान्तर मय तुमचो ले ऐ बलेंसे कि खराप माने चो सामना नी करा; मान्तर जोन कोनी तुचो उजा गाल थाने थापड़ मारेदे, हुनचो बाटे दुसर बले फेरून देस। 40अगर कोनी तुचो उपरे दोष लगान तुचो कुड़ता धरूक चाहाले, तेबे हुनके अन्गोची बले धरूक लाय देस। 41जोन कोनी तुके कोस भर बेकार ने धरून जायदे, तेबे हुनचो संगे दुय कोस जाते जा। 42जोन कोनी तुचो ले मांगो, हुनके देस, आउर जोन तुचो ले उदार धरूक चाहाओ हुनचो ले मुंह नी मोड़।
43“तुमी सुनुन चुकलासास कि मूसा चो नियम ने बोला जाऊन रली, ‘आपलो अड़स-पड़स चो लोग ले मया संगावा, आउर आपलो बयरी ले बईर।’” 44मान्तर ऐबे मय तुमचो ले ऐ बलेंसे कि आपलो बयरीमन ले मया संगावा आउर आपलो कन्दरातो बितामन चो काजे पारथना करा, 45जेचो ले तुमी आपलो सरग चो बुआ चो पिलामन ठेबा से कसनबल्लोने हुन अच्छा आउर खराप दुनो थाने आपलो बेर उदाऊ आय, आउर धरमी आउर अधरमी दुनो उपरे बरसा घसराऊ आय। 46कसनबल्लोने अगर तुमी आपलो मया संगातो बितामन ची संगे मया संगाआ से, तेबे तुमचो काजे काय फल होयदे? काय कर धरू बिता बले असने नी करू आत?
47“अगर तुमी मात्र आपलो भाईमन ची के जुहार करा, तेबे कोन सा बड़े काम करेसास? काय दुसर जाति बले असन नी करोत? 48ऐईकाजे जरूरी आय कि तुमी सिद्ध बना, जसन तुमचो सरग चो बुआ सिद्ध आय।”
Halbi Bible by The Love Fellowship is licensed under Creative Commons Attribution-ShareAlike 4.0 License.